Esata 1 - The Keyagana NT and 25 OT books

Kuvini a kanomo Vasitiʼa kini vekamo Sekisi geʼamo oʼafiʼniya gemae

^1-2 Pesiya koteʼmo Sekisiʼa kini vekamo maiʼniye. Agaemo Susa taonifiʼmo gamani yafa lafi kegiʼyafiʼmo yagaino neʼapateya siyateʼmo fai maiʼnenoʼaeʼmo muki kotegamo vani hataleti tuveti seveniʼa polovenisifiʼmo maiʼnaya vayaʼaiteʼmo yagaino apateʼnenoʼaeʼmo Itiya kotegatiʼmo aepa faiteno uno Itiyopiya kotegaʼeʼmo yagaino apateʼniye.

³ Loleʼe magoʼe kafugamo kini vekamo maiʼneno yagaino apateʼnenoʼaeʼmo muki ala apaki vayaʼmo muki kotegamo maiʼnaya vayaʼaifenagi aliʼyaʼamo neʼaliya vayaʼaifenagi gamani vayaʼaifenagi huno alopa yagita huteno ge huʼniye. Pesiya ami vayaʼaifenagi Mitiya ami vayaʼaifenagi yagaiʼa neʼapataya vayaʼaifenagi ala vayaʼaifenagi huno ge huʼnigeʼa eʼa maiʼnae.

⁴ Ani neʼyaʼmo magoʼe huno apamime apamime uʼnigeʼa sigisiʼa kaimo neʼa maiʼnagenoʼaeʼmo ani kini vekamoʼa muki noʼafi konali yaʼamogi kagemi yaʼamogi muki alu ya alu yaʼamogi huno alino apave liʼniye. Ani yaʼmo ageʼnayana alagepa yaʼmo haneʼnigeno mago hogote yaʼmo haneʼnigeʼa ageʼnae.

⁵ Ani alopa neʼyaʼmo ago neʼa hano hutagenoʼaeʼmo kini vekamoʼmo mago alu alopa neʼyaʼmo agaiʼa noʼamo haopaleʼmo lafi kegiʼya yuʼilagamo yagita huʼniye. Ani neʼyaʼmo Susa taonifiʼmo gamani yafa lafi kegiʼyafiʼmo muki maiʼnaya vayaʼmo ala vayanagi ina agufa vayanagi huʼa eʼa neʼnae. Ani neʼyaʼmo neme neme uʼa magoke salemo maiʼnae.

⁶ Ani neʼyaʼmo neʼnaya haopaleʼmo alagepa hiʼyalamuʼmo haneʼniya haopaleʼmo akeyaʼvilaga vayaʼmogimo haesa huge yaveyave huge oko huge huʼniya yafaʼe alaveʼyakana agufa yafaʼeʼmo aliʼa mopafiʼmo kale kaeʼa hiʼyalamuʼmo hu maleʼnae. Ani neʼyaʼmo nesayafeʼmo huʼapaeʼmo ani yateʼmo yaveyave kenaletiʼe oko kenaletiʼeʼmo asai maleteʼa alagepa nofitetiʼmo ki maleʼnae. Vegovego siluva kayoteʼmo lavolavomo asai maleteʼa yafa posimo faiʼa ateʼnaya posileʼmo nofi ki maleʼnae. Ani neʼyaʼmo nesaya haopale yateʼmo alagepa goli siyamo malege alagepa siluva siyamo malege huʼa maleli uʼeʼa hu maleʼnae.

⁷ Vayaʼmogimo aniʼmo nesaya kapumo aeto agufaʼe goli kapumo aliʼnae. Kini vekamoʼa asole nofi alagafati aniʼmo alino ani vayaʼmo lakino apamiʼniye.

⁸ Nofi alagafati aniʼmo na magi kapumo lakita negaune, huʼa huʼnafi hapauʼniya agufa ani kapumo lakiʼa neʼnae. Kini vekamoʼmo noʼafiʼmo aliʼyaʼmo neʼaliya vayaʼaeʼmo, muki vayaʼmogimo anifeʼmo hapauʼnisiyaʼmoʼmo kapuʼapifiʼmo aniʼmo lakita apamiyo, huno hapa paiʼniye.

⁹ Ani afinaʼmo Kuvini a kanomo Vasitiʼa ina kava huno muki aʼne anagaʼagekeʼmo kini vekamo nopiʼmo alopa neʼyaʼmo nesayafeʼmo yagita huno apateʼnigeʼa eʼa neʼnae.

¹⁰ Ani alopa neʼyaʼmo neʼnaya afinaʼmo napa seveni afinaʼmo kini vekamoʼmo nofi alagafati aniʼmo lusi aniʼmo neteno aiseʼamo negi maleʼniye. Maleteno hogote vayaʼmo noʼafiʼmo aliʼyaʼmo neʼaliya vayaʼmo seveniʼa vayaʼaifeʼmo ge huʼnigeʼa eʼnae. Apakiʼapimo Mehumaniʼagi Misitaʼagi Hamonaʼagi Mikitaʼagi Amakitaʼagi Setaʼagi Kakasiʼagi huʼa eʼnae.

¹¹ Kini vekamoʼmo hunoʼaeʼmo, Kuvini a kanomo Vasitiʼmo uta avalelita eyo, huno hapa paiʼniye. Ani Kuvini a kanomo Vasitiʼmo egefeʼmo hunoʼaeʼmo, kuvini kakolitamo alino agenopaleʼmo maleno aliteno eno, huno hapa paiʼniye. Ani kuvini a kanomo alagepa agufamo haneʼniya a kanomo maiʼniyaʼmofeʼmo kini vekamoʼmo muki gamani vayaʼe muki ani alopa neʼyateʼmo eʼnaya vayaʼmogiʼeʼmo kanale agufamo alinineno apavelisigeʼa agesayafeʼmo hauʼniye.

¹² Noʼafiʼmo aliʼyaʼmo neʼaliya vayaʼmogimo kini vekamoʼmo hapa paiʼniya gemo uʼa ha paiʼnayaʼmonanafa Kuvini a kanomo Vasitiʼa oʼafiʼniye. Oʼafiʼnigeno ani gemo kini vekamoʼmo afitenoʼaeʼmo lusi kava huno ge hauʼnigeno aipamo leʼniye.

¹³ Kini vekamoʼmo huʼniya kavaʼamo haneʼniyana muki vayaʼaiteʼmo alagepa huno yagaino apatege keʼaepa gemo afige huno maisiyafeʼmo aipa agesamo aliʼa api aiʼa atesaya vayaʼaifeʼmo ge huno apafi nekeya agufa kavaʼmo haneʼniye. Ani agufa kavaʼamo haneʼniyaʼmofeʼmo kuvini a kanomoʼmo huʼniya kavafeʼmo ava gemo afitenoʼaeʼmo ani ageteʼa afiʼnaya vayaʼaifeʼmo keya aeno ge huʼniye.

¹⁴ Ina kava huvo, huʼa ha nepaiya vayaʼai apakiʼapimo Kasenaʼagi Setaʼagi Atimataʼagi Tasisiʼagi Melesiʼagi Masenaʼagi Memukaniʼagi huʼa maiʼnae. Ani seveniʼa vayaʼmo Pesiya vayapatiʼmo maige Mitiya vayapatiʼmo maige huʼneʼa hogote gamani vayaʼmo maiʼnae.

¹⁵ Inagi agaemo ani vayaʼaifeʼmo ina ge huno hapa paiʼniye. Kuvini a kanomo Vasitiʼa nagaetegamo egefeʼmo hisiya kavafeʼmo noʼnifiʼmo aliʼyaʼnimo neʼaliya vayaʼmo aliʼna apateʼnogeʼa uʼa ha paiʼnayaʼmonanafa geʼnimo ago amagino ataleʼniye. Ani kavatefeʼmo keʼaepa gemoʼmo na agufa gemo huʼniye. Lagaemo Kuvini ategamo na agufa kavaʼmo hugune, huno apafi geʼniye.

¹⁶ Inagi ala vekamo Memukaniʼa kini vekaʼe ha neʼmaya gamani vayaʼefeʼmo ina ge huno hapa paiʼniye. Kini vekae, huʼna, afiyo. Kuvini a kanomo Vasitiʼa kini vekamogalegageʼmo ani agufa hosu kavaʼmo osuʼniyaʼmonanafa agaemo muki gamani vayakalegaʼe kagaemo muki yagaika neʼapatana vayaʼaitegaʼeʼmo ani agufa hosu kavaʼmo huʼniye.

¹⁷ Kagaemo muki haopalegamo yagaika neʼapatana aʼne anagaʼmogimo kuvini a kanomoʼmo huʼniya kavafeʼmo ava gemo afiteʼapaeʼmo ina ge huʼa hugae. Kini vekamo Sekisiʼa Kuvini a kanomo Vasitifeʼmo, eno, huno ge huʼniyaʼmonanafa geʼamo ago amagino ataleʼniye, huʼa hugae.

¹⁸ Ani gemo huteʼa anauʼapimogi geʼapimo oʼafisageʼapaeʼmo kaveta hugae.

¹⁹ Kini vekae, huʼna, kahauʼnisiyaʼmoʼmo mani agufa gemo huteka ge huka atalegeno muki vayaʼaitegamo uneno hino. Vasitiʼa halate magoʼe huno eno oʼnagegaiye. Ani agufa lokiya gemo huka Pesiya vayaʼe Mitiya vayaʼeʼmo keʼaepa geʼapimo haneʼniya mukufiʼmo vayaʼmogimo aeʼa kalo paeʼa oʼatalesayafeʼmo avoʼmo kae malegeno haneno. Avoʼmo kae maletesagekaeʼmo Vasiti aimuʼyaleʼmo mago aeno aga seʼnisiya a kanomo kuvini a kanomo maisiyafeʼmo lekana paika ato.

²⁰ Mani gemoʼmo muki neʼyagaina kotegamo aino atagu faeno uneno hisigeʼapaeʼmo muki aʼne anagaʼmogimo afiteʼa anauʼapimogi geʼapimo afigae. Aʼnemogimo apaki haneʼniya anauʼapimogi geʼapiʼe apaki ohaneʼniya anauʼapimogi geʼapiʼeʼmo afaʼa afigae, huno ha paiʼniye.

²¹ Kini vekaʼe muki neʼyagaiya vayaʼmogiʼeʼmo ani gemo afiteʼapaeʼmo ani geeʼmo hapauʼnigeno kini vekamoʼmo Memukaniʼa huʼniya gemo akame huʼniye.

²² Inagi kini vekamoʼmo avoʼmo kaeno atalegeno muki neʼyagaiya kotegamo uneno huʼniya gemo ina ge huno alu apake alu apakefatiʼmo avoʼmo kaenoʼaeʼmo, Vemogigeʼmo afamo anagaʼapileʼmo yagaiʼa apateyo, huno avoʼmo kae maleʼniye.