Hatu maeno apate'niya gemae 1 - The Keyagana NT and 25 OT books

Isipi vayaʼmogimo Isaleli vayaʼmo kalavusi huʼa apateʼneʼa hanageke yaʼmo apamiʼnaya gemae

^1-2 Yekopuʼe mafaʼne anagaʼaʼeʼmo magokepi lokaeʼa Isipi kotegamo uʼnaya vayaʼmogi apakiʼapimo haneʼniye. Ani vayaʼmogi Yekopuʼeʼmo afamo anagaʼapiʼeʼmo apaote apaote huʼa uʼnae. Lumeniʼagi Simiyoniʼagi Livaiʼagi Yutaʼagi

³ Isakaʼagi Sepaluniʼagi Menisameniʼagi

⁴ Naniʼagi Napataliʼagi Gatiʼagi Asaʼagi huʼa uʼnae.

⁵ Yosefeʼa hogoteno uno Isipi kotegamo maiʼnigeʼapaeʼmo Yekopuʼagi muki nofi vayaʼamo sevetiʼa vayanagi huʼa Isipi kotegamo uʼnae.

⁶ Henagaʼamo Yosefeʼa falige muki konagaʼamogimo falige ani afinaʼmo maiʼnaya vayaʼmo falige huʼnae.

⁷ Faliʼnayaʼmonanafa Isaleli vayaʼmogimo asole mafaʼnemo aliʼa apateʼnayaʼmofeʼmo magoʼe huʼa asole vayaʼmo afole aiteʼa Isipi koteʼmo maiʼa kili paeteʼa lokiya nofi vayaʼmo afole aiʼnae.

⁸ Magoʼe kafugamo utegeno henagaʼamo mago saufa kini vekamo afole aiteno Isipi koteʼmo yagaino apateʼniya vekamoʼmo Yosefeʼmo oʼageʼniye. Yosefeʼmo ago faliʼniyaʼmofeʼmae.

⁹ Kini vekamoʼmo vayaʼaeʼmo hapa painoʼaeʼmo, Afiyo, huno, Isaleli vayaʼmo asole vayaʼmo maiteʼapaeʼmo apakae lokiyaʼmoʼmo lagae lokiyatimo ago aeno aga seʼniye.

¹⁰ Alagepa huta lagesamo afigetao. Fiku yanageʼa kame vayatiʼeʼmo aliʼa lokaeteʼa lagaeʼeʼmo kamemo huteʼa kotiletiʼmo apaune heʼa ugae, huno hapa paiʼniye.

¹¹ Ani gemo huno hapa paiʼniyaʼmofeʼmo Isaleli vayaʼmogimo apaiyafiʼmo maisayafeʼmo mago yagaiʼa apatesaya vayaʼmo lekana paiʼa apateʼnageʼa lokiya vaiʼa yagaiʼa apateʼnageʼa lusi hapaise vose aliʼyaʼmo aliʼnae. Ani agufa lokiya kana aliʼyaʼmo aliteʼa lole taonilaʼmo Pitomi taoniʼe Lamasesi taoniʼeʼmo kiʼnae. Ani lole taonilapiʼmo kini vekamo neʼyaʼagi alu ya alu yaʼagi huʼa maleʼnae.

¹² Apakaemo magoʼe huʼa hapaise vose aliʼyaʼmo apamiʼnayaʼmonanafa Isaleli vayaʼmo magoʼe huʼa asole vayaʼmo afole aiʼnageʼapaeʼmo Isipi vayaʼmogimo apaketeʼapaeʼmo koliʼapimo huʼnae.

¹³ Isaleli vayaʼaifeʼmo koliʼapimo huʼnayaʼmofeʼmo magoʼe huʼa lusi hapaise vose aliʼyaʼmo apamiʼnae.

¹⁴ Isaleli vayaʼmo maiʼnaya kavaʼapimoʼmo alagi hosuʼniye. Apakaemo simeli aliʼyaʼmo alige mopaletiʼmo noʼmo kisaya yafaʼmo kaege hoyamo aliʼa vaige huʼa lusi hapaise vose aliʼyaʼmo aliʼnae. Isipi vayaʼmogimo muki afinaʼaeʼmo hapau huʼa oʼapateʼa magoʼe huʼa kana aliʼyakeʼmo apamiʼnae.

¹⁵ Isaleli aʼne anagaʼmogimo mafaʼnemo aliʼa apatesayafeʼmo huʼnaya afinaʼmo hapa neʼmaʼa atalaʼmo Sifalaʼe Puvaʼeʼmae. Isipi kini vekamoʼmo ani atalaʼanifeʼmo ina ge huno hana paiʼniye.

¹⁶ Lanakaemo mago Himulu a kanomoʼmo ve mafaʼnemo alino neʼatesigetanaeʼmo ani mafaʼnemo alagi kamitimo amagisaʼageno faligiye. Amagigaʼaʼmonanafa a mafaʼnemo alino atesigetanaeʼmo oʼamagitana afaʼa ateʼao, huno hana paiʼniye.

¹⁷ Ani ge huno hana paiʼniyaʼmonanafa Goti agiʼalefeʼmo koli huʼnaʼaʼmofeʼmo kini vekamoʼmo ani kavaʼmo hiʼao huno hana paiʼniya kavaʼmo osuʼana ve mafaʼne anagaʼmo afaʼa apateʼnaʼae.

¹⁸ Inagi kini vekamoʼmo lole atalaʼanifeʼmo ge huʼnigeʼana eʼnaʼagenoʼaeʼmo ina ge huno ge huno anafi geʼniye. Na kava higetanaeʼmo lanakaemo ve mafaʼne anagaʼmo afaʼa apateʼnaʼae, huno anafi geʼniye.

¹⁹ Anakaemo ha paiʼanaeʼmo, Muki Himulu nofi aʼne anagaʼmogimo Isipi aʼne anagakana huʼa oʼmaiʼnae. Apakaemo lokiya aʼne anagaʼmo maiʼnayaʼmofeʼmo utaʼa avaʼyi osuʼnoʼageʼapaeʼmo malage huʼa mafaʼnemo aliʼa neʼapatae, huʼana ha paiʼnaʼae.

²⁰ Ani kavaʼmo huʼnaʼaʼmofeʼmo Gotiʼa ani lole atalaʼmo alagepa huno hana maeʼnigeʼana alagepa huʼana maiʼnaʼae. Inagi Isaleli vayaʼmo magoʼe huʼa asole vayaʼmo afole aiteʼa lokiya nofi vayaʼmo hamaleʼnae.

²¹ Isaleli aʼne anagaʼmogimo mafaʼnemo aliʼa neʼapatageʼanaeʼmo hapa neʼmaʼa atalaʼmoganimo Gotifeʼmo koli huʼnaʼaʼmofeʼmo Gotiʼa anakaemo mafaʼnemo aliʼana atesaʼafeʼmo hana maeʼniye.

²² Inagi kini vekamo Feloʼa Isipi vayaʼaifeʼmo hapa painoʼaeʼmo, muki Himulu vayaʼmogimo saufamo aliʼa apatesaya ve mafaʼne anagaʼmo apasagautapa alopa anipiʼmo yaga autapa apataletetapa a mafaʼnemo aliʼa apatesagetapaeʼmo afaʼa apateyo, huno hapa paiʼniye.