Hatu maeno apate'niya gemae 34 - The Keyagana NT and 25 OT books

Ala kava neʼmoʼa Moseseʼmo halate teniʼa keʼaepa gemo lole yafatalateʼmo avoʼmo kaeno amiʼniya gemae

¹ Ala kava neʼmoʼa Mosesefeʼmo ina ge huno ha paiʼniye. Kagaemo lole latapa yafatalaʼmo hogote yafatalakana huka atalavaika latapa huvo. Kagaemo hogoteka yaga auka ataleʼnanageno aino lo aeʼniya yafatalateʼmo avoʼmo kaeʼnova kava huʼna halate saufa yafatalateʼmo avoʼmo kaegauve.

² Netepiʼmo alo huteka Sainai avefiʼmo eka haikeka aveʼafiʼmo naulagaleʼmo he tika maiyo.

³ Mago vekamo kagaeʼeʼmo magokepi lokaeno eno haino oʼmeno. Muki aveʼafiʼmo vayaʼmo eʼa hai eʼa oʼmaigae. Sipisipimofi pulumakamofi huʼa eʼa avemo haopaletiʼmo kahaumo oʼnegae.

⁴ Inagi Moseseʼa hogote yafatalakana huno lole yafatalaʼmo atalavaino latapa huʼniye. Kotilamiyapiʼmo Moseseʼa he tino Ala kava neʼmoʼa haikeno, huno ha paiʼniya gemo akame huno lole yafatalaʼmo alinino Sainai avefiʼmo uno haiʼniye.

⁵ Haiʼnigenoʼaeʼmo Ala kava neʼmo hiyapiʼmo emineno Moseseʼeʼmo avefiʼmo he tino maiʼnenoʼaeʼmo, Ala kava neʼmo maiʼnove, huno aeno hakalo huʼniye.

⁶ Ala kava neʼmo Mosese aulagaleʼmo neʼunoʼaeʼmo, Nagaemo Ala kava neʼmo Gotiʼnamae nagaemo Ala kava neʼmo Gotiʼnamae. Nagaemo nahau nayamopafiʼmo nahauge fikumo hapa maeʼna apamige malage huʼna naipamo leʼna oʼapatege lusi kava huʼna nahau huʼna apatege geʼnimo akame huge huʼna neʼmauve.

⁷ Nagaemo nahau huʼna neʼapatova kavateʼmo yagaiʼnovanageʼna tauseni tauseniʼa vayaʼaifeʼmo nahau huʼna apategauve. Nagaemo himuʼnamu kavanagi keʼaepa geʼnimo amagiʼa neʼatalaya kavanagi hosu kavaʼapigi huʼna aliʼna neʼatalove. Neʼatalovaʼmonanafa vaiʼapimo haneʼniya vayaʼmo afaʼa apakegeʼna oʼapategauve. Nagaemo afoʼapimogimo huʼnaya hosu kavaʼapilefeʼmo mafaʼne anagaʼapigi lotoʼapimogiʼe apakinago vayaʼenagi huʼna kayoʼmo apamiguve, huno ha paiʼniye.

⁸ Ha paiʼnigenoʼaeʼmo Moseseʼa malage huno mopafiʼmo ape huno maiʼneno monoʼmo huʼniye.

⁹ Moseseʼa hunoʼaeʼmo, O Ala kava nene, huʼna, nagaemo kaulagaleʼmo fikumo naha maeka neʼnamina kavakamo ago ageʼnova vekamo maiʼnisuvaʼmoʼmo lagaeʼeʼmo magokepi lokaeka uvo, huʼna ge nehuve. Lagaemo gemo noʼafuna vayaʼmo maiʼnonaʼmonanafa hosu kavatilefeʼmo afaʼa ateyo, huka huteka mafaʼneʼapimogimo afoʼapimogi yaʼmo neʼaliya kava huka lagaemo vayakamo maisunafeʼmo afaʼa lavalo, huno ha paiʼniye.

Gotiʼa halate kotalakemo hu maleʼniya gemae

¹⁰ Ala kava neʼmoʼa hunoʼaeʼmo, Afiyo, huno, lapakaeʼeʼmo magokepi kotalakemo hu malegauve. Nagaemo muki Isaleli vayakamogi apaulagaleʼmo ageʼa hapau aisaya agufa kavaʼmo hisugeʼapaeʼmo muki haopalegamo maiʼnaya vayaʼmogimo Ala kava neʼmoʼna aliʼyaʼnimo agegae. Nagaemo noʼagaya agufa naune kavaʼmo muki haopalegamo maiʼnaya mopafiʼmo muki nofi vayapatiʼmo afole oʼaiʼniya agufa naune kavaʼmo huguve. Lapa maesuvafeʼmo ani kavaʼmo hisugeʼa ageʼa hapau aigae.

¹¹ Hemenimo akame hiyo, huʼna hisuva gemo alagi akame hiyo. Afiyo, huʼna, Emo nofi vayanagi Kenani nofi vayanagi Hiti nofi vayanagi Pelesi nofi vayanagi Hivi nofi vayanagi Yemusi nofi vayanagi huʼna lapakaemo neʼvisageʼnaeʼmo aliʼna hapa faiʼna apatalegauve.

¹² Ehetapiye, huʼna, fiku yanagetapa visaya kotegamo maiʼnisaya vayaʼeʼmo magokepi kotalakemo hu malesageno aneʼaifiʼmo hegekana huno lapatafaugiyanagi.

¹³ Haʼao, lapakaemo ofalinimo nehaya hiʼyalamuʼapimo alitapa halagape vaitapa atalege posi yosagana huʼa yafaʼmo faiʼa ateʼneʼa mono nehaya yafaʼmo amagitapa nakupaetapa atalege yosaletiʼmo alo huʼnaya auneʼamo naipeletiʼmo vasagalitapa atalege hiyo.

¹⁴ Ala kava neʼmoʼnamo alu gotigifeʼmo naipa kafamo nehapaovaʼmofeʼmo alu gotigitefeʼmo monoʼmo osiyo. Nagaiʼnilefekeʼmo monoʼmo hiyo.

¹⁵ Fiku yanagetapa ani koteʼmo maiʼnaya vayaʼeʼmo magokepiʼmo kotalakemo hu malegayana anauʼapimogimo apataleʼa kumai heʼa alu veleʼmo ugekana huʼa aigofe gotigitefeʼmo monoʼmo huteʼapaeʼmo ofalinimo apamiteʼa lapakaefeʼmo eyo, huʼa hisagetapaeʼmo fiku yanagetapa uta ani ofalini yaʼmo negae.

¹⁶ Fiku yanageʼa neya mafaʼne anagatapimogimo ani vayaʼmogi aʼmafaʼnemo alisageʼa ani aʼmafaʼne anagaʼapimogimo anauʼapimogimo apataleʼa kumai heʼa ugekana huʼa aigofe gotigitefeʼmo monoʼmo huteʼa neya mafaʼnetapimo apavaleliʼa ugae.

¹⁷ Lapakaemo monoʼmo hisayafeʼmo mago yaʼmo auneʼmo alo osiyo.

¹⁸ Aeno apafu noleya peleti mayamo neʼnaya hopa afina kavakeʼmo hiyo. Seveniʼa felugamo maitetapa ani felugamo negae. Negae, huʼna lapa paiʼnova kavaʼmo akame hutapa Amipi kaileʼmo Isipi kotegatiʼmo ataletapa eʼnayaʼmofeʼmo ani kaileʼmo negae.

¹⁹ Muki yege mafaʼne anagatapigi yege pulumakagi yege sipisipigi huʼa nagaiʼni yaʼageʼmo maiʼnae.

²⁰ Maiʼnayaʼmonanafa yege noki afumo amagitapa nagaemo ofalinimo oʼnamisayafeʼmo aimuʼyaleʼmo sipisipi ofaliniletiʼmo miya faitapa afaʼa apateyo. Nokitapimo miya faitapa oʼapatesayana lugoʼapimo alita apalo atigae. Lapakaemo muki yege mafaʼnetapimo miya faita hatu maetapa apateyo. Lapakaemo nagaetegamo afaʼa oʼmetapa ofalinimo namisaya yaʼekeʼmo aliʼnitapa egae.

²¹ Muki sotafatiʼmo sigisiʼa afinaʼmo aliʼyaʼmo aligayaʼmonanafa seveni afinaʼmo maitapa haga leyo. Hoyamo aiʼyu neʼaiya kanaleʼe neʼyaʼmo neʼaliya kanaleʼeʼmo napa seveni afinaʼmo maita haga legae.

²² Viti alagamo afu lesiya afinaʼmo neʼyaʼmo alisaya hopa afina kavaʼeʼmo hiyo. Kafugamo hano hisiya afinaʼmo muki neʼyaʼmo neʼaliya hopa afina kavaʼmo hiyo.

²³ Muki kafugaʼaeʼmo ani loleʼe magoʼe hopa afinaʼmo muki ve anagaʼmo eʼa Ala kava neʼmo Isaleli vayaʼai Gotiʼapimoʼna naulagaleʼmo he tiʼa maigae.

²⁴ Lapakaemo neʼvisageʼnaeʼmo ani koteʼmo maiʼnaya vayaʼmo aliʼna hapa faiʼna apataleteʼna ani mopatapimo magoʼe huʼna aliniʼna uʼneʼna huʼna lapategauve. Lapakaemo muki kafugaʼaeʼmo ani loleʼe magoʼe hopa afinaʼmo utapa Ala kava neʼmo Gotitapimoʼna naulagaleʼmo he titapa maisageʼapaeʼmo ataleʼa uʼnaya vayaʼmogimo mopatapieʼmo hapaʼye osugiye.

²⁵ Lapakaemo afu ofalinimo namisaya afinaʼmo aeno apafu neleya peleti mayamo oʼnamitapa aeno apafu noleya peleti mayageʼmo namiyo. Pasova afinaʼmo sipisipi ofalinimo afaʼa lapakegeʼna lapateʼnova hopa afina ofalinimo oʼnetapa maleʼnisigeno egamo afole oʼaino.

²⁶ Muki kafugaʼaeʼmo hogoteno afu lesiya neʼyaʼmo alinitapa eta nagaemo Ala kava neʼmo Gotitapimoʼna nopiʼmo namiyo. Lapakaemo mememo anaʼaumo kaesaya samofiʼmo ani mememo nu anuʼamo lakitapa okaeyo.

²⁷ Ani gemo avoʼmo kae malo. Ani geletiʼmo Isaleli vayaʼeʼmo kotalakemo hu maleʼnove, huno ha paiʼniye.

²⁸ Moseseʼa Ala kava neʼeʼmo fotiʼa felugaʼe fotiʼa haniʼilagaʼeʼmo avefiʼmo maitenoʼaeʼmo neʼyaʼmo oʼnege aniʼmo oʼnege huno maiʼniye. Agaemo lole latapa yafatalateʼmo kotalake gemo teniʼa keʼaepa gemo avoʼmo kae maleʼniye.

Moseseʼa avefatiʼmo ataleno uno lamiʼniya gemae

²⁹ Moseseʼa avefiʼmo maiʼneno Ala kava neʼeʼmo gege huʼnaʼagenoʼaeʼmo augosafatiʼmo aeno ha leʼniyaʼmonanafa avefatiʼmo ataleno lole latapa yafatalaʼmo alinino uno laminoʼaeʼmo aeno ha leʼniye, huno agaiʼamo oʼageʼniye.

³⁰ Emineʼnigeʼapaeʼmo Eloniʼagi Isaleli vayanagi huʼa ageʼnayana augosafatiʼmo aeno ha leʼnigeʼa ageteʼapaeʼmo Mosese haopaleʼmo esayafeʼmo koli huʼnae.

³¹ Moseseʼa apakaefeʼmo keya aeno ge huʼnigeʼapaeʼmo Eloniʼagi Isaleli vayatama vayanagi huʼa Mosesetegamo eʼnageno Moseseʼa apakaeʼeʼmo gege huʼniye.

³² Henagaʼamo muki Isaleli vayaʼmo Mosese haopaleʼmo eʼnageno Moseseʼa Sainai avefiʼmo muki keʼaepa gemo Ala kava neʼmoʼa ha paiʼniya gemo hapa paiʼniye.

³³ Moseseʼa hapa paitenoʼaeʼmo aise lavolavomo alino augosafiʼmo aino ati kaeno aliʼniye.

³⁴ Aino ati kaeno aliʼniyaʼmonanafa Ala kava neʼeʼmo gege hisaʼafeʼmo unoʼaeʼmo lavolavomo alino ataleʼniye. Kumatega eminenoʼaeʼmo halate aise lavolavoletiʼmo augosafiʼmo aino ati kaeno alitenoʼaeʼmo agaefeʼmo ani kavaʼmo hiyo, huno ha paiʼniya gemo hapa paiʼniye.

³⁵ Isaleli vayaʼmogimo Mosese augosafatiʼmo aeno ha leʼnigeʼa ageʼnayaʼmofeʼmo aino ati kaeno aliʼniye. Aino ati kaeno aliʼnenoʼaeʼmo halate uno Ala kava neʼeʼmo gege hisaʼafeʼmo huʼniya afinaʼmo alino ataleteno Ala kava netegamo uʼniye.