Esala 9 - The Keyagana NT and 25 OT books

Mago Isaleli vayaʼmogimo malaga nofi aʼne anagaʼmo aliʼnaya gemae

¹ Ina kava hutegenoʼaeʼmo yagaiʼa lateʼnaya vayaʼmogimo eʼa nagaefeʼmo ina ge huʼa naha paiʼnae. Afiyo, huʼa, Isaleli vayatigi mono huʼa nelataya vayanagi Livai vayanagi huʼa malaga nofi vayaʼmo apataleʼa apaote oʼmaiʼnae. Apakaemo Kenani vayaʼenagi Hiti vayaʼenagi Pelesi vayaʼenagi Yemusi vayaʼenagi Emoni vayaʼenagi Movapu vayaʼenagi Isipi vayaʼenagi Emo vayaʼenagi huʼa magokepiʼmo lokaeʼa maiteʼapaeʼmo apakae kavaʼmo huteʼa Gotiʼa avenatuʼnaʼmo heno atalegekana nehiya agufa kavaʼmo nehae.

² Ina kava huʼa lagaepatiʼmo magoʼamogimo apakaiʼapiʼe ve mafaʼneʼapimogiʼeʼmo uʼa alu nofi vayaʼmogi a mafaʼnemo aliʼnayaʼmofeʼmo aote mafaʼnemo aliʼa apateʼnaya mafaʼnefiʼmo aliʼa fitagu fatagu huʼnae. Neʼyagaiya vayaʼmogiʼe yahauve vayaʼmogiʼeʼmo hogoteʼa ani agufa hosu kavaʼmo huʼnageʼa vayaʼmogi apakame huʼnae, huʼa naha paiʼnae.

³ Nagaemo ani gemo afiteʼnaeʼmo lusi kava huno naipamoʼmo kana huʼniyaʼmofeʼmo kukena yaʼnimo aliʼna apake aiteʼna nagenopa nayokaʼmo aliʼna faige navenanapa nayokaʼmo aliʼna faige huteʼna nagesa afi yaʼmo alagi ohaneʼnigeʼna fikumo fai maiʼnove.

⁴ Kame vayaʼmogi eʼa apavaleliʼuʼa Mamiloni kotegamo apateʼnaya vayaʼmogi hosu kavaʼmo huʼnayaʼmofeʼmo muki vayaʼmogimo Isaleli vayaʼmogi Gotiʼapimo geʼalefeʼmo atete huʼnaya vayaʼmo nagaemo fai maiʼnova yateʼmo eʼa aliʼa anupa huʼa maiʼnae. Nagesa afi yaʼnimo alagi ohaneʼnigeʼna fai maiʼnogenoʼaeʼmo uneʼmo ofalinimo nehaya afinaʼmo afole aiʼniye.

⁵ Ani ofalini nehaya afinaʼmo afole aiʼnigeʼnaeʼmo inagi nagaemo nagufamo aliʼna afepiʼmo ateʼnova kavapatiʼmo he tiʼna naleʼyamo faiʼna maiʼneʼnaeʼmo Ala kava neʼmo Gotiʼnimofeʼmo nunumuʼmo hisuvafeʼmo lole nayatalaʼmo aliʼna asagauʼnove. Ani aliʼna apake aiʼnova kukena yaʼnimo vaiteʼna maiʼnove.

⁶ Nagaemo ina gemo huʼna nunumuʼmo huʼnove. O Gotiʼnimogae, huʼna, Hosu kavatimoʼmo lagenopamo ago alino laga seno uno haiʼniyaʼmofeʼmo nagufamo alino afepiʼmo nateʼniye. Hosu kavatilefeʼmo vaiʼmo alisuna kavaʼmo kosime kosime uno haino kokuʼnateʼmo haneʼniyaʼmofeʼmo lusi kava huno navagage nehiyanageʼna afaʼa aliʼna maku huʼna okagegauve.

⁷ Laginago vayaʼmo maiʼnaya afinatetiʼmo eno hemeniʼeʼmo lagaemo vayakamogitamogi kini vayatigi mono huʼa nelataya vayatigi huta magoʼe huta alopa hosu kavaʼmo huʼnone. Huʼnonaʼmofeʼmo kagaemo alu kotega kini vayaʼmo alika apateʼnanageʼa eʼa lagaemo kamitimo lahaeteʼa muki yatimo kumaya aliteʼa afagi kotegamo lavaleliʼuʼa kalavusi huʼa lateʼnae. Akeyaʼvilaga lusi kava huʼa apavagage yaʼmo aliʼnaya agufa kavakeʼmo huta hemeniʼeʼmo lagaemo ani agufa kavakeʼmo nehune.

⁸ Hemenimo aise afinaʼmo Ala kava neʼmo Gotitimogae, huʼna, kagaemo fiku laha maeʼnananageta Isaleli vayapatiʼmo logufaʼamo maiʼneta aise vayaʼmo faita kasalo paeta lokiya yosaletiʼmo nilimo aigeno haneʼniya kava huta kaote koteʼmo mono nokamo faita ateʼnone. Ina kava huka laulagamo alika ayakeka latesanageta ha le yaʼmo agegaune. Kalavusi aliʼyaʼmo aliʼnonaʼmonanafa fiku laha maeʼnananageta halate he tita afaʼa maigune.

⁹ Lagaemo kalavusi aliʼyaʼmo aliʼnonaʼmonanafa ani kalavusi aliʼyaʼmo neʼalunagekaeʼmo Gotitimogamo lagaefeʼmo kage kanika olataleka fiku laha maeʼnanageʼapaeʼmo Pesiya kini vayaʼmogimo alagepa apaipamo kaliʼa lateteʼa lataleʼnageta eta halate mono nokamo kige heʼa halagape vaiʼa ataleʼnaya no atufafiʼmo noʼmo kige nehune. Ani kini vayaʼmogi Yulusalemu kotegagi Yuta kotegagi huʼa laha maesiya yafa kegiyagana huʼa maiʼnayanageta afaʼa maigune.

¹⁰ O Gotitimogae, huʼna, alagepa huka laha maeʼnanaʼmonanafa keʼaepa gekaeʼmo lagesamo oʼafita ago kataleta uʼnonaʼmofeʼmo hemenimo lagaemo na agufa gemo hugune.

¹¹ Kagaemo aliʼyakamo neʼaliya polofeti vayakamogimo kagaetegati gemo aliʼniʼeʼa aeʼa hakalo huʼa hapa nepaiya vayaʼai apavayafatiʼmo laha paiʼnana keʼaepa gekamo ago amagita ataleʼnone. Apakaemo laha paiʼapaeʼmo, Gotiʼa uta alisaya mopaleʼmo maiʼnaya vayaʼai hosu kavaʼapiyeʼmo alagi ohauʼnigenoʼaeʼmo avenatuʼnaʼmo heno neʼatale. Ani oʼaniya hosu kavaʼapimoʼa kosino alopa heteno muki ma mopafiʼmo aino atagu faeʼniye.

¹² Nehayaʼmofeʼmo aʼmafaʼnetapimo ani nofi vayaʼaina oʼapamige mafaʼnetapimogimo aʼmafaʼneʼapimo oʼalige hiyo. Lapakaemo muki afinaʼmo apakaeʼeʼmo kame osisageʼa alagepa huʼa maisayafeʼmo hapa oʼmaeyo. Lapakaemo lokiya vaitapa maiʼnetapa ani mopaleʼmo alita vaisaya hoyafatiʼmo alagepa neʼyaʼmo neme neme utapa falisageʼapaeʼmo mafaʼnetapimogimo ani mopamo alisageno apakaiʼapi mopaʼapimo muki afinaʼmo hanege hanege huno hanesiyafeʼmo ani kavaʼmo hiyo.

¹³ Lagaemo hosu kavaʼmo huteta alopa vaiʼmo aliʼnonaʼmofeʼmo kayoʼmo ago lamiʼnanaʼmonanafa hosu kavatimo haneʼniya kavatefeʼmo alopa kayoʼmo lamisana agufa kavaʼmo huta maiʼnonaʼmonanafa alopa kayoʼmo olamika laha maeka hosu kavapatiʼmo lagufamo alika katika lateʼnane.

¹⁴ Huʼnanaʼmofeʼmo fiku yanageta lagaemo halate keʼaepa gekamo amagita ataleteta alagi okahauʼnigeka kavenatuʼnaʼmo heka neʼatala kavaʼmo nehaya vayapatiʼmo aʼmafaʼneʼapimo alige aʼmafaʼnetimo apamige hugune. Ani kavaʼmo hisunana kagaemo kaipamo leka lateteka mukiʼamo alagi kamitimo lamagika hano huka latalesanageta lagaepatiʼmo magokeʼamo alagi oʼmaigune.

¹⁵ O Ala kava neʼmo Isaleli vayaʼmogita Gotitimogae, huʼna, Kagaemo fatago kavaʼagekeʼmo nehana Gotigamo maiʼnanaʼmofeʼmo kagaemo lataleʼnanageta faita kasalo paeta aise vayaʼmo maiʼnone. Hemenimo kaulagaleʼmo hetita maiʼnonaʼmofeʼmo kaulagaleʼmo afaʼa he tita oʼmaigunaʼmonanafa kaulagaleʼmo hosu kavatifikeʼmo maiʼnone, huʼna nunumuʼmo huʼnove.