Esata 5 - The Keyagana NT and 25 OT books

Esataʼa kini vekaeʼmo ge huno afi geʼnigeʼana Hemaniʼeʼmo alopa neʼyateʼmo eʼnaʼa gemae

¹ Esataʼa neʼyaʼmo oʼneno loleʼe magoʼe afinaʼmo mosino maiʼneno kuvini kukenamo alino vaitenoʼaeʼmo uno kini vekamo lafi kegiʼya yuʼilagamo uno haino kini vekamo aeno hanagi maleʼneno fai maiʼneno yagaino neʼapateya noʼmo haopaleʼmo he tino maiʼnigenoʼaeʼmo kini vekamoʼmo noʼafiʼmo neʼyagaiya siyateʼmo fai maiʼneno kumategamo aulu heno ageno maiʼniye.

² Kini vekamoʼmo Esataʼmo ageyana malaga maiʼnigeno agetenoʼaeʼmo Esatafeʼmo amuse hutenoʼaeʼmo goli hayopa kayoʼmo aliʼniya ayaʼmo aeno hayo huteno alino akoʼya huno ateteno lekana paiʼniye. Inagi Esataʼa agetenoʼaeʼmo uno haopaletiʼmo ani kayoʼmo atupaleʼmo ayatetiʼmo ame aliʼniye.

³ Kini vekamoʼmo hunoʼaeʼmo, Kuvini a kanomo Esatao, huno, Na agufa yafeʼmo kahauʼniye. Inagi kahauʼnisiyana nagaemo yagaiʼnova kopatiʼmo folagapati aliʼna fako huʼna magokayaga koʼamo kamiguve.

⁴ Esataʼa geʼaleʼmo aeno atagaina huno ha painoʼaeʼmo, Kini vekae, huʼna, Kahauʼnisiyana Hemaniʼeʼmo hemeni haniʼilagamo alopa yagita huʼna kateʼnova neʼyateʼmo eʼao, huno ha paiʼniye.

⁵ Kini vekamoʼmo hunoʼaeʼmo, Malage hutapa uta Hemaniʼmo avalelitapa egenoʼao kuviniʼmo hauʼniya kavaʼmo hino, huno hapa paiʼniye. Inagi kini vekaʼe Hemaniʼeʼmo Esataʼa alopa yagita hu maleʼniyategamo uʼnaʼageʼapaeʼmo magokepiʼmo faiʼa maiʼnae.

⁶ Nofi alagafati aniʼmo neʼneʼapaeʼmo kini vekamoʼmo halate Esatafeʼmo ge huno afi geʼniye. Na agufa yafeʼmo kahauʼnifigi naha paigeʼna kamino. Inagi kagaemo hukaeʼmo nagaemo muki yagaiʼna neʼapatova kopatiʼmo folagapati alika fako huka magokayagaʼamo namiyo, huka hisanaʼmoʼmo afaʼa aliʼna fako huʼna kamiguve.

⁷ Inagi Esataʼa kini vekamo geʼaleʼmo aeno atagaina huno ha paiʼniye. Ge huʼna kafi gesuva gemo haneʼniyana

⁸ amuse huka neʼnatesanana muki yafeʼmo ge huʼna kafi gesugekaeʼmo he kanalene, hukageʼmo huganaʼmofeʼmo egamo magoʼe huʼna lanakaitani neʼyaʼmo Hemaniʼeʼmo yagita huʼna lanategauvanagi eʼao. Nagaemo nahauʼnisiya yafeʼmo ani afinakeʼmo kaha paiguve, huno ha paiʼniye.

Hemaniʼa Motekaifeʼmo naipeletiʼmo aisugeno faligiye, huno hu maleʼniya gemae

⁹ Hemaniʼa neʼyaʼmo neteno ataleno uno nelaminoʼaeʼmo lusi kava huno amogaga aiteno aipamoʼmo kanale huʼniye. Neʼunoʼaeʼmo ageyana Motekaiʼa kini vekamo yafa lafi kegiʼya kate kipateʼmo itopaleʼmo maiʼniyatetiʼmo he tino ape huteno ala agiʼamo oʼamiʼnigenoʼaeʼmo Hemaniʼa lusi kava huno aipamo leno ateʼniye.

¹⁰ Aipamo leno ateʼniyaʼmonanafa hauʼniya kavaʼmo malage huno osuno afa ateno noʼalegamo uno avaʼyi hutenoʼaeʼmo ao vayaʼe aʼamo Selesiʼefeʼmo ge huʼnigeʼa eʼnae.

¹¹ Eʼa maiʼnagenoʼaeʼmo agaemo hunoʼaeʼmo, nagaemo asole moniʼnimo malege asole mafaʼneʼnimo aliʼna apatege huʼnove. Kini vekamoʼmo ala agiʼamo amiteno alopa aliʼyaʼmo amiʼnigeʼapaeʼmo asole vayaʼmo kini vekamo gamani vayaʼaʼe aliʼyaʼamo neʼaliya vayaʼamogiʼeʼmo agae aiyafikeʼmo neʼmaiya kavafeʼmo ava gemo huno hapa paiʼniye.

¹² Magoʼe gemo hapa painoʼaeʼmo, Kuvini a kanomo Esataʼa alopa yagita hutenoʼaeʼmo kini vekaʼe nagaeʼefekeʼmo eʼao, huno ge huʼniye. Mago alu vayaʼaifeʼmo ge osuʼnifa laʼagaefekeʼmo ge huʼniyanagetaʼa egamo utaʼa agaeʼeʼmo halate neʼyaʼmo negauʼae, huno hapa paiʼniye.

¹³ Huno hapa paiʼniyaʼmonanafa Yu vekamo Motekaiʼa kini vekamo lafi kegiʼya kate kipateʼmo itopaleʼmo maiʼnigeʼna ageteʼnaeʼmo nagaemo nagesamo afiʼnovana mani alagepa yaʼmo ina agufa yaʼmo haneʼniye, huno hapa paiʼniye.

¹⁴ Selesiʼmo Hemani aʼamoʼe muki ao vayaʼmogiʼeʼmo, Afiyo, huʼa, mago vayaʼaifeʼmo hapa paigeʼapao mago posi yosamo yatalaʼamo tuveti mitamo maleʼa ageteʼa aliʼa faiʼa ateyo. Ega netepiʼmo uka kini vekaeʼmo afi gekaeʼmo, Motekaiʼmo lugoʼafiʼmo aneʼmu aeka asaisanageno faligiye. Kagaemo ani kava hisanagenoʼaeʼmo kaipamoʼmo falu huʼnisigeka kamogaga aika kini vekaʼeʼmo uka neʼyaʼmo negane, huʼa ha paiʼnae. Hemaniʼa ani geeʼmo hauʼnigeno vayaʼaifeʼmo hapa paiʼnigeʼa yatala posi yosamo aliʼa faiʼa ateʼnae.