Hatu maeno apate'niya gemae 20 - The Keyagana NT and 25 OT books

Gotiʼa naya loleʼa keʼaepa gemo apamiʼniya gemae

¹ Gotiʼa muki geʼamo ina ge huno hapa paiʼniye.

² Nagaemo Ala kava neʼmo Gotitapimoʼnamo maiʼneʼnaeʼmo Isipi kotegamo kalavusi lahapaise vose hutapa aliʼyaʼmo aliʼnageʼnaeʼmo lapavaleliʼna eʼnove.

³ Alu gotigitefeʼmo mono osutapa nagaetefeʼmo mono hiyo.

⁴ Lapakaemo lapaleʼyamo faiʼnetapa mono hisayafeʼmo yosaletiʼmofi yafatetiʼmofi mago alu ya alu yatetiʼmofi kokuʼnapiʼmo haneʼniya yaʼmo auneʼamofi ma mopafiʼmo haneʼniya yaʼmo auneʼamofi anipiʼmo haneʼniya yaʼmo auneʼamofi hutapa alo osiyo.

⁵ Nagaemo Ala kava neʼmo Gotitapimoʼnamo neʼmauva naimuʼyaleʼmo maiʼnaya aigofe gotigifeʼmo naipa kafamo hapaeteʼna kaino nefauva vekamo maiʼnovaʼmofeʼmo alu gotigitefeʼmo lapaleʼyamo faiʼnetapa ape hutapa mono osiyo. Afoʼapimogi hosu kavaʼapilefeʼmo nagaefeʼmo ohapauʼnigeʼa apaini huʼa neʼnataya vayaʼmogi mafaʼne anagaʼapimo nagaemo kayo apamiguve. Nagaemo mafaʼneʼapimogi aliʼa apatesaya mafaʼnemo kayoʼmo apamige apakaemo aliʼa apateme apateme visaya mafaʼnemo kayoʼmo apamige huguve.

⁶ Nagaefeʼmo nohapaiya vayaʼmo kayoʼmo apamiguvaʼmonanafa nagaefeʼmo hapauʼnigeʼa keʼaepa geʼnimo akame nehaya vayaʼmo tauseni tauseniʼa vayaʼaifeʼmo nahau huʼna apategauve.

⁷ Lapakaemo Ala kava neʼmo Gotitapimo agiʼaleʼmo fikumo oʼaeyo. Mago vayaʼmogimo agiʼaleʼmo fikumo aesayaʼmoʼmo Ala kava neʼmoʼa kayoʼmo apamigiye.

⁸ Lapakaemo Sapati afinafeʼmo lapake okanitapa lapakesamo afitetapa alitapa aote afinaʼmo malegae.

⁹ Lapakaemo magoke sotafiʼmo sigisiʼa afinaʼmo muki lapakaitapi aliʼyaʼmo aligae.

¹⁰ Aligayaʼmonanafa seveni afinaʼmo Ala kava neʼmo Gotitapimoʼnalefeʼmo alita aote afinaʼmo malegae. Sapati afinaʼmo maitapa haga lesaya afinaʼmo haneʼniyanagetapa aliʼyaʼmo oʼaligae. Lapakaitapigi mafaʼnetapigi aliʼyatapimo neʼaliya vayanagi afutapigi alu kotegatiʼmo eʼa lapakaeʼeʼmo magokepi lokaeʼa maiʼnisaya vayanagi hutapa aliʼyaʼmo oʼaligae.

¹¹ Ala kava neʼmoʼa sigisiʼa afinaʼmo kokuʼnanagi mopagi solovala aninagi muki alu ya alu yaʼmo haneʼniya yanagi huno alo huno hano huteno seveni afinaʼmo maino haga leʼniyaʼmofeʼmo Ala kava neʼmoʼa Sapati afinaʼmo alagepa huno aoteʼmo haneno, huno hu maleʼniye.

¹² Itatapi afotapimogi apakiʼapileʼmo alita asagautetapa geʼapimo afitetapa akame hiyo. Ala kava neʼmo Gotitapimoʼnamo magoʼe huʼna yatala afinaʼmo lapamisugetapa ma mopafiʼmo maigayanagi.

¹³ Vayaʼmo kamitimo oʼapamagiyo.

¹⁴ Kumai kavaʼmo osiyo.

¹⁵ Kumayaʼmo oʼaliyo.

¹⁶ Mago alu vekaeʼmo aigofe gemo ha opaiyo.

¹⁷ Lapakaemo mago vayaʼmogi noʼapiyeʼmofi aʼapiyeʼmofi aliʼyaʼapimo neʼaliya vayaʼaifeʼmofi aliʼyaʼapimo neʼaliya aʼneʼaifeʼmofi pulumakaʼapiyeʼmofi nokiʼapiyeʼmofi muki yaʼapiyeʼmofi huno lapaʼye osino, huno hapa paiʼniye.

Vayaʼmogimo Gotifeʼmo koli huʼnaya gemae

¹⁸ Hakalu huteno alino alave huteno aeno haleʼnigeno pikulimoʼmo age aiʼniya kavaʼmo muki vayaʼmogimo ageteʼa afiʼnae. Avefatiʼmo alopa halinamo aiʼnigeʼa ageteʼapaeʼmo koli huteʼa aveletiʼmo ataleʼa alime alime uʼa afagiʼaleʼmo he tiʼa maiʼnae.

¹⁹ Apakaemo Mosesefeʼmo ha paiʼapaeʼmo, Kagaekeʼmo laha paigeta afino. Gotiʼa laha paisiyaʼmoʼmo fiku yanageta faligune, huʼa huʼnae.

²⁰ Moseseʼa hapa painoʼaeʼmo, Lapakaemo koli osiyo. Gotiʼa lapamalageka hisiyafeʼmo emineʼniye. Ani kavatetiʼmo koli hutetapaeʼmo hosu kavaʼmo osisayafeʼmo emineno lapamalageka huʼniye, huno hapa paiʼniye.

²¹ Inagi muki vayaʼmo uʼa afagiʼaleʼmo maiʼnageno Moseseʼmo lusi kava huno hani huʼniya hiyapiʼmo Gotiʼa maiʼnigeno ani hiyaʼmo haopaleʼmo uʼniye.

Ofalinimo hisaya yaʼmo malesaya hiʼyalamufeʼmo huʼniya gemae

²² Ala kava neʼmoʼa Mosesefe ha painoʼaeʼmo, Isaleli vayaʼaifeʼmo ina gemo huka hapa paiyo, huno ha paiʼniye. Ala kava neʼmoʼnamo huʼnaʼaeʼmo, Ago afiʼnageʼna nagaemo kokuʼnapatiʼmo lapakaetegamo ge huʼnove.

²³ Afiyo, huʼna, Lapakaemo goli yafatetiʼmofi siluva yafatetiʼmofi hutapa aigofe gotigimo nagaeʼeʼmo magokepi lokaeʼa maisayafeʼmo alo osiyo.

²⁴ Lapakaemo mago mopamo alitetapaeʼmo nagaetefeʼmo ofalinimo hisaya yaʼmo malesaya hiʼyalamuʼmo hugae. Ani hiʼyalamuteʼmo sipisipi ofalinimofi pulumaka ofalinimofi hutapa atafiʼmo kaetapa alagi asagalitapa namige nagaeʼe lapakaeʼeʼmo magoke laipa lagesamo alita maisuna ofalinimo namige hugae. Nagaemo lekana pai malesugetapa maiʼnetapa mono hisageʼna ala nagiʼnimo alisuva mopaleʼmo lapakaetegamo emiʼneʼnaeʼmo alagepa hutapa maiyo, huʼna lapa paiguve.

²⁵ Lapakaemo yafa hiʼyalamuteʼmo ofalinimo hisaya yaʼmo malesaya hiʼyalamuʼmo hisayafe hutapaeʼmo vayaʼmogi amagiʼa naku paesaya agufa yafatetiʼmo ani hiʼyalamuʼmo osiyo. Aeni kayotetiʼmo amagita naku paesayana nagaetefeʼmo mono hisaya hiʼyalamuʼmo alagi alita hosu hutapa atalegae.

²⁶ Hakayaletiʼmo uta haitapa ani ofalinimo hisaya agufa hiʼyalamuʼmo osiyo. Fiku yanagetapa hakayaleʼmo uta nehaisageʼapaeʼmo vayaʼmogimo lapavagage yatapileʼmo lapakegae.