Hatu maeno apate'niya gemae 23 - The Keyagana NT and 25 OT books

Ala kava neʼmoʼa alu kava alu kavaʼmo hiyo, huno huʼniya gemae. Gotiʼa Isaleli vayaʼaifeʼmo polomasi gemo huno hapa paiʼniya gemae

²⁰ Ala kava neʼmoʼa hunoʼaeʼmo, Afiyo, huʼna, nagaemo enisole vekamo aliʼna atesugeno uno hogoteteno uno visaya kategamo yagaino lapateteno ago alo huʼna lapateʼnova koteʼmo lapavalelinuno lapategaiye.

²¹ Agaefeʼmo koli huʼnetapa geʼamo afitetapa akame hiyo. Nagae nagimo agaepiʼmo haneʼniyaʼmofeʼmo kayoʼmo lapamisiya agufa kavaʼmo osiyo. Hosu kavatapimo alino oʼatalegaiyaʼmofeʼmae.

²² Hugiyaʼmonanafa lapa paisuva gemo alagi akame hutetapa afisayaʼmoʼmo nagaemo kame vayatapiʼeʼmo kamemo huge ohapauʼnigeʼa apaini huʼa nelapataya vayaʼmo naini huʼna apategauve.

²³ Nagaemo enisole vekaʼnimo uno hogoteteno lapavalelino uno Emo vayaʼmogi kotenagi Hiti vayaʼmogi kotenagi Pelesi vayaʼmogi kotenagi Kenani vayaʼmogi kotenagi Hivi vayaʼmogi kotenagi Yemusi vayaʼmogi kotenagi huno lapatesigeʼnaeʼmo ani vayaʼeʼmo kamemo huteʼna hapaeʼna hano huʼna apatalegauve.

²⁴ Lapakaemo ani vayaʼmogi gotiʼapimogitefeʼmo lapaleʼyamo ofaige akame hutapa mono osuge apakae kavaʼmo akame osuge hutetapa aigofe gotiʼapimogi apauneʼamo amagitapa aita atagitapa ataleyo.

²⁵ Ina kava hutapa Ala kava neʼmo Gotitapimoʼnamo aliʼyaʼnimo alisageʼna nagaemo lapa maeʼna neʼyaʼmo lapamige aniʼmo lapamige lapakaepatiʼmo muki kaitatapimo aliʼna lahapageʼna lapatege huguve.

²⁶ Aʼnetapimogimo falisaya mafaʼnemo aliʼa oʼapatege anamoʼmo oʼmaige hugae. Maisaya afinatapimo lapaʼmaegauvaʼmofeʼmo avaleliʼna emineʼna aliʼna hogo osuʼna lapaʼmaesugetapa alagepa hutapa yatala afinaʼmo mailitutapa atupaleʼmo avaʼyi hugae.

²⁷ Nagaemo koli hisaya kavaʼnimo aliʼna atesugeno uno hogotegaiyanageʼa kame vayatapimo ika ika hugae. Nagaemo aliʼna he tiʼna apatesugeʼa lapakaetegatiʼmo ataleʼa apaune hegae.

²⁸ Nagaemo asole avi lumemo anagaʼmo aliʼna apatesugeʼa uʼa hogoteteʼa Hivi vayanagi Kenani vayanagi Hiti vayanagi huʼa aliʼa hapa faiʼa apatalegae.

^29-30 Nagaemo magoke kafugafiʼmo muki vayaʼamo aliʼna hapa faiʼna oʼapataleʼna mago vayaʼmo aliʼna hapa faiʼna apataleteʼna mago vayaʼamo henagaʼamo aliʼna hapa faiʼna apataleteʼna nehisugetapa lapakaemo asole vayaʼmo afole aitetapa muki mopaʼamo aligae. Nagaemo malage huʼna aliʼna hapa faiʼna oʼapatalesuvaʼmoʼmo fiku yanageno mopamo afaʼa haneʼnisigeʼa asole afela afu anagaʼmo eʼa maiʼneʼa lahapaegae.

³¹ Nagaemo mopatapimo hakuʼmo haesa solovala ani agiʼnaletiʼmo uno Filisatini vayaʼai ani agiʼnaleʼmo utesigeʼna magoʼe huʼna alime uʼna lapategauve. Mago hakuʼmo kaʼme kotegatiʼmo uno Yufaletisi aniʼmo agiʼnaleʼmo uno lamitesigeno lapakae hakuʼmo hanegaiye. Nagaemo lokiya vaiʼna lapatesugetapa ani mopaleʼmo maiʼnaya vayaʼmo uta alita hapa faitapa apatalegae.

³² Lapakaemo apakaeʼeʼmo magokepi kotalakemo osuge gotiʼapimogiʼeʼmo kotalakemo osuge hiyo.

³³ Apakaemo afaʼa apategeʼa lapakae mopaleʼmo oʼmaiyo. Fiku yanageʼa aliʼa he tiʼa lapatesagetapaeʼmo hosu mono kavaʼmo hutetapa nagaetegamo hosu kavaʼmo hugae. Aigofe gotiʼapimogi aliʼyaʼmo alisayaʼmoʼmo aneʼaifiʼmo hegekana hutapa asagautapa aigae.