Hatu maeno apate'niya gemae 13 - The Keyagana NT and 25 OT books

Gotiʼa Isaleli vayaʼaifeʼmo yege mafaʼnetapimo apavaletapa nagaetefeʼmo apaote apateyo, huno hapa paiʼniya gemae

¹ Ala kava neʼmoʼa Mosesefeʼmo ina ge huno ha paiʼniye.

² Lapakaemo muki yege mafaʼnetapimo apavaleta nagaetefeʼmo apaote apateyo. Muki yege mafaʼnetapigi muki yuna afutapimogi yege apanaʼaugi huno nagaiʼni yaʼmo hanegaiye.

Aeno apafu noleya peleti mayamo neʼnaya hopa afinafeʼmo huʼniya gemae

³ Moseseʼa Isaleli vayaʼaifeʼmo hapa painoʼaeʼmo, Lapakaemo Isipi kotegamo lahapaise vose hutapa kalavusi aliʼyaʼmo neʼaligenoʼaeʼmo Ala kava neʼmoʼa himamu lokiyaʼaletiʼmo hatu maeno lapavalelino eʼniya afinafeʼmo lapake okanisigetapa lapakesamo afisayafeʼmo aeno apafu noleya peleti mayamo oʼnegae.

⁴ Ani afinaʼmo ataletapa ugae. Hogote kaimo agiʼamo Amimi kailemae.

⁵ Ala kava neʼmoʼa, lama gemo huve, huno, nagaemo lapakinago vayaʼaifeʼmo, Kenani vayaʼmogi mopagi Hiti vayaʼmogi mopagi Amo vayaʼmogi mopagi Hivi vayaʼmogi mopagi Yemu vayaʼmogi mopagi huʼna aliʼna lapamiguve, huno hapa paiʼniya Kenani kotega mopamo kanale lanitani mopafatiʼmo alagepa neʼyaʼmo afole aisiya mopaleʼmo utapa maisaya afinaʼmo muki kafugaʼae kafugaʼaeʼmo hemenimo mani agufa kaileʼmo aeno apafu noleya peleti mayamo nesayafeʼmo hopa afina kavaʼmo aepa faitapa hugae.

⁶ Lapakaemo seveniʼa afinaʼmo aeno apafu noleya peleti mayamo neyo. Seveni afinaʼmo Ala kava netefeʼmo alopa neʼyaʼmo yagita hugae.

⁷ Seveniʼa afinaʼmo aeno apafu noleya peleti mayamo negae. Ani afinaʼmo mago aeno apafu neleya peleti mayamo lapakae folagapiʼmo alagi ohanegaiye. Peleti mayamo aeno apafu lesiyafeʼmo neʼataya yaʼeʼmo notapifiʼmo alagi ohanegaiye.

⁸ Ani afinaʼmo afole aisigetapaeʼmo mafaʼnetapieʼmo Isipi kotegatiʼmo ataleta eʼnona afinaʼmo Ala kava neʼmoʼa alagepa huno laha maeʼniyaʼmofeʼmo mani kavaʼmo nehune, hutapa hapa paigae.

⁹ Ala kava neʼmoʼa Isipi kotegatiʼmo himamu lokiyaʼaletiʼmo lapavalelino eʼniyaʼmofeʼmo ani hopa afina kavaʼmo nehutapaeʼmo Gotitefeʼmo mono hisaya kavaʼmoʼa lapayateʼmo alagena yakana huno hanege lahapanileʼmo alagena yakana huno hanege huʼnisigetapaeʼmo lapakesamo afigae.

¹⁰ Ala kava neʼmoʼa ani kavaʼmo huʼniyaʼmofeʼmo muki kafugaʼaeʼmo lekana pai maleʼniya afinaʼaeʼmo mani keʼaepa gemo akame hugae.

¹¹ Moseseʼa hapa painoʼaeʼmo, Ala kava neʼmoʼa lapakinago vayaʼaifeʼmo, Kenani koʼmo lapamiguve, huteno agoʼyamo ataleteno hapa paiʼniye. Ala kava neʼmoʼa lapavalelino uno ani koʼmo lapamigiye.

¹² Lapakaemo ani mopaleʼmo uta maiʼnetapaeʼmo yege mafaʼnetapiʼe yuna afu anagaʼmogi yege apanaʼauʼeʼmo Ala kava netefeʼmo apavaleta apaote apategae. Muki afu anagaʼmogi yege ve apanaʼauʼeʼmo Ala kava neʼmoʼna nagaiʼni afumae.

¹³ Lapakaemo noki afu anagaʼmogi yege apanaʼaumo sipisipi afu ofaliniletiʼmo miya faita hatu maetapa apategae. Miya faita hatu maetapa oʼapatesayana lugoʼamo alitapa apalo atisageno faligiye. Lapakaemo muki yege mafaʼnetapimo Ala kava netetiʼmo miya faita hatu maetapa apategae.

¹⁴ Inagi henagaʼamo mafaʼnetapimogimo mani kavaʼmo aepaʼamo na agufa kavaʼmo nehae, huʼa ge huʼa lapafi gesagetapaeʼmo, Ala kava neʼmoʼa Isipi kotega kalavusi aliʼyaʼmo lahaise vose huta neʼalunageno himamu lokiyaʼaletiʼmo hatu maeno lavalelino eʼniye.

¹⁵ Feloʼmo aipa agesamo lokiya vaiʼnigeno lataleʼnigeta oʼmeʼnonaʼmofeʼmo Ala kava neʼmoʼa Isipi vayaʼmogi yege mafaʼne anagaʼapigi yuna afuʼapimogi yege apanaʼaugi huno kamitimo apamagiʼniye. Apamagiʼniya kavatefeʼmo nagaemo muki yuna afu anagaʼnimogi yege apanaʼauʼmo lugoʼapimo hatagauʼna Ala kava neʼmo ofalinimo amiteʼna yege mafaʼneʼnimo ani ofaliniletiʼmo miya faiʼna hatu maeʼna neʼapatove, hutapa hapa paiyo.

¹⁶ Ala kava neʼmoʼa Isipi kotetiʼmo himamu lokiyaʼaletiʼmo lavalelino eʼniyaʼmofeʼmo lapayateʼmo alagena yakana huno hanege lahapanileʼmo alagena yakana huno hanege hugiye, huno hapa paiʼniye.

Ala kava neʼmo hiyapiʼmo maige ata vaipiʼmo maige huteno apakaeʼeʼmo magokepi lokaeno uʼniya gemae

¹⁷ Feloʼa Isaleli vayaʼmo apataleʼnigeʼa uʼnagenoʼaeʼmo Gotiʼa Filisatini vayaʼai kotegamo uʼniya kaʼmo hogo kateʼmo apavalelino oʼuʼniye. Gotiʼa fiku yanageʼa hogo kateʼmo neʼvisageʼapaeʼmo mago vayaʼmogimo, Apakaemo kamemo hapaesageʼapaeʼmo halate atagineʼa Isipi kotegamo ugae, huno agesamo afiʼniye.

¹⁸ Agesamo afiʼniyaʼmofeʼmo Gotiʼa kaʼme kotega Haesa Solovala aniʼmo haneʼniya kateʼmo apavalelino aino vego huno uʼniye. Apavalelino uʼnigeʼapaeʼmo Isaleli vayaʼmo ami vayakana huʼa lokaeliʼa ute ute huʼnae.

¹⁹ Akeyaʼvilagamo Yosefeʼa Isaleli vayaʼaifeʼmo ina ge huno hapa paiʼniye. Gotiʼa emineno lapa maesigetapa Isipi kotetiʼmo ataletapa visaya afinaʼmo nayamufaʼnimo alinitapa ugae. Lapakaemo lapagoʼyamo ataletetapa he, ani kavaʼmo afaʼa hugune, hutapa naha paiyo, huno hapa paiʼniyaʼmofeʼmo ayamufaʼamo aliʼniʼa uʼnae.

²⁰ Apakaemo Sukoti taonifatiʼmo ataleʼa kaʼme koʼmo atupa koʼamo agiʼamo Itamu kotega otuleʼmo uʼa avaʼyi huteʼa ani koteʼmo seli noʼapimo aliʼa he tiʼa ateteʼa maiʼnae.

²¹ Muki felugaʼamo Ala kava neʼmo posi yosagana huno hiyapiʼmo he tino maiʼneno uno hogoteʼniye. Muki haniʼilagaʼamo posi yosagana huno ata vaipiʼmo he tino maiʼneno uno hogoteʼniye. Ata vaiʼmoʼa aeno ha leʼnigeʼa haniʼilagamo uge felugamo uge huʼnae.

²² Muki afinaʼaeʼmo felugamo hiyaʼmo uno hogotege haniʼilagamo ata vaiʼmo uno hogotege huʼniye.