Hatu maeno apate'niya gemae 24 - The Keyagana NT and 25 OT books

Moseseʼa kotalake gemo alino afole aiʼniya gemae

¹ Ala kava neʼmoʼa Mosesefeʼmo ina ge huno ha paiʼniye. Kagaikagi Eloniʼagi Nenapuʼagi Amihuʼagi sevetiʼa Isaleli vayatama vayanagi hutapa nagaetegamo avefiʼmo eta haiteyo. Apakaemo aise afagiʼaleʼmo maiʼneʼa nagaetefeʼmo mono hugae.

² Hugayaʼmonanafa Mosesegamo kagaikageʼmo eka nahaopaleʼmo hogo hugane. Apakaemo eʼa hogo osuge Mosesegaʼeʼmo muki vayaʼmo magokepi lokaeʼa oʼmege hugae, huno ha paiʼniye.

³ Inagi Moseseʼa uno muki vayaʼaifeʼmo Ala kava neʼmoʼa muki ha paiʼniya gemo hapa paige keʼaepa gemo hapa paige huʼnigeʼapaeʼmo magoke apaipa apakesamo aliteʼa geʼaleʼmo aeʼa atagaina huʼapaeʼmo, Ala kava neʼmoʼa muki huʼniya geʼamo afaʼa akame hugune, huʼa huʼnae.

⁴ Inagi Moseseʼa Ala kava neʼmoʼa muki huʼniya geʼamo mago mukufiʼmo avoʼmo kae maleʼniye. Kotilamiyapiʼmo he tino avemo aiyafiʼmo ofalinimo hisaya hiʼyalamuʼmo huteno tuolofuʼa yafaʼmo alino faino ateʼniya yafaʼmoʼa tuolofuʼa Isaleli nofi vayaʼaitefeʼmo aune kavaʼmo huʼniye.

⁵ Ani kavaʼmo huteno Isaleli neya vayaʼmo alino apateʼnigeʼa uʼa ofalinimo atafi kaeʼa Ala kava neʼmo amiteʼa pulumakamo amagiʼa Ala kava neʼeʼmo magokepiʼmo lokaeʼa maisayafeʼmo ofalinimo amiʼnae.

⁶ Moseseʼa ani ofalinimo huʼnaya afumo kolaʼmo alino mago yuvapafiʼmo lakino maleteno magoʼamo alino ofalini nehaya hiʼyalamuteʼmo aino fuli fuli huʼniye.

⁷ Inagi kotalakemo haneʼniya mukumo alino lekana paino hapa paiʼnigeʼa afiteʼapaeʼmo, Ala kava neʼmoʼa muki huʼniya gemo akame hugune, huʼa huʼnae.

⁸ Inagi Moseseʼa yuvapafi kolaʼmo alino vayaʼmogi apakufaleʼmo aino fuli fuli huno apatetenoʼaeʼmo, Afiyo, huno, mani kolaʼmo Ala kava neʼmoʼa lapakaeʼeʼmo kotalakemo hu maleʼniya gemo alino afole aino atesiya kotalake kavaʼmo haneʼniye, huno hapa paiʼniye.

⁹ Moseseʼagi Eloniʼagi Nenapuʼagi Amihuʼagi sevetiʼa Isaleli vayatama vayanagi huʼa avefiʼmo uʼa haiʼa ageʼnayana

¹⁰ Isaleli vayaʼmogi Gotiʼapimoʼmo maiʼnigeʼa ageʼnayana aiyamo afeʼalumelagamo oko yafaʼmo agiʼamo Safaiya yafatetiʼmo kateʼmo maleʼnageno kokuʼnakana huno aeno haleʼniye.

¹¹ Apakaemo Gotiʼmo ageʼnayaʼmonanafa apakaefeʼmo ayaʼmo oʼataleʼniyaʼmofeʼmo afaʼa maiʼnae. Inagi Gotiʼa ageteʼapaeʼmo neʼyaʼmo nege aniʼmo nege huʼnae.

Moseseʼmo Sainai avefiʼmo uno haiʼniya gemae

¹² Inagi Ala kava neʼmoʼa Mosesefeʼmo ha painoʼaeʼmo, Nagaetegamo eka haikeka he tika maiʼnegeʼna lole latapa yafatalateʼmo keʼaepa geʼnimo akame hiyo, huʼna huʼnova geʼnimo avoʼmo kaeʼna maleʼnovanageʼna ani yafatalaʼmo aliʼna kamisugeka Isaleli vayaʼmo alika apaya malegane, huno ha paiʼniye.

¹³ Ani ge huno ha paiʼnigeno Moseseʼa aliʼyaʼamo neʼaliya vekamo Yasuvaʼeʼmo Goti avefiʼmo uʼana haiʼnaʼae.

¹⁴ Hogoteno Moseseʼa Isaleli vayatama vayaʼaifeʼmo hapa painoʼaeʼmo, laʼagava maiʼnigetaʼa halate ataginetaʼa emitegauʼae. Eloniʼe Hoʼeʼmo lapakaeʼeʼmo magokepi maigaʼaʼmofeʼmo mago hanageke yaʼmo afole aisigetapaeʼmo anakaetegamo visageʼana aliʼana fako huʼana lapategaʼae.

¹⁵ Moseseʼa ani gemo hapa paiteno avefiʼmo uno haiʼnigeno hiyaʼmoʼa aveleʼmo kino ati kaeʼniye.

¹⁶ Ala kava neʼmo ha le konali yaʼamoʼmo emineno Sainai avefiʼmo aeno ha leʼnigeno sigisiʼa felugamo hiyaʼmoʼmo ani aveleʼmo kino ati kaeno haneʼniye. Seveniʼa felugamo Ala kava neʼmoʼa Mosesefeʼmo hiyapatiʼmo keya aeʼniye.

¹⁷ Ala kava neʼmo ha le konali yaʼamoʼa Isaleli vayaʼai apaulagaleʼmo avefiʼmo alopa atamo leteno muki yaʼmo leno sagalino hano nehiya agufa kava huʼnigeʼa ageʼnae.

¹⁸ Moseseʼa hiyapiʼmo uno haino avefiʼmo fotiʼa felugaʼe haniʼilagaʼeʼmo maiʼniye.