Esala 3 - The Keyagana NT and 25 OT books

Apakaemo halate Gotitefeʼmo mono hisaya kavaʼmo akame huʼnaya gemae

¹ Napa seveni kaimo eno ateʼnigeʼapaeʼmo Isaleli vayaʼmo taoniʼapifiʼmo maiʼneʼapaeʼmo muki vayaʼamogimo magoke apaipa apakesamo aliteʼa Yulusalemu taonifiʼmo uʼa aliʼa anupa huʼnae.

² Inagi Yosateki mafaʼnemo Yesuvaʼagi alu vayaʼmo konagaʼamogimo mono huʼa neʼapataya vayanagi Siyatili mafaʼnemo Selamamaʼagi konagaʼamogiʼenagi huʼa Isaleli vayaʼai Gotiʼapimo yafa hiʼyalamuʼmo ofalini hisaya yaʼmo atafiʼmo kaeʼa sagalisaya hiʼyalamuʼmo huʼnae. Moseseʼmo Goti vekamoʼmo keʼaepa gemo avoʼmo kae maleʼniya gemo akame hisayafeʼmo huʼnae.

³ Apakaemo alu nofi vayaʼmo ani koteʼmo maiʼnaya vayaʼaifeʼmo koli huʼnayaʼmonanafa akeyaʼvilaga yafa hiʼyalamuʼmo haneʼniya yafateʼmo huʼnae. Aepa faiʼa ani hiʼyalamuteʼmo neteʼe uneʼeʼmo hisaya ofalinimo atamoʼmo alagi leno saga lisiya ofalinimo muki neteʼae uneʼaeʼmo Ala kava neʼmo amiʼnae.

⁴ Ani kavaʼmo huteʼa apakaemo alopa hopa afina kavaʼmo akame huʼa na magi ofalinimo hiyo, huʼnifi ani agufa ofalinimo huʼnae. Hiyato nopiʼmo maiʼneʼa muki afinaʼmo avoʼmo kae maleʼniya keʼaepa gemoʼa huʼniya gemo akame huʼa ofalini kavaʼmo huʼnae.

⁵ Ani kavaʼmo huteʼa alu afinaʼmo alu ofalinimo huge saufa kaileʼmo ofalinimo huge Ala kava neʼmo muki hopa afinaʼae afinaʼaeʼmo lekana pai maleʼniya aote afinaʼmo ofalinimo huge vayaʼmogi apakaiʼapi hapauʼniya ofalinimo huge huʼnae.

⁶ Ala kava neʼmo noʼamo faiʼa atesaya yafaʼmo oʼmaleʼnayaʼmonanafa napa seveni kaileʼmo hogote afinaʼmo aepa faiʼa Ala kava netefeʼmo atafiʼmo alagi leno saga lisiya ofalinimo huʼnae.

Apakaemo Goti mono noʼamo halate aepa faiʼa kiʼnaya gemae

⁷ Apakaemo neʼyanagi aninagi olivi yosafati uveligi huʼa Saitoni taonifi vayaʼe Taiya taonifi vayaʼeʼmo Sita yosamo Lemanoni avefatiʼmo aeʼa halauliʼa emiʼeʼa solovala ani haigileʼmo maleʼneʼa aliʼa sipifiʼmo maleteʼa Yapa taonifiʼmo aliʼniʼa esayafeʼmo apamiʼnae. Ani kava huʼa yafatetiʼmo no kige yosaletiʼmo no kige hisaya vayaʼmo monimo apamiʼnae. Pesiya kini vekamo Sailasiʼmo ani kavaʼmo hisayafeʼmo Isaleli vayaʼaifeʼmo hunoʼaeʼmo, kanalenagi ani kavaʼmo afaʼa hiyo, huno hapa paiʼniye.

⁸ Apakaemo Yulusalemu taonifiʼmo aiʼa atagi neʼa eʼa maiʼnagenoʼaeʼmo napa tu kafugamo napa tu kaileʼmo Siyatili mafaʼnemo Selamamaʼagi Yosateki mafaʼnemo Yesuvaʼagi mago konagaʼanimogimo mono huʼa neʼapataya vayanagi Livai vayanagi muki kalavusi huʼa apateʼnaya vayaʼmo Yulusalemu taonifiʼmo aiʼa atagi neʼa eʼa maiʼnaya vayanagi huʼa aliʼyaʼmo aepa faiʼa aliʼnae. Apakaemo Livai vayaʼmo tuvetiʼa kafugamo aeʼa agaseʼa maiʼnaya ve anagaʼmogimo Ala kava neʼmo mono noʼmo kisaya aliʼyateʼmo yagaisayafeʼmo lekana paiʼa apateʼnae.

⁹ Inagi Livai nofi vekamo Yesuvaʼagi mafaʼne anagaʼagi konagaʼamogi Kaʼnamiyeʼagi mafaʼne anagaʼagi Hoʼnaviya nofi vayanagi huʼa magoke apaipa apakesamo aliteʼa aliʼa hetiʼa Goti mono noʼamo kisayafeʼmo yagaiʼa apateʼnae. Livai nofi vayaʼmo Henati ve mafaʼne anagaʼmogiʼe aganaʼamogiʼeʼmo hapa maeʼnae.

¹⁰ Ani mono noʼmo nekiya vayaʼmogi faiʼa atesaya alopa yafaʼmo aepa faiʼa neʼmalageʼapaeʼmo mono huʼa neʼapataya vayaʼmogimo vailiʼneʼa mono huʼa neʼapataya kukena yaʼmo aliʼa vaiteʼa pikulimo aliteʼa eʼa aliʼyaʼmo neʼaliya yateʼmo he tiʼa maiʼnae. Livai nofi vayapatiʼmo Esafi nofi vayaʼmogimo Ala kava neʼmo agiʼaleʼmo aliʼa asaga huʼa atesayafeʼmo kapa yuvapamo lole apayatalapiʼmo aliʼneʼa amagiʼnageno age aiʼniye. Isaleli vayaʼmogi kini vekamo Neviniʼa avoʼmo kae maleʼniya gemo akame huʼa ani kavaʼmo huʼnae.

¹¹ Ala kava neʼmo mono noʼmo faiʼa atesaya yafaʼmo maleʼnayaʼmofeʼmo apakaemo Ala kava neʼmo ala agiʼamo amige haoke hege huʼa yokemo huʼnae. Mago vayaʼmogimo yokemo huteʼa neʼatalageʼapaeʼmo alu vayaʼmogi yokemo huteʼa huʼnae. Ina gemo huʼa yokemo Ala kava nefeʼmo haoke heʼa huʼnae. Yokemo huʼapaeʼmo, Agaemo alagepa Gotiʼa maiʼniyaʼmofeʼmae. Muki afinaʼmo Isaleli vayaʼmogitapaeʼmo hau huno lapatege lapatege huno hau huno maigiyaʼmofeʼmae, huʼa yokemo huʼnae. Yokemo hutageʼapaeʼmo muki vayaʼmogi alopa gefatiʼmo keya aeʼa ge huʼa Ala kava neʼmo ala agiʼamo amiʼnae. Ala kava neʼmo mono noʼamo faiʼa atesaya yafaʼmo maleʼnayaʼmofeʼmo ala agiʼamo amiʼnae.

¹² Mono huʼa neʼapataya vayapatiʼmo asole kosuna vayanagi Livai nofi vayapatiʼmo asole kosuna vayanagi apakinago vayaʼaiteʼmo yagaiʼnaya kosuna vayanagi huʼa hogote mono noʼmo ageʼnaya vayaʼamogimo saufa mono noʼmo faiʼa atesaya yafaʼmo maleʼnageʼa ageteʼapaeʼmo alopa gefatiʼmo aviʼyaʼmo huʼnae. Aviʼyaʼmo huʼnayaʼmonanafa asole vayaʼmogimo apamogaga aiteʼapaeʼmo alopa gefatiʼmo keya aeʼa ge huʼnae.

¹³ Muki vayaʼmogimo afiʼnayaʼmonanafa vayaʼmogi aviʼyaʼmo nehafi apamogaga aiʼa ke yaʼmo neʼafi, huʼa afiʼa alagepa osuʼnae. Alopa gefatiʼmo keya aeʼa ge huʼnageʼa afagitegamo maiʼnaya vayaʼmogimo afiʼnayaʼmonanafa afiʼa alagepa osuʼnayaʼmofeʼmae.