Hatu maeno apate'niya gemae 15 - The Keyagana NT and 25 OT books

Moseseʼa yokemo huʼniya gemae

¹ Ani afinaʼmo Ala kava nefeʼmo Moseseʼe Isaleli vayaʼmogiʼeʼmo mago yokemo ina ge huʼa huʼnae. Ala kava neʼmoʼa lusi kava huno kamemo huno aeno apaka seteno ala agimo aliʼniyaʼmofeʼmo Ala kava nefeʼmo yokemo huguve. Agaemo hosi anagaʼe hosileʼmo fai maiʼnaya vayaʼeʼmo solovala anipiʼmo apasagauno yaga auno apataleʼniye.

² Himamuʼnimo Ala kava neʼmae. Agaefekeʼmo yokemo huguve. Agaemo nagufamo alino katino nateʼniye. Agaemo Gotiʼnimoʼmo maiʼniyanageʼna ala agimo amiguve. Agaemo afoʼnimogi Gotiʼapimoʼmo maiʼniyanageʼna agiʼaleʼmo aliʼna asaga huguve.

³ Ala kava neʼmo kame nehiya vekamo maiʼniye. Agaemo agiʼamo Ala kava nene.

⁴ Kini vekamo Felo talalaʼagi ami vayaʼagi huno solovala anipiʼmo apasagauno yaga auno apataleʼniye. Ami vayaʼaleʼmo lekana paino apateʼnigeʼa yagaiʼa apateʼnaya vayaʼmo aniʼmo neteʼa Haesa Solovala anipiʼmo faliʼnae.

⁵ Alopa aniʼmoʼa aeno apati kaeʼnigeʼa afepilagamo yafakana huʼa uʼa lamiʼnae.

⁶ O Ala kava nene, huʼna, lamaga kayatetiʼmo lokiya kavaʼmo huteka ala kagikamo aliʼnane. O Ala kava nene, huʼna, lamaga kayatetiʼmo kame vayaʼmo apamagika aika katali katalu huʼnane.

⁷ Kagaemo alagi aeka apaka seka hogote vekamo maiʼnana himamukaletiʼmo kame vayakamo alika afepiʼmo apateʼnane. Kagaemo kaipamo leʼniya kavakamoʼa atamoʼmo kahaumo leno hano huno ataleʼniya kava huno leno apasa kalino apataleʼniye.

⁸ Kagaemo kagoʼya kapatiʼmo kavamusaʼmo aiʼnanageno yasimo aliteno aniʼmo avalelinuno alino anupa huno ateʼniye. Aniʼmoʼa aino holakau holakau hutenoʼaeʼmo kegiʼyagana huno aeno he tino haneʼniye. Solovala aniʼmoʼa afepilagamo alino lokiya vaiteno maiʼniye.

⁹ Kame vayatimogi huʼapaeʼmo, Lagaemo apavegala aelita uta apatafautetaeʼmo kagemi yaʼapimo alita fako huta aligune huʼa huʼnae. Lagaemo naipetiletiʼmo apaitetaeʼmo apakaetegamo na agufa kavaʼmo hugune, huta hisupi ani kavaʼmo afaʼa hugune. Naipeletiʼmo alagi kamitimo apaita hano huta apatalegaune, huʼa huʼnae.

¹⁰ Huʼnayaʼmonanafa kagaemo yasikamo solovala aniteʼmo aliʼnanagenoʼaeʼmo alagi aeno apati kaeteno aniʼmo afepilagamo kana aenigana huno alinino uno lamino kahaepaleʼmo apateʼniye.

¹¹ O Ala kava nene, huʼna, alu gotigipatiʼmo ina laʼmo kagaekana huno maiʼniye. Kagaemo kaoteʼmo maiʼnana alagepa kaote kavakalefeʼmo ha le konali vekamo maiʼnane. Kageteʼapaeʼmo hapau aiʼnaya kavakalefeʼmo koli huʼnae. Oʼageʼnaya agufa kaune kavaʼmo nehane. Ani agufa kavaʼmo nehana Gotigamo maiʼnanaʼmofeʼmo ina lagimo kagaekana huʼa maiʼnae.

¹² Kagaemo lamaga kayaʼmo aeka hayo huʼnanagenoʼaeʼmo mopamo aino akaka vaeteno vayaʼmo alino nakaiʼniye.

¹³ Kagaemo miya faika hatu maeka apateʼnana vayakaeʼmo kahau huka apateteka apavalelika uʼnane. Himamu lokiyakaletiʼmo kaʼmo alika ho huka apavalelika uka kaote maiʼnana koteʼmo apateʼnane.

¹⁴ Muki nofi vayaʼmogimo ani kavafeʼmo kava gemo afiteʼapaeʼmo atete huʼa kolikamo hugae. Filisatini vayaʼmogimo yulagefaʼmo aigae.

¹⁵ Itomi nofi vayaʼaiteʼmo yagaiʼa neʼapataya vayaʼmogimo lusi kava huno apamoʼyamo aigiye. Movapu kotega lokiya ami vayaʼmogimo atete hugae. Muki Kenani koteʼmo maiʼnaya vayaʼmogimo lokiyaʼapimo alagi hano hisigeʼa ataleʼa apaune heʼa uʼa fala kigae.

¹⁶ O Ala kava nene, huʼna, Himamu lokiyakalefeʼmo kolikamo huge apamoʼya aige hugae. Vayakamo koʼapileʼmo neʼvisageʼapaeʼmo apakaetegamo mago kavaʼmo afaʼa osuʼa he tiʼa maiʼnisageʼa afaʼa ugae. Miya faika hatu maeka apateʼnana vayakamogimo aliʼa apatalete apatalete huliʼa ugae.

¹⁷ Kagaemo kagaika aveleʼmo apavalelika uka mopamo lapamiguve, huka hapa paiʼnana mopaleʼmo apatesanageʼa maigae. O Ala kava nene, huʼna, Ani mopaleʼmo maisana noʼmo ki maleʼnane. Kaote maisana mono nokamo alika lokiya vaika ateʼnananageno afaʼa hanegaiye.

¹⁸ Muki afinaʼmo Ala kava neʼmoʼa vayaʼaiteʼmo yagaino apatege apatege huno yagaino apateno maigiye.

¹⁹ Felo hosiʼagi talalaʼagi hosileʼmo fai maiʼnaya vayaʼagi huʼa solovala anipiʼmo asagauʼa aiʼnageno Ala kava neʼmoʼa aniʼmo halate alino ateʼnigeno aluga alugatiʼmo eno aeno apati kaeʼniyaʼmonanafa Isaleli vayaʼmo solovala aniʼmo folagapiʼmo mopamo hau huʼnigeʼa uʼnae.

Miliyamuʼa yokemo huʼniya gemae

²⁰ Gotitegati gemo alinineno aeno hakalo huno hapa nepaiya a kanomo Miliyamuʼa Eloni asaʼamoʼmo mago yaveʼyamo aliʼnigeʼa muki aʼne anagaʼmogimo yaveʼyamo aliteʼa uʼa Miliyamuʼmo akame huʼa neʼuʼapaeʼmo yaveʼyamo amagiʼa yokemo huʼa omo hageliʼa uʼnae.

²¹ Miliyamuʼa apakaefeʼmo hapa painoʼaeʼmo, Ala kava neʼmoʼa alopa kamemo huno aeno apaka seteno ala agiʼamo aliʼniyaʼmofeʼmo agaetefeʼmo yokemo hiyo, huno hapa paiʼniye. Agaemo hosi anaganagi hosileʼmo fai maiʼnaya vayanagi huno solovala anipiʼmo apasagauno yaga auno apataleʼniye, huno hapa paiʼniye.

Aniʼmoʼa atu hapaeʼniya gemae

²² Inagi Moseseʼa Isaleli vayaʼmo haesa solovala anitetiʼmo apavalelino kaʼme koʼmo Suva kotegamo uʼapaeʼmo loleʼe magoʼe afinaʼmo uʼnayaʼmonanafa aniʼmo alagi oʼageʼnae.

²³ Apakaemo Mala koteʼmo uʼa avaʼyi huteʼapaeʼmo mago aniʼmo haneʼnigeʼa ani aniʼmo neʼnayaʼmonanafa atu hapaeʼnigeʼa oʼneʼnae. Ani aniʼmoʼa atu hapaeʼniyaʼmofeʼmo ani kotefeʼmo agiʼamo Mala kotene huʼa ateʼnae.

²⁴ Atu hapaeʼniyaʼmofeʼmo muki vayaʼmogimo Mosesefeʼmo hagalu hagalu huʼa ge hauʼnae. Apakaemo huʼapaeʼmo, Lagaemo haiya anitetiʼmo nesune, huʼa huʼnae.

²⁵ Inagi Moseseʼa Ala kava nefeʼmo alopa gefatiʼmo nunumuʼmo huʼnigeno Ala kava neʼmoʼa mago yosamo ave liʼnigeno ani yosamo loʼaeno anipiʼmo yaga auʼnigeno ani aniʼmoʼa kanale huʼnigeʼa neʼnae. Ala kava neʼmoʼa ani koteʼmo apamalageka huʼniye. Ani koteʼmo mago keʼaepa gemo apamiʼniye.

²⁶ Apamitenoʼaeʼmo, Lapakaemo Ala kava neʼmo Gotitapimoʼnamo geʼnimo afitetapa naulagaleʼmo alagepa kavaʼmo huge ani kavaʼmo hiyo, huʼna lapa paiʼnova kavaʼmo huge muki keʼaepa geʼnimo akame huge hisayaʼmoʼmo nagaemo Isipi vayaʼmo apamiʼnova agufa kaita kayoʼmo olapamiguve. Ala kava neʼmoʼnageʼmo kaitatapimo aliʼna lahapageʼna nelapatove, huno hapa paiʼniye.

²⁷ Inagi Isaleli vayaʼmo Ilimi kotegamo uʼa avaʼyi huʼnae. Ani Ilimi kotegamo tuolofuʼa ani keli kotuʼmo haneʼnigeno sevetiʼa neti yosamo haneʼniyaʼmofeʼmo ani kotuʼmo haopaleʼmo seli noʼapimo aliʼa he tiʼa ateteʼa maiʼnae.