Hatu maeno apate'niya gemae 21 - The Keyagana NT and 25 OT books

Kalavusi aliʼyaʼmo alisaya vayaʼaiteʼmo yagaiʼa apatesaya kavafeʼmo huʼniya gemae

¹ Ala kava neʼmoʼa magoʼe gemo huno Mosesefe ha painoʼaeʼmo, Mani keʼaepa gemo Isaleli vayaʼaifeʼmo hapa paiyo.

² Lapakaemo lapakaitapi Himulu vayapatiʼmo kalavusi aliʼyaʼmo aligefeʼmo hisiyana sigisiʼa kafugamo aliʼyatapimo alitesigetapa seveni kafugaleʼmo hatu maetapa atesageno ugiye. Agaemo miyaʼmo olapamisigetapa fikumo atesageno ugiye.

³ Agaiʼageʼmo eno kalavusi aliʼya aliʼnisiyaʼmoʼmo agaiʼamo afaʼa atesageno ugiye. Aʼmo aliʼneno eno kalavusi aliʼyaʼmo aliʼnisiyaʼmoʼmo aʼaʼeʼmo afaʼa anatesageʼana ugaʼae.

⁴ Aliʼyaʼmo afoʼamoʼmo aʼmo avaleno amisigeno mafaʼnemo alino apateʼnisiyaʼmoʼmo itaʼapimoʼe mafaʼne anagaʼaʼeʼmo aliʼyaʼmo afoʼamoʼmo agaiʼa yaʼmogeno afaʼa apateteno agaiʼageʼmo ugiye.

⁵ Ani kalavusi aliʼyaʼmo alisiya vekamoʼmo hunoʼaeʼmo, Aliʼyaʼmo afoʼamofenagi aʼniyenagi mafaʼneʼniyenagi huno nahau nayamopafiʼmo nahauʼniyanageʼna apataleʼna oʼuguve, huno hisigenoʼaeʼmo,

⁶ aliʼyaʼmo afoʼamoʼmo agoti gemo neʼafiya vayaʼaitegamo avalelino ugiye. Henagaʼamo kipateʼmo avalelino uno ateʼneno nekayaletiʼmo agesamo aeno atetesigenoʼaeʼmo ani vekamo kalavusi aliʼyaʼmo alime alime uno faligiye.