Esata 4 - The Keyagana NT and 25 OT books

Motekaiʼa Yu vayaʼmo hapa maesiyafeʼmo Esatafeʼmo ge huno afi geʼniya gemae

¹ Motekaiʼa afole aiʼniya kavafeʼmo ava gemo afitenoʼaeʼmo kukenaʼamo alino apake aino ataleteno hosu ulale kukenamo alino vaiteno laʼnefamo alino faletenoʼaeʼmo aipafatiʼmo atu haeʼnigeno alopa gefatiʼmo faiyosago yokemo hulino taonifilagamo uno haiʼniye.

² Agaemo kini vekamo yafa lafi kegiʼya kate kipateʼmo uno avaʼyi huʼniyaʼmonanafa lafi kegiʼya yuʼilagamo uno ohaiʼniye. Kini vekamoʼmo hunoʼaeʼmo, ulale kukenamo vaiʼa aliʼnisaya vayaʼmo ani lafi kegiʼya yuʼilagamo afaʼa uʼa ohaigae, huteno, haʼao, hu maleʼniye.

³ Apakaemo kini vekamoʼmo huʼniya gemo muki kotegamo maiʼnaya vayaʼaifeʼmo aeʼa hakalo huʼa hapa paiʼnaya afinaʼmo muki Yu vayaʼmogimo ani gemo afiteʼapaeʼmo yulagefa aige neʼyaʼmo oʼneʼa mosige faiyosago yokemo huʼa aviʼyaʼmo huge huʼa maiʼneʼapaeʼmo muki vayaʼamogimo ulale kukenamo vaiteʼa laʼnefafiʼmo havaeʼa maiʼnae.

⁴ Esata aliʼyaʼamo neʼaliya aʼne anagaʼe yagaiʼa neʼataya ve anagaʼmogiʼeʼmo eʼa Motekaiʼa huʼniya kavafeʼmo ava gemo huʼa ha paiʼnageno Esataʼa afitenoʼaeʼmo lusi kava huno aipamoʼmo kana huʼniye. Agaemo Motekaiʼa ulale kukenamo asagino ataleteno alagepa kukenamo vaisiyafeʼmo kukena yaʼmo apamiʼnigeʼa aliniʼa eʼnayaʼmonanafa Motekaiʼa oʼaliʼniye.

⁵ Inagi Esataʼa mago vekamo agiʼamo Hatakifeʼmo ge huʼnigeno eʼniye. Hatakiʼa mago kini vekamo aʼne anagaʼaiteʼmo yagaino neʼapateya vekamoʼmo Esata aliʼyaʼamo alisiyafeʼmo kini vekamoʼmo lekana paino ateʼniye. Esataʼa Hatakiʼmo uno Motekaiʼa huʼniya kavaʼmo aepaʼamo agesiyafeʼmo alino ateʼnigeno uʼniye.

⁶ Hatakiʼa Motekaitegamo unoʼaeʼmo aliʼa anupa huʼa neʼmaiya kumaʼmo haopaleʼmo kini vekamo alopa noʼmo lafi kegiʼya kate kipateʼmo uʼniye.

⁷ Motekaiʼa agaetegamo afole aiʼniya kavafeʼmo Hatakifeʼmo ava gemo huno ha paitenoʼaeʼmo, Hemaniʼa Yu vayaʼmo naipeletiʼmo laisiyafeʼmo alopa monimo kini vekamoʼmo monimo neʼmaleya noʼafiʼmo malegauve, huno hapa paiʼniya gemo ha paiʼniye.

⁸ Motekaiʼa Hemaniʼmo kaeʼniya avopatiʼmo mago avoʼmo alino Hatakiʼa amiʼnigeno aliʼniye. Ani avopi gemoʼmo hunoʼaeʼmo, muki Yu vayaʼmo apaigeʼa faliyo, huno avoʼmo kae maleʼniya avoʼmo alino Hatakiʼmo amitenoʼaeʼmo, Esatafeʼmo muki afole aisiya kavafeʼmo ava gemo huka ha paiyo, huno ha paiʼniye. Hatakiʼa uno Esatafeʼmo ha paisigeno Esataʼa uno kini vekaeʼmo afi gesigeno kini vekamoʼmo muki Yu vayaʼaifeʼmo hau huno apateno.

⁹ Inagi Hatakiʼa uno Esatafeʼmo Motekaiʼa muki huʼniya geʼamo ha paiʼniye.

¹⁰ Esataʼa ani gemo afitenoʼaeʼmo Hatakiʼmo uno mago gemo Motekaifeʼmo ha paisiyafeʼmo alino ateʼnigeno uʼniye.

¹¹ Esataʼa hunoʼaeʼmo, ina ge huka ha paiyo, Kini vekamo afaʼa uʼna oʼagegauve. Inagi kini vekamoʼmo mago vekaeʼmo ge hisigenoʼaekeʼmo maiʼneno yagaino neʼapateya nopiʼmo uno haigiye. Inagi mago vekaeʼmo ge osuʼnisigeno agaiʼamo uno haisiyana naipeletiʼmo aisageno faligiye. Ani keʼaepa gemo aeʼa neʼagasaya kaʼmo magoke kaʼmo haneʼniyana mago vekamo afaʼa uno nehaisigenoʼaeʼmo kini vekamoʼa goli hayopa kayoʼaletiʼmo alino akoʼya huno lekana paino atesiyaʼmoʼmo ani vekamo ofalino agaetegamo afaʼa ugiye. Muki vayaʼamo kini vekamo aliʼyaʼamo neʼaliya vayaʼe afa vayaʼmogiʼeʼmo ani keʼaepa gemo ago afiʼnae. Inagi magoke kaimo ago uʼniyana nagaefeʼmo ge osuʼniye.

¹² Hatakiʼa uno ani gemo Motekaifeʼmo ha paiʼnigeno afitenoʼaeʼmo

¹³ ina ge huka Esatafeʼmo ha paiyo, kini vekamo nopiʼmo maiʼnanaʼmonanafa fiku yanageka faiʼna kasalo paegauve, huka kagesamo afigane. Muki Yu vayatimo alisaya agufa hanageke yaʼmo kagaeʼeʼmo afaʼageʼmo aligane.

¹⁴ Inagi kagaemo ani afinaʼmo ge osuka maisanaʼmoʼmo mago lagaemo laha maesiya kavaʼmo alu katetiʼmo afole aigiye. Afole aigiyaʼmonanafa kagaemo falisanageʼapaeʼmo muki afokamo nofi vayaʼaʼeʼmo alagikeʼmo faliʼa hano hugae. Faliʼa hano hugayaʼmofeʼmo mani agufa hosu afinaʼmo lagaemo Yu vayaʼmo laha maesanafeʼmo kuvini a kanomo maiʼnisapi huta oʼafiʼnone.

¹⁵ Inagi Esataʼa ani gemo afitenoʼaeʼmo, Ina ge hutapa Motekaifeʼmo ha paiyo, huno hapa paiʼniye.

¹⁶ He, kanalene. Kagaemo uka Susa taonifiʼmo maiʼnaya Yu vayaʼmo apavaleka alika anupa huka apategeʼa loleʼe magoʼe afinaʼe haniʼilagaʼeʼmo neʼyaʼe aniʼeʼmo oʼnetapa mosita maiyo. Ani kava huta nagaeʼe aliʼyaʼnimo neʼaliya aʼne anagaʼeʼmo neʼyaʼmo oʼneta mosigune. Keʼaepa gemo amagiʼna atalesuvana kini vekalegamo uʼna haiguve. Inagi ani kavaʼmo hisugeno naipeletiʼmo naisigeʼna falisuvana kanalenageʼna afaʼa faliguve, huno ha paiʼniye.

¹⁷ Motekaiʼa Esataʼmo ha paiʼniya gemo afitenoʼaeʼmo kini vekamo yafa lafi kegiʼya kate kipatetiʼmo atalenuno Esataʼa huvo, huno ha paiʼniya kavaʼmo huʼniye.