Esala 10 - The Keyagana NT and 25 OT books

Isaleli vayaʼmogi hosu kavaʼapiyeʼmo huʼapaeʼmo, Malaga nofi aʼnemo aliʼnone, huʼa huʼnaya gemae

¹ Esalaʼmo Goti mono noʼamo kipaʼmo haopaleʼmo maiʼneno hosu kavaʼapimo aeno hakalo huno nunumuʼmo huge aviʼyaʼmo huge ape hute hute huge huno maiʼnigeʼapaeʼmo muki asole Isaleli vayaʼmo ve anaganagi aʼne anaganagi mafaʼne anaganagi huʼa eʼa haopaleʼmo aliʼa anupa huʼa maiʼneʼa apakaeʼeʼmo lusi kava huʼa aviʼyaʼmo huʼnae.

² Inagi Sekaniyaʼmo Yehiyo mafaʼnemo Elami nofi vekamoʼmo Esalafeʼmo ha painoʼaeʼmo, Lagaemo Gotitimo geʼamo ago amagita ataleteta alu kote vayapatiʼmo malaga nofi aʼne anagaʼmo aliʼnonaʼmonanafa ataleta alagepa huta maisuna kaʼmo haneʼniyanageta alita afamu amiteta lavayagunagu hugune.

³ Inagi hemenimo lagaemo Gotitimoʼeʼmo kotalakemo hu malegetao. Gotitimofeʼmo hutaeʼmo, Ani malaga aʼne anagaʼe mafaʼne anagaʼapiʼeʼmo hapa faita apatalegaune, huta ha paigune. Kagaemo ala vakeʼnimogae, huʼna, alagepa laipa lagesamo nelaminageʼa Gotitimo keʼaepa geʼamo afiteʼa atete nehaya vayaʼai geʼapiʼeʼmo afaʼa afigune. He, Goti keʼaepa gemo alagi akame hugune.

⁴ He tiyo. Kagaika aliʼyakamogi he tika ani aliʼyaʼmo aliyo. Inagi lagaemo kagaeʼeʼmo magoke laipamo alita maiʼneta muki gekamo akame hugune. Koli osuka ani aliʼyaʼmo aliyo, huno ha paiʼniye.

⁵ Ha paiʼnigeno Esalaʼa he tino mono huʼa neʼapataya vayaʼaiteʼmo neʼyagaiya vayaʼaifenagi Livai nofi vayaʼaifenagi muki Isaleli vayaʼaifenagi huno ina ge huno hapa paiʼniye. Lapakaemo Gotifeʼmo Sekaniyaʼmo huʼniya agufa gemo hutapaeʼmo, akame hugune, hutapa lapagoʼyamo ataletetapa hiyo, huno hapa paiʼniyaʼmofeʼmo alagi akame hugune, huʼa apagoʼyamo ataleteʼa huʼnae.

⁶ Inagi Esalaʼa Goti mono noʼamo ataleno Yehohananiʼmo Iliyasipi mafaʼnemo maleʼniya nopiʼmo uno haino maiʼnenoʼaeʼmo kalavusi huʼa apateʼnayategatiʼmo eʼnaya vayaʼmogi hosu kavaʼapilefeʼmo neʼyaʼmo oʼnege aniʼmo oʼnege huno maiʼnenoʼaeʼmo yulagefaʼmo aiʼniye.

⁷ Apakaemo mago gemo avoʼmo kaeteʼapaeʼmo kalavusifatiʼmo ataleʼa eʼnaya vayaʼai mafaʼneʼapieʼmo avoʼmo kaeʼapaeʼmo, Loleʼe magoʼe afinaʼmo oʼuʼnisigetapa hogoteta lapakaemo eta Yulusalemu taonifiʼmo alita anupa hiyo, huʼa huʼnae.

⁸ Mago vekamo oʼmesiyaʼmoʼmo inagi lagaemo muki yaʼamo aliteta Isaleli nofi vayapatiʼmo kalavusifatiʼmo ataleʼa eʼnaya vayapatiʼmo alita hafaita atalegaune, huʼa huʼnae. Ani gemo yagaiʼa lapateʼnaya vayaʼai geʼe vayatama vayaʼai geʼeʼmo haneʼniye. Ani yagaiʼnaya vayaʼmogi mago apa vayaʼmo aliʼa apateʼnageʼa muki Yuta kotegaʼe Yulusalemu taonifiʼeʼmo uʼeʼa huʼa ani gemo huʼa hapa paiʼnae.

⁹ Inagi loleʼe magoʼe afinaʼmo oʼuʼnigeʼa muki Yuta nofi vayanagi Menisameni nofi vayanagi huʼa eʼa Yulusalemu taonifiʼmo naeni kaimo tuveti afinaʼmo aliʼa anupa huʼnae. Mukiʼamogimo Goti mono noʼamo haopaleʼmo aliʼa anupa nehaya yateʼmo fai maiʼneʼa atete huʼnae. Alopa koʼmo aiteno muki vayaʼmo ko apaige ani hanageke yaʼmo afole aige huʼniyaʼmofeʼmo atete huʼnae.

¹⁰ Inagi mono huno neʼapateya vekamo Esalaʼmo he tino ina ge huno hapa paiʼniye. Lapakaemo Goti geʼamo ago amagitapa ataletetapa malaga aʼne anagaʼmo aliʼnae. Ani kavatetiʼmo Isaleli vayaʼmogi hosu kavatimo magoʼe huno kosino alopa heʼniye.

¹¹ Inagi afiyo. Lapakaemo Ala kava neʼmo lapakinago vayaʼmogi Gotiʼapimofeʼmo hosu kavatapimo aeta hakalo hutetapa Gotiʼa hauʼniya kavaʼmo hiyo. Lapakaemo malaga vayaʼmo ma mopafiʼmo maiʼnaya vayaʼeʼmo afalu afalu kavaʼmo huta oʼmaita lapaote maiʼnetapa ani malaga aʼne anagaʼmo aliʼnaya aʼnemo hapa faitapa apataleyo, huno hapa paiʼniye.

¹² Hapa paiʼnigeʼa muki aliʼa anupa huʼa maiʼnaya vayaʼmogimo alopa gefatiʼmo ge huʼapaeʼmo, He, kagaemo akame hisuna gemo huʼnananageta akame hugune.

¹³ Akame hugunaʼmonanafa hemenimo koʼmo neʼaiya kanaleʼmogeta kumategamo afaʼa oʼmaigune. Asole vayaʼmogitamo ani hosu kavaʼmo huteta Goti gemo ago amagita ataleʼnonaʼmofeʼmo magoke afinaʼmofi lole afinaʼmofi huta alita api oʼaigune.

¹⁴ Oʼaigunaʼmofeʼmo kahao ke honanageta lagesamo afitaeʼmo yagaiʼa lateʼnaya vayaʼmo manileʼmo he tiʼa maiʼnisageʼapaeʼmo alu taonifi alu taonifiʼmo maiʼnaya vayaʼmogi malaga aʼnemo aliʼnaya vayaʼmo ege taoniʼapifiʼmo maiʼnaya yasi vayaʼe vayatama vayaʼeʼmo ege hisageta alita api aita atesunageno Gotiʼa lokiya kava huno aipamo leno nelateya kavaʼamo atalegaiye, huʼa huʼnae.

¹⁵ Muki vayaʼamogimo ani gemo huʼnaya gelefeʼmo kanalene, huʼa huʼnayaʼmonanafa Yonataniʼmo Asahe mafaʼneʼe Yahasiyaʼmo Tikava mafaʼnemoʼeʼmo ani geeʼmo anakaemo ohanauʼniye. Mago Livai vekamo Sametaiʼe mago vekamo Mesulamiʼeʼmo hana maeʼana ani geleʼmo huʼnaʼae.

¹⁶ Ohapauʼniyaʼmonanafa muki kalavusifatiʼmo ataleʼa eʼnaya vayaʼai mafaʼne anagaʼapimogimo aliʼa api aiʼa atesaya kavafeʼmo hapauʼnigeʼa ani gemo akame huʼnae. Mono huno neʼapateya vekamo Esalaʼmo mago afamo anagapatiʼmo afoʼapimogimo neʼyagaiya vayaʼmo lekana paiʼa apateteʼa apakiʼapimo avoʼmo kaeʼnageʼa ani vayaʼmogimo teni kaimo vani afinaʼmo eʼa ani kavafeʼmo ge huge afige huteʼa aliʼa api aisayafeʼmo fai maiʼnae.

¹⁷ Apakaemo ani malaga aʼnemo aliʼnaya vayaʼaifeʼmo ge huʼa apafi geʼnaya aliʼyaʼmo loleʼe magoʼe kaileʼmo aliʼa hano huʼnae.

Malaga aʼne anagaʼmo aliʼnaya ve anagaʼmogi apakiʼapimo haneʼniya gemae

¹⁸ Mono huʼa neʼapataya vayaʼai ve mafaʼne anagaʼapimogimo malaga aʼne anagaʼmo aliʼnaya ve anagaʼmogi apakiʼapimo haneʼniye. Yosataki mafaʼnemo Yesuvaʼagi aganaʼamogimo Meseyaʼagi Eliyesaʼagi Yalipiʼagi Getaliyaʼagi huʼa maiʼnae.

¹⁹ Apakaemo aʼne anagatimo hapa faita apatalegaune, huʼa polomasi gemo huʼnae. Hosu kavaʼmo huʼa Goti gemo amagiʼa ataleʼnayaʼmofeʼmo magoke ve sipisipi ofalinimo Goti gemo amagiʼa ataleʼnaya agufa ofalinimo huʼnae.

²⁰ Ani hosu kavaʼmo huʼnaya ve anagaʼmo magoʼe huʼa Ime nofi vekalaʼmo Hananiʼe Sepataiyaʼeʼmo maiʼnaʼae.

²¹ Halimi nofi vayaʼmo Maseyaʼagi Ilaiyaʼagi Semaiyaʼagi Yehiyoʼagi Usiyaʼagi huʼa maiʼnae.

²² Pasa nofi vayaʼmo Eliyovenaiʼagi Meseyaʼagi Isameliʼagi Netanoʼagi Yosamatiʼagi Ilasaʼagi huʼa maiʼnae.

²³ Livai nofi vayapatiʼmo malaga aʼne anagaʼmo aliʼnaya vayaʼmogi apakiʼapimo haneʼniye. Yosamatiʼagi Simeiʼagi Kelaiyaʼmo alu agiʼamo Kelitaʼagi Petahiyaʼagi Yutaʼagi Eliyesiʼagi huʼa maiʼnae.

²⁴ Yokemo nehaya vayapatiʼmo magoke vekamo Eliyasiʼagi mono no kipateʼmo yagaiʼnaya vayapatiʼmo Salumiʼagi Telemiʼagi Uliʼagi huʼa maiʼnae.

²⁵ Magoʼe huʼa Isaleli vayapatiʼmo Palosi nofi vayaʼmo Lamiyaʼagi Yesiyaʼagi Malakiyaʼagi Miyaminiʼagi Eliyesaʼagi Malakiyaʼagi Menaiyaʼagi huʼa maiʼnae.

²⁶ Ilami nofi vayaʼmo Matanaiyaʼagi Sakalaiyaʼagi Yehiyoʼagi Amaniʼagi Yelemotiʼagi Iliyaʼagi huʼa maiʼnae.

²⁷ Satu nofi vayaʼmo Iliyovinaiʼagi Ilaisimiʼagi Matanaiyaʼagi Yelemotiʼagi Samaʼagi Ayiyaʼagi huʼa maiʼnae.

²⁸ Memai nofi vayaʼmo Yehohananiʼagi Hananaiyaʼagi Yamaiʼagi Atalaiʼagi huʼa maiʼnae.

²⁹ Mani nofi vayaʼmo Mesalamiʼagi Malukiʼagi Anaiyaʼagi Yasumiʼagi Seyaʼagi Lemotiʼagi huʼa maiʼnae.

³⁰ Pohatimovapu nofi vayaʼmo Aʼnaʼagi Kelaʼagi Menaiyaʼagi Maseyaiyaʼagi Matanaiyaʼagi Mesaleʼagi Minuiʼagi Manasaʼagi huʼa maiʼnae.

^31-32 Halimi nofi vayaʼmo Eliyesiʼagi Isiyaʼagi Malakiyaʼagi Semaiyaʼagi Simiyoniʼagi Menesameniʼagi Malukiʼagi Semaliyaʼagi huʼa maiʼnae.

³³ Hasumi nofi vayaʼmo Matenaiʼagi Matataʼagi Yamaʼniʼagi Ilifaletiʼagi Yelemaiʼagi Manasaʼagi Simeyiʼagi huʼa maiʼnae.

^34-42 Mani nofi vayaʼmo Maʼanaiʼagi Emalamiʼagi Yuveliʼagi Menaiyaʼagi Meniyaʼagi Keluʼagi Vaniyaʼagi Melemotiʼagi Ilaiyasimiʼagi Matanaiyaʼagi Matanaiʼagi Yasaiʼagi Maniʼagi Minuiʼagi Simeyiʼagi Selemaiyaʼagi Netaniʼagi Anaiyaʼagi Makanemaiʼagi Sasaiʼagi Salaiʼagi Ayaleʼagi Selemaiyaʼagi Semalaiyaʼagi Salumiʼagi Amalaiyaʼagi Yosefeʼagi huʼa maiʼnae.

⁴³ Nimo nofi vayaʼmo Yeyaiyoʼagi Matitaiyaʼagi Yamatiʼagi Yeminaʼagi Yaʼnaiʼagi Yoveliʼagi Menaiyaʼagi huʼa maiʼnae.

⁴⁴ Muki mani vayaʼmogimo malaga aʼne anagaʼmo aliʼnae. Mago aʼne anagaʼapimogimo mafaʼnemo aliʼa apateʼnae.