Esala 4 - The Keyagana NT and 25 OT books

Isaleli vayaʼmogi aliʼyaʼmo neʼaligeʼapaeʼmo kame vayaʼapimogi huʼa apatafauʼa apatesaya agufa gemo huʼnaya gemae

¹ Yuta nofi vayaʼmogiʼe Menisameni nofi vayaʼmogiʼeʼmo kame vayaʼapimogimo afiʼnayana kalavusi huʼa apateʼnaya vayaʼmo atagi neʼeʼa Ala kava neʼmo Isaleli vayaʼmogi Gotiʼapimo mono noʼamo nekiye, huʼa huʼnaya gemo afiʼnae.

² Afiteʼapaeʼmo Selamamategaʼe Isaleli vayaʼmogi apakinago vayaʼaiteʼmo neʼagaiya vayaʼaitegaʼeʼmo eʼa huʼapaeʼmo, Lagaemo afaʼa lategeta eta lapakaeʼeʼmo magokepi Gotitimo mono noʼamo kino. Lapakaemo Gotitapimoʼmo agesayafeʼmo kahauya nehaya kava huta kahauya nehune. Asiliya kini vekamo Isahatoniʼmo lavalelino eʼnigeta eta mani koteʼmo maiʼnona afinatetiʼmo aepa faiteta Gotitefeʼmo ofalini hume hume eta hemenimo maiʼnone, huʼa huʼnae.

³ Huʼnayaʼmonanafa Selamamaʼagi Yesuvaʼagi Isaleli vayaʼaiteʼmo yagaiʼa apateʼnaya vayanagi huʼa huʼapaeʼmo, Ala kava netimo Gotitimo mono noʼamo lagaitigeʼmo kigunanagetapa Ala kava neʼmo Isaleli vayaʼmogi Gotiʼapimotefeʼmo kitapa laha oʼmaegae. Pesiya kini vekamo Sailasiʼmo kiyo, huno higetaeʼmo nekune, huʼa hapa paiʼnae.

⁴ Inagi ani mopaleʼmo maiʼnaya vayaʼmogimo Yuta vayaʼmogi no kisaya lokiyaʼapimo aliʼa hano huʼa atalesageʼa ani aliʼyaʼmo oʼaliʼa atalesayafeʼmo hanageke yaʼmo apamiʼnae.

⁵ Apakaemo mago vayaʼmo monimo apamiteʼa apavaleʼnageʼa Yuta vayaʼaitegamo alu kava alu kavatetiʼmo kame huʼa aeʼa apaka sesageʼa aliʼyaʼmo oʼaliʼa atalesayafeʼmo huʼnae. Apakaemo ani kavaʼmo Pesiya kini vekamo Sailasiʼmo maiʼniya afinatetiʼmo huli huli uʼa agae aimuʼyaleʼmo Naliyusiʼmo maiʼniya afinaʼeʼmo ani kavaʼmo alagike huli huliʼa uʼnae.

Yuta vayaʼmo kame vayaʼapimogi agoti huʼa apatesayafeʼmo huʼnaya gemae

⁶ Kini vekamo Naliyusiʼmo falitegenoʼaeʼmo Sekisiʼa Pesiya kini vekamo maiʼniye. Ani afinaʼmo kame vayaʼapimogimo Yulusalemu vayaʼe Yuta polovenisi koteʼmo maiʼnaya vayaʼeʼmo mago avoʼmo kaeteʼa agoti huʼa apateʼnae.

⁷ Kini vekamo Sekisiʼmo falitegenoʼaeʼmo Atasekisiʼmo Pesiya kini vekamo maiʼnigeʼapaeʼmo inagi Misilamuʼagi Mitaleʼnaʼagi Tamoʼagi magokepi lokaeʼa maiʼnaya vayanagi huʼa mago avoʼmo kaeʼa atalageno kini vekamo Atasekisitegamo uʼniye. Apakaemo ani avoʼmo magoke magoke huʼa Alamiya gefatiʼmo avoʼmo kaeʼnae.

⁸ Hogote gamani vekamo Lehumiʼe avoʼmo nekaeya vekamo Simisaiʼeʼmo Yulusalemu vayaʼmo agotimo huʼa apatesayafeʼmo avoʼmo kaeʼana atalaʼageno kini vekamo Atasekisitegamo uʼniye. Anakaemo ina ge huʼana avoʼmo kaeʼnaʼae.

^9-10 Nagaemo hogote gamani vekamo Lehumiʼnagi avoʼmo nekaeya vekamo Simisaiʼagi hutaʼa laʼagaeʼeʼmo magokepi lokaeʼa maiʼnaya vayaʼmo Ninai nofi vayanagi Afasati nofi vayanagi Tapeli nofi vayanagi Afa nofi vayanagi Ake nofi vayanagi Mamiloni vayanagi Susa taonifi vayanagi Tehai nofi vayanagi Ilami nofi vayanagi Sameliya taonifi vayanagi Yufaleti aniʼmo mugagayaga faliga koteʼmo maiʼnaya vayanagi hutaʼa apakae apavayamo alitaʼa avoʼmo kaoʼae. Kini vekamo Asanapaʼmo ani kanale kini vekamo ala agimo haneʼniya vekamoʼmo ani nofi vayaʼmo koʼapiletiʼmo alino hapa faino apataleteno apavalelinuno mani koteʼmo apateʼniye.

¹¹ Kini vekamo Atasekisigae, huʼna, lagaemo aliʼyakamo neʼaluna vayaʼmo Yufaletisi aniʼmo mugagayaga faligamo maiʼnona vayaʼmogitamo mago getimo haneʼniye.

¹² Kini vekae, huta, lagaemo ina ge huta kaha paigesune. Yuta vayaʼmo kagaetegatiʼmo ataleʼa eʼa lagaeʼeʼmo Yulusalemu taonifiʼmo maiʼneʼa ani hosu taonimo halate kisayafeʼmo huʼnae. Akeyaʼvilagamo ani taonifi vayaʼmogimo kini vekamo geʼamo ago amagiʼa ataleʼnae. Hemenimo ani nofi vayaʼmogigeʼmo Yulusalemu taonimo kige yafa kegiʼyamo huʼa hano hisayafeʼmo faiʼa atesaya yaʼmo aliʼa alagepa huge nehae.

¹³ Nehayaʼmofeʼmo kini vekae, huʼna, afiyo. Apakaemo halate ani taonimo kige yafa kegiʼyamo huʼa hano huge hisayaʼmoʼmo Yuta vayaʼmogimo takesi monimo okamisageka gamani monieʼmo kafu hugane.

¹⁴ Kagaemo yagaika nelatanaʼmofeʼmo Yuta vayaʼmogimo kini vekamoga kagikaleʼmo aliʼa afepi katesayafeʼmo olahauʼnigetaeʼmo mani avoʼmo kagaefeʼmo kaeta kaha nepaune.

¹⁵ Lagaemo lahauʼniyana kagaemo mago gamani vayaʼmo alika apatesanageʼa uʼa kaginago vayaʼmogi apava gemo haneʼniya mukufiʼmo kahauya huʼa lekana paigae. Lekana paiʼa kaha paisagekaeʼmo ani Yulusalemu taonifi vayaʼmogimo ge noʼafiya vayaʼmo maiʼnae, huka apakegane. Akeyaʼvilaga afinatetiʼmo muki afinaʼae afinaʼaeʼmo kini vayaʼmo kana yaʼmo aliʼa apamige polovenisi koteʼmo yagaiʼnaya vayaʼmo kana yaʼmo aliʼa apamige huʼnae. Apakaemo muki Yulusalemu vayaʼmogimo gamani vayaʼmogi gemo oʼafisayafeʼmo aliʼa he tiʼa apateʼnayaʼmofeʼmo kini vayaʼmogimo eʼa ani taonimo alagi heʼa halagape vaiʼa ataleʼnae.

¹⁶ Kini vekae, huta, lagaemo ina ge huta kaha nepaune. Apakaemo halate ani taonimo kige kegiʼyamo huʼa hano huge hisayaʼmoʼmo inagi kagaemo ani Yufaletisi aniʼmo mugagayaga faliga koteʼmo maiʼnaya vayaʼaiteʼmo magoʼe huka yagaika oʼapategane.

¹⁷ Inagi kini vekamoʼmo avoʼapifiʼmo lekana paino agetenoʼaeʼmo avoʼapileʼmo ina ge huno avoʼmo kaeʼniye. Hogote gamani vekamo Lehumigagi avoʼmo nekana vekamo Simisaigagi lanakaeʼeʼmo magokepi lokaeʼa maiʼnaya vayaʼmo Sameliya kotega maiʼnaya vayanagi Yufaletisi aniʼmo mugagayaga faliga koteʼmo maiʼnaya vayaʼaifenagi, huʼna, alagepa hutapa maiyo, huʼna ge lapamamaove.

¹⁸ Lapakaemo ani avoʼmo kaetapa ataleʼnaya gemo lekana paiʼa naha paiʼnageʼna afiʼnove.

¹⁹ Nagaemo gamani vayaʼaifeʼmo huʼnaeʼmo, Uta mukufiʼmo kahauya hutapa ageyo, huʼna hapa paiʼnogeʼa kahauya huʼa ageʼnayana akeyaʼvilagamo Yulusalemu vayaʼmogimo kini vayaʼai geʼapimo oʼafige muki vayaʼmogimo gamani vayaʼmogi gemo oʼafisayafeʼmo aliʼa he tiʼa apatege huʼnae. Akeyaʼvilaga afinatetiʼmo ani agufa kavaʼmo huʼnae.

²⁰ Akeyaʼvilagamo mago lokiya kini vayaʼmo Yulusalemu taonifiʼmo maiʼneʼa muki haopalega Yufaletisi aniʼmo mugagayaga faliga kotega yagaiʼa apateʼneʼa ani vayaʼaitetiʼmo alu takesi alu takesimo aliʼnae.

²¹ Lapakaemo ani aliʼyaʼmo oʼaliʼa atalesayafeʼmo, ataleyo, hutapa hapa paiyo. Fiku yanageʼa ani taonimo kigae. Nagaemo huʼnaeʼmo, ani aliʼyaʼmo aliyo, huʼna hapa paisuva afinakeʼmo aliʼyaʼmo afaʼa aligae.

²² Ani kavaʼmo hutapa haita me oʼatalesayafeʼmo geʼnimo alagepa hutapa afiyo. Fiku yanageʼa ani mono noʼmo kisageta kini vayaʼmogitamo alopa kana yaʼmo aligune.

²³ Apakaemo ani kini vekamo Atasekisi avoʼmo aliteʼa aliniʼuʼa lekana paiʼa hapa paiʼnageʼa Lehumiʼagi Simisaiʼagi magokepiʼmo lokaeʼa maiʼnaya vayanagi huʼa afiʼnae. Afiteʼapaeʼmo malage huʼa Yulusalemu taonifiʼmo u haiʼa himamuʼapiletiʼmo Yu nofi vayaʼmogi aliʼyaʼapimo oʼaliʼa atalesayafeʼmo ge huʼa apatafauʼa apateʼnae.

²⁴ Ani kavaʼmo huʼnageʼa Yulusalemu taonifiʼmo Yuta vayaʼmogimo Goti mono noʼaleʼmo aliʼyaʼmo oʼaliʼa ataleʼnae. Noʼmo afaʼageʼmo haneme haneme neʼvigenoʼaeʼmo Pesiya kotega kini vekamo Naliyasiʼmo napa tu kafugaʼamo yagaino apateʼniya afinakeʼmo halate aepa faiʼa Goti mono noʼaleʼmo aliʼyaʼmo aliʼnae.