Hatu maeno apate'niya gemae 3 - The Keyagana NT and 25 OT books

Gotiʼa Mosesefeʼmo keya aeno ge huʼniya gemae

¹ Ani afinaʼmo Mosese ayemoʼamoʼmo Yetaloʼmo Mitiyani vayaʼmo mono huno neʼapateya vekamo sipisipiʼaleʼmo yagaiʼniye. Moseseʼa sipisipi anagaʼmo apavalelino mago kaʼme kotegamo hau huʼniya koteʼmo mago avemo agiʼamo Holepi avemo alu agiʼamo Sainai avemo Gotiʼa ani avefiʼmo maisiyafeʼmo aote ave huno hu maleʼniya avefiʼmo uno avaʼyi huʼniye.

² Ala kava neʼmo enisole vekaʼamo mago aise yosafiʼmo atamo nelegeno ani ata vaipiʼmo afole aiʼnigeno Moseseʼa ageʼniye. Ageʼniyana atamo ani yosafiʼmo leʼniyaʼmonanafa ani yosamo leno saga oliʼniye.

³ Moseseʼa agesa alaʼamo afitenoʼaeʼmo ani kavaʼmo aeto agufa kavaʼmo huno atamoʼmo yosaʼamo leno saga noliyanageʼna uʼna haopaletiʼmo agegauve, huno agesamo afiʼniye.

⁴ Ala kava neʼmoʼa ani yosafatiʼmo Moseseʼmo ageno maiʼnigenoʼaeʼmo ani yosamo agesiyafeʼmo kaʼmo ataleno aniyateʼmo eʼnigenoʼaeʼmo, Moseseyo, Moseseyo, huno huʼnigeno, ove, huno huʼnigenoʼaeʼmo

⁵ mani yosamo haopaleʼmo eka hogo osuvo. He tika maiʼnana mopamo aliʼna aote maleʼnova mopaleʼmo he tika maiʼnanaʼmofeʼmo sukamo asagika malo.

⁶ Nagaemo kaginago vayaʼmogi Gotiʼapimoʼnamae. Nagaemo Emalehamuʼagi Aisakiʼagi Yekopuʼagi huʼna Gotiʼapimoʼnamo maiʼnove, huno ha paiʼnigeno Moseseʼa Gotiʼmo aulu haeno agesiyafeʼmo koli huteno augosafiʼmo alino ati kaeʼniye.

⁷ Ala kava neʼmoʼa ha painoʼaeʼmo, Nagaemo vayaʼnimo apakeʼnogeʼa Isipi kotegamo maiʼnageʼa Isipi vayaʼmogimo lusi kava huʼa hapaise vose aliʼyaʼmo apamiʼnageʼna ageʼnove. Ani aliʼyate kava vayaʼmogimo kana yaʼmo apamiʼnageno apakafu kiʼnigeʼa kage gage nehaya gemo afiʼnove.

⁸ Afiteʼnaeʼmo Isipi vayaʼmogi apayapatiʼmo apakufamo aliʼna katiʼna apatesuvafeʼmo emiʼneʼnove. Nagaemo mago mopamo kanale lanitani mopafatiʼmo neʼyaʼmo alagepa huno afole neʼaiya kotega mopaleʼmo apavaleliʼna uguve. Hemenimo ani mopaleʼmo Kenani nofi vayanagi Hiti nofi vayanagi Emo nofi vayanagi Pelesi nofi vayanagi Hivi nofi vayanagi Yemu nofi vayanagi huʼa maiʼnae.

⁹ Isaleli vayaʼmo apakafu kiʼnigeʼa kage gage nehaya gemo afige Isipi vayaʼmogimo hapaise vose aliʼyaʼmo apamiteʼapaeʼmo aliʼa afepi neʼapataya kavaʼmo agege huʼnove.

¹⁰ Hemenimo nagaemo aliʼna katesugeka Isipi kini vekalegamo uka vayaʼnimo Isaleli vayaʼmo Isipi kotegatiʼmo apavalelika egane, huno ha paiʼnigeno

¹¹ Moseseʼa Gotifeʼmo, nagaemo ina laʼnamogeʼna kini vekamo Felotegamo uʼna Isaleli vayaʼmo Isipi kotegatiʼmo apavaleliʼna esuvafeʼmo ani gemo nehane, huno huʼniye.

¹² Gotiʼa ha painoʼaeʼmo, Nagaemo kagaeʼeʼmo magokepiʼmo lokaeʼna maiguve. Mago alagena kavaʼmo hisana kavaʼmo aliʼna kave liguve. Ani hisana alagena kavaʼmo haneʼniye. Isipi kotegatiʼmo apavalelika eka mani aveleʼmo nagaefeʼmo mono hugane, huno ha paiʼniye.

¹³ Moseseʼa Gotifeʼmo ha painoʼaeʼmo, Nagaemo Isaleli vayaʼmo maiʼnaya kotegamo uʼna avaʼyi huteʼnaeʼmo, laginago vayaʼmogi Gotiʼapimoʼmo lapakaetegamo alino nateʼnigeʼna eʼnove, huʼna hapa paisugeʼapaeʼmo, agiʼamo ina laʼae, huʼa ge huʼa nafi gesageʼnaeʼmo na agufa gemo huʼna hapa paiguve, huno afi geʼnigenoʼaeʼmo

¹⁴ Gotiʼa ha painoʼaeʼmo, Maiʼnova agufa kavakeʼmo huʼna maiʼnovanageʼna ani kavakeʼmo huʼna maiguve. Kagaemo Isaleli vayaʼaifeʼmo, Maiʼniya agufa kavaʼmo huno maiʼniyanageno ani kavakeʼmo huno maiʼniya vekamoʼmo alino nateʼnigeʼna lapakaetegamo eʼnove, huka hapa paiyo, huno ha paiʼniye.

¹⁵ Ha paiteno Gotiʼa magoʼe gemo ha painoʼaeʼmo, Ala kava neʼmo laginago vayaʼmo Emalehamu Gotiʼamoʼmogi Aisaki Gotiʼamoʼmogi Yekopu Gotiʼamoʼmogi huno Gotiʼapimoʼmo alino nateʼnigeʼna lapakaetegamo eʼnove, huka hapa paiyo. Mani nagiʼnimo hanege hanege huno haneʼnisigeʼa henagaʼamo lapakinago vayaʼmo afole aisaya vayaʼmogimo ani nagigeʼmo aegae.

¹⁶ Uka Isaleli vayatama vayaʼmo apavaleka alika anupa huka apateʼnekaeʼmo, Lapakinago vayaʼmo Emalehamu Gotiʼamoʼmogi Aisaki Gotiʼamoʼmogi Yekopu Gotiʼamoʼmogimo huno Gotiʼapimoʼmo nagaeteʼmo afole aiteno naha painoʼaeʼmo, Nagaemo lapa maesuvafeʼmo emiʼneʼna Isipi vayaʼmogimo lapakaetegamo nehaya hosu kavaʼmo ageʼnove.

¹⁷ Nagaemo Isipi kotega neʼaliya hanageke yapatiʼmo apavaleliʼna Kenani nofi vayanagi Hiti nofi vayanagi Emo nofi vayanagi Pelesi nofi vayanagi Hivi nofi vayanagi Yemu nofi vayanagi huʼa maiʼnaya kotegamo kanale lanitani mopafatiʼmo alagepa neʼyaʼmo afole neʼaiya mopaleʼmo lapavaleliʼna uʼna lapategauve, huʼna kaha nepauva gemo huka hapa paiyo.

¹⁸ Ani ge huka hapa paisanaʼmoʼmo gekamo afaʼa afigae. Kagaeʼe Isaleli vayatama vayaʼeʼmo Isipi kini vekalegamo utapa ha paitapaeʼmo, Ala kava neʼmo Himulu vayaʼmogita Gotitimoʼmo lagaemo alino anupa huno lateʼniye. Kahaoke honanagi, afaʼa latalegeta loleʼe magoʼe felugamo uta kaʼme kotegamo Ala kava neʼmo Gotitimoʼmo ofalini amigune, hutapa ha paiyo.

¹⁹ Mani gemo hutapa ha paigayaʼmonanafa ago ageʼnovana lapatalesigetapa oʼugae. Nagaemo himamuʼniletiʼmo aliʼyaʼmo oʼalisuvaʼmoʼmo lapatalesigetapa afa oʼugae.

²⁰ Olapatalegaiyaʼmofeʼmo nagaemo himamuʼniletiʼmo Isipi kotegamo noʼagaya agufa naune kavaʼmo huteʼna kayoʼmo apamisugeno kini vekamoʼmo afaʼa lapatalesigetapa ugae.

²¹ Nagaemo lapa maeʼa fikumo lapamisaya agufa apaipa apakesamo Isipi vayaʼmo apamisugeʼa visaya afinaʼmo afaʼa lapatalesagetapa oʼugayaʼmonanafa asole kagemi yaʼmo lapamisagetapa alinitapa ugae.

²² Muki aʼne anagatapimogimo hapaopale maiʼnisaya aʼne anagaʼaifeʼmo mago siluva yafafenagi goli yafafenagi kukena yafenagi huʼa ge huʼa apafi gesageʼa lapamisagetapa mafaʼne anagatapiʼe a mafaʼne anagatapiʼeʼmo vaitapa apategae. Ani kavaʼmo hutapa Isipi vayaʼmogi kagemi yaʼmo alinitapa ugae, huno ha paiʼniye.