Hatu maeno apate'niya gemae 12 - The Keyagana NT and 25 OT books

Pasova kavaʼmo aepa faiʼa huʼnaya hopa afinafeʼmo huʼniya gemae

¹ Moseseʼe Eloniʼeʼmo Isipi kotegamo maiʼnaʼagenoʼaeʼmo Ala kava neʼmoʼa ina ge huno hana paiʼniye

² Mani hemeni kafugamo hogote kaimo lapakae kaimo hanegaiye.

³ Muki Isaleli vayaʼaifeʼmo hapa paitanaeʼmo, mani kaimo teni afinaʼmo magoke magoke vayaʼmogitapamo aikeli sipisipimo afamo anagatapilefeʼmo lekana pai maleyo.

⁴ Sipisipimo neʼa hano hisaya agufa afamo anagaʼmo oʼmaiʼnisayaʼmoʼmo apakaemo hapaopaleʼmo maiʼnisaya afamo anagaʼeʼmo magoke sipisipimo lekana pai malegae. Sipisipimo haiya kava huta negaupi hutapa agetetapa lekana pai maleyo.

⁵ Lapakaemo ina kava hutapa magoke kafugamo maiʼnisaya ve sipisipimofi ve mememofi hutapa lekana pai maleyo. Alu ya alu yaʼmo hapauʼnisiya sipisipimofi mememofi hutapa lekana opaitapa alagepa huʼa maiʼnisaya sipisipiʼe memeʼekeʼmo lekana pai maleyo.

⁶ Ani afuleʼmo yagaiʼnisageno fotini afinaʼmo afole aisigeʼapaeʼmo muki Isaleli vayaʼmo yegemo uno lamino nefalesigeʼapaeʼmo lekana pai maleʼnisaya afumo lugoʼapimo hatagaugae.

⁷ Hatagautetapa kolaʼamo lakitapa maleʼnetapa nesaya noʼmo kipate atulu yosalatenagi yofo yosalatenagi hutapa faleyo.

⁸ Faletetapaeʼmo ani haniʼilagamo ani sipisipimo kaetetapa aeno apafu noleya peleti mayaʼe atu neheya hagomupaʼeʼmo neyo.

⁹ Oleʼnisiya ameʼamo oʼneyo. Lapakaemo samofiʼmo okaetapa atafikeʼmo agenopaʼagi aiya ayaʼagi muki aipaʼagi agusaʼagi hutapa kaeyo.

¹⁰ Lapakaemo mago atupaʼamo negetapa maleʼnetapa netepiʼmo oʼneyo. Netepiʼmo mago hanesiya yaʼamo oʼnetapa atafiʼmo kaetapa ataleyo.

¹¹ Lapakaemo nesunetapaeʼmo kukenatapimo vaige sutapimo vaige hayopa kayotapimo alige huʼnetapaeʼmo malage hutapa negae. Nagaemo emiʼneʼna lapakaemo lapakegeʼna lapateʼna uʼnova kavafeʼmo lapakesamo afisaya agufa neʼyaʼmo agiʼamo Pasova neʼyaʼmae.

¹² Ani haniʼilagamo nagaemo muki Isipi kotegamo uʼneʼna huʼna muki yege mafaʼneʼapigi alu afu alu afuʼapimogi yege afuʼapigi huʼna kamitimo apamagisugeʼa faligae. Nagaemo Isipi vayaʼmogi gotiʼapimogitefeʼmo agoti huʼna apateteʼna kamitimo apamagiguve. Nagaemo Ala kava neʼmo maiʼnove.

¹³ Ani kolatetiʼmo notapimo kipa yosaleʼmo falesageno lapakae alagena yaʼmo hanegaiye. Nagaemo Isipi vayaʼmo apamagisuva afinaʼmo kolaʼmo ageteʼnaeʼmo lapakaseʼna visugeno ani kaitaʼmo olahapaugiye.

¹⁴ Henagaʼamo ani hisuva kavafeʼmo lapakesamo afisayafeʼmo mago alopa afinatapimo hanegaiye. Henagaʼamo lapakaeʼe lapakaepatiʼmo afole aisaya vayaʼmogiʼeʼmo ani kavafeʼmo Ala kava netefeʼmo hopa afina neʼyaʼmo negae. Muki kafugaʼae kafugaʼaeʼmo mani afina kavatefeʼmo ani neʼyaʼmo nete nete hugae.

Aeno apafu nole peleti mayamo nesaya hopa afina kavafeʼmo huʼniya gemae

¹⁵ Ala kava neʼmoʼa magoʼe gemo hunoʼaeʼmo, Seveniʼa afinaʼmo aeno apafu nole peleti mayamo negae. Napa vani afinaʼmo notapifatiʼmo peleti mayafiʼmo ateʼnageno aeno apafu neleya yaʼmo alitapa atalegae. Mago vekamoʼmo ani seveniʼa afinapati mago afinaʼmo aeno apafu leʼniya peleti mayamo nesigetapaeʼmo Isaleli nofi vayapafatiʼmo alita ha faitapa atalegae.

¹⁶ Napa vani afinaʼe seveni afinaʼeʼmo alitapa anupa hutapa maiʼnetapa monoʼmo hugae. Lapakaemo ani lole afinaʼmo muki alu aliʼya alu aliʼyaʼmo oʼaligae. Neʼyatapimo nesaya yaʼmo alo hugae.

¹⁷ Ani afinaʼmo nagaemo asole Isaleli vayaʼmo Isipi kotetiʼmo apavaleliʼna uguvaʼmofeʼmo muki kafugaʼae kafugaʼaeʼmo aeno apafu nole peleti mayamo hopa afinaʼmo akame hutapa negae. Isaleli vayaʼmogitapamo ani kavaʼmo alagi oʼataleyo.

¹⁸ Napa vani kaimo fotini afinaʼmo uneʼmo aepa faitetapa aeno apafu nole peleti mayamo neme neme neʼvisageno tuveti vani afinaʼmo unetigiye.

¹⁹ Seveniʼa agufa afinaʼmo peleti mayafiʼmo ateʼnageno aeno apafu neleya yaʼmo notapifiʼmo alagi ohaneno. Ina laʼmo aeno apafu leʼniya peleti mayamo nesifi lapakaepatiʼmo alita ha faitapa atalegae. Alu nofi vekamoʼmo nesifi Isaleli vekamoʼmo nesifi hisigetapaeʼmo alagi alita ha faitapa atalegae.

²⁰ Lapakaemo aeno apafu neleya neʼyaʼmo oʼnegae. Lapakaemo muki notapifiʼmo aeno apafu nolesiya peleti mayamo negae.

Apakaemo sipisipimo hatagaiʼa nesaya gemae

²¹ Inagi Moseseʼa Isaleli vayaʼaiteʼmo yagaiʼa neʼapataya vayatama vayaʼaifeʼmo ge huʼnigeʼa eʼnagenoʼaeʼmo ina ge huno hapa paiʼniye. Lapakaemo afamo anagatapieʼmo lapakesamo afitapa Pasova aikeli sipisipimo lekana paitetapa avalelitutapa lugoʼapimo hatagaiyo.

²² Lapakaemo kolaʼamo mago yuvapafiʼmo lakitapa maleʼnetapa mago aise yosamo hisopu akopamo alitapa yuvapafiʼmo laki malesaya kolapiʼmo aetetapa kipateʼmo aluga aluga yosalateʼe anaga yofo yosaleʼeʼmo ani kolatetiʼmo falegae. Muki vayaʼamo kumatega emi omeʼa noʼapifiʼmo maiʼnisageno kotino.

²³ Ani haniʼilagamo Ala kava neʼmoʼa Isipi vayaʼmo kamitimo apamagisiyafeʼmo muki Isipi kotegamo uneno hunoʼaeʼmo kipate yosaleʼmo kolaʼmo haneʼnisigeno agetenoʼaeʼmo lapakaseno uteno vayaʼmo kamitimo apamagisiya enisole vekaeʼmo aeka apakaso huno hisigeno lapakae nopiʼmo uno haino mafaʼnetapimo oʼapamagigiye.

²⁴ Lapakaeʼe mafaʼnetapiʼeʼmo mani lapa pauva hopa afina kavaʼmo alagi oʼataletapa huge huge hutapa maigae.

²⁵ Henagaʼamo Ala kava neʼmoʼa lapakaefeʼmo, mago mopamo lapamiguve, huno polomasi gemo huʼniya mopaleʼmo utapa maisaya afinaʼmo ani hopa afina kavaʼmo hutapa Pasova sipisipimo hatagautapa negae.

²⁶ Ani neʼyaʼmo nesaya afinaʼmo mafaʼnetapimogimo lapakaefeʼmo huʼapaeʼmo, mani neʼnona neʼyaʼmoʼa na agufa aepaʼamo haneʼniya neʼyaʼmo neʼnone, huʼa ge huʼa lapafi gesagetapaeʼmo

²⁷ ina ge hutapa hapa paigae. Ani ofalinimo Pasova sipisipi ofalinimo Ala kava netimo ofalinimo haneʼniye. Agaemo Isipi kotegamo maiʼnona afinaʼmo emineno lagegeno lateno uno Isipi vayaʼmo kamitimo apamagiʼniyaʼmonanafa afamo anagatimo apakufamo alino katino apateʼniya kavatefeʼmo neʼnone, hutapa hapa paigae, huno hapa paiʼnigeʼapaeʼmo Isaleli vayaʼmo ape huteʼa mono huʼnae.

²⁸ Huteʼapaeʼmo he tiʼa uʼa Ala kava neʼmoʼa Moseseʼe Eloniʼefeʼmo hana paiʼniya kavaʼmo akame huʼa huʼnae.

Isipi vayaʼai yege mafaʼneʼapimo kamitimo apamagiʼnigeʼa faliʼnaya gemae

²⁹ Haniʼilaga folaguʼmo Ala kava neʼmoʼa muki Isipi vayaʼai yege mafaʼneʼapimo kamitimo apamagiʼnigeʼa faliʼnae. Agaemo kini vekamo yege mafaʼneʼamo hogoteno kamitimo amagiteno muki Isipi vayaʼmogi yege mafaʼnemo apamagilino uno kalavusi vayaʼmogi yege mafaʼneʼapiʼeʼmo apamagiʼniye. Agaemo muki yuna afu anagaʼmogi yege apanaʼaumo apamagige huʼniye.

³⁰ Ani haniʼilagamo kini vekagi muki aliʼyaʼamo neʼaliya vayanagi muki Isipi vayanagi huʼa he tiʼa ageʼnayana yege mafaʼneʼapimo ago faliʼnageʼa ageʼnae. Muki Isipi haopalega mago nopiʼmo yege mafaʼneʼapimo afaʼa oʼmaiʼnafa muki nopati yege mafaʼneʼapimo ago faliʼnayaʼmofeʼmo alopa gefatiʼmo kage kage huʼnae.

³¹ Kini vekamo Feloʼa Moseseʼe Eloniʼefeʼmo ge huʼnigeʼana eʼnaʼageno hana painoʼaeʼmo, Lanakaeʼe muki Isaleli vayaʼeʼmo alagi ago viyo. Lapakaemo nagaefeʼmo ani kavaʼmo hugesune, hutapa huʼnaya kavaʼmo hutapa utapa Ala kava nefeʼmo mono hiyo.

³² Naha paiʼnaya kavaʼmo hutapa muki sipisipitapigi memetapigi pulumakatapigi hutapa apavaletetapa Isipi kotetiʼmo alagi ataletapa viyo. Inagi lanakaemo nagaeʼeʼmo alagepa huʼna maisuvafeʼmo alitana auletana nateʼao, huno hana paiʼniye.

³³ Isipi vayaʼmogimo Isaleli vayaʼmo malage huʼa apataleʼa visayafeʼmo lokiya gemo huteʼa aliʼa hapa faiʼnae. Oʼvisayaʼmoʼmo lagaemo mukiʼamo ago faligune, huʼa huʼnae.

³⁴ Inagi Isaleli vayaʼmogimo aeno apafu noleya falaovamo alopa yuvapafiʼmo maleʼnae. Apakaemo yuvapafiʼmo muki yaʼapimo maleteʼa kukenaʼapiletiʼmo hayaeteʼa apakiʼnaleʼmo aliʼa kofiliʼa uʼnae.

³⁵ Isaleli vayaʼmogimo Moseseʼa hiyo, huno hapa paiʼniya agufa kavaʼmo huʼa Isipi vayaʼaifeʼmo goli yafafenagi siluva yafafenagi kukena yafenagi huʼa ge huʼa apafi geʼnae.

³⁶ Ala kava neʼmoʼa Isipi vayaʼmogi Isaleli vayaʼmo fikumo hapa maeʼa apamisaya agufa apaipa apakesamo apamiʼnigeʼa muki ge huʼa apafi geʼnaya yaʼmo apamiʼnae. Ani kavaʼmo huʼa Isaleli vayaʼmogimo Isipi vayaʼai kagemi yaʼapimo aliʼa hano huʼnae.

Isaleli vayaʼmo Isipi kotetiʼmo ataleʼa uʼnaya gemae

³⁷ Isaleli vayaʼmo Lamesisi taonifatiʼmo ataleʼa Sukoti taonifiʼmo uʼnae. Ve anagaʼageʼmo sigisi hataleti tauseniʼa ve anagaʼmo lekana paiʼnayaʼmonanafa aʼne mafaʼneʼapimo lekana opaiʼnaya vayaʼeʼmo uʼnae.

³⁸ Asole alu nofi vaya alu nofi vayaʼmo aliʼa anupa huteʼa asole pulumakagi sipisipigi memegi huʼa magokepi lokaeʼa uʼnae

³⁹ Apakaemo Isipi kotegatiʼmo aliniʼa eʼnaya falaovaletiʼmo aeno apafu noleya peleti mayamo kaeʼa neʼnae. Apakaemo aeno apafu lesiya yaʼmo falaovafiʼmo oʼateʼnae. Isipi vayaʼmogimo malage huʼa Isaleli vayaʼmo aliʼa hapafaiʼa apataleʼnayaʼmofeʼmo neʼyaʼapimo aliʼa alo hisaya kanaʼapimo ohaneʼniye.

⁴⁰ Isaleli vayaʼmo Isipi kotegamo fo hataleti tetiʼa kafugamo kalaga hageʼa maiʼnae

⁴¹ Ani fo hataleti tetiʼa kafugamo Isipi koteʼmo alagi maiʼa hano huteʼa Ala kava neʼmo vayaʼamo Isipi kotetiʼmo ataleʼa uʼnae. Isaleli vayaʼmo hogoteʼa Isipi kotegamo eʼa avaʼyi huʼnaya agufa afinakeʼmo Isipi kotetiʼmo ataleʼa uʼnae.

⁴² Ani haniʼilagamo Ala kava neʼmoʼa Isaleli vayaʼmo Isipi kotetiʼmo hatu maeno apavalelino visiyafeʼmo yagaino apateʼniyaʼmofeʼmo Isaleli vayaʼmo henagaʼamo afole aisaya vayaʼmogimo muki kafugaʼae kafugaʼaeʼmo mani afinaʼmo haniʼilagamo apau okaleʼa Ala kava netefeʼmo mono hisaya afinaʼapimo haneʼniye.

Pasova kavafeʼmo keʼaepa geʼamo hu maleʼniya gemae

⁴³ Ala kava neʼmoʼa Moseseʼe Eloniʼefeʼmo ina ge huno hana paiʼniye. Pasova kavaʼmo huʼa ofalinimo hisaya neʼyaʼmo keʼaepa geʼamo haneʼniyana malaga vayaʼmogimo oʼnegae.

⁴⁴ Lapakaemo ago miya faitapa apateʼnisageʼa kalavusi aliʼyatapimo neʼalisaya vayaʼmo apakufamo lagautapa apateʼnisaya vayaʼmogimo afaʼa negae.

⁴⁵ Kalaga vayaʼmogimo afaʼa oʼnegae. Moni aliʼyaʼmo eʼa neʼalisaya vayaʼmogimo oʼnegae.

⁴⁶ Lapakaemo maiʼnisaya nopikeʼmo netetapa kumategamo alinita uta lamitapa oʼneyo. Lapakaemo sipisipi ofalini afumo ayamufaʼamo aitapa lo oʼaeyo.

⁴⁷ Muki Isaleli nofi vayaʼamogitapamo ani agufa Pasova kavaʼmo hugae.

⁴⁸ Agufamo olagauʼnisiya vekamoʼmo oʼnegaiyaʼmofeʼmo kalaga vekamoʼmo Ala kava netefeʼmo Pasova neʼyaʼmo nesiyafeʼmo hauʼnisiyaʼmoʼmo ani vekamo vayaʼamogimo agufamo lagauʼa atetesagenoʼaeʼmo afaʼa eno negaiye. Agaemo ani kote vekagana huno maigiye.

⁴⁹ Ani kote vayaʼe kalaga hageʼa eʼa lapakaeʼeʼmo magokepi lokaeʼa maiʼnisaya vayaʼeʼmo magoke keʼaepa gemo hanegaiye.

⁵⁰ Inagi muki Isaleli vayaʼmogimo Ala kava neʼmoʼa Moseseʼe Eloniʼefeʼmo hana paiʼniya kavaʼmo akame huʼnae.

⁵¹ Ani Pasova kavaʼmo huʼnaya afinaʼmo Ala kava neʼmoʼa muki Isaleli nofi vayaʼmo Isipi kotegatiʼmo apavalelino eʼniye. Afamo anagaʼapiʼe anagaʼapiʼeʼmo aliʼa apaote apaote huʼa eʼnagenoʼaeʼmo apavalelino eʼniye.