Hatu maeno apate'niya gemae 16 - The Keyagana NT and 25 OT books

Isaleli vayaʼmogimo neʼyaʼapimo mana neʼyaʼmo alige namamo apatafauge huʼnaya gemae

¹ Apakaemo Ilimi kotetiʼmo ataleʼa kaʼme koʼmo agiʼamo Sini koteʼmo uʼa avaʼyi huʼnae. Ani koʼmo Ilimi koʼmo hanete Sainai avemo hanete hutegeno folagapiʼmo haneʼniye. Apakaemo Isipi kotegatiʼmo ataleʼa eʼnaya afinatetiʼmo tu kaimoʼmo fifitini afinaʼmo ani koteʼmo uʼa avaʼyi huʼnae.

² Uʼa avaʼyi huteʼapaeʼmo muki Isaleli vayaʼmogimo Moseseʼe Eloniʼefeʼmo hagalu hagalu huʼa ge hanauʼnae.

³ Apakaemo huʼapaeʼmo, Lanakaemo muki vayaʼamo kaʼme kotegamo laga tesigeta falisunafeʼmo lavalelitana eʼnaʼae. Ala kava neʼmoʼa Isipi kotegamo maiʼnisunageno kamitimo lamagiʼniyesinana kanale huʼniyesine. Isipi kotegamo maiʼnetaeʼmo samofiʼmo afu ameʼamo kaege neʼyaʼmo kaege hutetaeʼmo fai maiʼneta neʼyaʼmo neta lamu huʼnone, huʼa huʼnae.

⁴ Inagi Ala kava neʼmoʼa Mosesefeʼmo ina ge huno ha paiʼniye. Nagaemo kokuʼnapatiʼmo peleti mayamo aliʼna yaga ausugeno ko aigekana huno asagauno aisigeʼa muki vayaʼmo kumatega uʼa lamiʼa magoke afinaʼmo nesaya agufa neʼyaʼmo aligae. Nagaemo keʼaepa geʼnimo akame hisafi osisafigeʼna ani kavatetiʼmo apamalageka huʼna apakegauve.

⁵ Napa sigisi afinaʼmo neʼyaʼmo aliteʼa noʼapifiʼmo aliʼa alu aiteʼapaeʼmo lole afinaʼmo nesaya agufa neʼyaʼmo haneʼniye, huʼa agegae.

⁶ Inagi Moseseʼe Eloniʼeʼmo Isaleli vayaʼaifeʼmo ani gemo huʼana hapa paiʼnaʼae. Uneʼmo Ala kava neʼmoʼa Isipi kotegatiʼmo lavalelino eʼniye, hutapa agegae.

⁷ Lapakaemo Ala kava nefeʼmo hagalu hagalu hutapa ge hauʼnaya gemo afiʼniyaʼmofeʼmo netepiʼmo ha le konali kavaʼamo agegae. Laʼagaemo ina lagitaʼamo maiʼnoʼagetapaeʼmo laʼagaefeʼmo hagalu hagalu hutapa ge laʼahaunae, huʼana hapa paiʼnaʼae.

⁸ Moseseʼa magoʼe gemo hapa painoʼaeʼmo, Ala kava neʼmoʼa agaefeʼmo hagalu hagalu hutapa ge hauʼnaya gemo ago afiʼniyaʼmofeʼmo Ala kava neʼmoʼa asole ameʼamo uneʼmo lapamige netepiʼmo netapa lapamu hutetapa maisaya agufa peleti mayamo lapamige hugiye. Laʼagaemo ina lataʼamo maiʼnoʼae. Lapakaemo laʼagaefeʼmo hagalu hagalu hutapa ge nolahaʼaʼmonanafa Ala kava nefekeʼmo ge nehae, huno hapa paiʼniye.

⁹ Inagi Moseseʼa Elonifeʼmo hunoʼaeʼmo, Isaleli vayaʼaifeʼmo ani ge huka hapa paiyo, huno ha paiʼniye. Ala kava neʼmoʼa hagalu hagalu hutapa ge hauʼnaya gemo ago afiʼniyaʼmofeʼmo nagae nahaopaleʼmo etapa hogo hutapa maiyo, huka hapa paiyo, huno huʼniye.

¹⁰ Eloniʼa Isaleli vayaʼaifeʼmo ani gemo hapa nepaigeʼapaeʼmo aiʼa afe leʼa kaʼme kotegamo aulu heʼa ageʼnayana Ala kava neʼmo ha le konali yaʼamo hiyapiʼmo afole aiʼnigeʼa ageʼnae.

¹¹ Ala kava neʼmoʼa Mosesefeʼmo ina ge huno ha paiʼniye.

¹² Nagaemo Isaleli vayaʼmogimo hagalu hagalu huʼa ge nahauʼnaya gemo ago afiʼnove. Apakaefeʼmo hapa paikaeʼmo, yegemo uno lamino nefaleya kanaleʼmo ameʼamo negae. Netepiʼmo peleti mayamo neta lapamu hutetapa maigae. Netetapaeʼmo nagetapaeʼmo, agaemo Ala kava neʼmo Gotitimoʼmo maiʼniye, hutapa nagegae, huka hapa paiyo, huno ha paiʼniye.

¹³ Uneʼmo asole nama anagaʼmo hifakana nama anagaʼmo haleli eʼa seli noʼapimo haneʼniya yapiʼmo asagauʼa aiteʼa mopaleʼmo aiʼa ati kaeʼnae. Netepiʼmo lao yaʼmo emineno muki maiʼnaya haopalegamo haneʼniye.

¹⁴ Lao yaʼmo ago leno hau hutegenoʼaeʼmo ani kaʼme kotegamo mago lao yaʼmo vego vego huno koʼmopagana huno asole yaʼmo aino akaya heno aise aise huno haneʼniye.

¹⁵ Isaleli vayaʼmogimo ani yaʼmo ageteʼapaeʼmo oʼageʼnaya yaʼmo ageʼnayaʼmofeʼmo mani yaʼmo na agufa yane, huʼa huʼnae. Huʼnagenoʼaeʼmo Moseseʼa hapa painoʼaeʼmo, Ala kava neʼmoʼa peleti mayagana hutapa nesayafeʼmo lapamiʼniye.

¹⁶ Ala kava neʼmoʼa ani yafeʼmo hunoʼaeʼmo, Mukiʼamogitapamo neta lapamu hisaya agufaʼamo alitapa anupa hugae. Afamo anagatapiʼeʼmo nesayafeʼmo aiseʼamo alopa hugekana huʼnisiya agufa samofiʼmo alita maletapa havai tesayaʼmoʼmo alagine, huno hapa paiʼniye.

¹⁷ Isaleli vayaʼmogimo ani gemo akame huʼa magoʼamogimo alaʼamo aliʼnageʼa magoʼamogimo aiseʼamo aliʼa anupa huʼnageʼa huʼnae.

¹⁸ Apakaemo samofiʼmo aliʼnayana asole yaʼmo aliʼniya vekamo yaʼmoʼmo afamo anagaʼamogimo nesaya agufa yaʼmo aeno aga seno magoʼe yaʼmo ohaneʼnigeno aiseʼamo aliʼniya vekamoʼeʼmo kafu osuʼniye. Aiseʼamo aliʼniya vekamoʼmo kafu osuʼniye.

¹⁹ Moseseʼa hapa painoʼaeʼmo, negetapaeʼmo egaʼamo nesaya yaʼmo mago oʼmaleyo, huno hapa paiʼniyaʼmonanafa

²⁰ Moseseʼa hapa paiʼniya gemo magoʼamogimo oʼafiʼa negeʼapaeʼmo maleʼa havaeteʼa egaʼamo he tiʼa ageʼnayana ani neʼyapiʼmo aise aise kanagiʼmoʼa havai teʼnigeno lusi hosu atuʼmo aiʼnigeʼa ageʼnae. Moseseʼa ani kavaʼmo agetenoʼaeʼmo aipamo leno apateʼniye.

²¹ Muki nateʼae nateʼaeʼmo apakaemo neʼa hano hisaya agufaʼamo aliʼa nete nete hume hume uʼnae. Inagi aligeʼa ataleʼnaya neʼyateʼmo netepi yegemoʼmo haineno neʼagegenoʼaeʼmo ani hageteno huno hano huʼniye.

²² Napa sigisi afinaʼmo lole agufa afinaʼmo nesaya agufa neʼyaʼmo magoke magoke vayaʼmogimo lole samolaʼmo aiseʼamo alopa hugekana samolapiʼmo aliʼa maleʼa havai teʼnae. Isaleli vayaʼaiteʼmo yagaiʼa apateʼnaya vayaʼmogimo ani kavaʼmo ageteʼapaeʼmo uʼa Mosesefeʼmo ha paiʼnae.

²³ Ha paiʼnagenoʼaeʼmo Moseseʼa hapa painoʼaeʼmo, Ala kava neʼmoʼa ani ge huno huʼniye. Egamo sapati afinaʼmo maitapa haga lesayana Ala kava netapimona nagiʼnilefeʼmo maitapa haga legae. Atafiʼmo kaetapa nesayafeʼmo lapauʼnisiya vayaʼmogitapamo atafiʼmo kaetapa negae. Samofiʼmo kaetapa nesayafeʼmo lapauʼnisiya vayaʼmogitapamo samofiʼmo kaetapa nege hutetapaeʼmo egaʼamo nesaya yaʼmo mago maleyo, huno huʼniye, huno hapa paiʼniye.

²⁴ Hapa paiʼniyaʼmofeʼmo Moseseʼa huʼniya gemo afiteʼa akame huʼa egaʼapimo nesaya yaʼmo maleʼnageno kanagiʼmo omaiʼnigeno atu oʼaiʼniye.

²⁵ Inagi Moseseʼa ina ge huno hapa paiʼniye. Hemenimo Sapati afinaʼmo Ala kava netefeʼmo maitapa haga lesaya afinaʼmo haneʼniyaʼmofeʼmo maleʼnisaya neʼyaʼmo afaʼa negae. Hemenimo neʼyafeʼmo kahauya hugayana neʼyaʼmo kahaufilagamo haneʼnisigetapa oʼagegae.

²⁶ Sigisiʼa afinaʼmo ani neʼyaʼmo afaʼa aligayaʼmonanafa napa seveni afinaʼmo sapati afinaʼmogeno neʼyaʼmo ohanegaiye, huno hapa paiʼniye.

²⁷ Napa seveni afinaʼmo mago vayaʼamogimo neʼyafeʼmo uʼa kahauya huʼnayaʼmonanafa oʼageʼnae.

²⁸ Ala kava neʼmoʼa Mosesefeʼmo hunoʼaeʼmo, Na magi afinaʼmo geʼnimo oʼafitapa amagitapa ataletetapa keʼaepa geʼnimo akame nosae.

²⁹ Afiyo, huʼna, Ala kava neʼmoʼa sapati afinaʼmo lapamiʼniyaʼmofeʼmo napa sigisi afinaʼmo lole afinaʼmo nesaya agufa neʼyaʼmo nelapamiye. Seveni afinaʼmo muki vayaʼamo noʼapifiʼmo maigae. Mago vekamoʼmo noʼafatiʼmo ataleno uneno osuno maigiye, huno hapa paiʼniyaʼmofeʼmo

³⁰ seveni afinaʼmo maiʼa haga leʼnae.

³¹ Isaleli vayaʼmogimo ani neʼyafeʼmo mana neʼyane, huʼa agi aeʼnae. Ani neʼyaʼmo mago namuyaso alagagana yaʼmo yaveyave avina yakana huno haneʼniye. Hagaʼamoʼmo lumemo anuʼeʼmo nekaya miseketiʼmoʼmo nehiya agufa hagamo huʼniye.

³² Moseseʼa apakaefeʼmo ina ge huno hapa paiʼniye. Ala kava neʼmoʼa naha painoʼaeʼmo, Magoke samomo aiseʼamo alopa hugekana huʼnisiya samofiʼmo ani neʼyaʼmo maleʼnisageʼa lapakinago vayaʼmogimo agegae. Nagaemo Isipi kotegatiʼmo lapavaleliʼna kaʼme kotegamo eʼnaeʼmo lapamiʼnova neʼyaʼmo agesayafeʼmo malegae, huno naha paiʼniye, huno hapa paiʼniye.

³³ Moseseʼa Elonifeʼmo, mago mopa samofiʼmo mana neʼyaʼmo alika maleteka Ala kava neʼmo aulagaleʼmo maleʼnageʼa henagaʼamo afole aisaya vayaʼmogimo agegae, huno ha paiʼniye.

³⁴ Ala kava neʼmoʼa Mosesefeʼmo huvo, huno ha paiʼniya gemo Eloniʼa akame hisiyafeʼmo ani samomo alino kotalake kesimo haopaleʼmo maleʼniye.

³⁵ Isaleli vayaʼmogimo ani neʼyaʼmo fotiʼa kafugamo neʼnae. Neme neme uʼa Kenani vayaʼmo maiʼnaya koteʼmo avaʼyi huʼnae.

³⁶ Mani mana neʼyaʼmo magoke afinaʼmo neʼa hano hisaya agufa neʼyaʼmo mago aiseʼamo alopa hugekana huʼniya samofiʼmo haneʼniye.