Hatu maeno apate'niya gemae 19 - The Keyagana NT and 25 OT books

Isaleli vayaʼmo eʼa Sainai avefiʼmo maiʼnaya gemae

^1-2 Isaleli vayaʼmo Isipi kotetiʼmo ataleʼa uʼapaeʼmo Lefinimi koteʼmo maigeʼa ataleʼa napa tali kaileʼmo kaʼme koʼmo Sainai koteʼmo uʼa avaʼyi huʼnae. Apakaemo Sainai avemo haopaleʼmo seli noʼapimo aliʼa he tiʼa ateteʼa maiʼnae.

³ Moseseʼa Gotitegamo ani avefiʼmo uno haiʼnigeno Ala kava neʼmo ani avefiʼmo maiʼneno Mosesefeʼmo ina ge huno keya aeno ge huno ha paiʼniye. Kagaemo Yekopu nofi vayaʼmo Isaleli vayaʼaifeʼmo ina ge huka hapa paiyo.

⁴ Nagaemo Isipi vayaʼaitegamo huʼnova kavaʼnimo lapakaemo ago ageʼnae. Nagaemo hakikimoʼa hakufiʼmo agapamo avalelino neʼviya kava huʼna lapavaleliʼna eʼnogetapa nagaetegamo eʼnae.

⁵ Inagi lapakaemo kotalakeʼnimo atafautapa alagi huʼnetapa geʼnimo akame hisayana muki vayapatiʼmo nagaiʼnilefeʼmo lekana paiʼna lapateʼnova vayaʼnimo maigae. Muki ma mopafi haneʼniya yaʼmo nagaiʼni yaʼageʼmo haneʼniyaʼmofeʼmae.

⁶ Nagaemo kini vekatapimo maiʼneʼna yagaiʼna lapatesugetapa naulagaleʼmo vayaʼaiteʼmo mono hutapa apatesaya vayaʼmo maige lapaote vayaʼnimo maige hugae, huka hapa paiyo.

⁷ Inagi Moseseʼa avefatiʼmo uno lamino Isaleli vayatama vayaʼaifeʼmo ge huʼnigeʼa eʼnageno Moseseʼa mani gemo Ala kava neʼmoʼa hiyo, huno ha paiʼniya gemo hapa paiʼniye.

⁸ Muki vayaʼmogimo ani gemo afiteʼapaeʼmo, Ala kava neʼmoʼa lagaefeʼmo muki ani kavaʼmo hiyo, huno huʼniya kavaʼmo hugune, huʼa ha paiʼnageno Moseseʼa uno Ala kava nefeʼmo huʼnaya gemo ha paiʼniye.

⁹ Ala kava neʼmoʼa Mosesefeʼmo ina ge huno ha paiʼniye. Afiyo, huʼna, Nagaemo alopa hiyapiʼmo maiteʼna kagaetegamo emiʼneʼna kaha paisugeʼa Isaleli vayaʼmogimo ani gemo afigayaʼmofeʼmo muki afinaʼmo hisana geeʼmo lama gemo nehane, huʼa hugae. Inagi Moseseʼa vayaʼmogimo huʼnaya gemo Ala kava nefeʼmo ha paiʼniye.

¹⁰ Inagi Ala kava neʼmoʼa Mosesefeʼmo ha painoʼaeʼmo, Naulagaleʼmo he tiʼa maisayafeʼmo kagaemo uka hemeniʼe egaʼeʼmo apavaleka apaote apato. Muki vayaʼaifeʼmo, kukenatapimo sese hiyo, huka hapa paiyo.

¹¹ Olagaʼamo alo hiyo, huka hapa paiyo. Ema olagaʼamo nagaemo Sainai avefiʼmo eminesugeʼa muki vayaʼmogimo nagegae.

¹² Kagaemo avemo aiyaʼafiʼmo vayaʼmo afaʼa oʼmesayafeʼmo kaʼmo akanika vego hu malo. Hu maleteka ina ge huka hapa paiyo. Ehetapiye, huka, lapakaemo kaʼmo akani malesaya yaʼmo aeta haletapa avefiʼmo ohaige avemo aiyafiʼmo oʼmege aveleʼmo ame oʼalige hiyo, huka hapa paiyo. Ina lagimo aveleʼmo ame alisafi kamitimo apamagigae.

¹³ Apayatetiʼmo apagufaleʼmo apatafauʼneʼa oʼapamagiyo. Yafa kayotetiʼmo apamagige keveletiʼmo hapaege hugae. Mago vekamoʼmofi afumoʼmofi huno ka akani maleʼnisaya yaʼmo aeno haleno uno haisigeʼapaeʼmo kamitimo amagisageno faligiye. Pikulimoʼmo yatala afinaʼmo age aitesigetapaeʼmo ave haopaleʼmo afaʼa egae, huno ha paiʼniye.

¹⁴ Inagi Moseseʼa avefatiʼmo uno lamino vayaʼmo apavaleno apaote apateʼnigeʼa kukena yaʼapimo sese huʼnae.

¹⁵ Moseseʼa hapa painoʼaeʼmo, Olagaʼeʼmo alagepa hutapa maisayafeʼmo alo hiyo. Lapakaemo aʼnetapiʼeʼmo magokepi lokaetapa ohavaeyo, huno hapa paiʼniye.

¹⁶ Ema olagaʼamo netepiʼmo alopa hiyaʼmoʼa avemo kino ati kaeʼnigenoʼaeʼmo alino alave huteno hakalu nehigenoʼaeʼmo alopa gefatiʼmo pikulimo huʼnigeʼa seli noʼapimo haneʼniya yateʼmo muki maiʼnaya vayaʼmogimo afiteʼa lusi kava huʼa atete huʼnae.

¹⁷ Moseseʼa seli noʼapiletiʼmo Gotiʼeʼmo uʼa fotu hisayafeʼmo apavalelino uʼnigeʼa uʼa avemo aiyafiʼmo maiʼnae.

¹⁸ Ala kava neʼmo ata vaipiʼmo maiteno emineʼniyaʼmofeʼmo Sainai avefatiʼmo halinamoʼmo huteno avemo aino atikaeʼniye. Alopa sitopufatiʼmo lusi kava huno halinamo ailino uno nehaiya kava huno halinamo aiʼnigeno avefiʼmo alopa imimaʼmo aliʼniye.

¹⁹ Pikulimoʼmo alino alopa huno age aiteno alino ala ala hulino neʼvigenoʼaeʼmo Moseseʼa Gotifeʼmo ge huʼnigeno Gotiʼa geʼaleʼmo aeno atagaina huno age aiʼniye.

²⁰ Inagi Ala kava neʼmo emineno Sainai avefiʼmo maiʼnenoʼaeʼmo Mosesefeʼmo ge huʼnigeno Moseseʼa uno haiʼniye.

²¹ Ala kava neʼmoʼa agaefeʼmo ha painoʼaeʼmo, Kagaemo uka lamika muki vayaʼaifeʼmo, ehetapiye, huka, fiku yanagetapa Ala kava neʼmo agegaune hutetapa kaʼmo akani maleʼniya kaʼmo aeta haletapa uta haisayategamo faligae, huka hapa paiyo.

²² Mono huʼa neʼapataya vayaʼmo nahaopaleʼmo eʼa hogo nehaya vayaʼmogiʼeʼmo apakaiʼapimo aliʼa apaoteʼmo apateteʼa maigae. Fiku yanageʼna kayoʼmo apamiguvanagi aliʼa apaote apateteʼa maiyo.

²³ Moseseʼa Ala kava nefeʼmo, Kagaemo avemo aiyafiʼmo ka akanitapa vego hu malesageno avemo aoteʼmo haneno, huka laha paiʼnanaʼmofeʼmo vayaʼmo Sainai avefiʼmo afaʼa uʼa ohaigae, huno ha paiʼniye.

²⁴ Ala kava neʼmoʼa geʼaleʼmo aeno atagaina hunoʼaeʼmo, Kagaemo uka lamika Eloniʼmo avalelika eka haikeno. Haikeganaʼmonanafa mono huʼa neʼapataya vayaʼe muki vayaʼeʼmo ka akani maleʼnana kaʼmo aeʼa haleʼa avefiʼmo eʼa hai oʼmegae. Fiku yanageʼna kayoʼmo apamiguve, huno ha paiʼniye.

²⁵ Moseseʼa ani gemo afitenoʼaeʼmo uno lamino vayaʼaifeʼmo ani gemo hapa paiʼniye.