Esata 3 - The Keyagana NT and 25 OT books

Hemaniʼa muki Yu vayaʼmo naipeletiʼmo apaisugeʼa faligae, huno hu maleʼniya gemae

¹ Henagaʼamo aise afinaʼmo kini vekamo Sekisiʼa mago vekamoʼmo muki neʼyagaiya vayaʼaina aeno apakaseno hogote gamani vekamo maisiyafeʼmo ani vekamo agiʼamo Hemaniʼa lekana paino ateʼniye. Hemani afoʼamoʼmo Hameʼnataʼae, Agagai aginago vekamae.

² Kini vekamoʼmo muki vayaʼaifeʼmo hunoʼaeʼmo, Hemaniʼa ala agiʼamo amiyo, huno hapa paiʼnigeʼa muki kini vekamo aliʼyaʼamo neʼaliya vayaʼmogimo ape huteʼa ala agiʼamo amiʼnayaʼmonanafa Motekaiʼa ape huteno Hemaniʼmo ala agiʼamo amisiyafeʼmo ohauʼniye.

³ Kini vekamo lafi kegiʼyafiʼmo maiʼneʼa aliʼyaʼamo neʼaliya vayaʼmogimo Motekaifeʼmo huʼapaeʼmo, Na kava higekaeʼmo kini vekamo geʼamo akame nosane, huʼa afi geʼnae.

⁴ Apakaemo muki afinaʼae afinaʼaeʼmo Motekaifeʼmo ani kavaʼaeʼmo ha paiʼnayana geʼapimo oʼafiʼniyaʼmofeʼmo uʼa Hemanifeʼmo huʼapaeʼmo, Motekaiʼa hunoʼaeʼmo, Yu nofi vayapati vekamo maiʼnove, huno hapa paiʼniye. Apakaemo huʼapaeʼmo, Hemaniʼa Motekaiʼmo afaʼa atesigeno maiʼneno ani agufa kavakeʼmo huno maisifigeta agegaune, huʼa apakesamo afiʼnae.

⁵ Hemaniʼa Motekaiʼmo ageyana agaetefeʼmo ape huteno ala agiʼamo oʼamiʼnigeno agetenoʼaeʼmo lusi kava huno aipamo leʼniye.

⁶ Apakaemo Motekaifeʼmo huʼapaeʼmo, Yu nofi vayapati vekamo maiʼniye, huʼa ha paiʼnayaʼmofeʼmo Hemaniʼa Motekaikeʼmo naipeletiʼmo aisiyafeʼmo ohauʼniyaʼmonanafa muki Motekai nofi vayaʼmo Pesiya kotegamo maiʼnaya Yu nofi vayaʼeʼmo apaisigeʼa falisaya kafeʼmo agesamo afiteno kahauya huno agesayafeʼmo huʼniye.

⁷ Inagi tuolofuʼa kafugamo Sekisiʼa kini vekamo maiʼniya afinaʼmo napa vani kaimo agiʼamo Nisaniʼe huʼa agi neʼaya kaileʼmo Hemaniʼa na agufa kaileʼmo hainu afinaʼmo alagepa huʼa Yu vayaʼmo naipeletiʼmo apaisaya afinafeʼmo kahauya huʼa agesayafeʼmo yafatetiʼmo satu yokalomo leʼnae. Ani yokalomo ago leʼa kahauya huʼa ageʼnayana tuolofu kaimo agiʼamo Aʼna kaileʼmo apaisaya afinaʼmo ageʼnae.

⁸ Inagi Hemaniʼa uno kini vekaeʼmo ina ge huno ha paiʼniye. Mago nofi vayaʼmo muki kagaemo yagaiʼnana kotegamo mai uʼeʼa huʼnae. Ani vayaʼmogimo mago alu vayaʼmo mani koteʼmo maiʼnaya vayaʼmogimo nehaya agufa kavaʼmo nosae. Apakaemo aeto agufa vayaʼmo maiʼneʼa kagaemo yagaiʼnana koteʼmo hu maleʼnana keʼaepa gemo akame nosae. Ani kava nehayaʼmofeʼmo kagaemo afaʼa apatesanageʼa maisayaʼmoʼmo ani kavaʼapimoʼa alagi kaha oʼmaesigeno kagaemo kokamoʼmo alagi alagepa huno ohanegaiye.

⁹ Inagi kini vekae, huno, kagaemo kahauʼnisiyaʼmoʼmo keʼaepa gemo huka atalegeno uneno hisigeʼa muki vayaʼmogimo ani ve aʼnemo naipeletiʼmo apaisageʼa faligae. Inagi kagaemo ani kavaʼmo hisanageʼapaeʼmo naipeletiʼmo apaisaya vayaʼai miyaʼapimo nagaemo lusi asole siluva monimo fifiti miliyoni kinamo monimo neʼmalana nokafiʼmo malegauve, huno ha paiʼniye.

¹⁰ Kini vekamoʼmo Hemaniʼmo huʼniya keʼaepa geleʼmo alagena yaʼmo hu maleteno alino lokiya vaino atesiyafeʼmo ayatetiʼmo linimo asagino Hemaniʼmo Yu vayaʼai kameʼapimo amiʼniye.

¹¹ Kini vekamoʼmo Hemanifeʼmo hunoʼaeʼmo, Monikamo afaʼa ateʼneka ani vayaʼaitegamo na agufa kavaʼmo huguve huka hisapigi ani kavaʼmo afaʼa huvo, huno ha paiʼniye.

¹² Napa vani kaileʼmo tetini afinaʼmo Hemaniʼa kini vekamo avoʼmo nekaya vayaʼaifeʼmo ge huʼnigeʼa eʼnae. Eʼnagenoʼaeʼmo agaemo muki geʼamo alagi hapa paiʼnigeʼa avoʼmo kaeʼnae. Muki ani kotega mopaleʼmo maiʼnaya vayaʼmogi apakeʼapifati apakeʼapifatiʼmo ani avoʼmo kaeʼnae. Avoʼmo ago kaetagenoʼaeʼmo ani avoʼmo alino muki neʼyagaiya vayatama vayaʼaitegagi gamani vayaʼaitegagi hogote vayaʼaitegagi huno atalegeno uneno huʼniye. Hemaniʼa muki ani kaeʼnaya avoʼaleʼmo kini vekamo Sekisi liniletiʼmo alagena yaʼmo hu maleʼnigeno kini vekamoʼmo agaiʼamo ani avoʼmo kaeʼnegekana huʼniye.

¹³ Avoʼmo aliniʼa neʼvaya vayaʼmogimo ani avoʼmo alini uʼapaeʼmo ani kini vekamoʼmo yagaiʼniya koteʼmo neʼyagaiya vayaʼaina apamiʼnae. Muki ani avopi gemoʼmo hunoʼaeʼmo, Tetini afinaʼmo tuolofu kaimo agiʼamo Aʼna kaileʼmo muki Yu vayaʼmo naipeletiʼmo apaisageʼa faliyo. Muki neya ve aʼnegi anau anekalogi mafaʼnegi hutapa apaita hano hutapa apataleyo. Apaita hano hutaletapa muki kagemi yaʼapimo aliyo, huno huʼniye.

¹⁴ Muki vayaʼamogimo afiteʼa alo huʼa maiʼneʼa lekana pai maleʼnaya afinaʼmo Yu vayaʼmo apaisayafeʼmo avoʼmo kaeʼnaya gemo lekana paitapa muki polovenisiʼafiʼmo maiʼnaya vayaʼaifeʼmo hapa paiyo, huno hapa paiʼniye.

¹⁵ Inagi ani gemo alopa taonimo Susa taonifiʼmo gamani yafa lafi kegiʼyafiʼmo maiʼnaya vayaʼaifeʼmo aeʼa hakalo huʼa hapa paiʼnageʼa afiʼnae. Kini vekamoʼmo ani keʼaepa gemo avoʼmo aliniʼa neʼvaya vayaʼaifeʼmo malagene, huno hapa paiʼnigeʼa uʼa aliniʼa muki haopalegamo uʼeʼa huʼnae. Kini vekaʼe Hemaniʼeʼmo fai maiʼneʼana nofi alagafati aniʼmo neʼana maiʼnaʼaʼmonanafa Susa taonifiʼmo maiʼnaya vayaʼmogimo ani gemo afiʼa hapau aiteʼa alu apakesa alu apakesamo afiʼnae.