Hatu maeno apate'niya gemae 2 - The Keyagana NT and 25 OT books

Moseseʼmo itaʼamoʼmo alino ateʼniya gemae

¹ Ani afinaʼmo mago Livai nofi vekamoʼmo Livai nofi a kanomo aliʼniya a kanomoʼmo

² aipaguʼeʼmo maiteno ve mafaʼnemo alino ateʼniye. Ageʼniyana alagepa mafaʼnemo maiʼnigeno agetenoʼaeʼmo loleʼe magoʼe agufa kaimo alino fala kino ateʼniye.

³ Inagi magoʼe huno alino fala kino atesiya kavaʼmo osuʼnigenoʼaeʼmo hona yuvapamo alino kameletiʼmo faleno aeno kaniteno ani yuvapafiʼmo mafaʼneʼamo havaeno ateteno alinino uno lamino ani haigileʼmo haneʼniya akepapiʼmo fala kino ateʼniye.

⁴ Ani mafaʼnemo asaʼamoʼmo mago aise afagiʼaleʼmo he tino maiʼneno ani mafaʼneleʼmo na agufa kavaʼmo afole aisifi, huno ageno maiʼniye.

⁵ He tino maiʼnigeʼapaeʼmo kini vekamo Felo a mafaʼneʼe aliʼyaʼamo neʼaliya a mafaʼne anagaʼeʼmo anitegamo eʼnae. Felo a mafaʼnemoʼmo aniʼmo faleʼnigeʼapaeʼmo aliʼyaʼamo neʼaliya a mafaʼne anagaʼmo ani agiʼnaleʼmo uʼeʼa nehuʼapaeʼmo ageyana hona yuvapamo akepapiʼmo haneʼnigeno agetenoʼaeʼmo aliʼyaʼamo neʼaliya a mafaʼnemo alino ateʼnigeno uno alinino eʼniye.

⁶ Kini vekamo a mafaʼnemoʼmo hona yuvapamo avayaʼamo alino akalino ageʼniyana ve mafaʼnemo maiʼneno aviʼyaʼmo nehigeno agetenoʼaeʼmo hau huno ateteno, Ani mafaʼnemo Himulu nofi vayaʼmogi mafaʼnemo maiʼniye, huno huʼniye.

⁷ Ani mafaʼnemo asaʼamoʼmo eno Felo a mafaʼneeʼmo ina ge huno afi geʼniye. Nagaemo uʼna mago Himulu nofi a kanoeʼmo ha paisugeno eno nuʼmo kagaikalefeʼmo amiteno yagaino atesifiye, huno afi geʼniye.

⁸ Felo a mafaʼnemoʼmo, he kanalenagi uka ge hugeno eno, huno ha paiʼnigeno uno ani mafaʼnemo itaʼamofeʼmo ge huʼnigeno eʼniye.

⁹ Felo a mafaʼnemoʼmo ha painoʼaeʼmo, Ani mafaʼnemo avalelika uka nuʼmo amiteka agaika nato miyaʼmo kamiguve, huno ha paiʼniye. Inagi itaʼamoʼmo mafaʼneʼamo avalelino uno nuʼmo amiteno againo ateʼniye.

¹⁰ Ani mafaʼnemo kosino alopa heʼnigenoʼaeʼmo itaʼamoʼmo avalelino uʼnigeno Felo a mafaʼnemoʼmo agaiʼa mafaʼneʼagana huno avaleno agaiʼniye. Nagaemo anipatiʼmo avaleʼnova mafaʼnemae, huteno agiʼamo Moseseʼae huno ateʼniye.

Moseseʼmo aune hetaleno Mitiyani kotegamo uʼniya gemae

¹¹ Inagi henagaʼamo, Moseseʼa kositenoʼaeʼmo uno vayaʼamo Himulu vayaʼmo apakeʼniyana lusi hapaise vose aliʼyaʼmo neʼaligeno apakeʼniye. Moseseʼa ageʼniyana Isipi vekamoʼmo agaiʼa nofi vekamo Himalu vekamo neʼamagigeno ageʼniye.

¹² Inagi Moseseʼa vayafeʼmo aulu helinuneno huʼniyana vayaʼmo oʼapakeʼniye. Oʼapakeʼniyaʼmofeʼmo ani Isipi vekamo alagi kamitimo amagiteno ani kahaepafiʼmo keli kafiteno alino aeno ati kaeno ateʼniye.

¹³ Inagi egaʼamo Moseseʼa halate uno anakeʼniyana lole Himulu vekalaʼmo kaveta nehaʼageno anaketenoʼaeʼmo, aepa faino kaveta huʼniya vekaeʼmo, Na kava higekaeʼmo kagaika nofi vekamo neʼamagine, huno afi geʼnigenoʼaeʼmo

¹⁴ Ina laʼmo lagaeteʼmo yagaika lateʼneka agoti getimo afiteka alika fako huka latesana vekamo maigane, huteno lekana paino kateʼniye. Kagaemo Isipi vekamo kamitimo amagiʼnana kava huka nagaemo namagisanafeʼmo nehapiye, huno huʼnigeno Moseseʼa ani gemo afitenoʼaeʼmo, nagaemo huʼnova kavafeʼmo muki vayaʼmogimo ago afiʼnae, huno agesamo afiteno koli huʼniye.

¹⁵ Kini vekamo Feloʼa Moseseʼmo huʼniya kavafeʼmo ava gemo afitenoʼaeʼmo, Moseseʼmo amagiyo, huno huʼniyaʼmonanafa Moseseʼa kini vekalegatiʼmo ataleno aune hetaleno uno Mitiyani vayaʼai kotegamo maiʼniye. Uno avaʼyi hutenoʼaeʼmo mago ani keli kotuʼmo haopaleʼmo maiʼniye.

¹⁶ Ani kote vayaʼmo mono huno neʼapateya vekamo agiʼamo Yetaloʼa seveniʼa a mafaʼne anagaʼmo alino apateʼniye. Moseseʼa ani keli kotuteʼmo maiʼnigeʼapaeʼmo ani a mafaʼne anagaʼmogimo aniʼmo he fili uʼa afoʼapimo sipisipi anagaʼmogimo aniʼmo neʼnaya yapiʼmo laki maleʼnisageʼa nesayafeʼmo eʼnae.

¹⁷ Eʼnayaʼmonanafa mago alu sipisipileʼmo yagaiʼa neʼapataya vayaʼmogimo eʼa ani a mafaʼne anagaʼmo aliʼa hapafaiʼa apataleʼnae. Aliʼa hapafaiʼa apataleʼnayaʼmonanafa Moseseʼa he tino ani aʼmafaʼne anagaʼmo hapa maeno aniʼmo he fino sipisipi anagaʼapimo apamiʼniye.

¹⁸ Henagaʼamo Luveliʼa alu agiʼamo Yetaloʼmo afoʼapimotegamo eʼnagenoʼaeʼmo haiya kava hutapa hemenimo malage hutapa eʼnae, huno apafi geʼnigeʼapaeʼmo

¹⁹ apakaemo ha paiʼapaeʼmo, Mago Isipi vekamoʼmo laha maeno sipisipileʼmo neʼyagaiya vayaʼai apayapatiʼmo lagufamo aliʼa katino lateʼniye. Ani vekamoʼmo sipisipitimo aniʼmo he fino apamiʼniye, huʼa ha paiʼnageno

²⁰ agaemo a mafaʼne anagaʼaeʼmo, ani vekamo haiyaʼaleʼmo maiʼniye. Na kava higetapaeʼmo anileʼmo ataletapa eʼnae. Utapa ani vekaeʼmo ge higenoʼao esigeta lagaeʼeʼmo magokepi neʼyaʼmo negaune, huno hapa paiʼnigeʼa uʼa Moseseʼmo avaleliʼa eʼnae.

²¹ Yetaloʼa Mosesefeʼmo, lagaeʼeʼmo lokaeka maiyo, huno ha paiʼnigeno Moseseʼa he, ani kavaʼmo huguve, huno huʼnigenoʼaeʼmo Yetaloʼa mago a mafaʼnemo agiʼamo Sipolaʼmo avaleno amiʼnigeno aliʼniye.

²² Sipolaʼa aipaguʼeʼmo maiteno mafaʼnemo alino ateʼnigeno Moseseʼa hunoʼaeʼmo, Nagaemo alu kotega vekamo eʼna mani koteʼmo maiʼneʼna mafaʼnemo aliʼna ateʼnove, huno huʼniyaʼmofeʼmo agiʼamo Gesomiʼae, huno ateʼniye.

²³ Henagaʼamo Isipi vayaʼaiteʼmo yagaino apateʼniya kini vekamo ago faliʼniye. Isipi vayaʼmogimo Isaleli vayaʼmo kalavusi aliʼyaʼmo apamiʼnageʼa lusi kana yaʼmo aliteʼa yulagefa aige ge huge huʼa maiʼnaya gemo Gotiʼa afiʼniye.

²⁴ Apakaemo aliʼa apamalagiʼnagenoʼaeʼmo Gotiʼa afiteno Emalehamufenagi Aisakifenagi Yekopufenagi huno Kenani kotega mopamo lapamiguve, huno hapa paiʼniya kotalakeʼaeʼmo agesamo afiʼniye.

²⁵ Afiʼniyaʼmofeʼmo Isaleli vayaʼmo apaketenoʼaeʼmo apakaefeʼmo hunoʼaeʼmo, Vayaʼnimogi maiʼnae, huno huʼniye.