Hatu maeno apate'niya gemae 40 - The Keyagana NT and 25 OT books

Isaleli vayaʼmogi seli noʼmo aliʼa he tiʼa ateteʼa Gotiʼa agaiʼalefeʼmo aliʼa aote maleʼnaya gemae

¹ Ala kava neʼmoʼa Mosesefeʼmo ha painoʼaeʼmo,

² Napa vani kaimo napa vani afinaʼmo seli mono noʼnimo alita he titapa ateyo

³ Lapakaemo kotalake kesifiʼmo naya loleʼa keʼaepa gemo haneʼniya kesimo seli nopiʼmo alinita haitapa maletetapa alopa latapa kenaletiʼmo folagapiʼmo aetapa asai malesageno loleʼmo anagaʼe afelagaʼeʼmo hanegaiye.

⁴ Hiʼyalamuʼmo alinita uta haitapa afepiʼmo maletetapa lamumo alinita etapa atamo kani aetapa kaetetapa hiʼyalamuteʼmo maleyo.

⁵ Alu hiʼyalamuʼmo goli yafatetiʼmo alo hu maleʼnaya hiʼyalamuteʼmo alagepa atumo neʼaiya laʼnefamo maleʼneʼa atamo nekaya hiʼyalamuʼmo alinita haitapa kotalake kesimo hanetesigeno folagapiʼmo kenamoʼmo aeno akaniʼniya haopaleʼmo malagamo maleyo. Mono noʼmo kipateʼmo kenaletiʼmo aeta asaitapa aeta akani maleyo.

⁶ Kumatega seli noʼmo kegiʼya kipateʼmo ofalinimo maleʼneʼa atamo kaesaya hiʼyalamuʼmo maleyo.

⁷ Aniʼmo falesaya yuvapamo seli mono noʼmo hanete ofalini hiʼyalamuʼmo hanete hutesigeno folagapiʼmo maletetapa aniʼmo laki maleyo.

⁸ Seli kegiʼyamo hutapa vego huʼa maletetapa kegiʼyamo kipateʼmo kenaletiʼmo aeta asaitapa aeta akani maleyo.

⁹ Uvelimo alinitetapa seli noteʼmo falege muki ani nopiʼmo haneʼniya yateʼmo falege hutetapa alita aoteʼmo maleyo.

¹⁰ Ofalini yaʼmo maleʼneʼa atamo nekaya hiʼyalamuteʼmo uvelimo falege aliʼyaʼmo neʼaliya yateʼmo falege hutetapa ani hiʼyalamuʼmo alitapa aoteʼmo maleyo. Ani hiʼyalamuʼmo magoʼe huno aoteʼmo hanegaiye.

¹¹ Lapakaemo aniʼmo falesaya yuvapaleʼe hiʼyalamuʼmo aiyaleʼeʼmo uvelimo falesageno aoteʼmo hanegaiye.

¹² Kagaemo uka Eloniʼagi mafaʼne anagaʼagi huka apavalelika eka seli mono noʼmo kipateʼmo aniʼmo faleka apato.

¹³ Kagaemo Eloniʼmo aote kukenamo vaika ateteka uvelimo lakika ateteka alika aote ategenoʼa nagaetefeʼmo mono huno apatesiya aote vekamo maino.

¹⁴ Kagaemo mafaʼne anagaʼamo apavalelika eka mono huʼa apatesaya kukenamo alika vaika apato.

¹⁵ Kagaemo afoʼapimoʼmo uvelimo lakika ateʼnana kava huka lakika apategeʼa nagaetefeʼmo mono huʼa apatesaya aliʼyaʼmo aliyo. Lakika apatetegeʼapaeʼmo apakaiʼapiʼe aliʼa apatesaya mafaʼne anagaʼapimogiʼeʼmo mono huʼa apatesaya aliʼyaʼmo aligae, huno ha paiʼniye.

¹⁶ Moseseʼa Ala kava neʼmoʼa muki ani ha paiʼniya kavaʼageʼmo akame huno huʼniye.

¹⁷ Napa tu kafugafiʼmo napa vani kaimo napa vani afinaʼmo Isipi kotegatiʼmo ateleʼa eʼnaya afinaʼmo seli mono noʼmo aliʼa he tiʼa ateʼnae.

¹⁸ Apakaemo seli mono noʼmo ina kava huʼa aliʼa he tiʼa ateʼnae. Yosamo aliʼa faiʼa ateteʼa aepaʼaleʼmogi atupaʼaleʼmogi huʼa muki yosaletiʼmo maleʼa ki maleʼnae.

¹⁹ Apakaemo ani mono noteʼmo kenaletiʼmo aiʼa ati kae maleʼneʼa afu agufaletiʼmo magoʼe huʼa akalo huʼa aiʼa ati kae maleʼnae. Gotiʼa Mosesefeʼmo ha paiʼniya agufa kavaʼageʼmo akame huʼa huʼnae.

²⁰ Inagi apakaemo Gotiʼa keʼaepa geʼamo lole yafatalateʼmo avoʼmo kae maleʼniya yafatalaʼmo aliʼa kotalake kesifiʼmo maleʼnae. Lole yosalaʼmo aliʼa aluga alugaʼamo haneʼniya katalapiʼmo ateteʼa aliʼa kofiliʼa visaya kavaʼmo hu maleʼnae. Ani kesimo avayaleʼmo Goli yafatetiʼmo alo huʼnaya avayamo aliʼa agotofuleʼmo akalo huʼa maleʼnae. Ani avayaleʼmo kolaʼmo aiʼa fuli fuli huʼnagenoʼaeʼmo Gotiʼa hau huno apateʼniye.

²¹ Apakaemo ani kesimo aliniʼa uʼa haiʼa maleteʼa folagapiʼmo kenaletiʼmo aeʼa asaiʼa aeʼa hanagi maleʼnageno anagaʼe afelagaʼeʼmo loleʼmo haneʼniye. Ala kava neʼmoʼa Mosesefeʼmo ha paiʼniya agufa kavaʼageʼmo huʼnae.

²² Apakaemo hiʼyalamuʼmo aliniʼa uʼa haiʼa afelaga mono nopiʼmo lamaga haopaleʼmo maleʼnae.

²³ Peleti mayamo alini eʼa ani hiʼyalamuteʼmo Ala kava neʼmo aulagaleʼmo maleʼnae. Ala kava neʼmoʼa Mosesefeʼmo ha paiʼniya agufa kavaʼageʼmo huʼnae.

²⁴ Apakaemo afelaga mono nopiʼmo lamumo alini uʼa haiʼa hoga haopaleʼmo maleʼnae.

²⁵ Ala kava neʼmo aulagaleʼmo lamufiʼmo kani aeʼa kaeteʼa maleʼnae.

²⁶ Goli yafatetiʼmo alo hu maleʼnaya hiʼyalamuʼmo afelaga mono nopiʼmo kenamo asaiʼa maleʼnaya haopaleʼmo maleteʼa

²⁷ ani hiʼyalamuteʼmo alagepa atumo neʼaiya laʼnefamo kaeʼnae. Ala kava neʼmoʼa Mosesefeʼmo ha paiʼniya agufa kavaʼageʼmo huʼnae.

²⁸ Mono noʼmo kipateʼmo kenaletiʼmo aeʼa asaiʼa aeʼa akani maleʼnae.

²⁹ Ofalini yaʼmo maleʼneʼa nekaya hiʼyalamuʼmo kumategamo seli kegiʼyamo kipateʼmo maleʼnageno Moseseʼa viti ofaliniʼe afu ofaliniʼeʼmo ani hiʼyalamuteʼmo maleʼneno atamo kaeʼniye. Ala kava neʼmoʼa agaefeʼmo ha paiʼniya agufa kavaʼageʼmo huʼniye.

³⁰ Aniʼmo falesaya yuvapamo seli mono noʼmo hanete ofalini hiʼyalamuʼmo hanete hutegeno folagapiʼmo maleteʼa aniʼmo falesaya aniʼmo lakiʼa maleʼnae.

³¹ Ani anitetiʼmo Moseseʼagi Eloniʼagi Eloni mafaʼne anagaʼagi huʼa apaiyaʼe apayaʼeʼmo sese huʼnae.

³² Seli mono nopiʼmo uʼa haisayafeʼmo apaiyaʼe apayaʼeʼmo sese huteʼapaekeʼmo uʼa haige ofalini yaʼmo maleʼneʼa atamo nekaya hiʼyalamuʼmo haopaleʼmo esayafeʼmo ani kavaʼmo huʼa apaiyaʼe apayaʼeʼmo sese huteʼapaekeʼmo ege huʼnae. Ala kava neʼmoʼa Mosesefeʼmo ha paiʼniya agufa kavaʼageʼmo huʼnae.

³³ Apakaemo seli kegiʼyamo huʼa vego hu maleteʼa ani kegiʼyamo kipateʼmo kenaletiʼmo aeʼa asaiʼa aeʼa akani maleʼnae. Moseseʼagi ani aliʼyaʼmo aliʼnaya vayanagi huʼa alagi aliʼa hano huʼnae.

Hiyaʼmo emineno seli mono noteʼmo haneʼniya gemae

³⁴ Aliʼyaʼamo alagi alino hano huʼnigenoʼaeʼmo hiyaʼmo emineno seli mono noteʼmo kino ati kaeʼnigeno Ala kava neʼmo ha le konali yaʼamo ani nopiʼmo havai teʼniye.

³⁵ Hiyaʼmoʼa noteʼmo haneʼnigeno Ala kava neʼmo ha le konali yaʼamo mono nopiʼmo havai teʼniyaʼmofeʼmo Moseseʼa uno ohaiʼniye.

³⁶ Ani hiyaʼmo seli mono notetiʼmo ataleno uno haiʼnigeʼapaeʼmo Isaleli vayaʼmo uʼnae.

³⁷ Uʼnayaʼmonanafa hiyaʼmo seli mono notetiʼmo ataleno uno ohaiʼnigeʼapaeʼmo afaʼa maiʼnae. Afaʼa agava maiʼnagenoʼaeʼmo hiyaʼmo uno haiʼnigeʼapaeʼmo uʼnae.

³⁸ Ala kava neʼmo hiyaʼamoʼmo felugaʼamo mono noʼamo anagamo haneʼnigenoʼaeʼmo haniʼilagaʼamo atamo kani aegekana huno aeno ha leʼnigeʼa Isaleli vayaʼmogimo visaya haopalega kaʼmo ageʼnae.