Hatu maeno apate'niya gemae 18 - The Keyagana NT and 25 OT books

Yetalo ayemoʼamoʼmo Mosesetegamo eʼniya gemae

¹ Yetaloʼa Mitiyani vayaʼaiteʼmo mono huno neʼapateya vekamo Mosese ayemoʼamoʼmo Gotiʼa Mosesetegaʼe Isaleli vayaʼaitegaʼeʼmo huʼniya kavafeʼmo ava gemo afiʼniye. Agaemo Ala kava neʼmoʼa Isaleli vayaʼmo Isipi kotegatiʼmo apavalelino eʼniya kavafeʼmo ava gemo afige huʼniye.

² Hogoteno Moseseʼa aʼamo Sipolaʼe lole mafaʼneʼalaʼeʼmo alino apateʼnigeʼa uʼa Sipola afoʼamogiʼeʼmo maiʼnae.

³ Moseseʼa hunoʼaeʼmo, nagaemo nata vekamo eʼna mani koteʼmo maiʼnove, huno huʼniyaʼmofeʼmo yege mafaʼneʼaeʼmo agiʼamo Gesomiʼae huno ateʼniye.

⁴ Henagaʼamo anile alino ateʼniya mafaʼneʼaeʼmo, Afoʼnimo Gotiʼamoʼmo nagaemo naha maeʼnigeno Isipi kini vekamoʼmo namagiʼnigeʼna ofaliʼnove, huno huʼniyaʼmofeʼmo agiʼamo Eliyesaʼae huno ateʼniye.

⁵ Inagi Mosese ayemoʼamoʼmo Yetaloʼa Mosese aʼe lole mafaʼneʼalaʼeʼmo apavalelino Mosesetegamo eʼniye. Moseseʼa kaʼme kotega Goti avemo haopaleʼmo maiʼnigeʼapaeʼmo Isaleli vayaʼmogi seli noʼapimo aliʼa he tiʼa ateteʼa maiʼnae.

⁶ Hogoteno Yetaloʼa Mosesetegamo ina ge huno atalegeno uʼniye. Nagaemo kayemokamoʼna Yetaloʼnamo akaʼe lole mafaʼnekalaʼeʼmo apavaleliʼna neʼove, huno ge huno atalegeno uʼniye.

⁷ Moseseʼa ani gemo afitenoʼaeʼmo kategamo uʼnigeʼana Yetaloʼeʼmo fotu huteʼanaeʼmo ape huno ateteno haeno neʼniye. Anakaemo maiʼnaʼa kavafeʼmo ge huge afige huteʼanaeʼmo Mosese seli nopiʼmo uʼa haiʼnae.

⁸ Moseseʼa ayemoʼamofeʼmo Ala kava neʼmoʼa kini vekamo Felotegamo huʼniya kavafenagi Isipi vayaʼaitegamo huʼniya kavafenagi Isaleli vayaʼmo hapa maeʼniya kavafenagi huno ava gemo huno ha paiʼniye. Apakaemo kategamo neʼuʼapaeʼmo alu kana alu kana yaʼmo aliʼnageno Ala kava neʼmoʼa hapa maeʼnigeʼa alagepa huʼa maiʼnaya kavafeʼmo ava gemo huno ha paiʼniye.

⁹ Ala kava neʼmoʼa Isipi vayaʼai apayapatiʼmo Isaleli vayaʼmo hapa maeno apakufamo alino katino apateʼniya kavafeʼmo ava gemo Yetaloʼa afitenoʼaeʼmo amogaga aiʼniye.

¹⁰ Yetaloʼa hunoʼaeʼmo, Ala kava neʼmo agiʼaleʼmo alita asaga huta amuse hugune. Agaemo Isipi vayaʼai apayapatiʼe Felo ayapatiʼeʼmo lapakufamo alino katino lapateʼnigetapa Isipi vayaʼeʼmo oʼmaitapa eta afaʼa maiʼnae.

¹¹ Isipi vayaʼmogi gotiʼapimogimo himu lapateteʼa apakiʼapileʼmo aliʼa asaga huʼnayaʼmonanafa Ala kava neʼmoʼa muki gotigimo ago aeno apaka seʼniyaʼmofeʼmo hemenimo nagaemo ageʼnovana Ala kava neʼmoʼa alu gotigimo alagi ago aeno apaka seʼniye, huʼna ageʼnove, huno ha paiʼniye.

¹² Inagi Yetaloʼa mago ofalinimo alinineno atafiʼmo kaeno Gotiʼmo ofalinimo amiʼniye. Magoʼe huno alu ofalinimo Gotiʼmo amige huʼnigeʼa Eloniʼe muki Isaleli vayatama vayaʼeʼmo eʼa Goti aulagaleʼmo Mosese ayemoʼamoʼeʼmo neʼyaʼmo neʼnae.

Moseseʼa agoti gemo afisaya vayaʼmo lekana paino apateʼniya gemae

¹³ Egaʼamo Moseseʼa Isaleli vayaʼmogi kavaʼapimo alino fako huno apatesiyafeʼmo fai maiʼnigeʼapaeʼmo asole vayaʼmo netepiʼmo eʼa he tiʼa maili uʼa unetiʼnae.

¹⁴ Mosese ayemoʼamoʼmo Moseseʼa vayaʼamo hapa maeʼniya kavaʼmo agetenoʼaeʼmo, Vayaʼmo hapa neʼmana kavaʼmo haiya agufa kavaʼmo huʼnane. Na kava higekaeʼmo kagaikageʼmo fai maiʼnanageʼapaeʼmo kaulagaleʼmo asole vayaʼmo eʼa he tiʼa netepatiʼmo maili uʼa unetiʼnae, huno ge huno afi geʼniye

¹⁵ Moseseʼa ha painoʼaeʼmo, Vayaʼmogimo Gotiʼa ge hisiya gemo afisayafeʼmo nagaetegamo eʼnae.

¹⁶ Mago vayaʼmo mago kavatefeʼmo ge vaiteʼapaeʼmo nagaetegamo eʼnageʼna aliʼna fako huʼna apateteʼna Goti keʼaepa geʼamo aliʼna apaya neʼmalove, huno ha paiʼnigeno

¹⁷ Mosese ayemoʼamoʼmo ha painoʼaeʼmo, Ani nehana kavaʼmo kanale osuʼniye.

¹⁸ Mani aliʼyaʼmo lusi alopa aliʼyaʼmo haneʼniyaʼmofeʼmo kagaikageʼmo afaʼa oʼaligane. Kagaikaʼe mani he tiʼa maiʼnaya vayaʼeʼmo lusi kava huno alagaʼmo lahapaesigetapa alagepa hutapa oʼmaigae.

¹⁹ Hemenimo geʼnimo afiyo. Aliʼyakamo alagepa huno afole aisiya kavafeʼmo kaha paigesuve. Kaha paisugenoʼaeʼmo Gotiʼa kagaeʼeʼmo magokepi lokaeno maigiye. Kagaemo vayaʼmogi kana yaʼapimo alinika uka Gotiʼmo amisanafeʼmo vayaʼaitefeʼmo Goti aulagaleʼmo he tika maigane.

²⁰ Kagaemo Goti geʼamo avoʼmo kae maleʼnaya geʼe keʼaepa geʼeʼmo alika apaya malege akame huʼa visaya kaʼmo alika apave lige aliʼyaʼmo alisayafeʼmo ani kavaʼmo hutapa aliʼyaʼmo aliyo, huka hapa paige hugane.

²¹ Kagaemo muki vayapatiʼmo alagepa huʼa aliʼyaʼmo alisaya vayaʼmo maige Gotifeʼmo koli huge lama gemo huge hapaʼye osuge huʼa maiʼnisaya vayaʼmo lekana paika apato. Magoʼamogimo vani tauseniʼa vayaʼaiteʼmo yagaiʼa apatege magoʼamogimo vani hataletiʼa vayaʼaiteʼmo yagaiʼa apatege magoʼamogimo fifitiʼa vayaʼaiteʼmo yagaiʼa apatege magoʼamogimo teniʼa vayaʼaiteʼmo yagaiʼa apatege hugae.

²² Kagaemo afaʼa apateʼnisanageʼa vayaʼmogi kavaʼapimo aliʼa fako hugae. Apakaemo alopa hanageke yatefeʼmo eʼa kagaefeʼmo hisageka alika fako huganaʼmonanafa aise hanageke yatefeʼmo apakaiʼapimo afaʼa aliʼa fako hugae. Apakaemo ani aliʼyaʼmo aliʼa kaha maesagenoʼaeʼmo kana okahaugiye.

²³ Kagaemo mani agufa kavaʼmo hisanagenoʼaeʼmo Gotiʼa ani aliʼyaʼmo aliyo, huno hisigeka oʼataleka aliʼyaʼmo aligane. Ani aliʼyaʼmo alisanageʼapaeʼmo muki mani vayaʼmogi apaipamoʼmo falu huʼninageʼa noʼapilegamo ugae, huno ha paiʼniye.

²⁴ Inagi Moseseʼa ayemoʼamoʼmo huʼniya gemo akame huno muki aliyo, huno ha paiʼniya aliʼyaʼmo aliʼniye.

²⁵ Moseseʼa muki Isaleli vayapatiʼmo alagepa huʼa aliʼyaʼmo alisaya agufa vayaʼmo lekana paino apateʼniye. Vani tauseniʼa vayaʼaiteʼmo yagaiʼa apatege hataletiʼa vayaʼaiteʼmo yagaiʼa apatege fifitiʼa vayaʼaiteʼmo yagaiʼa apatege teniʼa vayaʼaiteʼmo yagaiʼa apatege hisaya vayaʼmo lekana paino apateʼniye.

²⁶ Inagi muki afinaʼmo apakaemo agoti geleʼmo yagaiʼnae. Alopa hanageke yatefeʼmo eʼa Mosesefeʼmo ha paigeno alino fako huʼniyaʼmonanafa aise hanageke yaʼamo afaʼa apakaiʼapimo aliʼa fako huʼnae.

²⁷ Inagi Mosese ayemoʼamoʼmo ateʼnigeno koʼalegamo uʼniye.