Esala 6 - The Keyagana NT and 25 OT books

Apakaemo kini vekamo Sailasiʼa hu maleʼniya gemo ageʼnaya gemae

¹ Kini vekamo Naliyasiʼmo ani avoʼmo agetenoʼaeʼmo inagi agaemo kini vekamo Sailasiʼmo avoʼmo kae maleʼniya gemo kahauya hutapa ageyo, huno avoʼmo kaena ataleʼniye. Avoʼmo kaeno ataleʼnigeʼa Mamiloni kotegamo gamani vayaʼai mukumo haneʼniya nokopiʼmo kahauya huʼnae.

² Apakaemo Mitiya kotegamo Akameta taonifiʼmo mukumo neʼmalaya nopiʼmo Sailasiʼmo mukufiʼmo avoʼmo kae maleʼniya keʼaepa gemo haneʼnigeʼa ageʼnae. Ani gemo ina ge huno haneʼniye.

³ Kini vekamo Sailasiʼmo hogoteno yagaiʼniya kafugamo Yulusalemu taonifiʼmo Goti mono noʼamo kisayafeʼmo keʼaepa gemo avoʼmo kaenoʼaeʼmo Yu vayaʼmogi hogoteno Goti mono noʼamo haneʼniya kumateʼmo ofalinimo huʼnae. Ani kumateʼmo halate ani mono noʼmo kiyo. Noʼmo faiʼa atesaya yafaʼmo lokiya yafaʼmo malegae. Yatalaʼamo tuveti seveni mitamo haisigeno aluga alugaʼamo tuveti seveni mitamo hanegaiye.

⁴ Apakaemo loleʼe magoʼe alopa yafaʼmo aliʼa akalo huʼa maleliʼa haige saufa yosamo yafateʼmo aliʼa akalo huʼa maleliʼa haige huteʼa kigae. Kini vekamo moni neʼmaleya noʼafatiʼmo monimo aliʼa muki no kisaya yaʼmo miya faige aliʼyaʼmo alisaya vayaʼmo miyaʼapimo apamige hugae.

⁵ Kini vekamo Nepukanesaʼmo Yulusalemu taonifatiʼmo Goti mono noʼafatiʼmo goli yafatetiʼmo alo huge siluva yafatetiʼmo alo huge huʼnaya yaʼmo alinino Mamiloni kotegamo eʼniyaʼmonanafa muki ani yaʼmo Goti saufa mono noʼafiʼmo alinitutapa noʼale noʼaleʼmo maleyo, huno avoʼmo kae maleʼniye.

⁶ Ani gemo huno kini vekamo Sailasiʼmo avoʼmo kae maleʼniya gemo lekana paiteno kini vekamo Naliyasiʼmo avoʼmo kaenoʼaeʼmo, Hogote gamani vekamo Tatenaigamo Yufaletisi aniʼmo mugagayaga faliga koteʼmo yagaiʼnana vekagi Seta Mosenaigagi lanakaeʼeʼmo magokepi lokaeʼa maiʼnaya vayanagi hutapa mono noʼmo nekiya kotegamo oʼutapa afagiʼaleʼmo maiyo.

⁷ Noʼmo nekiya vayaʼmo apatafautapa oʼapateyo. Yu vayaʼaiteʼmo neʼyagaiya gamani vekaʼe Yu vayatama vayaʼeʼmo afaʼa apateʼnigeʼa Goti mono noʼamo haneʼniya mopaleʼmo halate kiyo.

⁸ Hemenimo nagaemo lapakaemo hapa maesayafeʼmo keʼaepa gemo hu malove. Yu vayatama vayaʼmogi ani mono noʼmo kisayafeʼmo malage hutapa monimo apamiyo. Ani monimo lapakaemo Yufaletisi aniʼmo mugagayaga faliga kotegatiʼmo takesimo neʼaliya monifatiʼmo alita apamiyo. No kisaya kaʼmo akanitapa oʼapateyo.

⁹ Na agufa yafeʼmo kafu huʼnisafi apamiyo. Yulusalemu taonifiʼmo mono huʼa neʼapataya vayaʼmogimo aikeli ve pulumakaeʼmofi ve sipisipieʼmofi aikeli sipisipieʼmofi vitieʼmofi hageeʼmofi nofi alagafati anifeʼmofi olivi yosa alagafati uvelieʼmofi huno hapauʼnisiyaʼmoʼmo inagi lapakaemo apamisageʼa Gotiʼa kokuʼnapi maiʼniya Gotina ofalinimo amigae. Haitapa meʼotalesayafeʼmo muki afinaʼae afinaʼaeʼmo apamiyo.

¹⁰ Apakaemo kokuʼnapi Gotitefeʼmo alagepa atumo neʼaiya ofalinimo huge kini vekamoʼnaʼe ve mafaʼne anagaʼniʼeʼmo nunumuʼmo huʼa latege hisageta alagepa huta maigune.

¹¹ Magoʼe keʼaepa gemo hu malove. Ina lagimo ani geʼnimo akame osisafi noʼapiletiʼmo mago yosamo aiʼa akaiteʼa ani yosamo aliʼa aeʼa he ti maleʼneʼa ani vekamo ani yosaleʼmo aneʼmu aeʼa asaisageno faligiye. Noʼamo heʼa halagape vaiʼa atalesageno no atufaʼageʼmo hanegaiye.

¹² Ani mono noteʼmo Gotiʼa agaiʼa agimo hanegaiyanageʼa haiya kini vayaʼmogiʼmofi haiya vayaʼmogiʼmofi huʼa ani Yulusalemu taonifi mono noʼmo heʼa halagape vaisafi hu maleʼnova gemo akame osisafi hisayaʼmoʼmo afaʼa kamitimo apamagigae. Nagaemo Naliyasiʼnamo mani gemo alagi ago hu malove. Mukiʼamogitapamo geʼnimo alagepa hutapa akame hiyo.

Apakaemo mono noʼmo kiʼa hano huteʼa Goti aote mono noʼmo hanesiyafeʼmo lekana paiʼa ateʼnaya gemae

¹³ Inagi hogote gamani vekamo Yufaletisi aniʼmo mugagayaga faliga koteʼmo yagaiʼniya gamani vekamo Tatenaiʼagi Seta Mosenaiʼagi magokepi lokaeʼa maiʼnaya vayanagi huʼa kini vekamoʼmo kaeʼniya avoʼmo ago aliteʼapaeʼmo lekana paiʼa afiteʼa muki geʼamo alagepa huʼa akame huʼnae.

¹⁴ Gotitegati gemo aliniʼeʼana aeʼana hakalo huʼana hapa nepaiʼa vekalaʼmo Hagaiʼe Ito mafaʼnemo Sakalaiyaʼeʼmo Goti gemo hapa nepaiʼageʼapaeʼmo Yu vayaʼmogi vayatama vayaʼmogimo Goti mono noʼaleʼmo aliʼyaʼmo aliʼnaya kavaʼmo alagepa huno afole aiʼniye. Apakaemo noʼmo kime kime uʼa kiʼa hano huʼnae. Isaleli vayaʼmogi Gotiʼapimoʼmo kiyo, huno huge Pesiya kini vayaʼmo Sailasiʼagi Naliyasiʼagi Atasekisiʼagi huʼa kiyo, huʼa huge huʼnageʼa kiʼa hano huʼnae.

¹⁵ Apakaemo kaimo agiʼamo Aʼna kaileʼmo tali afinaʼmo kini vekamo Naliyasiʼmo sigisiʼa kafugamo yagaino apateʼniya afinaʼmo kiʼa hano huʼnae.

¹⁶ Kiʼa hano huʼnageʼapaeʼmo Isaleli nofi vayaʼmo mono huʼa neʼapataya vayanagi Livai nofi vayanagi kalavusi huʼa apateʼnageʼa atagineʼa eʼnaya vayaʼmogi mafaʼne anagaʼapigi huʼa Goti mono noʼamo aliʼa aote ateteʼa apamogaga aiʼnae.

¹⁷ Mono noʼmo aote hanesiyafeʼmo lekana paiʼa ateteʼapaeʼmo vani hataletiʼa ve pulumakagi tu hataletiʼa ve sipisipigi fo hataletiʼa sipisipi aikeligi huʼa apavaleliʼuʼa mukiʼamo Gotitefeʼmo ofalinimo huʼnae. Apakaemo hosu kavaʼapilefeʼmo ofalinimo huʼnae. Tuolofuʼa Isaleli nofi vayaʼmo maiʼnaya kava huʼa hosu kavaʼapilefeʼmo tuolofu ve mememo apavaleliʼeʼa tuolofu Isaleli nofi vayaʼaitefeʼmo apamagiʼa ofalinimo huʼnae.

¹⁸ Apakaemo mono huʼa neʼapataya vayaʼmogimo aliʼa fako huʼa apateʼnageʼa apaote apaote huʼa apamiʼnae. Ina kava huʼa apakaemo Livai nofi vayaʼmogi aliʼa fako huʼa apateʼnageʼa Yulusalemu taonifiʼmo Goti aliʼyaʼamo apaote apaote huʼa aliʼyaʼmo aliʼnae. Moseseʼmo mukufiʼmo keʼaepa gemo avoʼmo kae maleʼniya gemo akame huʼnae.

Isaleli vayaʼmo kalavusi aliʼyapatiʼmo hatu maeno apateʼnigeʼa maiʼnaya Pasova hopa afina kavaʼmo huʼnaya gemae

¹⁹ Kalavusi huʼa apateʼnaya vayaʼmogi mafaʼne anagaʼapimogimo Pasova hopa afina kavaʼmo napa vani kaileʼmo fotini afinaʼmo huʼnae.

²⁰ Mono huʼa neʼapataya vayaʼe Livai nofi vayaʼeʼmo Goti mono aliʼyaʼamo alisayafeʼmo apakaiʼapimo aliʼa alo huʼa apateʼnayaʼmofeʼmo Pasova afina kavaʼmo huteʼa sipisipi anaʼaumo amagiʼa ofalinimo huʼnae. Kame vayaʼmogimo kalavusi huʼa apateʼnaya vayaʼai mafaʼne anagaʼapimogi hosu kavaʼapilefenagi mono huʼa neʼapataya konagaʼapimogi hosu kavaʼapilefenagi apakaiʼapi hosu kavaʼapilefenagi huʼa ofalinimo huʼnae.

²¹ Inagi muki Isaleli vayaʼmo kame vayaʼmogi kalavusi huʼa apateʼnayategatiʼmo atagineʼa eʼnaya vayaʼmogiʼe Ala kava neʼmo Isaleli vayaʼmogi Gotiʼapimofeʼmo kahauya huʼa ageteʼa mono hisayafeʼmo ani mopaleʼmo maiʼnaya vayaʼai hosu kavaʼapifatiʼmo ataleʼa eʼnaya vayaʼmogiʼeʼmo ani ofalinimo ameʼamo magokepi neʼnae.

²² Ala kava neʼmoʼa apamogaga aisayafeʼmo alino he tino apateʼniyaʼmofeʼmo hopa afinaʼmo seveni afinaʼae afinaʼaeʼmo aeno apafu noleya peleti mayamo afina kavaʼmo akame huʼa apamogaga aiʼnae. Gotiʼa lokiya vaino apatesigeʼa Isaleli vayaʼmogi Gotiʼapimo mono noʼamo kisayafeʼmo Asiliya kini vekamo aipa agesamo alino aino afe leno ateʼniye.