Hatu maeno apate'niya gemae 14 - The Keyagana NT and 25 OT books

Apakaemo haesa solovala aniʼmo aino akaka vaeʼnigeʼa uʼnaya gemae

¹ Ala kava neʼmoʼa Mosesefeʼmo ina ge huno ha paiʼniye.

² Isaleli vayaʼaifeʼmo ina gemo hapa paiyo. Hapa paikaeʼmo, Atagine uta solovala aniʼmo agiʼnaleʼmo Pihahiloti koteʼmo seli notapimo alita he tita atetetapa maiyo. Miganoli taonimo hanete solovala aniʼmo hanete hutegeta folagapiʼmo Malasefoni koʼmo haopaleʼmo maiyo, huka hapa paiyo.

³ Kini vekamo Feloʼa hunoʼaeʼmo, Isaleli vayaʼmogimo kaʼme kotegamo kaʼmo ohaneʼniyanageʼa haiya kateʼmo ugupi huʼa oʼageʼnae, huno agesamo afigiye.

⁴ Inagi nagaemo kini vekamo Felo aipa agesamo aiʼna akani malesugeno lokiya vaigiyaʼmofeʼmo apavegala aelino ugiyaʼmonanafa nagaemo aeʼna aga sege muki ami vayaʼamo aeʼna apaka sege huteʼna ala nagiʼnimo aliguve. Isipi vayaʼmogimo agaiʼageʼmo Ala kava neʼmo maiʼniye, huʼa nagegae, huno ha paiʼnigeʼa Isaleli vayaʼmogimo ani gemo akame huʼa uʼnae.

⁵ Isipi kini vekaeʼmo ha paiʼapaeʼmo, Isaleli vayaʼmo ago apaune heʼa uʼnae, huʼa ha paigeno afiteno agaiʼagi muki aliʼyaʼamo neʼaliya vayanagi huʼa halate kame huʼa apatesaya apaipa apakesamo aliteʼapa, Na kava higetaeʼmo lagaemo Isaleli vayaʼmo aliʼyatiletiʼmo apataleʼnonageʼa uʼnae, huʼa huʼnae.

⁶ Feloʼa kame hisiya talalamo aliteno vayaʼamo apavalelino uʼniye.

⁷ Agaemo hosimogi talalamo halauliʼa neʼvageʼapaeʼmo kamemo nehaya hogote talalamo sigisi hataletiʼa talalagi muki Isipi talalagi ami vayaʼagi yagaiʼa apateʼnaya talalagi huno apavalelino uʼniye.

⁸ Isaleli vayaʼmo Ala kava neʼmo himamuʼaletiʼmo ataleʼa uʼnayaʼmofeʼmo apamogaga aime aime uʼnae. Ala kava neʼmoʼa Isipi kini vekamo aipa agesamo aino akani maleʼnigeno lokiya vaiʼniyaʼmofeʼmo Isaleli vayaʼmo apavegala aelino uʼniye.

⁹ Ani Isipi vayaʼmogimo muki hosiʼapimo apavalege Felo talalaʼmo halauge hosileʼmo yagaiʼnaya vayaʼmogimo hosimo apavalege huteʼa Isaleli vayaʼmo apavegala aeli uʼa seli noʼmo aliʼa he tiʼa ateteʼa maiʼnaya haopalegamo avaʼyi uʼa huʼnae. Apakaemo solovala aniʼmo agiʼnaleʼmo Pihahiloti koʼmo hanete Malasefoni koʼmo hanete hutegeʼa haopaleʼmo uʼa maiʼnae.

¹⁰ Feloʼe ami vayaʼaʼeʼmo ago eʼa hogo huʼnageʼapaeʼmo Isaleli vayaʼmogimo apaketeʼapaeʼmo lusi kava huʼa koli huteʼa Ala kava neʼmoʼa hapa maesiyafeʼmo ge huʼnae.

¹¹ Apakaemo Mosesefeʼmo huʼapaeʼmo, Isipi kotegamo kiʼa latesaya kanoluʼmo haneʼniye. Na agufa kavaʼmo higekaeʼmo mani kaʼme kotegamo falisunafeʼmo lavalelika eʼnane. Na kavaʼmo higekaeʼmo Isipi kotegatiʼmo lavalelika eʼnane.

¹² Lagaemo Isipi kotegamo maiʼnetaeʼmo kagaefeʼmo hutaeʼmo, Afaʼa latenageta Isipi vayaʼmogi aliʼyaʼmo alita maino, huta kaha opaiʼnopiye. Isipi vayaʼaiteʼmo kalavusi aliʼyaʼmo lahaise vose huta alita maiʼnonesinana kanale huʼniyesinaʼmonanafa mani kaʼme kotegamo falisunaʼmoʼmo alagi hosugiye, huʼa huʼnae.

¹³ Moseseʼa Isaleli vayaʼaifeʼmo, koli osiyo, huno hapa paiʼniye. Afaʼa he titapa maiyo. Ala kava neʼmoʼa lapa maeno lapakufamo alino katino lapatesiya kavaʼmo agegae. Hemenimo apakeʼnaya Isipi vayaʼmo halate henagaʼamo alagi magoʼe hutapa oʼapakegae.

¹⁴ Ala kava neʼmoʼa kamemo hapaesigetapa lapakaemo afaʼa maigae, huno hapa paiʼniye.

¹⁵ Ala kava neʼmoʼa Mosesefeʼmo ha painoʼaeʼmo, Na kava higekaeʼmo nagaefeʼmo kage kage huka keya neʼane. Isaleli vayaʼaifeʼmo, kategageʼmo aulu helitapa viyo, huka hapa paiyo.

¹⁶ Hayopa kayokamo alika asagauliʼneka solovala aniteʼmo akoʼya huʼnegenoʼao aniʼmo aino akaka vaesigeno aniʼmo folagapiʼmo mopamo hau huʼninageʼa Isaleli vayaʼmo ugae.

¹⁷ Inagi nagaemo Isipi vayaʼmogi apaipa apakesamo aiʼna akani maleʼnisugeno lokiya vaiʼninageʼa lapakame huʼa neʼvisageʼnaeʼmo Feloʼagi ami vayaʼagi talalagi hosileʼmo yagaiʼnaya vayanagi huʼna aeʼna apaka seteʼna ala nagiʼnimo aliguve.

¹⁸ Aeʼna apaka sesugeʼapaeʼmo apakaemo nageteʼapaeʼmo Ala kava neʼmo agaiʼageʼmo maiʼniye, huʼa nagegae.

¹⁹ Ani Goti enisole vekaʼamo uno hogotetegeʼa uʼnayatetiʼmo ataleno eno apakame huno uʼniye. Ani kavaʼmo huno hiyaʼmoʼa posi yosagana huno uno hogoteʼniya hiyaʼmo eno apakamelegamo aeno he tino haneʼniye.

²⁰ Ani hiyaʼmoʼa Isipi vayaʼmogi seli noʼmo hanete Isaleli vayaʼmogi seli noʼmo hanete hutegeno folagapiʼmo aeno he tino haneʼniye. Ani hiyaʼmoʼa Isipi vayaʼaitegamo aeno hani huno apateʼniyaʼmonanafa Isaleli vayaʼaitegamo aeno ha leʼniye. Ani kava huʼniyaʼmofeʼmo haniʼilagamo Isipi vayaʼmogimo Isaleli vayaʼmogi hapaopaleʼmo oʼuʼnae.

²¹ Inagi haniʼilagamo Moseseʼa solovala aniteʼmo ayaʼmo alino asagauno akoʼya huʼnigenoʼaeʼmo Ala kava neʼmoʼa yegemo haine neʼeya haopalegatiʼmo lokiya yasimo alino ateʼnigeno alinineno solovala aniteʼmo alinino neʼvigeno kotiʼniye. Yasimoʼmo solovala aniʼmo alino aino akaka vaeno lole huʼnigeno aniʼmo folagapiʼmo hau huʼniya mopamo alino hamaleʼniye.

²² Inagi Isaleli vayaʼmo solovala aniʼmo folagapiʼmo hau huʼniya mopaleʼmo uʼnageno aniʼmoʼa aluga alugamo kegiʼyagana huno aeno he tino haneʼniye.

²³ Isipi vayaʼmo aniʼmo aino akaka vaeʼniya folagapiʼmo hosiʼapigi talalaʼapigi hosileʼmo yagaiʼnaya vayanagi huʼa apavegala aeliʼa uʼnae.

²⁴ Kotisiyafeʼmo huʼnigenoʼaeʼmo Ala kava neʼmo ata vaiʼmo haneʼniya hiyapiʼmo maiʼniyatetiʼmo ape huno apakeʼniyana Isipi ami vayaʼmo eʼnageno apaketenoʼaeʼmo alino hosu huno apateʼnigeʼa lusi koli huʼnageno apakesa afiʼyaʼmo ohaneʼniye.

²⁵ Agaemo talalaʼapimo aiyaʼamo mopafiʼmo aeno lapaneteno oʼvisiya agufa kavaʼmo huʼnigeʼapaeʼmo Isipi vayaʼmogimo huʼapaeʼmo, Ala kava neʼmoʼa Isaleli vayaʼmo hapa maeno lagaeʼeʼmo kamemo nehiyanageta apataleta laune heta ugune, huʼa huʼnae.

²⁶ Inagi Ala kava neʼmoʼa Mosesefeʼmo, Kayaʼmo aeka hayo huʼneka solovala aniteʼmo akoʼya hugenoʼa halate aniʼmoʼa aluga alugatiʼmo eno Isipi ami vayanagi talalaʼapigi hosileʼmo yagaiʼnaya vayanagi huno aeno apati kaeno, huno ha paiʼniye.

²⁷ Moseseʼa ayaʼmo aeno hayo huno akoʼya huliʼnigeno ko tiʼnigenoʼaeʼmo aniʼmo halate aluga alugatiʼmo hogoteno haneʼniya agufa kavaʼmo huno eʼniye. Isipi vayaʼmo apaune hesayafeʼmo huʼnayaʼmonanafa Ala kava neʼmoʼa Isipi vayaʼmo aniʼmo folagapi maiʼnageno aino atagu faeno apataleʼnigeno aniʼmo aeno apati kaeʼniye.

²⁸ Aniʼmoʼa halate aluga alugatiʼmo eno Isipi kini vekamo ami vayaʼamogi Isaleli vayaʼmo apavegala aeliʼa eʼnaya vayaʼmo aeno apati kaeʼniye. Muki talalaʼapigi hosiʼapigi hosileʼmo yagaiʼnaya vayanagi huno aeno apati kaeʼniye. Magoke vekaʼe hosiʼeʼmo alagi afaʼa oʼmaiʼniye.

²⁹ Ago faliʼnayaʼmonanafa Isaleli vayaʼmo aniʼmoʼa aluga alugamo kegiʼyagana huno aeno he tiʼnigeno folagapiʼmo hau huʼniya mopaleʼmo mugagayaga faligamo uʼnae.

³⁰ Ala kava neʼmoʼa ani kavatetiʼmo Isaleli vayaʼmo Isipi vayaʼai apayapatiʼmo apakufamo alino katino apateʼniye. Isipi vayaʼmogi apakufamo solovala aniʼmo agiʼnaleʼmo haneʼnigeʼa Isaleli vayaʼmogimo ageʼnae.

³¹ Isaleli vayaʼmogi Ala kava neʼmoʼa Isipi vayaʼaitegamo lusi kavaʼmo huʼnigeʼa ageteʼapaeʼmo Ala kava nefeʼmo koli huteʼa aliʼyaʼamo neʼaliya vekamo Moseseʼa huʼniya geʼaeʼmo apakesamo afiʼa fatago huʼnae.