Esata 9 - The Keyagana NT and 25 OT books

Yu vayaʼmogimo kame vayaʼapimo naipeletiʼmo apaiʼnaya gemae

¹ Tuolofu kaimo agiʼamo Aʼna kaileʼmo tetini afinaʼmo Kini vekamoʼa ani kavaʼmo hiyo, huno hu maleʼniya kavaʼmo hisaya afinaʼmo ago afole aiʼniye. Yu vayaʼmogi kame vayaʼapimogi huʼapaeʼmo, aeta apaka segaune, huʼa huʼnayaʼmonanafa Yu vayaʼmogimo apakaefeʼmo alagi ohapauʼniya vayaʼmo ago aeʼa apaka seʼnae.

² Yu vayaʼmogimo Kini vekamo Sekisiʼa muki yagaiʼniya koteʼmo haneʼniya taonifiʼmo maiʼnaya kame vayaʼapimogi anonaʼapilefeʼmo kamemo hisayafeʼmo aliʼa anupa huʼa maiʼnae. Muki vayaʼamogimo Yu vayaʼaifeʼmo koliʼapimo huʼnayaʼmofeʼmo mago vayaʼmogimo alagi afaʼa aeʼa apaka oseʼnae.

³ Muki kotegamo yagaiʼnaya vayanagi muki gamani vayanagi muki kini vekamo aliʼyaʼamo neʼaliya vayanagi huʼa Motekaifeʼmo koli huʼnayaʼmofeʼmo Yu vayaʼmo hapa maeʼnae.

⁴ Muki vayaʼamogimo ageʼnayana kini vekamoʼmo Motekaiʼmo alopa napamo amige lokiyaʼamo amige huʼnigeʼa ageʼnae. Inagi muki afinaʼmo Motekaiʼa lokiyaʼamo magoʼe huno afole aiʼniye.

⁵ Inagi muki Yu vayaʼmogimo apayapiʼmo lusi kava huʼa naipeʼapimo aliʼneʼa asole kame vayaʼapiʼeʼmo kamemo huteʼa naipeletiʼmo apaiʼnageʼa faliʼnae. Apakaemo alagi apakaefeʼmo ohapauʼniya vayaʼaitegamo hapauʼniya agufa kavaʼmo afaʼa huʼnae.

⁶ Susa taonifiʼmo gamani yafa lafi kegiʼyafiʼmo Yu vayaʼmogimo faefu hataletiʼa vayaʼmo naipeletiʼmo apaiʼnageʼa faliʼnae.

^7-10 Yu vayaʼmogimo Hemani mafaʼne anagaʼamo naya loleʼa mafaʼne anagaʼmo naipeletiʼmo apaiʼnae. Ani Yu vayaʼai kameʼapimo Hemani afoʼamoʼmo Hemaʼnataʼae. Hemani mafaʼne anagaʼamogi apakiʼapimo Pasanataʼagi Talifoniʼagi Asapataʼagi Polataʼagi Aʼnaliyaʼagi Aliʼnataʼagi Pamasitaʼagi Alisaiʼagi Alitaiʼagi Vaisataʼagi huʼa naipeletiʼmo ago apaiʼnayaʼmonanafa Yu vayaʼmogimo kagemi yaʼapigeʼmo oʼaliʼnae.

¹¹ Susa taonifiʼmo gamani yafa lafi kegiʼyafiʼmo maiʼnaya vayaʼmo Yu vayaʼmogimo na magi vayaʼmo naipeletiʼmo apaiʼnafi huʼa kini vekaeʼmo ha paiʼnae.

¹² Kini vekamoʼmo Kuvini a kanomo Esatafeʼmo ina ge huno ha paiʼniye. Yu vayaʼmogimo Susa taonifiʼmo gamani yafa lafi kegiʼyafatikeʼmo faefu hataletiʼa kame vayaʼapimo naipeletiʼmo apaiʼnageʼa faliʼnae. Ani kava huʼa Hemani mafaʼne anagaʼamo naya loleʼa mafaʼne anagaʼmo naipeletiʼmo ago apaite huʼnae. Muki alu kotegatiʼeʼmo na agufa kavaʼmo huʼnae. Na agufa kavafeʼmo ge huka nafi gesapi ani kavaʼmo afaʼa huguve. Magoʼe kavafeʼmo kahauʼnisigekaeʼmo ge huka nafi gesanaʼmoʼmo afaʼa he, huʼnageʼmo huguve.

¹³ Esataʼa hunoʼaeʼmo, kini vekae, huno, kagaemo kahauʼnisiyaʼmoʼmo egamo Yu vayaʼmo afaʼa apateʼnegeʼapao Susa taonifiʼmo magoke agufa kavakeʼmo hiyo. Inagi Hemani mafaʼne anagaʼamo naya loleʼa mafaʼne anagaʼai apakufaʼamo posi yosaleʼmo apaneʼmu aeʼa asaiyo.

¹⁴ Inagi kini vekamoʼa hunoʼaeʼmo, ani kavaʼmo hiyo, huno hapa paiʼniye. Agaemo Susa taonifiʼmo ani keʼaepa gemo avoʼmo kae maleʼnigeʼa Hemani mafaʼne anagaʼmo naya loleʼa vayaʼai apakufaʼamo posi yosaleʼmo apaneʼmu aeʼa asaiʼnae.

¹⁵ Inagi kaimo agiʼamo Aʼna kaileʼmo fotini afinaʼmo Susa taonifiʼmo maiʼnaya Yu vayaʼmogimo halate aliʼa anupa huteʼa magoʼe huʼa tali hataletiʼa vayaʼmo naipeletiʼmo apaiʼnayaʼmonanafa kagemi yaʼapimo oʼaliʼnae.

¹⁶ Kini vekamoʼmo muki yagaiʼniya kotegamo maiʼnaya Yu vayaʼmo ofaliʼa afaʼa maisayafeʼmo aliʼa anupa huteʼa seveti faefu tauseniʼa kame vayaʼapimo naipeletiʼmo apaiteʼa maiʼa haga leʼnae. Naipeletiʼmo apaiʼnayaʼmonanafa kame vayaʼapimogi kagemi yaʼapimo oʼaliʼnae.

¹⁷ Ani kamemo muki taoniʼafiʼmo Aʼna kaileʼmo tetini afinaʼmo huʼnae. Fotini afinaʼmo maiʼa haga leteʼa alopa yagita huʼa neʼneʼa lusi kava huʼa apamogaga aiʼnayaʼmonanafa

¹⁸ Susa taonifiʼmo maiʼnaya Yu vayaʼmogimo fifitini afinaʼmo maiʼa haga leʼnae. Apakaemo tetini afinaʼe fotini afinaʼeʼmo kamemo huteʼa fifitini afinaʼmo maiʼa haga leteʼa alopa yagita huʼa neʼneʼa lusi kava huʼa apamogaga aiʼnae.

¹⁹ Ani kavatefeʼmo aise taonifiʼmo yafa lafi kegiʼyamo ohaneʼniya taonifiʼmo maiʼnaya Yu vayaʼmogimo Aʼna kaileʼmo fotini afinaʼmo hopa afinaʼmo lekana pai maleteʼa alopa yagita huteʼa lusi kava huʼa neʼneʼa apamogaga aiʼa apakaiʼapimo magoke magoke vayaʼmo hapa maeʼa apamogaga yaʼmo aliʼa apamiʼnae.

Mago alopa neʼyafeʼmo Yu gefatiʼmo agiʼamo Pulimi neʼyane, huʼa agi aeʼnaya gemae

²⁰ Motekaiʼa ani afinaʼmo afole aiʼniya kavafeʼmo ava gemo huno avoʼmo kaeno atalegeno haopaleʼmo maiʼnaya Yu vayaʼaitegamo uge afagi kotegamo maiʼnaya Yu vayaʼaitegamo uge kini vekamo Sekisiʼa yagaino neʼapateya kotegaʼeʼmo uge huʼniye.

²¹ Agaemo hapa painoʼaeʼmo, Muki kafugaʼaeʼmo Aʼna kaimo fotini afinaʼe fifitini afinaʼeʼmo hopa kavaʼmo hiyo.

²² Ani lole afinaʼmo Yu vayaʼmogimo kame vayaʼapiʼeʼmo kamemo huteʼa huʼa aeʼa apakaseteʼa maiʼa haga leʼnae. Ani kaileʼmo apaipamoʼmo kana huʼniya kavaʼapimo anonalefeʼmo apamogaga aiʼnae. Yulagefa aiʼnaya kavaʼapimo anonaʼaleʼmo hopa kavaʼmo huʼnae. Motekaiʼa hunoʼaeʼmo, Ani lole afinafeʼmo alopa yagita huge lapamogaga aige lapao vayaʼe kagemi yaʼapimo oʼmaleʼnisaya vayaʼeʼmo fiku hapa maetapa apamige hiyo, huno hapa paiʼniye.

²³ Motekaiʼa ani gemo avoʼmo kae maleʼnigeʼapaeʼmo Yu vayaʼmogimo akame huʼa muki kafugaʼae kafugaʼaeʼmo hopa kavaʼmo huʼa maiʼnae.

²⁴ Hemaniʼa Hameʼnata mafaʼnemo Agagai nofi vekamoʼa Yu vayaʼai kameʼapimo maiʼnenoʼaeʼmo muki Yu vayaʼmo apaino hano huno apatalesiyafeʼmo agesa afiʼniye. Agaemo apaisigeʼa falisaya afinafeʼmo kahauya huno agesiyafeʼmo satugana agufa yokalomo leno kahauya huʼniye. Ani yokaloeʼmo Yu gefatiʼmo agiʼamo Pulie.

²⁵ Kahauya huʼniyaʼmonanafa Esataʼa kini vekalegamo uʼnigenoʼaeʼmo kini vekamoʼmo Hemaniʼmo hosu kavaʼmo hisiyafeʼmo agesamo afiʼniya kavaʼamoʼmo agaiʼa agenopaleʼmo asagauno aisigeʼa agaiʼaʼe muki mafaʼne anagaʼaʼeʼmo posi yosaleʼmo apaneʼmu aeʼa asaisayafeʼmo keʼaepa gemo avoʼmo kaeʼniye.

²⁶ Hemaniʼa Puli yokalomo leʼniyaʼmofeʼmo ani hopa afinafeʼmo agiʼamo Pulimie huʼa agi ateʼnae. Ani avoʼmo ava gemogi ageʼnaya kavafenagi apakaetegamo afole aiʼniya kavafeʼmogi huʼa

²⁷ Yu vayaʼmogimo keʼaepa gemo hu maleteʼapaeʼmo, Lagaemogi muki laginago vayaʼmogi alu nofi vayaʼmo eʼa Yu nofi vayapiʼmo maisaya vayaʼmogiʼeʼmogi huʼa muki kafugaʼaeʼmo hiyo, huta huʼnona gemo akame huteʼa ani lole afinatefeʼmo apamogaga aiʼa hopa kavaʼmo hiyo, huʼa huʼnae.

²⁸ Inagi muki magoke magoke Yu afamo anagaʼmogimogi henagaʼamo muki afole aisaya vayaʼmogimogi muki polovenisifiʼmo maiʼnaya vayaʼmogimogi muki alopa taonifiʼmo maiʼnaya vayaʼmogimogi huʼa muki kafugaʼaeʼmo ani alopa afinaʼmo Pulimi afinafeʼmo apakesa afiteʼa maiʼa haga legae. Fiku yanageʼa henagaʼamo apake kanigiye, huʼa huʼnae.

²⁹ Apiheli aʼmafaʼnemo Kuvini a kanomo Esataʼe Yu vekamo Motekaiʼeʼmo magoʼe huʼana alu avoʼmo kaeteʼana ani lole Pulimi afinafeʼmo haneʼniya geleʼmo aliʼana maleʼnaʼae. Himamuʼaniletiʼmo hopa kava hisaya kavaʼmo aliʼana lokiya vaiʼana ateʼnaʼae.

³⁰ Motekaiʼa muki vani hataleti tuveti seveniʼa polovenisifiʼmo maiʼnageno kini vekamoʼmo yagaino neʼapateya Yu vayaʼaitegamo ani avoʼmo kaeno ataleʼnigeno uʼniye. Ani avopiʼmo apaipamoʼmo falu hisiya agufa lama gemo avoʼmo kaeno ataleʼnigeno uʼniye.

³¹ Ani avopiʼmo Pulimi hopa afinafeʼmo Yu vekamo Motekaiʼe Kuvini a kanomo Esataʼeʼmo apakaeʼe apakinago vayaʼmogiʼeʼmo akame hisayafeʼmo avoʼmo kae maleʼnaʼa gemo haneʼniye. Ani gemo neʼyaʼmo mo sige yulagefa aige huʼa maisaya kavafeʼmo huʼnaʼae.

³² Esataʼa Pulimi afinaʼmo hiyo, huno hapa paiʼniya gemoʼmo ani kavaʼmo alino lokiya vaino ateʼnigeno gamani vayaʼai mukufiʼmo avoʼmo kaeʼniye.