Esata 2 - The Keyagana NT and 25 OT books

Esataʼa Kuvini a kanomo hamaleʼniya gemae

¹ Kini vekamoʼmo aipamo leʼniya kavaʼamo hano hutegenoʼaeʼmo halate kuvini a kanomo Vasitiʼa hosu kavaʼmo huʼnigeno hafaino ataleʼniya keʼaepa gemo avoʼmo kae maleʼniya geeʼmo agesamo afiʼniye.

² Kini vekamo vayaʼamo maiʼneʼa noʼafiʼmo aliʼyaʼamo neʼaliya vayaʼmogi kini vekaeʼmo huʼapaeʼmo, mago alagepa apakufamo haneʼnisiya aʼmafaʼne anagaʼmo veʼeʼmo magokepi lokaeʼa ohavaeʼnisaya aʼmafaʼne anagaʼaifeʼmo kahauya hugae.

³ Kagaemo mago gamani vayaʼmo muki neʼyagaina kotegamo maiʼnaya vayapatiʼmo mago vayaʼmo lekana paika apatesanageʼa alagepa apakufamo haneʼnisiya aʼmafaʼne anagaʼmo apavaleli eʼa Susa taonimo gamani lafi kegiʼyafiʼmo aʼne anagakamo neʼmaiya nopiʼmo apategae. Hegaiʼa kagae aʼne anagaʼaiteʼmo yagaino neʼapateya vekamoʼmo yagaino apategaiye. Yagaino apateʼnisigeʼapaeʼmo kahaʼye hisiya agufa apakufamo alino hamalesiyafeʼmo ani aʼnemogi uvelimo faleteʼa apakufaleʼmo konalimo aliteʼa maiyo.

⁴ Inagi ani aʼne anagapatiʼmo mago afeʼmo kahauʼnisiya a kanomo kuvini a kanomo maisiyafeʼmo lekana paika atesanageno Kuvini a kanomo Vasiti aimuʼyaleʼmo maigiye, huʼa ha paiʼnae. Kini vekamoʼmo ani gemo afitenoʼaeʼmo hauʼnigeno ani gemo akame huʼniye.

⁵ Susa taonimo gamani lafi kegiʼyafiʼmo maiʼniya Yu vekamo agiʼamo Motekaiʼae. Motekai afoʼamoʼmo Yaiʼae. Yai afoʼamoʼmo Simaiʼae. Simai afoʼamoʼmo Kisiʼae. Motekaiʼmo Menisameni nofi vayapati vekamo maiʼniye.

⁶ Akeyaʼvilaga kini vekamo agiʼamo Nepukanesaʼa Mamiloni kotegatiʼmo eno Yu vayaʼaiteʼmo yagaino neʼapateya kini vekamo Yehoiyakiniʼe Yu vayaʼeʼmo apavalelinuno Mamiloni kotegamo kalavusi huno apateʼniye. Ani afinaʼmo Motekai afoʼamoʼeʼmo avalelino uʼniye.

⁷ Motekaiʼa mago aʼmafaʼnemo agiʼamo Esatateʼmo yagaino ateʼniye. Himulu gefatiʼmo Hanasaʼae huʼa agi aeʼnae. Esataʼa Motekai afoʼamo aganaʼamo aʼmafaʼnemo maiʼniye. Maiʼniyaʼmonanafa afoʼamoʼe itaʼamoʼeʼmo ago falitaʼageno Motekaiʼa Esataʼmo avaleno aʼmafaʼneʼa ya huno neʼagaiya aʼmafaʼnemo maiʼniye. Esataʼa alagepa augosaʼe agufaʼeʼmo haneʼniya aʼmafaʼnemo maiʼniye.

⁸ Kini vekamo keʼaepa geʼamo aeʼa hakalo huʼa hapa paiʼnageʼapaeʼmo asole aʼmafaʼne anagaʼmo apavaleli eʼa Susa taonimo gamani lafi kegiʼyafiʼmo apateʼnageno Hegaiʼa yagaino apateʼniye. Ani afinaʼmo Esataʼeʼmo avaleli eʼa kini vekamo lafi kegiʼya yuʼilagamo ateʼnageno aʼne anagaʼaiteʼmo neʼyagaiya vekamo Hegaiʼa yagaino ateʼniye.

⁹ Agaemo Esatafeʼmo hauʼnigeno amuse huno ateʼniyaʼmofeʼmo malage huno agufamo alino alagepa hisiya yaʼe alagepa neʼyaʼeʼmo amiʼniye. Aʼne anagaʼai nopiʼmo mago hogoteʼa aeʼa anagi maleʼnaya yapiʼmo maisiyafeʼmo Esataʼmo alino atetenoʼaeʼmo seveniʼa aʼmafaʼne anagaʼmogi kini vekamo nopiʼmo aliʼyaʼmo neʼaliya aʼmafaʼne anagaʼaifeʼmo, alagepa huta Esatateʼmo yagaita ateyo, huno hapa paiʼniye.

¹⁰ Hogoteno Motekaiʼa Esatafeʼmo ha painoʼaeʼmo, Yu nofi aʼmafaʼnemo maiʼnove, huka hapa opaiyo, huno ha paiʼnigeno ani gemo afiteno akame huno maiʼniye.

¹¹ Muki afinaʼaeʼmo Motekaiʼa aʼne anagaʼmogi noʼmo lafi kegiʼya malaga umenitata huno maiʼniye. Agaemo Esataʼa haiya kava huno maiʼnifi huno ge huno apafige na agufa kavaʼmo Esatategamo nehafi huno ge huno apafige hisiyafeʼmo uno maiʼniye.

¹² Kini vekamoʼmo apakufaeʼmo ageno haʼye hisiyafeʼmo magoke kafugamo ani aʼne anagaʼmo aliʼa alagepa huʼa apateʼnae. Sigisi kaileʼmo apakufaleʼmo mago yosamo agiʼamo meyae huʼa agi neʼaya yosafatiʼmo kola uvelimo he fiʼa aliniʼeʼa apakufaleʼmo faleʼa apateʼnae. Mago alu sigisi kaileʼmo mago uveliʼe mago alagepa atumo neʼaiya masave aniʼeʼmo faleʼa apateʼnae. Ani kavaʼmo huʼa hano hutageʼapaeʼmo magoke magoke aʼmafaʼnemo apavaleliʼa kini vekamo Sekisitegamo uʼnae.

¹³ Inagi muki aʼmafaʼne anagaʼmogimo kini vekamo nopiʼmo ugefeʼmo huʼapaeʼmo alagepa kukenamo apakaiʼapimo hapauʼniya agufa kukenamo vailiʼa ute ute huʼnae.

¹⁴ Uneʼmo kini vekamo nopiʼmo uno haino maime uno netepiʼmo aʼne anagaʼai nopiʼmo eʼniye. Mago vekamo Sasigasi kini vekamoʼmo napa tu aʼne anagaʼai noteʼmo neʼyagaiya vekamo ayapiʼmo apateʼnae. Ani aʼmafaʼnemoʼmo kini vekalegamo halate magoʼe huno oʼugiyaʼmonanafa henagaʼamo kini vekamoʼmo agaefeʼmo hausigenoʼaeʼmo agi aeno ge hisigeno halate agaetegamo ugiye.

¹⁵ Inagi Esataʼa kini vekalegamo visiya afinaʼmo ago afole aiʼniye. Ani aʼmafaʼnemo Amihaili aʼmafaʼnemo maiʼnigeno Amihailiʼa Motekai avuʼamoʼmo maiʼniye. Motekaiʼa Esataʼmo avaleno aʼmafaʼneʼa ya huno agaiʼniye. Muki vayaʼmogimo Esataʼmo ageteʼapaeʼmo amuse huʼa ateʼnae. Inagi Esataʼa kini vekamo uno agesiyafeʼmo hunoʼaeʼmo, mago yaʼmo namiyo, huno ge osuʼniyaʼmonanafa Hegaiʼa aʼne anagaʼaiteʼmo neʼyagaiya vekamoʼmo hauʼniya kukenamo vaiteno uʼniye.

¹⁶ Ani afinaʼmo Sekisiʼa seveniʼa kafugamo kini vekamo maiʼneno yagaino apateʼniye. Ani kafugamo teni kaieʼmo agiʼamo Temetiye, huʼa agi neʼaya kaileʼmo Esataʼa avaleliʼa kini vekalegamo uʼnae.

¹⁷ Kini vekamoʼmo Esatafeʼmo magoʼe huno hau ayamopafiʼmo hauʼnigeno mago alu aʼmafaʼne anagaʼmo veʼeʼmo magokepi lokaeʼa ohavaeʼnaya aʼmafaʼne anagaʼaifeʼmo ohauʼniye. Kini vekamoʼmo magoʼe huno amuse huno ateʼniyaʼmofeʼmo Esata agenopaleʼmo kuvini kakolitamo alino maleno ateteno Kuvini a kanomo Vasiti aimuʼyaleʼmo ateʼniye.

¹⁸ Inagi kini vekamoʼmo Esataʼmo lusi yagita huno ateʼniye. Agaemo muki hogote vayaʼe gamani vayaʼefeʼmo ge huʼnigeʼa eʼa neʼnae. Kini vekamoʼmo hunoʼaeʼmo, Nagaemo Esataʼmo kuvini a kanomo maisiyafeʼmo lekana paiʼna ateʼnovaʼmofeʼmo nagaemo muki yagaiʼnova koteʼmo maiʼnaya vayaʼmo maitapa haga leyo, huno hapa paiteno muki vayaʼmo magoʼe huno alagepa yaʼmo apamiʼniye. Kini vayaʼmogimo neʼapamiya agufa kava huno magoʼe yaʼmo apamiʼniye.

Motekaiʼa kini vekamo ha maeʼnigeno kini vekamo ofalino afaʼa maiʼniya gemae

¹⁹ Napa tu afinaʼmo veʼeʼmo magokepi lokaeʼa ohavaeʼnaya aʼmafaʼne anagaʼmo apavaleʼa aliʼa anupa huʼa apateʼnageno Motekaiʼa kini vekamo lafi kegiʼya yuʼilaga kate kipateʼmo ala apaki vayaʼeʼmo magokepi lokaeno maiʼniye.

²⁰ Hogoteno Motekaiʼa Esatafeʼmo ha painoʼaeʼmo, Yu nofi aʼmafaʼnemo maiʼnove, huka vayaʼaifeʼmo hapa opaiyo, huno ha paiʼniye. Esataʼa Motekaiʼmo yagaino ateʼniya afinatetiʼmo geʼamo afiteno akame huʼniya kava huno ani afinaʼeʼmo geʼamo afiteno akame huʼniye.

²¹ Motekaiʼa kini vekamo lafi kegiʼya yuʼilaga kate kipateʼmo itopaleʼmo maiʼniya afinaʼmo lole vekalaʼmoganimo kini vekamo lafi kegiʼya yuʼilaga kate kipateʼmo neʼyagaiʼa vekalaʼani anakiʼanimo Mikitanaʼe Telesiʼeʼmo anaipamo leʼnigeʼana kini vekamo amagisaʼageno falisiyafeʼmo vegemo huʼnaʼae.

²² Motekaiʼa ani lole vekalaʼmogani huʼnaʼa gemo afitenoʼaeʼmo uno Kuvini a kanomo Esatafeʼmo ha paiʼnigeno Esataʼa Motekai agiʼalefeʼmo uno kini vekaeʼmo ha paiʼniye.

²³ Ani gemo aepaʼaeʼmo kahauya huʼnayana alagi lama gemo huʼnaʼa gemo afiʼnae. Afiʼnayaʼmofeʼmo apakaemo ani lole vekalaʼmo anavaleli uʼana yosaleʼmo ananeʼmu aeʼana asaiʼnaʼageʼana faliʼnaʼae. Kini vekamo aulagaleʼmo ani kavafeʼmo ava gemo gamani vayaʼai mukufiʼmo avoʼmo kae maleʼnae.