Esata 6 - The Keyagana NT and 25 OT books

Kini vekamoʼa Motekaiʼmo ala agiʼamo amiʼniya gemae

¹ Ani haniʼilagamo kini vekamo au kalesiyafeʼmo havaeʼniyaʼmonanafa au okaleno afaʼa maiʼnenoʼaeʼmo agaiʼamo yagaino neʼapateya koteʼmo afole aiʼniya kavafeʼmo ava gemo avoʼmo kaeʼa neʼmalaya mukueʼmo mago vekaeʼmo, alinika eno, huno ha paiʼnigeno alinineno kini vekamo aulagaleʼmo ani mukufiʼmo lekana paiʼniye.

² Inagi lole vekalaʼmo Mikitanaʼe Telesiʼeʼmo kini vekamo lafi kate kipateʼmo hogoteʼana neʼyagaiʼa vekalaʼani anava gemo haneʼnigeno lekana paiʼniye. Ani lole vekalaʼmoganimo kini vekamo amagisaʼageno falisiya kafeʼmo kahauya nehaʼagenoʼaeʼmo Motekaiʼa ani hisaʼa kavafeʼmo anava gemo afitenoʼaeʼmo eno kini vekaeʼmo ha paiʼniya anava gemo lekana paiʼnigeno kini vekamoʼmo ani gemo afiʼniye.

³ Afitenoʼaeʼmo, Ani alagepa kavaʼalefeʼmo haiya agufa kavaʼmo huʼa Motekaiʼmo ala agiʼamo amiʼnae, huno apafi geʼnigeʼapaeʼmo kini vekamo aliʼyaʼamo neʼaliya vayaʼmogi huʼapaeʼmo, Agaetefeʼmo mago kavaʼmo osuʼnae, huʼa ha paiʼnae.

⁴ Inagi kini vekamoʼmo hunoʼaeʼmo, Hemenimo ina laʼmo noʼmo lafi kegiʼyafiʼmo maiʼniye, huno apafi geʼniye. Hemaniʼa ani afinaʼmo alo hu maleʼniya yosaleʼmo Motekaiʼmo aneʼmu aeno asaisiyafeʼmo kini vekaeʼmo ge huno afi gesiyafeʼmo eno haineʼniye.

⁵ Kini vekamo aliʼyaʼamo neʼaliya vayaʼmogimo ageteʼapaeʼmo, Hemaniʼa kagaemo kagesiyafeʼmo ago eno kagava maiʼniye, huʼa ha paiʼnageno kini vekamoʼmo, avalelita eta haiteyo, huno hapa paiʼniye.

⁶ Inagi Hemaniʼa eno haineʼnigenoʼaeʼmo kini vekamoʼmo, Afiyo, huno, mago vekamo maiʼniyanageʼna nagaemo ala agimo amiguvaʼmonanafa nagaemo agaetegamo na agufa alagepa kavaʼmo huguve, huno afi geʼnigenoʼaeʼmo Hemaniʼa aipafiʼmo agesamo afinoʼaeʼmo, kini vekamoʼmo ani kavaʼmo ina lategamo hisiyafeʼmo ani gemo huʼniye. Mago vayaʼmo oʼmaiʼnafa nagaekeʼmo maiʼnove, huno agesamo afiʼniye.

^7-8 Inagi Hemaniʼa kini vekamo geʼaleʼmo aeno atagaina huno ha painoʼaeʼmo, Kini vekae, huʼna, ala agiʼamo alisiya vekalegamo ina kavaʼmo huvo. Kini vekamogamo yatala lokiya kukenamo neʼvaina kukena alige hosimo fai neʼmaina hosimo agenopaleʼmo kini kakolitagana agufa yaʼmo maleʼa ateʼnaya hosimo avalege huliʼa egae.

⁹ Kagae nofi vayapatiʼmo mago hogote vekaeʼmo ge hugenoʼao ani vekamoʼmo kukenakafatiʼmo mago alino vaino ateteno hosileʼmo avaleno faino ateno. Ani vekamo hosileʼmo haino fai maiʼnisigeno ani hogote vekamoʼmo taonifiʼmo vayaʼmo aliʼa anupa huʼa neʼmaiya yateʼmo avalelino vino. Ani lole vekalaʼmo neʼuʼanaeʼmo kagae nofi vekamoʼmo ge hunoʼaeʼmo, Mani vekamo ageyo, huno, kini vekamoʼmo amuse huno ateteno ala agiʼamo amisiyafeʼmo hauʼnisiya vekalegamo ani agufa kavaʼmo hugiye, huno ge hugiye.

¹⁰ Kini vekamoʼmo ani gemo afitenoʼaeʼmo Hemanifeʼmo ina ge huno ha paiʼniye. Malage huka uka kukenaʼnimo alige hosiʼnimo avalege hulika eka Yu vekamo Motekaitegamo kagaemo naha paiʼnana agufa kavaʼmo huvo. Agaemo kini vekamo lafi kegiʼya kate kipateʼmo itopaleʼmo maiʼnegaiye. Muki naha paiʼnana gemo akame huka agaetegamo ani agufa kavaʼmo huvo, huno ha paiʼniye.

¹¹ Hemaniʼa kini vekamo geʼamo akame huno uno kukena alige hosi avalege hulineno Motekaiʼmo vaino ateteno Motekaiʼa hosileʼmo uno haino fai maiʼnigeno Hemaniʼa taonifiʼmo aliʼa anupa huʼa neʼmaiya yateʼmo avalelino uʼniye. Anakaemo neʼuʼanaeʼmo Hemaniʼa alopa gefatiʼmo ge huno hapa paiʼniye. Ageyo, huno, kini vekamoʼmo ala agiʼamo amisiyafeʼmo hauʼnisiya vekalegamo mani agufa kavaʼmo hugiye, huno hapa paiʼniye.

¹² Henagaʼamo Motekaiʼa halate aino atagineno kini vekamo lafi kegiʼya kate kipateʼmo uʼniyaʼmonanafa Hemaniʼa agenopaleʼmo lavolavoletiʼmo aino ati kaelineno yulagefa aime aime noʼalegamo atagineno nagu nagu huno uʼniye.

¹³ Unoʼaeʼmo aʼamo Selesiʼe muki ao vayaʼefeʼmo agaetegamo muki afole aiʼniya kavafeʼmo ava ge huno hapa paiʼnigeʼapaeʼmo aʼaʼe muki ao vayaʼmo ageteʼa afiʼnaya vayaʼmogiʼeʼmo huʼapaeʼmo, Motekaiʼa alagi kame huno kateʼniyanageka alagi aepa faiʼnananageka alagi asagauka aisanafeʼmo hane. Yu nofi vekamo maiʼniyaʼmofeʼmo kagaemo alagi aeka oʼagasegananageka alagikeʼmo asagauka aigane, huʼa ha paiʼnae.

¹⁴ Ani gemo nehageʼapaeʼmo kini vekamo aliʼyaʼamo neʼaliya vayaʼmogimo Hemaniʼmo avaleliʼa Esataʼa alopa yagita hu maleʼniyategamo visayafeʼmo malage huʼa uʼnae.