Hatu maeno apate'niya gemae 11 - The Keyagana NT and 25 OT books

Yege mafaʼne anagaʼapimo faligae, huno huʼniya gemae

¹ Ala kava neʼmoʼa Mosesefeʼmo ha painoʼaeʼmo, Nagaemo halate magoʼe huʼna Feloʼe Isipi vayaʼeʼmo kayoʼmo apamitesugenoʼaeʼmo henagaʼamo afaʼa lapatalesigetapa ugae. Ani afinaʼmo alagi alino lapafaino lapatalesigetapa ugae.

² Hemenimo kagaemo muki Isaleli vayaʼaifeʼmo hapa paigeʼa Isipi vayaʼmo hapaopaleʼmo maiʼnisaya nopi vayaʼaifeʼmo goli konali yaʼmo lamige siluva konali yaʼmo lamige hiyo, huʼa ge huʼa apafi gegae.

³ Ani gemo huno hapa paiʼnigenoʼaeʼmo Ala kava neʼmoʼa Isipi vayaʼmogimo Isaleli vayaʼaina fikumo hapa maeʼa apamisaya agufa apaipa apakesamo apamiʼnigeʼa ani konali yaʼmo fikumo apamiʼnae. Muki Isipi vayaʼmogi apaulagaleʼe Felo aliʼyaʼamo neʼaliya vayaʼai apaulagaleʼeʼmo Moseseʼmo ala agi vekamo maiʼniye.

⁴ Inagi Moseseʼa Felofeʼmo, Ala kava neʼmoʼa ina ge huno huʼniye, Nagaemo haniʼilaga folaguʼmo muki Isipi haopalegamo uʼneʼna huguve.

⁵ Nagaemo muki Isipi vayaʼmogi yege mafaʼne anagaʼapimo kamitimo apamagisugeʼa faligae. Ani kavaʼmo kagae yege mafaʼneletiʼmo aepa faiteno muki afa aliʼyaʼmo neʼaliya aʼnemogi peleti mayamo kaesayafeʼmo vitimo aeʼa lata nepaiya aʼne anagaʼmogi yege mafaʼne anagaʼapiʼeʼmo faligae. Muki alu afu alu afu anagaʼapimogi yege anaʼauʼeʼmo faligae.

⁶ Falisageʼapaeʼmo muki Isipi kotegamo maiʼnaya vayaʼmogimo alopa gefatiʼmo lusi kava huʼa kage kage hugae. Ani agufa kage kage kavaʼmo hogoteʼa Isipi vayaʼmogimo osuʼnaya agufa kavaʼmo huteʼa henagaʼamo ani kavaʼmo osugae.

⁷ Faligayaʼmonanafa Isaleli vayaʼaitegatiʼmo kalamoʼmo hau hau osugiye. Ala kava neʼmoʼa Isipi vayaʼe Isaleli vayaʼeʼmo alino fako huno apateteno alu kava alu kavaʼmo huʼniye, huka agesanafeʼmo muki Isaleli vayanagi muki alu afu alu afuʼapiʼenagi huʼa hanageke yaʼmo oʼaligae.

⁸ Ani afinaʼmo muki aliʼyakamo neʼaliya vayaʼmo nagaetegamo eʼa apaleʼyamo faiʼneʼapaeʼmo, kagaeʼe kakame nehaya vayakaʼeʼmo afaʼa viyo, huʼa naha paisageʼnaeʼmo afaʼa uguve, huno ha paiteno lusi kava huno aipamo leno ateteno Feloʼmo ataleno uʼniye.

⁹ Ala kava neʼmoʼa Mosesefeʼmo ha painoʼaeʼmo, Nagaemo Isipi kotegamo magoʼe huʼna noʼagaya agufa naune kavaʼmo hisuvafeʼmo Feloʼa gekamo alagi oʼafigiye, huno ha paiʼniye.

¹⁰ Inagi Moseseʼe Eloniʼeʼmo Felo aulagaleʼmo muki ani noʼagaya agufa anaune kavaʼmo huʼnaʼaʼmonanafa Ala kava neʼmoʼa Felo aipa agesamo aino akani maleʼniyaʼmofeʼmo Isaleli vayaʼmo koʼaletiʼmo apataleʼnigeʼa oʼuʼnae.