Hatu maeno apate'niya gemae 10 - The Keyagana NT and 25 OT books

Akenu anagaʼmo afole aiʼnaya gemae

¹ Henagaʼamo Ala kava neʼmoʼa Mosesefeʼmo, Nagaemo ani alagena kavaʼnimo aulagaleʼmo hisuvafeʼmo Felo aipa agesaʼe aliʼyaʼamo neʼaliya vayaʼai apaipa apakesaʼeʼmo aliʼna akani maleʼnovaʼmofeʼmo Felotegamo uvo.

² Inagi nagaemo Isipi koteʼmo noʼagaya agufa naune kavaʼmo huʼnova kavafeʼmo nava gemo huka mafaʼne anagakaʼe kagiyokamogiʼefeʼmo hapa paige nagaefeʼmo Ala kava neʼmo maiʼniye, huka nagege hisanafeʼmo ani kavaʼmo huʼnove, huno ha paiʼniye.

³ Inagi Moseseʼe Eloniʼeʼmo Felotegamo uʼana ha paiʼanaeʼmo, Ala kava neʼmo Himulu vayaʼmogita Gotitimoʼmo kagaefeʼmo hunoʼaeʼmo, Na magi afinaʼmo geʼnimo amagika ataleteka naiyafiʼmo oʼmaiʼnane. Vayaʼnimo afaʼa apatalegeʼa uʼa nagaetefeʼmo mono hiyo.

⁴ Apatalesanageʼa oʼvisayaʼmoʼmo afiyo, huʼna, egamo akenu anagaʼmo aliʼna apatesugeʼa kagae koteʼmo egae.

⁵ Akenu anagaʼmogimo muki mopaʼaleʼmo maiʼa aiʼa ati kaesagetapa mopamo oʼagegae. Koʼmopamoʼmo amagiteno ataleʼnisiya neʼyaʼamo akenu anagaʼmogimo neʼa hano huge muki yosa haitaʼamo neʼa hano huge hugae.

⁶ Kagae nopiʼmo uʼa haiʼa havaitege aliʼyakamo neʼaliya vayaʼmogi nopiʼmo uʼa haiʼa havai tege muki vayakamo Isipi vayaʼmogi nopiʼmo uʼa haiʼa havai tege hugae. Ani kavaʼmo afotapimogimo oʼagege lototapimogimo oʼagege lapakaemo maime eʼnaya afinatetiʼmo eno hemenimo maiʼnaya afinaʼeʼmo oʼagege huʼnaya kavaʼmo afole aigiye, huno huʼniye, huno Moseseʼmo Felofeʼmo ha paiteno ataleno aino afe leno uʼniye.

⁷ Felo aliʼyaʼamo neʼaliya vayaʼmogimo Felofeʼmo ha paiʼapaeʼmo, Na magi afinaʼmo mani vekamo lagaeteʼmo aneʼaitigana huno maigiye. Apatalegeʼa uʼa Ala kava neʼmo Gotiʼapimotefeʼmo mono hiyo. Isipi koʼmo alagi hosuʼniya kavaʼmo ageʼnananaʼmonanafa ageka aeto nosapiye, huʼa huʼnae.

⁸ Inagi Moseseʼe Eloniʼeʼmo kini vekalegamo halate anavaleliʼana eʼnaʼageno Feloʼa hana painoʼaeʼmo, Utapa Ala kava neʼmo Gotitapimotefeʼmo mono hiyo. Ugayaʼmonanafa ina lagimo ugae, huno ge huno afi geʼnigenoʼaeʼmo

⁹ Moseseʼa hunoʼaeʼmo, Muki neya vayanagi kosuna vayanagi ve mafaʼne anagatigi a mafaʼne anagatigi sipisipitigi pulumakatigi huta magokepi ugune. Alopa yagitamo huteta Ala kava netefeʼmo mono hugune, huno ha paiʼniye.

¹⁰ Nagaemo lapatalesugetapa visayaʼmoʼmo Ala kava neʼmoʼa lapakaeʼeʼmo magokepi lokaeno ugiye, huno kigi yokalo gemo huʼniye. Magoʼe gemo hunoʼaeʼmo, utapa hanageke yaʼmo aligayanagi ehetapiye.

¹¹ Haʼao. Aʼne mafaʼnetapimo oʼugafa ve anagaʼageʼmo utapa Ala kava netefeʼmo mono hugae. Ani kavafeʼmo lapauʼniye, huno huʼnigeʼapaeʼmo aliʼyaʼamo neʼaliya vayaʼmogimo Moseseʼe Eloniʼeʼmo aliʼa hana faiʼana anataleʼnaʼageʼana malaga uʼana lamiʼnaʼae.

¹² Ala kava neʼmoʼa Mosesefeʼmo hunoʼaeʼmo, Kayaʼmo alika asagauka Isipi kotegamo akoʼya huʼnegenoʼao akenu anagaʼmo Isipi kotegamo eʼa mopafati hageno haineʼniya neʼyaʼmo haitaʼamo negae. Koʼmopamoʼmo amagiteno ataleʼniya neʼyaʼamo negae.

¹³ Inagi Moseseʼa hayopa kayoʼamo alino asagauno akoʼya nehigenoʼaeʼmo Ala kava neʼmoʼa yegemo haine neʼeya haopalegatiʼmo yasimo alino ateʼnigeno magoke felugaʼe haniʼilagaʼeʼmo yasimo aliʼniye. Netepiʼmo yegemo haine neʼeya haopalegatiʼmo akenu anagaʼmo yasimoʼa apavalelino eʼniye.

¹⁴ Akenu anagaʼmo eʼa muki Isipi koteʼmo lusi kava huʼa maiʼa kili paeʼnae. Akeyaʼvilagamo mago ani agufa asole akenu anagaʼmo oʼmaiʼnayanageʼa henagaʼamo ani agufa asole akenu anagaʼmo oʼmaigae.

¹⁵ Akenu anagaʼmo eʼa havaiteteʼa muki mopaleʼmo maiʼa ati kaeʼnagenoʼaeʼmo mopamoʼmo alino anupaʼageʼmo huʼniye. Apakaemo muki hegafatalili yaʼmo nege koʼmopamoʼmo amagiteno ataleʼniya yosa alagamo nege muki hoyafiʼmo haneʼniya neʼyaʼmo nege huʼnageno muki Isipi kotega yosamo haitagi hoyafiʼmo haneʼniya hegafatalili yanagi huno alagi ohaneʼniye.

¹⁶ Feloʼa malage huno Moseseʼe Eloniʼefeʼmo ge huʼnigeʼana eʼnaʼageno hana painoʼaeʼmo, Nagaemo Ala kava neʼmo Gotitapimotegaʼe lanakaetegaʼeʼmo hosu kavaʼmo huʼnove.

¹⁷ Lahanaoke hovanagi, hosu kavaʼnimo hemenitogeʼmo alitana ataletetana Ala kava neʼmo Gotitapimofeʼmo nunumumo hisaʼageno mani lamagisigeta falisuna kayoʼmo alino ataleno, huno huʼnigeno

¹⁸ Moseseʼa Feloʼmo ataleno uno Ala kava nefeʼmo nunumuʼmo huno ge huno afi geʼniye.

¹⁹ Inagi Ala kava neʼmoʼa yegemo uno lamino nefaleya haopalegatiʼmo lokiya yasimo alino ateʼnigeno alinino eno akenu anagaʼmo apavalelino uno haesa solovala anipiʼmo apataleʼniye. Magoke akenuʼmo Isipi kotegamo alagi oʼmaiʼniye.

²⁰ Oʼmaiʼniyaʼmonanafa Ala kava neʼmoʼa Felo aipa agesamo aino akani maleʼniyaʼmofeʼmo Isaleli vayaʼmo apataleʼnigeʼa oʼuʼnae.

Alopa haniʼmo huʼniya gemae

²¹ Inagi Ala kava neʼmoʼa Mosesefeʼmo ha painoʼaeʼmo, kayaʼmo alika asagauka aliʼneka kokuʼnateʼmo akoʼya huʼnegeno Isipi kotegamo alopa haniʼmo hino, huno hapa paiʼniye. Aeto agufa lokiya haniʼmo hugiyaʼmofeʼmo apayatetiʼmo afaʼa atafausaya agufa haniʼmo hugiye.

²² Inagi Moseseʼa ayaʼmo alino asagauliʼneno kokuʼnateʼmo akoʼya huʼnigeno muki Isipi kotegamo loleʼe magoʼe felugamo lusi haniʼmo huʼniye.

²³ Muki Isipi vayaʼmogi apakaiʼapimo magoke vekamo alagi oʼagege he tiʼa oʼmaige huteʼa nopikeʼmo maiʼnae. Maiʼnayaʼmonanafa Isaleli vayaʼmo maiʼnaya haopaʼalegamo haniʼmo osuʼniye.

²⁴ Huʼnigenoʼaeʼmo Feloʼa Mosesefeʼmo ge huʼnigeno eʼnigenoʼaeʼmo, Utapa Ala kava netapilefeʼmo mono hiyo. Aʼne mafaʼnetapiʼeʼmo afaʼa ugayaʼmonanafa sipisipitapiʼe pulumakatapiʼeʼmo afaʼa apatetetapa viyo, huno ha paiʼnigeno

²⁵ Moseseʼa hunoʼaeʼmo, Haʼao, huno, Latalegeta muki alu afu alu afu anagatiʼeʼmo apavalelita uta amagita Ala kava neʼmo Gotitimoʼmo ofalinimo amigune.

²⁶ Ala kava neʼmo Gotitimotefeʼmo mono hisunafeʼmo muki alu afu alu afutiʼeʼmo apavalelita ugune. Magoke afutimo afaʼa oʼategaune. Mono hisuna yateʼmo uta avaʼyi hutetaeʼmo haiya agufa afumo amagita amisupi huta agegaune, huno ha paiʼniye.

²⁷ Ha paiʼniyaʼmonanafa Ala kava neʼmoʼa Felo aipa agesamo aino akani maleʼniyaʼmofeʼmo apataleʼnigeʼa oʼuʼnae.

²⁸ Feloʼa Mosesefeʼmo ha painoʼaeʼmo, Nataleka uvo. Ehekae, huʼna, halate magoʼe huka nagae naulagaleʼmo magoʼe huka oʼmeno. Halate eka naulagaleʼmo avaʼyi hisanaʼmoʼmo faligane, huno ha paiʼniye.

²⁹ Moseseʼa geʼaleʼmo aeno atagaina huno ha painoʼaeʼmo, Alagepa gemo huʼnane. Halate magoʼe huʼna eʼna okagegauve, huno ha paiʼniye.