Esata 7 - The Keyagana NT and 25 OT books

Esataʼa Hemaniʼmo agoti huno ateʼniya gemae

¹ Inagi kini vekaʼe Hemaniʼeʼmo Esataʼeʼmo uʼana neʼyaʼmo nesayafeʼmo uʼnaʼae.

² Lole afinaʼmo utegeʼanaeʼmo nofi alagafati aniʼmo neʼneʼapaeʼmo kini vekamoʼmo Esatafeʼmo ina ge huno afi geʼniye. Kuvini akanomo Esatao, huno, Na agufa yafeʼmo kahauʼniye. Kahauʼnisiya yafeʼmo naha paigeʼna kamino. Inagi kagaemo kahauʼnisiyaʼmoʼmo nagaemo muki yagaiʼnova kopatiʼmo folagapati aliʼna fako huʼna magokayaga koʼamo kamiguve, huno ha paiʼniye.

³ Esataʼmo kuvini a kanomoʼmo hunoʼaeʼmo, kini vekae, huno, kahauʼnisigeka amuse huka neʼnatesanaʼmoʼmo nagaeʼe vayaʼniʼeʼmo ofalita afaʼa maisunafeʼmo naha mao, huʼna ge huʼna kafi nekove.

⁴ Mago vekamoʼa nagaeʼe vayaʼniʼeʼmo naipeletiʼmo laisigeta falisunafeʼmo lagufamo ago maketi hu maleʼniye. Lagaemo afa vayaʼmo maiʼneta kalavusi aliʼyaʼmo afaʼa alita maisunafeʼmo lagufamo maketi hu maleʼniyesinana kanalenageno getimo alagi ohaneʼniyesine. Falisunagenoʼaeʼmo kini vekamoʼmo yagaiʼniya koʼalegamo muki yaʼamo alagepa huno ohanegaifa ago asagauno aigiye. Kametimoʼa kini vekamo anonaʼalefeʼmo afaʼa oʼamigiye, huno hapa paiʼniye.

⁵ Kini vekamo Sekisiʼa ani gemo afitenoʼaeʼmo Esatafeʼmo hunoʼaeʼmo, haiya agufa hosu vekamoʼmo koli osunoʼaeʼmo ani agufa himuʼnamu gemo huʼniye. Ani vekamo haiyaʼaleʼmo maiʼniye, huno afi geʼniye.

⁶ Esataʼa geʼaleʼmo aeno atagaina huno ha painoʼaeʼmo, Ani hosu vekamo Hemanifekeʼmo nehugenoʼaeʼmo agaemo kametimo maiʼniye, huno ha paiʼniye. Hemaniʼa kini vekaʼe kuvini a kanoʼefeʼmo koli huʼnigeno lusi kava huno atete hauʼniye.

⁷ Kini vekamoʼmo Esataʼmo huʼniya gemo afitenoʼaeʼmo lusi kava huno aipamo leʼnigeno neʼyaʼmo oʼneno ataleno he tino kumatega uno lamiteno noʼaleʼmo haneʼniya hoyafiʼmo lamiʼniye. Hemaniʼmo agesa afinoʼaeʼmo, kini vekamoʼmo ago kamitimo namagigiye, huno agesamo afitenoʼaeʼmo Esatafeʼmo afi gesigeno kini vekamoʼmo oʼamagino ha maesiyafeʼmo nopiʼmo maiʼniye.

⁸ Inagi kini vekamo kumatega hoyafiʼmo maigeno ataleno nopiʼmo eno haineno ageyana Hemaniʼa Esataʼmo havaeʼniya hipaleʼmo agoʼya faino havaeno maiʼnigeno agetenoʼaeʼmo, hae, huno, ani vekamoʼmo nagaiʼni naulagaleʼmo kuvini ategamo hosu kavaʼmo hisiyafeʼmo nehifiye, huno hutegeʼapaeʼmo uʼa Hemani augosafiʼmo lavolavoletiʼmo aiʼa ati kaeʼa ateʼnae.

⁹ Mago vekamo kini vekamo aliʼyaʼamo neʼaliya vekamo agiʼamo Haʼmonaʼa hunoʼaeʼmo, Hemaniʼa agaiʼa noʼaleʼmo lusi yatala posi yosamo faino ateʼniya yosaleʼmo Motekaiʼmo aneʼmu aeno asaisiyafeʼmo faino ateʼniyaʼmonanafa kini vekae, huʼna, Motekaiʼa kaha maeʼniya vekamo maiʼniye. Kini vekamoʼmo hunoʼaeʼmo, lapakaemo Hemaniʼmo avalelitutapa agaiʼamo ani posi yosaleʼmo aneʼmu aeta asaigeno falino, huno hapa paiʼniye.

¹⁰ Inagi Hemaniʼa Motekaiʼmo faligiye, huno alo huno ateʼniya yatala posi yosaleʼmo aneʼmu aeʼa asaiʼnae. Ani kavaʼmo huʼnagenoʼaeʼmo kini vekamoʼmo aipamo leʼniya kavaʼamo hano huʼniye.