Esala 5 - The Keyagana NT and 25 OT books

Yuta vayaʼmogimo halate Goti mono noʼamo kisayafeʼmo aliʼyaʼmo aliʼnaya gemae

¹ Ani kafugafiʼmo Gotitegati gemo alini eʼana aeʼana hakalo huʼana hapa nepaiʼa vekalaʼmo Hagaiʼe Ino mafaʼnemo Sakalaiyaʼeʼmo Yuta kotega maiʼnaya Isaleli vayaʼaifenagi Yulusalemu taonifiʼmo maiʼnaya Isaleli vayaʼaifenagi huʼana Isaleli vayaʼai Gotiʼapimoʼmo yagaino neʼapateya Goti agiʼaletiʼmo geʼamo aeʼana hakalo huʼana hapa paiʼnaʼae.

² Ani gemo afiʼnageʼanaeʼmo Siyatili mafaʼnemo Selamamaʼe Yesateki mafaʼnemo Yesuvaʼeʼmo vayaʼmo apavaleʼana Goti mono noʼamo halate aepa faiʼa Yulusalemu taonifiʼmo nekigeʼanaeʼmo ani Gotitegati gemo alini eʼana aeʼana hakalo nehaʼa vekalaʼmoganimo hapa maeʼana kiʼnae.

³ Nekigeʼapaeʼmo Tatenaiʼmo Yufaletisi aniʼmo mugagayaga faliga koteʼmo yagaiʼniya gamani vekagi Setali Mosenaiʼagi anakaegiʼeʼmo magokepi lokaeʼa maiʼnaya vayanagi huʼa eʼa Goti noʼamo nekiya vayaʼaifeʼmo huʼapaeʼmo, Ina laʼmo mani noʼmo kige taonile yafa kegiʼyaʼmo huge hiyo, huno lapa paiʼniye, huʼa ge huʼa apafi geʼnae.

⁴ Huʼa ge huʼa lafi geʼnagetaeʼmo lagaemo mono noʼmo nekiya vayaʼai apakiʼapimo aeta hapa paiʼnone.

⁵ Hapa paiʼnonaʼmonanafa Yu vayaʼai Gotiʼapimoʼmo Yu vayatama vayaʼmo aulu hapaeno apaketeno yagaino neʼapateyaʼmofeʼmo ani aliʼyaʼmo atalesayafeʼmo afaʼa apatafauʼa oʼapateʼnae. Tatenaiʼmo agesamo afinoʼaeʼmo, hogoteʼna ani kavatefeʼmo kini vekamo Naliyasifeʼmo avoʼmo kaeʼna ataleteʼna anonaleʼmo kaesiya avoʼmoʼeʼmo agava maiguve, huno agesamo afitenoʼaeʼmo avoʼmo kaeʼniye.

⁶ Tatenaiʼmo avoʼmo kaenoʼaeʼmo, Nagaemo Tatenaiʼnamo aniʼmo mugagayaga faliga koteʼmo yagaiʼnova vekamoʼnagi Seta Mosenaiʼagi laʼagaeʼeʼmo magokepiʼmo lokaeʼa maiʼnaya vayanagi huta avoʼmo nekaone.

⁷ Ani avoʼmo kaenoʼaeʼmo, Kini vekamo Naliyasiyo, huta, kaipamoʼmo falu hino.

⁸ Kini vekae, huta, lagaemo kagaemo ina ge huka kagesamo afiyo. Lagaemo Yuta kotegamo uta Yuta vayaʼmo apakeʼnonana Ala Gotiʼapimo mono noʼamo halate nekiye. Apakaemo ani noʼmo alopa yafatetiʼmo kige alopa yosaletiʼmo gapa huge huʼa apaya mukiki huʼa aliʼyaʼmo neʼaligenoʼaeʼmo alagepa aliʼyaʼmo afole neʼaiye.

⁹ Lagaemo ani aliʼyaʼmo agetetaeʼmo yagaiʼa apateʼnaya vayatama vayaʼaifeʼmo hutaeʼmo, ina lagimo lapa paiʼnagetapaeʼmo mani mono noʼmo kige muki kavaʼamo huge nehae, huta ge huta apafi geʼnone.

¹⁰ Apafi getaeʼmo apakiʼapimo ina lagimo ani aliʼyateʼmo yagaiʼnafi huta ge huta apafi geta apakiʼapimo avo kaeta kaha paisunafeʼmae.

¹¹ Inagi getileʼmo ina ge huʼa aeʼa atagaina huʼnae. Lagaemo Gotiʼa mopaleʼe kokuʼnateʼeʼmo yagaiʼniya vekamo aliʼyaʼamo neʼaluna vayane. Akeyaʼvilagamo yatala afinaʼmo mani mono noʼmo ala kini vekatimoʼmo ki maleʼniya noʼmo halateʼmo nekune.

¹² Laginago vayaʼmogimo hosu kavaʼmo huʼnageno kokuʼnapi Gotiʼa aipamo leno apatetenoʼaeʼmo agaemo apavalelinuno Mamiloni kini vekamo Nepukanesa ayapiʼmo apateʼnigeʼa kini vekamo ati vayaʼamogimo eʼa kame huteʼa ani mono noʼmo heʼa halagape vaiʼa ataleteʼa Yu vayatimo apavaleliʼuʼa Mamiloni kotegamo apateʼnageʼa kalavusi aliʼyaʼmo aliʼnae.

¹³ Ani kavaʼmo huʼnayaʼmonanafa Mamiloni kini vekamo Sailasiʼmo hogote kafugaʼafiʼmo hunoʼaeʼmo, halate Goti mono noʼamo kiyo, huno hu maleʼniye.

¹⁴ Kini vekamo Nepukanesaʼmo goli yafatetiʼe siluva yafatetiʼeʼmo alo hu maleʼnaya yaʼmo Yulusalemu taonifiʼmo Goti mono noʼafatiʼmo alininuno Mamiloni taonifi vayaʼmogi gotiʼapimo mono nopiʼmo maleʼniyatetiʼmo kini vekamo Sailasiʼmo lagaepatiʼmo mago vekamo agiʼamo Sesimasaʼmo alino amiʼniye. Sailasiʼmo ani vekamoʼmo yagaino latesiyafeʼmo lekana paino ateʼniye.

¹⁵ Kini vekamo Sailasiʼmo Sesimasafeʼmo ha painoʼaeʼmo, Ani yaʼmo halate alinikuka Yulusalemu taonifiʼmo Goti mono noʼamo haneʼniya yateʼmo halate mono noʼamo kiyo, huno ha paiʼniye.

¹⁶ Inagi Sesimasaʼmo eno Yulusalemu taonifiʼmo Goti mono noʼamo faiʼa atesaya yafaʼmo maleʼniye. Maleʼniya afinatetiʼmo mono noʼmo kime kime eʼa hemenimo aliʼyaʼmo neʼaliyaʼmonanafa kiʼa hano osuʼnae.

¹⁷ Inagi kini vekae, huta, kagaemo kahauʼnisiyana ina ge huka huvo. Uta kini vayaʼai mukumo maleʼniya nopiʼmo uta haitapa kahauya huta agetapa alita lekana paiyo. Kini vekamo Sailasiʼmo ani Goti mono noʼmo kiyo, huno hu maleʼnifi hu oʼmaleʼnifigeʼa kaha paigae. Afitekaeʼmo kahauʼnisiya kavafeʼmo avoʼmo kaeka laha paiyo, huno avoʼmo kaeʼniye.