Hatu maeno apate'niya gemae 29 - The Keyagana NT and 25 OT books

Moseseʼa fotiʼa afinaʼmo avefi maiʼnigeno Ala kava neʼmoʼa seli mono noʼamo kisiya kavafeʼmo ha paiʼniya gemae. Muki afinaʼae afinaʼaeʼmo ofalinimo hisaya kavafemo huʼniya gemae

³⁸ Lapakaemo muki afinaʼae afinaʼaeʼmo magoke kafugamo maiʼnisaʼa lole sipisipilaʼmo anavalelitetapa ofalini hiʼyalamuteʼmo anategae.

³⁹ Mago sipisipimo netepimo ofalinimo namitetapa mago sipisipimo uneʼmo yegemo uno lamino falesiya kanaleʼmo namigae.

⁴⁰ Lapakaemo mago aise laisimoʼmo kana nehiya agufa falaova laʼnefagi loleʼe loleʼa kapumo olifi yosa alagaletiʼmo alo huʼnaya uveligi loleʼe loleʼe kapumo nofi alagafati aninagi hutapa alinitetapa sipisipiʼeʼmo ofalinimo namigae.

⁴¹ Uneʼmo yegemo uno lamino nefalesigetapaeʼmo alu sipisipigi laʼnefagi nofi alagafati aninagi hutapa netepi aliʼnaya agufa yaʼmo alinitetapa ofalinimo namigae.

⁴² Muki afinaʼae afinaʼaeʼmo lapakaemo oʼataletapa ani ofalinimo naulagaleʼmo seli mono noʼnimo kipaʼmo aulagamo atafiʼmo kaete kaete hugae. Ani kipaʼmo Ala kava neʼmo aulagaleʼmo nagaeʼe lapakaeʼeʼmo fotu hutetaeʼmo nagaemo gemo lapa paiguve.

⁴³ Nagaemo ani yateʼmo Isaleli vayaʼeʼmo alita anupa huta maiʼnisunagenoʼaeʼmo ha le konali yaʼnimoʼmo mono noʼnimo alino aoteʼmo malesigeno nagaiʼni noʼmo hanegaiye.

⁴⁴ Nagaemo ani kavatetiʼmo mono noʼniʼe ofalini neʼnamiya hiʼyalamuʼeʼmo aliʼna aote malegauve. Nagaemo Eloniʼe mafaʼneʼalaʼeʼmo Isaleli vayaʼaiteʼmo mono huʼa apateteʼana aliʼyaʼnimo alisayafeʼmo apavaleʼna aliʼna apaoteʼmo apategauve.

⁴⁵ Nagaemo Isaleli vayaʼmogitapa folagapiʼmo maiteʼna Gotitapimoʼnamo maiguve.

⁴⁶ Lapakaemo nagaemo nagesayana Ala kava neʼmo Gotitapimoʼnamo maiʼneʼna lapakae folagapiʼmo maisuvafeʼmo Isipi kotegatiʼmo lapavaleliʼna eʼnova Gotitapimoʼnamo maiʼnovanagetapa nagegae. Nagaemo Ala kava neʼmo Gotitapimoʼnamo maiʼnove.