Esala 7 - The Keyagana NT and 25 OT books

Esalaʼmo Yulusalemu taonifiʼmo uno avaʼyi huʼniya gemae

^1-5 Ani kavaʼmo afole aitegenoʼaeʼmo Pesiya kini vekamo Atasekisiʼmo yagaiʼniya afinaʼmo Esalaʼmo Mamiloni kotegatiʼmo eʼniye. Esalaʼmo Eloni nofi vayapati vekamo mono huno neʼapateya vekamo maiʼniye. Esalaʼmo Selaiya mafaʼnemo maiʼnigeno Selaiyaʼmo Asalaiya mafaʼnemo maiʼnigeno Asalaiyaʼmo Hilikiya mafaʼnemo maiʼnigeno Hilikiyaʼmo Salumi mafaʼnemo maiʼnigeno Salumiʼmo Saʼnoki mafaʼnemo maiʼnigeno Saʼnokiʼmo Ehitapi mafaʼnemo maiʼnigeno Ehitapiʼmo Amaliya mafaʼnemo maiʼnigeno Amaliyaʼmo Asaliya mafaʼnemo maiʼnigeno Asaliyaʼmo Melaiyoti mafaʼnemo maiʼnigeno Melaiyotiʼmo Selahiya mafaʼnemo maiʼnigeno Selahiyaʼmo Uyi mafaʼnemo maiʼnigeno Uyiʼmo Muki mafaʼnemo maiʼnigeno Mukiʼmo Amisuva mafaʼnemo maiʼnigeno Amisuvaʼmo Finiyasi mafaʼnemo maiʼnigeno Finiyasiʼmo Eliyesa mafaʼnemo maiʼnigeno Eliyesaʼmo Eloni mafaʼnemo maiʼniye. Eloniʼa hogote vekamo mono huno neʼapateya vekamo maiʼniye.

^6-7 Esalaʼmo Ala kava neʼmo Isaleli vayaʼmogi Gotiʼapimoʼmo Mosese ayapiʼmo apamiʼniya keʼaepa gemo alagepa huno afiteno avoʼmo nekaeya vekamo maiʼniye. Gotiʼamoʼmo agaeʼeʼmo magokepi lokaeno maiʼnenoʼaeʼmo ha maiʼniyaʼmofeʼmo Esalaʼmo kini vekaeʼmo naha maeka namiyo, huno ge huno afi nekegenoʼaeʼmo inagi kini vekamoʼmo muki ge huno afigeʼniya yaʼmo amiʼniye. Kini vekamo Atasekisiʼmo seveniʼa kafugamo yagaino apateʼnenoʼaeʼmo Esalaʼmo napa vani afinaʼmo napa vani kaileʼmo Mamiloni kotegatiʼmo ataleno mago Isaleli vayaʼeʼmo Yulusalemu taonifiʼmo uʼnae. Ani magokepi lokaeʼa uʼnaya vayapiʼmo mono huʼa neʼapataya vayanagi Livai vayanagi mono yokemo nehaya vayanagi mono noʼmo kipateʼmo neʼyagaiya vayanagi mono noʼafiʼmo aliʼyaʼmo neʼaliya vayanagi huʼa uʼnae.

^8-9 Apakaemo napa vani afinaʼmo napa vani kaileʼmo Mamiloni koʼmo ataleʼnae. Gotiʼa Esalaʼeʼmo magokepi lokaeno maiʼnenoʼaeʼmo ha maeʼnigeno napa vani afinaʼmo faefu kaileʼmo Yulusalemu taonifiʼmo uno avaʼyi huʼniye. Ani afinaʼmo kini vekamoʼmo seveniʼa kafugamo vayaʼaiteʼmo yagaiʼniye.

¹⁰ Esalaʼa Ala kava neʼmo keʼaepa gemo alagepa huno afisiyafeʼmo kahauya huno lekana paiteno akame huno Isaleli vayaʼaina alino apaya malesiyafeʼmo aipamo alo huʼniyaʼmofeʼmo Gotiʼa alagepa huno ha maeʼniye.

Kini vekamo Atasekisiʼmo mago avoʼmo kaeno ataleʼniya gemae

¹¹ Kini vekamo Atasekisiʼmo mago avoʼmo kaeno mono huno neʼapateya vekamo Esalaʼmo Ala kava neʼmo keʼaepa geʼe Isaleli vayaʼmogi akame hisaya geʼeʼmo alagepa huno afiʼniya vekamo amiʼniye. Ani avopiʼmo ina ge huno kaeʼniye.

¹² Nagaemo Atasekisiʼnamo kini vayaʼaiteʼmo yagaiʼna neʼapatova kini vekamo maiʼnove. Esalagamo mono huka neʼapatana vekamogae. Kagaemo kokuʼnapi Goti keʼaepa gemo avoʼmo nekana vekamogae, huʼna, alagepa huka maiyo.

¹³ Nagaemo keʼaepa gemo hu maleʼnovana muki Isaleli vayanagi mono huʼa neʼapataya vayanagi Livai vayanagi huʼa yagaiʼnova koteʼmo maiʼnaya vayaʼmogimo kagaeʼeʼmo Yulusalemu taonifiʼmo uʼa haisayafeʼmo hapauʼnisiya vayanagi huʼa afaʼa ugae.

¹⁴ Kini vekaʼniʼe seveniʼa vayaʼmogimo alagepa naipa nagesamo neʼnamiya vayaʼeʼmo alita kateʼnonanageka uka Yulusalemu taonifi vayaʼe Yuta vayaʼeʼmo apakegane. Apakaemo Gotikamo keʼaepa gemo aliʼnana mukufiʼmo keʼaepa gemo akame nehafi nosafi huka uka agegane.

¹⁵ Nagaeʼe alagepa naipa nagesamo neʼnamiya vayaʼeʼmo Isaleli vayaʼmogitapa Gotitapimoʼmo Yulusalemu taonifiʼmo maiʼniya Gotitapimoʼmo siluvaʼe goliʼeʼmo fikumo amiʼnona ofalinimo alinika ugane.

¹⁶ Kagaemo muki Mamiloni kotegatiʼmo alisana siluvagi goligi Isaleli vayaʼe mono huʼa neʼapataya vayaʼmogiʼeʼmo fiku neʼamiya ofalinigi huka alinika uka Yulusalemu taonifi Gotiʼapimo mono notefeʼmo apamiyo.

¹⁷ Kagaemo ani monileʼmo alagepa huka yagaiteka ve pulumakagi ve sipisipigi sipisipi anaʼaugi vitigi nofi alagafati aninagi huka miya faika Yulusalelmu taonifi Gotitapimo mono noʼmo yafa hiʼyalamuteʼmo ofalinimo huvo.

¹⁸ Kagaemo ani ofalini yaʼmo ago miya faitekaeʼmo inagi siluvaʼe goliʼeʼmo magoʼamo hanesigekaeʼmo kagaeʼe vayakaʼeʼmo lapauʼnisigetapa Gotitapimoʼmo hauʼnisiya kavaʼmo hiyo.

¹⁹ Kagaemo Gotikamo mono notefeʼmo muki alu ya alu yaʼmo kamiʼnaya yaʼmo alinikuka mukiʼamo Yulusalemu taonifiʼmo Goti nopiʼmo malo.

²⁰ Ani muki yaʼamoʼmo ho okaesigekaeʼmo inagi nagaemo monimo neʼmalova nopatiʼmo kagaemo alinikuka miya faiyo.

²¹ Nagaemo kini vekamo Atasekisiʼnamo Yufaletisi aniʼmo mugagayaga faliga koteʼmo monileʼmo yagaiʼnaya vayaʼaitegamo keʼaepa gemo huʼna atalogeno uʼniye. Nagaemo ina ge huʼna huve. Ani mono huno neʼapateya vekamo Esalaʼmo kokuʼnapi Gotiʼa keʼaepa geʼamo avoʼmo nekaeya vekamoʼa na agufa yafeʼmo ge huno lapafigesifigi malage hutapa amiyo.

²² Siluvamo 3,400 kilomo alagi haiʼmo amigae. Viti kuʼmo faefu hataletiʼamo alagi haiʼmo amigae. Nofi alagafati aniʼmoʼa tu tauseni litamo alagi haiʼmo amigae. Olivi uvelimoʼa tu tauseni litamo alagi haiʼmo amigae. Lapakaemo agaiʼamo hauʼnisiya kava hutapa hagemo afaʼa amigae.

²³ Lapakaemo muki yaʼamo kokuʼnapi Goti notefeʼmo hauʼniya yaʼamo alagepa hutapa Esalaʼmo amiyo. Fiku yanageno Gotiʼa aipamo leno natege mafaʼne anagaʼnimo aipamo leno apatege hugiye.

²⁴ Afiyo, huʼna, Keʼaepa geʼnilefeʼmo lapakaemo mono huʼa neʼapataya vayaʼaitetiʼmo takesimo oʼalige Livai nofi vayaʼaitetiʼmo oʼalige yoke nehaya vayaʼaitetiʼmo oʼalige mono no kipateʼmo neʼyagaiya vayaʼaitetiʼmo oʼalige Netanimi vayaʼaitetiʼmo oʼalige Goti nopiʼmo aliʼyaʼmo neʼaliya vayaʼaitetiʼmo oʼalige hiyo.

²⁵ Esalao, huʼna, afiyo. Gotikamoʼmo afiteka ageʼnana kavaʼmo kamiʼniya kavatetiʼmo muki vayaʼaiteʼmo alagepa huʼa yagaiʼa apatesayafeʼmo agoti gemo neʼafiya vayaʼe yasi vayaʼeʼmo lekana paika apategeʼapao muki vayaʼmogi aniʼmo mugagayaga faliga koteʼmo maiʼnaya vayaʼmogimo alagepa huʼa aliʼa fako huʼa apateyo. Goti keʼaepa gemo akame nehaya vayaʼmo lekana paika apato. Kagaemo Goti keʼaepa gemo oʼafiʼnaya vayaʼaina alika apaya malo.

²⁶ Ina laʼmo Gotikamo keʼaepa geʼamofi kini vekamo geʼamofi huno akame osisigeʼapaeʼmo malage huʼa agoti huʼa ateteʼa kayoʼmo amiyo. Kamitimo amagiʼa kiʼa atesafi alu kotega aliʼa ha faitalesageno visifi muki yaʼamo alisafi kalavusi huʼa atesafi hiyo, huno avoʼmo kaeʼniye.

²⁷ Esalaʼmo ani avoʼmo lekana paino afitenoʼaeʼmo Goti aulena agiʼamo amiʼniye. Agaemo hunoʼaeʼmo, Laginago vayaʼmogi Gotiʼapimoʼmo Ala kava nefeʼmo namogaga aiʼna haoke nehove. Agaemo Ala kava neʼmo Yulusalemu taonifiʼmo mono noʼaleʼmo alagepa kavaʼmo hisiyafeʼmo Gotiʼa kini vekamo aipafiʼmo alagepa kavaʼmo maleʼniye.

²⁸ Maleteno kini vekamo aulagalenagi aipa agesamo neʼamiya vayaʼmogi apaulagalenagi kini vekamo lokiya yahauve vayaʼamogi apaulagalenagi huno fiku naha maeno namiʼniye, huʼna huʼnove. Inagi Ala kava neʼmo Gotiʼnimoʼmo nagaeʼeʼmo maiʼnenoʼaeʼmo naha maeno lokiya vaino nateʼniyaʼmofeʼmo nagaemo Isaleli vayapatiʼmo yahauve vayaʼmo Yulusalemu taonifiʼmo nagaeʼeʼmo uta haisunafeʼmo apavaleliʼna eʼna aliʼna anupa huʼna apateʼnove.