Hatu maeno apate'niya gemae 17 - The Keyagana NT and 25 OT books

Moseseʼa kayotetiʼmo yafapiʼmo amagiʼnigeno aniʼmo emineʼniya gemae

¹ Muki Isaleli vayaʼmogimo Ala kava neʼmoʼa huʼniya gemo akame huʼa kaʼme koʼmo agiʼamo Sini kotetiʼmo ataleʼuʼa mago koʼmo agiʼamo Lefinimi koteʼmo seli noʼapimo aliʼa he tiʼa ateteʼa maiʼnayaʼmonanafa vayaʼmogimo nesaya aniʼmo alagi ohaneʼniye.

² Ohaneʼniyaʼmofeʼmo Isaleli vayaʼmogi Moseseʼmo ge hauʼapaeʼmo, Kagaemo aniʼmo malage huka lamigeta neno, huʼa huʼnageno Moseseʼa hapa painoʼaeʼmo, Na kava higetapa nagaefeʼmo ge nahauʼnae. Na kava higetapaeʼmo Ala kava neʼmo amalageka hisayafeʼmo nehae, huno huʼniye.

³ Vayaʼmogimo ani koteʼmo anifeʼmo hapauteno apainagamo akaniʼnigeʼa Mosesefeʼmo hagalu hagalu huʼa ge hauʼapaeʼmo, Na kava higekaeʼmo Isipi kotegatiʼmo lavalelika eʼnane. Kagaemo lagaitigi mafaʼne anagatigi muki alu afu alu afu anagatigi huta anifeʼmo falisunafeʼmo kahauʼnifiye, huʼa huʼnae.

⁴ Moseseʼa Ala kava nefeʼmo alopa gefatiʼmo nunumuʼmo hunoʼaeʼmo, Mani vayaʼmogimo yafa kayotetiʼmo namagisayafeʼmo nehayaʼmofeʼmo nagaemo apakaetegamo na agufa kavaʼmo hisuve, huno ge huno afi geʼniye.

⁵ Ala kava neʼmoʼa Mosesefeʼmo ha painoʼaeʼmo, Kagaemo Isaleli vayapatiʼmo mago vayatama vayaʼmo apavalelika uka hogoto. Hayopa kayokaletiʼmo alopa aniʼmo Isipi kotegamo uno nelamiya aniteʼmo amagiʼnana hayopa kayokamo alinika ugane

⁶ Afiyo, huʼna, Nagaemo kaulagaleʼmo Holepi avefiʼmo haneʼniya yafateʼmo he tiʼna maiguve. Kagaemo eka haopaleʼmo maiʼnekaeʼmo yafapiʼmo neʼamagigenoʼao vayaʼmogimo nesaya aniʼmo eminegaiye, huno ha paiʼnigeno Moseseʼa Isaleli vayapati vayatama vayaʼmogi apaulagaleʼmo ani kavaʼmo huʼnigeno aniʼmo emineʼniye.

⁷ Moseseʼa ani kotefeʼmo agiʼamo Masa kone huno atete Melima kone huno atete huʼniye. Masa kone huno ateʼniya agimo aepaʼamo amalageka huʼnaya kone, huno ateʼniye. Melima kone agimo aepaʼamo geletiʼmo kaveta huʼnaya kone, huno ateʼniye. Apakaemo geletiʼmo kavetamo huge Ala kava neʼmo lagaeʼeʼmo magokepi lokaeno maiʼnifi oʼmaiʼnifi huʼa huteʼa amalageka huge huʼnayaʼmofeʼmo ani magoke kotefeʼmo lole agimo ateʼniye.

Isaleli vayaʼe Amaleki vayaʼeʼmo kamemo huʼnaya gemae

⁸ Amaleki nofi vayaʼmogi Lefinimi kotegamo eʼa Isaleli vayaʼeʼmo kamemo huʼnae.

⁹ Moseseʼa Yasuvafeʼmo ha painoʼaeʼmo, Lapakaepatiʼmo mago vayaʼmo lekana paika apavalelikuka Amaleki vayaʼeʼmo kamemo huvo. Egamo nagaemo aise avefiʼmo uʼna haiʼna Goti kayoʼamo nayapiʼmo aliteʼna he tiʼna maiʼnegauve, huno ha paiʼniye.

¹⁰ Yasuvaʼa Moseseʼmo ha paiʼniya gemo akame huʼnigeʼa uʼa Amaleki vayaʼeʼmo kamemo huʼnae. Moseseʼagi Eloniʼagi Hoʼagi huʼa aise avefiʼmo uʼa haiʼnae.

¹¹ Ina kava huno Moseseʼa ayaʼmo alino asagauno maiʼnigeʼapaeʼmo Isaleli vayaʼmogi Amaleki vayaʼmo kamemo huʼa aeʼa apaka seʼnae. Ayaʼmo ataleʼnigeno asagauno aiʼnigeʼapaeʼmo Amaleki vayaʼmogimo Isaleli vayaʼmo kamemo huʼa aeʼa apaka seʼnae.

¹² Henagaʼamo Moseseʼmo ayanupafatiʼmo agafu kiʼnigeno ayaʼmo magoʼe huno alino oʼasagauʼniye. Eloniʼe Hoʼeʼmo mago yafaʼmo aliʼana mopaleʼmo maleʼnaʼageno Moseseʼmo ani yafateʼmo fai maiʼniye. Maiʼnigeʼana Eloniʼe Hoʼeʼmo aluga aluga haopaleʼmo he tiʼana maiʼneʼana ayatalateʼmo aliʼana asagauʼana maiʼnaʼageno yegemo uno lamino faleʼniye.

¹³ Ani kavatetiʼmo Yasuvaʼe Isaleli vayaʼeʼmo Amaleki vayaʼmo naipeletiʼmo kame huʼa aeʼa apaka seʼnae.

¹⁴ Inagi Ala kava neʼmoʼa Mosesefeʼmo ha painoʼaeʼmo, Muki vayaʼmogiʼe henagaʼamo afole aisaya vayaʼmogiʼeʼmo apakesamo afisayafeʼmo ani gemo huka mago mukufiʼmo avoʼmo kaeteka Yasuvafeʼmo halate ha paiyo. Ani avoʼmo kaesana gemo, Ala kava neʼmoʼnamo Amaleki nofi vayaʼmo aliʼna hano huʼna apatalesugeʼa muki vayaʼmogimo apakaefeʼmo magoʼe huʼa apakesamo oʼafigae.

¹⁵ Inagi Moseseʼa ofalinimo hisaya yafa hiʼyalamuʼmo hutenoʼaeʼmo, Ani hiʼyalamufeʼmo Ala kava neʼnimo kalahauʼmeʼnimo maiʼniye, huno agi ateʼniye.

¹⁶ Ala kava neʼmoʼa agoʼyamo ataletenoʼaeʼmo Amaleki vayaʼmogimo yagaino neʼapateya Isaleli vayaʼeʼmo kamemo huʼnayaʼmofeʼmo Ala kava neʼmoʼnamo afole aite afole aite hisaya Amaleki vayaʼeʼmo kamemo hute hute huguve, huno huʼniyaʼmofeʼmo ani hiʼyalamuʼmo huteno ani agimo ateʼniye.