Hatu maeno apate'niya gemae 32 - The Keyagana NT and 25 OT books

Isaleli vayaʼmogi goli yafatetiʼmo pulumakamo auneʼamo alo huʼa maleʼneʼa mono huʼnaya gemae

¹ Moseseʼa avefiʼmo uno haino yatala afinaʼmo maiʼniyaʼmofeʼmo Isaleli vayaʼmogimo uʼa Elonifeʼmo ha paiʼapaeʼmo, Moseseʼa Isipi kotegatiʼmo lavalelino eʼniya vekalegamo na agufa kavaʼmo afole aiʼnifi huta oʼageʼnonaʼmofeʼmo kagaemo mago gotigimo alo hisanageʼa uʼa hogoteteʼa lavaleliʼa ugae, huʼa ha paiʼnae.

² Eloniʼa apakaefeʼmo, goli yafatetiʼmo alo huʼnaya linimo aʼne anagatapimogi apakesafatiʼe mafaʼne anagatapimogi apakesafatiʼeʼmo hatu maetapa alinitetapa namiyo, huno hapa paiʼniye.

³ Muki vayaʼmogi apakesafatiʼmo linimo hatu maeʼa alini eʼa amiʼnae.

⁴ Agaemo goli yafatetiʼmo alo huʼnaya linimo alino atafi kaeʼnigeno leno ani nehegenoʼaeʼmo alino pulumakamo auneʼamo alo huʼniye. Alo huʼnigeʼapaeʼmo, O Isaleli vayaʼmogitapae, huʼa, afiyo, huʼa, Isipi kotegatiʼmo lapavalelino eʼniya gotitapimae, huʼa huʼnae.

⁵ Inagi Eloniʼa mago ofalinimo malesaya hiʼyalamuʼmo pulumakamo auneʼamo haneʼniya haopaleʼmo huʼniye. Agaemo muki vayaʼmogimo hisaya kavafeʼmo ani ge huno hapa paiʼniye. Egamo Ala kava netefeʼmo alopa yagitamo hugune.

⁶ Kotilamiyapiʼmo Isaleli vayaʼmogimo he tiʼa ofalinimo atafi kaege aliʼa nanu aeʼa apateteʼa maisaya ofalinimo amige huteʼa itopaleʼmo fai maiʼneʼa neʼyaʼe aniʼeʼmo neteʼa henagaʼamo aʼne anagaʼapiʼeʼmo hapauʼniya kavaʼmo huʼnae.

⁷ Ala kava neʼmoʼa Mosesefeʼmo ha painoʼaeʼmo, Malage huka uka lamiyo. Kagaemo Isipi kotegatiʼmo apavalelika eʼnana vayakamogimo apakaiʼapimo aliʼa hosu huʼa neʼapatae.

⁸ Apakaefeʼmo akame hiyo, huʼna huʼnova kaʼmo malage huʼa ataleʼa uʼnae. Apakaemo goli yafaʼmo atafiʼmo kaeʼnageno ani heʼnigeʼa aliʼa pulumakamo auneʼamo alo hu maleʼneʼa ani yatefeʼmo mono huteʼa ofalini amiteʼa, O Isaleli vayaʼmogitapae, huʼa, Isipi kotegatiʼmo lapavalelino eʼniya gotitapimoʼmae, huʼa huʼnae.

⁹ Nagaemo ani vayaʼmo ago apakeʼnovana gemo alagi noʼafiya vayaʼmo maiʼnae.

¹⁰ Maiʼnayaʼmofeʼmo afaʼa nateʼnegeʼnao naipamoʼmo ata leʼniyanageʼna alina hano huʼna apataleno. Ani vayaʼmogi apaimuʼyaleʼmo asole vayaʼmo alo huʼna apatesugeʼa vayakamo maigae, huno ha paiʼniye.

¹¹ Moseseʼa Ala kava neʼmo Gotiʼamofeʼmo lokiya vaino ge huno ha painoʼaeʼmo, Ala kava nene, huʼna, Na kava higekaeʼmo Isipi kotegatiʼmo himamu lokiyakaletiʼmo apavalelika eʼnana vayakaeʼmo kaipamo leka apatesanafeʼmo nehane.

¹² Fiku yanageʼa Isipi vayaʼmogi huʼapaeʼmo, Gotiʼa apakaetegamo hosu kavaʼmo huteno ani mopaletiʼmo alino hano huno apatalesiyafeʼmo apavalelino uʼniye, huʼa hugae. Kaipamo neleya kavaʼmo ataleteka alu kaipa kagesamo afiteka vayakamo alika hano huka oʼapatalo.

¹³ Kagaemo aliʼyakamo aliʼnaya vayaʼmo Emalehamufenagi Aisakifenagi Yekopufenagi huka kagesamo afiyo. Kagaemo kagikaletiʼmo kagoʼyamo ataleteka hukaeʼmo, Nagaemo asole mafaʼnetapimogi aliʼa apatesaya mafaʼnemogi kokuʼnapi haneʼniya kanefikana huʼa maisaya mafaʼnemo aliʼna afole aiʼna apatesugeʼa uʼa ani lapamiguve, huʼna huʼnova koteʼmo muki afinaʼmo maige maige huʼa maigae, huka huʼnane, huno huʼnigenoʼaeʼmo

¹⁴ Ala kava neʼmoʼa alu aipa agesamo afiteno vayaʼaeʼmo, apamagiguve huno huʼniya kavaʼmo osuʼniye.

¹⁵ Inagi Moseseʼa lole yafatalaʼmo aliteno avefatiʼmo ataleno uno lamiʼniye. Ala kava neʼmoʼa ani lole yafatalateʼmo aluga alugaʼalateʼmo avoʼmo kae maleʼniye.

¹⁶ Gotiʼa agaiʼamo lole yafatalaʼmo alo huteno ani yafatalateʼmo haginaletiʼmo kaegekana huno avoʼmo kaeʼniye.

¹⁷ Moseseʼa uno lamiʼnigeʼanaeʼmo Yasuvaʼeʼmo fotu huteʼana uʼana nelamiʼanaeʼmo Yasuvaʼa asole vayaʼmogi apakemo aiʼnageno afitenoʼaeʼmo Mosesefeʼmo ina ge huno ha paiʼniye, maiʼnaya koteʼmo kamemo nehuʼapaeʼmo apakemoʼmo nehigeʼna afiʼnove, huno huʼnigenoʼaeʼmo

¹⁸ Moseseʼa ha painoʼaeʼmo, kamemo huʼa aeʼa apaka seteʼa apamogaga neʼaiya vayaʼmogi nehaya agufa apakemo oʼafige kame vayaʼmogi kamemo huʼa aeʼa apaka seʼnageʼa kage kage nehaya vayaʼmogi nehaya agufa apakemo oʼafige huʼnovaʼmonanafa yokemo huʼnageʼna afiʼnove, huno ha paiʼniye.

¹⁹ Moseseʼa maiʼnaya yateʼmo eno avaʼyi hutenoʼaeʼmo apakeyana pulumakamo auneʼamo haneʼnigeʼapaeʼmo muki vayaʼmogimo ogefage nehageno apakeʼniye. Moseseʼa apaketenoʼaeʼmo aipamo leʼnigeno lole yafatalaʼmo avemo aiyafiʼmo yaga auno ataleʼnigeno aino akaya heʼniye.

²⁰ Moseseʼa pulumakamo auneʼamo alino atafiʼmo kaeteno aeno lata paiʼnigeno laʼnefamo alino hamaleʼniye. Ani laʼnefamo alino anipiʼmo aino atagu faeno ataletenoʼaeʼmo muki Isaleli vayaʼmo alino he tino apateʼnigeʼa ani anipatiʼmo neʼnae.

²¹ Moseseʼa Elonifeʼmo, Muki vayaʼmogimo kagaetegamo na agufa kavaʼmo huʼnagekaeʼmo apakeka apataleʼnanageʼapaeʼmo ani alopa hosu kavaʼmo huʼnageno alopa kana yaʼmo apakaeteʼmo asagauno aiʼniye, huno ge huno afi geʼniye.

²² Eloniʼa hunoʼaeʼmo, Ala neʼnimogae, huʼna, kaipamo leka oʼnato. Kagaemo mani vayaʼmogi hosu kavaʼmo hisayafeʼmo hapauʼniya vayaʼmo maiʼnageka ago apakeʼnane.

²³ Apakaemo naha paiʼapaeʼmo, Moseseʼa Isipi kotegatiʼmo lavalelino eʼniya vekaleʼmo na agufa kavaʼmo afole aiʼnifi huta oʼageʼnonaʼmofeʼmo kagaemo gotigimo alo hugeʼa uʼa hogoteteʼa lavaleliʼa viyo, huʼa huʼnageʼnaeʼmo

²⁴ geʼapimo afiteʼna hapa paiʼnaeʼmo, Muki vayaʼmogi goliletiʼmo alo huʼnaya linimo lapakesafatiʼmo hatu maetapa namiyo, huʼna huʼnogeʼa goli linimo namiʼnageʼna atafiʼmo yaga auʼna ateʼnogeno ani pulumakamo leno afole aiʼniye, huno ha paiʼniye.

²⁵ Eloniʼa hosu kavaʼmo osisayafeʼmo huno apatafauno oʼapateʼnigeʼa kame vayaʼapimogi apaulagaleʼmo apavagage hisiya kavaʼmo huteʼa alagi ge oʼafisaya agufa vayaʼmo maiʼnageno Moseseʼa apakeʼniye.

²⁶ Apaketenoʼaeʼmo Moseseʼa lafi kegiʼya kipateʼmo he tino maiʼneno keya aeno ge hunoʼaeʼmo, Haiya vekamo Ala kava netegamo maiguve huno hisifi nagaetegamo egaiye, huno huʼnigeʼapaeʼmo muki Livai nofi vayaʼmo eʼa aulagaleʼmo aliʼa anupa huʼa maiʼnae.

²⁷ Moseseʼa hapa painoʼaeʼmo, Ala kava neʼmo Isaleli vayaʼmogi Gotiʼapimoʼmo hunoʼaeʼmo, Naipetapimo alinitutapa maiʼnaya kotetiʼmo lapakanatapimogimo kamitimo apaige lapavagi huʼa uʼeʼa hisaya vayaʼmo kamitimo apaige lapaopaleʼmo maiʼnaya vayaʼmo kamitimo apaige hiyo, huno huʼniye, huno hapa paiʼniye.

²⁸ Livai nofi vayaʼmogimo ani afinaʼmo Moseseʼa huʼniya kavaʼmo huʼa tali tauseniʼa vayaʼmo kamitimo apaiʼnae.

²⁹ Inagi Moseseʼa hunoʼaeʼmo, Ala kava neʼmo aliʼyaʼamo alisayafeʼmo hemenimo lapakaitapimo alitapa lapaoteʼmo lapategenoʼao alagepa yaʼmo lapamigiye. Lapakaemo mafaʼnetapiʼe lapakanatapimogiʼeʼmo kamemo huʼnayaʼmofeʼmae, huno hapa paiʼniye.

³⁰ Egaʼamo Moseseʼa hunoʼaeʼmo, Lapakaemo alopa hosu kavaʼmo huʼnae. Huʼnayaʼmofeʼmo hemenimo nagaemo Ala kava netegamo avefiʼmo uʼna haiʼna hosu kavatapimo alino atalesifi oʼatalesifigeʼna amalageka huʼna ge huʼna afi gegauve.

³¹ Inagi Moseseʼa avefiʼmo uno haino Ala kava nefeʼmo ha painoʼaeʼmo, Ani vayaʼmogimo alopa hosu kavaʼmo huʼnae. Apakaemo apakaiʼapilefeʼmo goli yafatetiʼmo gotiʼapimoʼmo alo huʼnae.

³² Alo huʼnayaʼmonanafa hosu kavaʼapimo afa alika atalegapiye. Alika oʼatalesanana inagi kagaemo nagiʼnimo mukufiʼmo avoʼmo kae maleʼnana nagiʼnimo aeka kalo paeka atalo, huno huʼnigeno

³³ Ala kava neʼmoʼa Mosesefeʼmo ha painoʼaeʼmo, Ina lagimo nagaetegamo hosu kavaʼmo huʼnisafigeʼna ani vayaʼmogi apakigeʼmo aeʼna kalo paeʼna atalegauve.

³⁴ Kagaemo hemenimo uka hogoteteka kaha paiʼnova kotegamo apavalelika uvo. Afiyo, huʼna, nagae enisole vekamoʼmo uno hogoteteno lapavalelino ugiye. Lapavalelino ugiyaʼmonanafa kayoʼmo apamisuva afinaʼmo ani vayaʼmo hosu kavaʼapilefeʼmo kayoʼmo apamiguve, huno ha paiʼniye.

³⁵ Inagi Ala kava neʼmoʼa alopa kaitaʼmo alino ateʼnigeno ani vayaʼaiteʼmo eʼnigeʼa kaitaʼmo hapauʼniye. Apakaemo Eloniʼa pulumakamo goli yafatetiʼmo alo hisiyafeʼmo ha paiʼnayaʼmofeʼmae.