Hatu maeno apate'niya gemae 5 - The Keyagana NT and 25 OT books

Moseseʼe Eloniʼeʼmo uʼana Isipi kini vekamo ageʼnaʼa gemae

¹ Henagaʼamo Moseseʼe Eloniʼeʼmo Isipi kini vekalegamo uʼanaeʼmo, Ala kava neʼmo Isaleli vayaʼmogi Gotiʼapimoʼmo kagaefeʼmo hunoʼaeʼmo, Vayaʼnimo apatalegeʼa kaʼme kotegamo uʼa nagiʼnilefeʼmo alopa yagita huteʼa nagaetefeʼmo mono hiyo, huno huʼniye, huʼana ha paiʼnaʼae.

² Feloʼa hunoʼaeʼmo, Ala kava neʼmo ina laʼmo maiʼninageʼnaeʼmo nagaemo geʼamo afiteʼna Isaleli vayaʼmo apatalesugeʼa ugae. Nagaemo Ala kava neʼmo oʼageʼnovaʼmofeʼmo afaʼa apatalesugeʼa oʼugae, huno hana paiʼnigeʼanaeʼmo

³ Himulu nofi vayaʼmogi Gotiʼapimoʼmo laʼagaetegamo afole aiʼniye. Kahaoke hovanagi, afaʼa latalegeta kaʼme kotegamo loleʼe magoʼe afinaʼmo uta Ala kava neʼmo Gotitimoʼmo afumo amagita ofalinimo amino. Fiku yanageno alopa kaitaʼmo lamige ati vayaʼmo alino apatesigeʼa eʼa naipeletiʼmo laige hugae, huʼana ha paiʼnaʼae.

⁴ Isipi kini vekamoʼmo Moseseʼe Eloniʼefeʼmo hunoʼaeʼmo, na kava higetanaeʼmo aliʼyaʼnimo neʼaliya vayaʼmo ataleʼa visaya agufa gemo nehaʼae. Lanakaemo malage hutana muki Isaleli vayaʼaifeʼmo utapa aliʼyakeʼmo aliyo, hutana hapa paiʼao, huno hana paiʼniye.

⁵ Afiʼao, huno, Hemenimo vayatanimo asole vayaʼmo maiʼnagetanaeʼmo aliʼyatetiʼmo alitana apatalesaʼageʼa afaʼa maisayafeʼmo nehaʼae, huno hana paiʼniye.

⁶ Inagi ani afinaʼmo Feloʼa aliʼyaʼamo neʼaliya Isipi vayaʼe Isaleli vayapatiʼmo yagaiʼa neʼapataya vayaʼefeʼmo hapa painoʼaeʼmo,

⁷ Lapakaemo vaiʼniya kahauletiʼmo noʼmo kisaya yafaʼmo alo hisayafeʼmo magoʼe hutapa alinitutapa oʼapamiyo. Apakaiʼapigeʼmo uʼa kahaumo aliniʼa egae.

⁸ Aliteʼapaeʼmo hogoteta na magiʼamo alo hiyo, huta hapa paiʼnisupi ani agufaʼageʼmo alo hiyo, huta hapa paiyo. Mago avalelita emitetapa alo osiyo. Afaʼageʼmo neʼmaiya vayaʼmo maiʼnayaʼmofeʼmo latalegeta uta afumo amagita Gotitimoʼmo ofalinimo amigune, huʼa alopa gefatiʼmo huʼnae.

⁹ Magoʼe huʼa aliʼyaʼmo aliteʼa aigofe gemo afisaya kanaʼapimo ohaneno, huno hapa paiʼniye.

¹⁰ Inagi Felo aliʼyaʼaleʼmo yagaiʼnaya vayaʼe Isaleli vayapatiʼmo vayaʼaleʼmo yagaiʼa apateʼnaya vayaʼeʼmo uʼa Isaleli vayaʼaifeʼmo, Feloʼa, kahaumo magoʼe hutapa alinitetapa oʼapamiyo, huno huʼniye, huʼa hapa paiʼnae.

¹¹ Ina kava hutapa lapakaitapimo uteta hutapa kahaumo kahauya hutapa alinita etapa noʼmo kisaya yafaʼmo hogotetapa alo huʼnaya agufa kavaʼmo hutapa alo hiyo. Ani yafaʼmo alo nehaya agufamo kava hutapa alo hiyo, huno huʼniye, huʼa hapa paiʼnae.

¹² Inagi kahaumo aliʼa anupa hisayafeʼmo muki Isaleli vayaʼmogimo Isipi haopalegamo uʼeʼa huʼa kahauya huʼa aliʼnae.

¹³ Isipi vayaʼmo yagaiʼa neʼapataya vayaʼmogimo malagene, huʼa huteʼa kahaumo alinita eta lapamiʼnona afinaʼmo alopa aliʼyaʼmo aliʼnaya kava hutapa aliyo, huʼa hapa paiʼnae.

¹⁴ Felo aliʼyateʼmo Isaleli vayapatiʼmo lekana paiʼa apateʼnageʼa yagaiʼa neʼapataya vayaʼaitegamo uʼapaeʼmo, na kava higetapaeʼmo lapakaemo hogoteta alo nehaya kava hutapa alo osuʼnae, huʼa huteʼa apamagiʼnae.

¹⁵ Isaleli vayapatiʼmo yagaiʼa apateʼnaya vayaʼmogimo kini vekalegamo uʼapaeʼmo, Na kava higekaeʼmo lagaetegamo ani agufa kavaʼmo nehane.

¹⁶ Apakaemo kahaumo aliniʼeʼa olamiʼnayaʼmonanafa noʼmo kisaya yafaʼmo malage hutapa alo hiyo, huʼa huteʼa aliʼyakamo neʼaluna vayaʼmo lamagiʼnae. Lagaemo vaiʼmo alisuna kavaʼmo osuʼnifa vayakamogigeʼmo vaiʼmo alisaya kavaʼmo huʼniye, huʼa ha paiʼnagenoʼaeʼmo

¹⁷ Kini vekamoʼmo hunoʼaeʼmo, Lusi kava huno alagaʼmo nelahapaeya vayaʼmae, Alaga lahapaeʼniyaʼmofeʼmo afaʼa latalegeta uta Ala kava netimo afumo amagita ofalinimo amino, hutapa nehae.

¹⁸ Malage hutapa aliʼyaʼmo uta aliyo. Kahaumo alinita eta olapamigunaʼmonanafa alo hiyo, huta lapa paiʼnisuna kavaʼmo hutapa alo hiyo, huno hapa paiʼniye.

¹⁹ Isaleli vayapatiʼmo yagaiʼa neʼapataya vayaʼmogimo kini vekamoʼmo aiseʼamo alo osisaya agufa gemo huʼnigeʼa afiteʼapaeʼmo, hemenimo magoʼe huta alopa kana yaʼmo lagaeteʼmo afole aiʼniye, huʼa huʼnae.

²⁰ Inagi apakaemo kini vekamo ataleʼa uʼa Moseseʼe Eloniʼeʼmo fotu huʼnae. Apakaemo esayaʼaeʼmo anakaemo apakava maiʼnaʼae.

²¹ Yagaiʼa apateʼnaya vayaʼmogimo hana paiʼapaeʼmo, Ala kava neʼmoʼa kavatanimo lanaketenoʼaeʼmo alino fako huno lanategaiye. Lanakaemo huʼnaʼa kavatetiʼmo kini vekamoʼe muki Isipi vayaʼmogiʼeʼmo lagaefeʼmo ohapauʼnigeʼa magoʼe huʼa apaini huʼa lateteʼa kamitimo lamagisayafeʼmo yagaiʼa maiʼnae, huʼa hana paiʼnae.

Moseseʼa aipamoʼmo kana huʼnigeno Gotifeʼmo nunumuʼmo huʼniya gemae

²² Moseseʼa halate Ala kava netegamo uno ge hunoʼaeʼmo, Ala kava nene, huʼna, Na kava higekaeʼmo vayakamo hanageke yaʼmo apamiʼnane. Kagaemo na kava higeka Felotegamo visuvafeʼmo alika nateʼnane.

²³ Nagaemo uʼna kagikalefeʼmo aepa faiʼna kini vekaeʼmo ha paiʼnova afinatetiʼmo kini vekamoʼmo vayakalegamo hosu kavaʼmo huʼniye. Kagaemo vayakamo aiseʼamo hapa maeka hatu maeka oʼapateʼnane, huno nunumuʼmo huʼniye.