Hatu maeno apate'niya gemae 33 - The Keyagana NT and 25 OT booksAla kava neʼmoʼa Isaleli vayaʼaifeʼmo, Sainai aveletiʼmo ataletapa viyo, huno hapa paiʼniya gemae 1 Ala kava neʼmoʼa Mosesefeʼmo ina ge huno ha paiʼniye. Kagaikaʼe Isipi kotegatiʼmo apavalelika eʼnana vayaʼeʼmo mani kotetiʼmo ataletapa nagaemo Emalehamufenagi Aisakifenagi Yekopufenagi huʼna ani mopamo lapakaeʼe lapakinago vayaʼeʼmo hakiʼna lapamiguve, huʼna nagoʼyamo ataleteʼna hapa paiʼnova koteʼmo viyo. 2 Nagaemo enisole vekaʼnimo aliʼna atesugeno uno hogotetesigeʼna Kenani nofi vayanagi Emo nofi vayanagi Hiti nofi vayanagi Pelesi nofi vayanagi Hivi nofi vayanagi Yemusi nofi vayanagi huʼna alina hapafaiʼna apatalegauve. 3 Mago kanale lanitani mopaleʼmo viyo. Gemo noʼafiya vayaʼmo maiʼnayaʼmofeʼmo lapakaeʼeʼmo magokepi lokaeʼna oʼuguve. Fiku yanageʼna aliʼna hano huʼna lapatalegauve, huno Mosesefeʼmo ha paiʼniye. 4 Moseseʼa Isaleli vayaʼaifeʼmo ani lokiya gemo huno hapa paiʼnigeʼapaeʼmo yulagefa aiteʼa konali yaʼapimo aliʼa oʼvaiʼnae. 5 Ala kava neʼmoʼa Mosesefeʼmo ha painoʼaeʼmo, Isaleli vayaʼaifeʼmo ina gemo huka hapa paiyo. Lapakaemo gemo noʼafiya vayaʼmo maiʼnae. Nagaemo lapakae folagapiʼmo afole aiteʼna aliʼna hano huʼna lapatalegauvaʼmofeʼmo konali yatapimo asagitapa maleyo. Lapakaetegamo na agufa kavaʼmo hisufi huʼna nagesamo afiguve, huno ha paiʼniye. 6 Inagi Isaleli vayaʼmogi Holepi avemo haopaleʼmo konali yaʼapimo asagiʼa maleʼnae. Gotiʼa Moseseʼeʼmo gege huʼnaʼa gemae 7 Moseseʼa agaiʼa seli noʼmo alinino uno Isaleli vayaʼmo maiʼnaya koʼmo afagiʼaleʼmo alino he tino ateʼniye. Moseseʼa ani seli nofeʼmo agiʼamo Gotiʼeʼmo magokepi lokaeʼa aliʼa anupa huʼa neʼmaiya none, huno ateʼniye. Inagi Ala kava neʼmo kahauya huʼa agesayafeʼmo huʼnaya vayaʼmo ani malaga haneʼniya nopiʼmo uʼnae. 8 Muki afinaʼmo Moseseʼa ani seli notegamo neʼvigeʼapaeʼmo muki vayaʼmo seli noʼapimo kipateʼmo he tiʼa maiʼneʼa ageʼa maiʼnageno ani nopiʼmo uno haiʼniye. 9 Moseseʼa nopiʼmo uno haiʼnigenoʼaeʼmo hiyaʼmoʼa posi yosagana huno emineno Gotiʼeʼmo magokepi lokaeʼa aliʼa anupa huʼa maiʼnaya noʼmo kipateʼmo haneʼnigeno ani hiyapatiʼmo Ala kava neʼmoʼa Mosesefeʼmo ha paiʼniye. 10 Muki vayaʼmogimo hiyaʼmo ageʼnayana ani seli noʼmo kipateʼmo emineno haneʼnigeʼa ageteʼapaeʼmo seli noʼapimo kipateʼmo he tiʼa maiʼneʼa mono huʼnae. 11 Mago vekamoʼmo ao vekaʼeʼmo gege hisaʼafeʼmo augosafiʼmo ageno halegeno ageno halegeno huʼneʼana gege nehaʼa kava huno Ala kava neʼmoʼa Moseseʼeʼmo gege huʼnaʼae. Gege huteʼanaeʼmo Moseseʼa atagineno emineno neʼmaiya kotegamo uʼniyaʼmonanafa aliʼyaʼamo neʼaliya vekamo Yasuvaʼmo Nani mafaʼnemo ani seli nopatiʼmo ataleno oʼuno maiʼniye. Moseseʼa Ala kava neʼmo ha le konali yaʼamo agesiyafeʼmo hauʼniya gemae 12 Moseseʼa Ala kava nefeʼmo, Kagaemo nagaefeʼmo muki vayaʼmo apavalelika uvo, huka naha paiʼnanaʼmonanafa nagaeʼeʼmo lokaeno visiya vekaeʼmo naha opaiʼnane. Naha opaiʼnanaʼmonanafa nagaefeʼmo, kagaemo ago kageʼna alagepa huʼnove, huka huʼnane. Naulagaleʼmo fikumo kaha maeʼna nekamuva kavaʼmo ago ageʼnane, huka naha paiʼnane. 13 Fikumo naha maeka neʼnamina kavaʼmo ageʼnisuvana kagesamo neʼafina kavakaʼe nekahaiya kavakaʼeʼmo hemenimo alika nave lisanageʼna kaulagaleʼmo fikumo naha maeka neʼnamina kavakamo afaʼa agegauve. Ani nofi vayaʼaifeʼmo vayaʼnimo maiʼnae, huteka kagesa afifi huka maiyo. 14 Ala kava neʼmoʼa, Nagaemo kagaeʼeʼmo magokepi lokaeʼna neʼuʼnaeʼmo kaipafiʼmo kaha maesugeka maika haga legane, huno ha paiʼniye. 15 Moseseʼa ha painoʼaeʼmo, Lagaeʼeʼmo magokepi lokaeka oʼvisanana mani kotetiʼmo alika lategeta oʼvino 16 Lagaeʼeʼmo magokepi lokaeka oʼvisanaʼmoʼmo haiya kava huʼa lageteʼapaeʼmo, Goti aulagaleʼmo Moseseʼe Goti vayaʼaʼeʼmo fiku hapa maeno neʼapamiya kavaʼamo afaʼa ageʼnaya vayane, huʼa hugae. Kagaemo lagaeʼeʼmo magokepi lokaeka visanaʼmoʼmo nagaeʼe vayakaʼefeʼmo muki ma mopafi vayapatiʼmo apaote nofi vayaʼmo maiʼnae, huʼa lagegae. 17 Ala kava neʼmoʼa Mosesefeʼmo ha painoʼaeʼmo, Nagaemo kageʼna alagepa huʼnovana naulagaleʼmo fikumo kaha maeʼna nekamuva kavaʼnimo ageʼnanaʼmofeʼmo gekamo akame huguve, huno ha paiʼniye. 18 Moseseʼa Ala kava nefeʼmo ha painoʼaeʼmo, kahaoke hovanagi, ha le konali yakamo alika nave liyo, huno huʼnigeno 19 Ala kava neʼmoʼa Mosesefeʼmo ha painoʼaeʼmo, Nagaemo nahau nayamopafiʼmo neʼnahaiya alagepa kavaʼnimo aliʼna atesugeno visigeka agegane. Nagaemo nagiʼnimo Ala kava neʼmo maiʼnove, huʼna kaha paisugeka afigane. Ina lagifeʼmo fikumo hapa maeʼna apamiguve, huʼna huʼnisufigeʼna fikumo hapa maeʼna apamiguve. Ina lagifeʼmo nahau nayamopafiʼmo nahauʼnisifi apakaefeʼmo afaʼa nahau nayamopafiʼmo nahaugiye. 20 Nahaugiyaʼmonanafa naugosaʼafiʼmo afaʼa oʼnagegane. Naugosafiʼmo nagesiya vekamo afaʼa oʼmaigifa ago faligiyaʼmofeʼmae. 21 Nahaopaleʼmo mago yafaʼmo haneʼniyanageka eka haikeka ani yafateʼmo he tika maigane. 22 Nagaemo yafa kapiʼmo aliʼna kateʼneʼna nayatetiʼmo kaulagaleʼmo aiʼna ati kaeliʼneʼna kaulagaletiʼmo eʼna uguve. Ha le konali yaʼnimo aliʼna atesugeno kaulagaletiʼmo eno ugiye. 23 Eʼna neʼuʼnaeʼmo nayaʼmo aliʼna atalesugekaeʼmo nagotofuʼageʼmo nageganaʼmonanafa naugosaʼafiʼmo oʼnagegane, huno ha paiʼniye. |
© 2013, Wycliffe Bible Translators, Inc. All rights reserved.
Wycliffe Bible Translators, Inc.