Esata 8 - The Keyagana NT and 25 OT books

Kini vekamoʼmo Yu vayaʼaifeʼmo uta kame vayatapiʼeʼmo kamemo hiyo, huno hapa paiʼniya gemae

¹ Ani afinaʼmo Kini vekamo Sekisiʼa Yu vayaʼai kameʼapimo Hemani noʼamogi kagemi yaʼamogi huno alino Kuvini a kanomo Esataʼmo amiʼniye. Esataʼa kini vekaeʼmo hunoʼaeʼmo, Motekaiʼe nagaeʼeʼmo magoke kolatalaʼmo maiʼnoʼae, huno ha paiʼniyaʼmofeʼmo Motekaiʼa kini vekamo aulagaleʼmo eno he tiʼniye.

² Kini vekamoʼmo hogoteno Hemani ayatetiʼmo linimo asagiʼniya linimo alino agaiʼa ayateʼmo vaiteno halate asagino Motekai ayateʼmo vaino ateʼniye. Ani linileʼmo kini vekamo alagena yaʼamo haneʼniye. Esataʼa Motekaiʼmo lekana paino ateʼnigeno muki Hemani kagemi yateʼmo yagaiʼniye.

³ Inagi halate Esataʼa uno kini vekamo aiyafiʼmo agoʼya faino maiʼneno aviʼyaʼmo nehunoʼaeʼmo kini vekaeʼmo hunoʼaeʼmo, Kanalenageka Hemaniʼa Yu vayaʼmogitalegamo hisiya hosu kavafeʼmo hu maleʼniya gelefeʼmo muki vayaʼaifeʼmo hukaeʼmo, Yu vayaʼaitegamo ani agufa kavaʼmo osiyo, huka hapa paiyo, huno ha paiʼniye.

⁴ Ha paiʼnigeno kini vekamoʼmo aipafiʼmo he, kanalene, huno agesamo afitenoʼaeʼmo goli hayopa kayotetiʼmo alino akoʼya huno lekana paino ateʼnigeno Esataʼa kini vekamo aulagaleʼmo he tino maiʼniye.

⁵ He tino maiʼnenoʼaeʼmo, Kini vekae, huʼna, kagaemo kahauʼnisiyaʼmoʼmo nagaefeʼmo kahauʼninageka nagaemo huʼnova geeʼmo kanalene, huka kagesamo afiʼnisanaʼmoʼmo Hemaniʼa hogoteno hu maleʼniya gemo aeka kalo paesanafeʼmo ge huka atalegeno muki vayaʼaitegamo uneno hisigeʼa afiteʼa Hemaniʼa hu maleʼniya gemo akame osiyo. Hemaniʼa avoʼmo kae maleʼniya gemoʼmo muki kagaemo yagaiʼnana koteʼmo maiʼnaya Yu vayaʼaifeʼmo hunoʼaeʼmo, naipeletiʼmo apaita hano hutapa apataleyo, huno avoʼmo kae maleʼniye.

⁶ Nagae vayaʼaitegamo ani agufa hanageke yaʼmo afole aisigeʼna ageteʼnaeʼmo haiya kava huʼna alagepa huʼna maiguve. Magoke kolaʼmo naipeletiʼmo apaisageʼa falisageʼnaeʼmo nagaemo haiya agufa kavaʼmo huʼna alagepa huʼna maiguve, huno ha paiʼniye.

⁷ Kini vekamo Sekisiʼa kuvini a kanomo Esataʼe Yu vekamo Motekaiʼefeʼmo hunoʼaeʼmo, Afiʼao, huno, Hemaniʼa Yu vayaʼmo naipeletiʼmo lapaino hano hisiyafeʼmo huʼniyaʼmofeʼmo nagaemo ago aneʼmu aeʼna asaiʼnove. Asaiteʼna muki yaʼamo ago aliʼna Esataʼmo amiʼnove.

⁸ Lanakaitanigeʼmo Yu vayaʼmo hapa maesiya agufa avoʼmo lanahauʼnisiya gemo hutana kaetetana nagae nagimo afaʼa kaetetana liniletiʼmo alagena yaʼnimo ani avoteʼmo hu maleʼao. Mago avoteʼmo nagae nagimo haneteno alagena yaʼnimo haneʼnisigeʼa ageteʼapaeʼmo magoke vekamoʼa afaʼa aeno kalo paeno oʼatalegaiye.

⁹ Inagi ani kavaʼmo hisayafeʼmo tuveti tali afinaʼmo tali kaimo agiʼamo Sivani kaileʼmo ani kafugafiʼmo Motekaiʼa kini vekamo avoʼmo nekaya vayaʼaifeʼmo ge huʼnigeʼa eʼnae. Agaemo mago gemo hapa paiʼnigeʼa ani gemo avoʼmo kaeʼnae. Ani avoʼmo kaeʼa atalageno Yu vayaʼaitegagi muki kotegamo neʼyagaiya vayaʼaitegagi hogote gamani vayaʼaitegagi kini nofi vayaʼmo neʼyagaiya vayaʼaitegagi muki vani hataleti tuveti seveniʼa polovenisi kotegagi huno uneno huteno Itiya kotetiʼmo aepa faiteno uno Itiyopiya kotegagi huno uneno huʼniye. Ani avoʼmo Yu gefatiʼmo kaege alu kote alu koteʼmo maiʼnaya vayaʼai apakeʼapifati apakeʼapifatiʼmo kaege huʼa avoʼmo kaeʼnae.

¹⁰ Motekaiʼa hunoʼaeʼmo, ani avoteʼmo kini vekamo agiʼamo avoʼmo kaege liniʼaletiʼmo alagena yaʼmo huge hiyo, huno hapa paiʼnigeʼa ani kavaʼmo hu maletageno avoʼmo aliʼniʼa neʼvaya vayaʼaina apamiʼnigeʼa kini vekamo lafi kegiʼyafatiʼmo uʼa lusi kava huʼa nagu nagu huʼa neʼvaya hosimo apavaleli eʼa ani hosileʼmo fai maiteʼa malage huʼa aliniʼa muki haopalegamo uʼeʼa huʼnae.

¹¹ Ani avoʼmoʼa hunoʼaeʼmo, Kini vekamoʼmo muki taoniʼafiʼmo maiʼnaya Yu vayaʼmogitapamo afiyo, huno, lapakaegi aʼnetapigi mafaʼnetapigi huʼa naipeletiʼmo lapaisayafeʼmo hisaya vayaʼmo anonaʼapilefeʼmo lapakaemo kamemo apahegae. Kamemo hisayafeʼmo haiya vayaʼeʼmofi alu kotega maiʼnaya vayaʼmogiʼeʼmofi huta kamemo hutetapa naipeletiʼmo apaita hano hutaletapaeʼmo muki kagemi yaʼapimo afaʼa aligae, huno hapa paiʼniye.

¹² Kini vekamo Sekisiʼa muki yagaino neʼapateya koteʼmo ani kavaʼmo tetini afinaʼmo tuolofu kaimo agiʼamo Aʼna kaileʼmo Yu vayaʼmogimo alo huʼa maiʼneʼapaeʼmo kamemo hisayafeʼmo lekana pai maleʼniye.

¹³ Ani gemo muki kotega hapa paige muki vayaʼaifeʼmo hapa paige hiyo.

¹⁴ Avoʼmo aliniʼa neʼvaya vayaʼmo hosileʼmo uʼa haiʼa fai maiteʼa malage huʼa aliniʼa nagu nagu huʼa uʼnae. Kini vekamoʼmo viyo, huno huʼniya gemoʼmo hunoʼaeʼmo, malagene, huno huʼnigeʼapaeʼmo nagu nagu huʼa aliniʼa uʼnae. Ani kava huʼa alopa taonimo Susa taonifiʼmo gamani yafa lafi kegiʼyafiʼeʼmo ani gemo hapa paiʼnae.

¹⁵ Apakaemo kini vekamoʼa neʼvaiya agufa kukenamo yaveyave yaʼmo hanege oko yaʼamo hanege huʼniya kukenamo aliʼa Motekaiʼmo vaiʼa ateteʼapaeʼmo mago haesa kenamo yatala kenamo aliʼa kofiʼa ateʼnae. Inagi mago kini kakolitamo alopa goli kakolitamo aliʼa agenopaleʼmo maleʼa ateʼnageno Motekaiʼa kini vekamo atalenuno lamiʼniye. Susa taonifiʼmo maiʼnaya vayaʼmogimo ageteʼapaeʼmo lusi kava huʼa amuse huʼa ateteʼa apamogaga aiʼnae.

¹⁶ Uʼnigeʼapaeʼmo muki Yu vayaʼmogi apaipamoʼmo lusi kava huno kanale huʼnigeno apaipamoʼmo falu huʼnigeʼa maiʼnae. Muki vayaʼmogimo Yu vayaʼaina ala apakiʼapimo apamiʼnae.

¹⁷ Muki kotegaʼe taonifiʼeʼmo maiʼnaya Yu vayaʼmogimo kini vekamoʼmo huʼniya gemo afiteʼapaeʼmo mago afinaʼmo lekana pai maleteʼa alopa yagita huʼa neʼa apamogaga aiʼa maiʼnae. Muki alu asole vayaʼmogimo Yu vayaʼaifeʼmo koliʼapimo huteʼapaeʼmo Yu vayaʼageʼmo ha maleʼnae.