Hatu maeno apate'niya gemae 4 - The Keyagana NT and 25 OT books

Gotiʼa Moseseʼmo lokiya himamuʼamo amiʼnigeno noʼagaya agufa aune kavaʼmo huʼniya gemae

¹ Moseseʼa geʼaleʼmo aeno atagaina huno ha paiʼniye. Isaleli vayaʼmogimo hisuva geeʼmo, alagi lama gemo nehane, huʼa osuʼa geʼnimo oʼafisageʼnaeʼmo na agufa kavaʼmo hisuve. Apakaemo huʼapaeʼmo, kagaetegamo Ala kava neʼmo afole oʼaiʼniye, huʼa hisageʼnaeʼmo nagaemo na agufa gemo huʼna hapa paiguve, huno afi geʼnigenoʼaeʼmo

² Ala kava neʼmoʼa, kayapiʼmo na agufa yaʼmo aliʼnane, huno afi geʼnigeno, hayopa kayoʼmo aliʼnove, huno ha paiʼnigenoʼaeʼmo

³ ani kayoʼmo mopafiʼmo yaga auvo, huno ha paiʼnigeno Moseseʼa hayopa kayoʼamo mopafiʼmo yaga auʼnigenoʼaeʼmo nagaloʼyavemo alino hamaleʼnigeno Moseseʼa agetenoʼaeʼmo aune heʼniye.

⁴ Ala kava neʼmoʼa Mosesefeʼmo, kayatetiʼmo aigoʼyaleʼmo atafauvo, huno ha paiʼnigeno Moseseʼa nagaloʼyavemo aigoʼyaleʼmo atafauʼnigenoʼaeʼmo ani nagaloʼyavemoʼmo halate hayopa kayoʼmo alino hamaleʼniye.

⁵ Ala kava neʼmoʼa ha painoʼaeʼmo, Isaleli vayaʼmogi kagaefeʼmo huʼapaeʼmo, Laginago vayaʼmo Emalehamu Gotiʼamoʼmogi Aisaki Gotiʼamoʼmogi Yekopu Gotiʼamoʼmogi huno Gotiʼapimoʼmo agaetegamo afole aiʼnigeka lama gemo nehane, huʼa apakesamo afisayafeʼmo apakaetegamo visana afinaʼmo ani agufa kavaʼmo huvo, huno ha paitenoʼaeʼmo

⁶ Ala kava neʼmoʼa magoʼe gemo huno ha painoʼaeʼmo, Kagaemo kayaʼmo sioti kukafiʼmo vaiyo, huno huʼnigeno ayaʼmo sioti kupiʼmo vaiteno he fino ageʼniyana ayaʼmo lepolosi yaʼmo hauteno yaveyaveʼageʼmo huʼnigeno ageʼniye.

⁷ Ala kava neʼmoʼa ha painoʼaeʼmo, kagaemo halate kayaʼmo sioti kukafiʼmo vaiyo, huno huʼnigeno ayaʼmo ani kavaʼmo huno vaiteno he fino ageʼniyana mago alu ayaʼmo afaʼa haneʼniya ayakana huʼnigeno ageʼniye.

⁸ Ala kava neʼmoʼa, gekaeʼmo lama gemo nehane, huʼa osuge hogoteʼa noʼagaya agufa kaune kavaʼmo hisanageʼapaeʼmo apakesamo afiʼa fatago osuge hisagekaeʼmo apakesamo afiʼa fatago hisayafeʼmo napa tu afinaʼmo noʼagaya agufa kaune kavaʼmo huvo.

⁹ Ani lole noʼagaya agufa kaune kavaʼmo ageteʼapaeʼmo apakesamo afiʼa fatago osisagekaeʼmo mago alopa anipatiʼmo he fika mopafiʼmo lakigeno aniʼmoʼa kolaʼmo alino hamaleno, huno ha paiʼniye.

¹⁰ Moseseʼa Ala kava nefeʼmo hunoʼaeʼmo, O Ala kava nene, huʼna, nagaemo hogoteʼna asole vayaʼai apaulagaleʼmo alagepa huʼna ge nosuva vekamo maiʼnovaʼmonanafa hemenimo kagaeʼeʼmo magokepi gege nehuʼaʼmofeʼmo nagaemo ge hisuva agufa vekamo oʼmaiʼnove. Navayamoʼmo lusi kava huno kana nehiyanageʼna alagepa huʼna ge osuguve, huno huʼnigenoʼaeʼmo

¹¹ Ala kava neʼmoʼa ha painoʼaeʼmo, Ina laʼmo vayaʼmogi apavayamo alo huno apateʼniye. Ina laʼmo vayaʼmogi apavayamo alino akanige apakesamo alino akanige apaulagamo alo huge apaulagamo alino fali kaege nehiye. Nagaemo Ala kava neʼmonageʼmo muki ani kavaʼmo nehuve.

¹² Ani kavaʼmo nehuvaʼmofeʼmo hemenimo afa uvo. Nagaemo hisana gemo kaha maeʼna kaha paisugeka hugane, huno ha paiʼniye.

¹³ O Ala kava nene, huno, kagaemo mago alu vekageʼmo alika ategeno vino, huno ha paiʼnigenoʼaeʼmo

¹⁴ Ala kava neʼmoʼa Mosesefeʼmo aipamo leʼnigeno, Nepukamoʼmo Eloniʼmo Livai nofi vekamo maiʼniye. Nagaemo ageʼnovana alagepa huno gemo nehiya vekamo maiʼniye. Agaemo hemenimo kagaeʼeʼmo fotu hisaʼafeʼmo neʼe. Agaemo eno kagetenoʼaeʼmo aipafilagamo amogaga aigiye.

¹⁵ Kagaemo muki geʼamo agaefeʼmo afaʼa ha paisanageno hugiye. Nagaemo lanakae lanavayaleʼmo maiʼneʼna lahana maeʼnisugetana lanakaemo lanavayafatiʼmo alagepa gemo hugaʼae. Nagaemo hisaʼa kavaʼmo aliʼna lanaya malegauve.

¹⁶ Eloniʼmo kagae kavayaʼmo alino muki vayaʼaifeʼmo hapa paigiye. Kagaemo agaeteʼmo Gotigagana huka maiʼneka ha paisanageno aeno hakalo huno hapa paigiye.

¹⁷ Kagaemo mani hayopa kayokamo aliteka uvo. Henagaʼamo mani hayopa kayotetiʼmo noʼagaya agufa kaune kavaʼmo hugane.

Moseseʼa halate Isipi kotegamo uʼniya gemae

¹⁸ Inagi Moseseʼa ayemoʼamoʼmo Yetalotegamo atagineno uno ha painoʼaeʼmo, kahaoke hovanagi, afaʼa nategeʼna Isipi kotegamo halate uʼna konagaʼnimogimo ago faliʼnisafi afaʼa maiʼnisafigeʼna apakegesuve, huno huʼnigenoʼaeʼmo Yetaloʼa, he, kanalenagi kaipamoʼmo falu huʼninageka afa uvo, huno ha paiʼniye.

¹⁹ Moseseʼa Mitiyani kotegamo maiʼnigenoʼaeʼmo Gotiʼa, muki kamagisayafeʼmo huʼnaya vayaʼmo ago faliʼnayanagi Isipi kotegamo halate uvo, huno ha paiʼniye.

²⁰ Inagi Mosese aʼagi lole mafaʼneʼalanagi huno mago nokileʼmo apavaleno faino apateʼniye. Moseseʼa Goti kayoʼamo alitegeʼa Isipi kotegamo uʼnae.

²¹ Ala kava neʼmoʼa Mosesefeʼmo ha painoʼaeʼmo, Isipi kotegamo uka avaʼyi hukaeʼmo kini vekamo aulagaleʼmo muki noʼageya agufa kaune kavaʼmo huvo. Kagaemo ani kavaʼmo hisana lokiyakamo ago kamiʼnove. Kini vekamoʼmo ani kavaʼmo agegaiyaʼmonanafa nagaemo aipa agesamo aliʼna akani malesugeno Isaleli vayaʼmo afaʼa apatalesigeʼa oʼugae.

²² Ani afinaʼmo kagaemo kini vekamo Felofeʼmo, Ala kava neʼmoʼa, Isaleli vayaʼaifeʼmo yege mafaʼneʼnigana huʼa maiʼnae, huno naha paiʼniye, huka ha paiyo.

²³ Maiʼnayaʼmofeʼmo afaʼa apatalegeʼa uʼa nagaetefeʼmo mono hiyo. Kagaemo apatalesanageʼa oʼvisayaʼmoʼmo nagaemo yege mafaʼnekamo amagisugeno faligiye, huno naha paiʼniye, huka ha paiyo, huno ha paiʼniye.

²⁴ Moseseʼa kateʼmo neʼvigeno Ala kava neʼmoʼmo vayaʼmo nehavaya yateʼmo fotu huteno amagino falino atesiyafeʼmo huʼniye.

²⁵ Sipolaʼa mago ave neʼneya yafaʼmo alino ve mafaʼneʼamo agufamo lagauteno Mosese aiyaleʼmo yaga auʼniye. Agaemo hunoʼaeʼmo, Kagaemo kola anauʼnimogae, huno huʼniye.

²⁶ Mafaʼneʼamo agufamo lagauʼniyaʼmofeʼmo Ala kava neʼmoʼa Moseseʼmo oʼamagino afaʼa ateʼniye. Ateʼnigeno Sipolaʼa mafaʼneʼamo agufamo lagauʼniyaʼmofeʼmo Mosesefeʼmo hunoʼaeʼmo, Kola anauʼnimogae, huno huʼniye.

²⁷ Ala kava neʼmoʼa Elonifeʼmo hunoʼaeʼmo, Kagaemo kahaufilagamo uka Moseseʼeʼmo fotu huvo, huno ha paiʼnigeno Eloniʼa uʼnigeʼana Moseseʼeʼmo Goti aote aveleʼmo fotu huteʼana Eloniʼa Moseseʼmo haeno neʼniye.

²⁸ Moseseʼa Elonifeʼmo hunoʼaeʼmo, Ala kava neʼmoʼa alino kateʼnigeka eʼnane, huno ha paige Ala kava neʼmo muki ha paiʼniya gemo ha paige muki alagena kavaʼmo huvo, huno ha paiʼniya kavafeʼmo ha paige huʼniye.

²⁹ Inagi Moseseʼe Eloniʼeʼmo uʼana Isaleli vayaʼai vayatama vayaʼmo aliʼana anupa huʼana apateʼnaʼae.

³⁰ Eloniʼa muki geʼamo Ala kava neʼmoʼa Mosesefeʼmo ha paiʼniya geʼamo hapa paiʼniye. Inagi agaemo muki vayaʼai apaulagaleʼmo muki alagena kavaʼmo huʼniye.

³¹ Huʼnigeʼa apakesamo afiʼa fatago huʼnae. Ala kava neʼmoʼa vayaʼamo kana yaʼmo aliʼnageno agetenoʼaeʼmo hapa maesiyafeʼmo emineʼniya kavafeʼmo ava gemo afiteʼapaeʼmo ape huʼa maiʼneʼa mono huʼnae.