Esala 1 - The Keyagana NT and 25 OT books

Sailasiʼmo Pesiya kotega kini vekamoʼmo hunoʼaeʼmo, Ala kava neʼmo mono noʼamo Yulusalemu taonifiʼmo kiyo, huno hu maleʼniya gemae

¹ Sailasiʼa Pesiya kotega kini vekamo hogote kafugaʼamo yagaiʼniya afinaʼmo Yelemaiyaʼmo Ala kava neʼmo geʼamo hapa paiʼniya gemo afole aisiyafeʼmo Sailasi aipafiʼmo Ala kava neʼmoʼa aliʼyaʼmo aliʼnigeno muki vayaʼmogi afisayafeʼmo mago keʼaepa gemo avoʼmo kaeno hu maleʼniye.

² Sailasiʼa Pesiya kotega kini vekamoʼmo hunoʼaeʼmo, Ala kava neʼmo kokuʼnapi Gotiʼa muki kini vayaʼmogi mopaleʼmo yagaisuvafeʼmo namitenoʼaeʼmo, Kagaemo Yuta polovenisi Yulusalemu taonifiʼmo mono noʼnimo kika nato, huno naha paiʼniye.

³ Inagi lapakaemo muki agaiʼa vayaʼamogitapafatiʼmo haiya vayaʼmogimo uʼa haiʼa noʼamo halate kigae. Ala kava neʼmo Gotitapimoʼmo lapakaeʼeʼmo lokaeno maiʼninageʼa Yutiya kotegamo uʼa haiʼa Yulusalemu taonifiʼmo Ala kava neʼmo Isaleli vayaʼai Gotiʼapimo mono noʼamo kiyo. Agaemo Yulusalemu taonifi Gotiʼmae.

⁴ Apakaemo Yulusalemu taonifiʼmo uʼa haisageʼa aliʼa apatalesaya Yu vayaʼmo ina lagimo haiya koteʼmo kalaga hageʼa maiʼnisafi uʼa haisayafeʼmo hapauʼnisiyaʼmoʼmo hapaopaleʼmo maiʼnaya vayaʼmogi hapa maegae. Apakaemo siluva yafanagi goli yafanagi kagemi yanagi yuna afugi huʼa apamigae. Ani yaʼe Yulusalemu taonifiʼmo Goti mono noʼalefeʼmo Gotina amisayafeʼmo hapauʼnisiya ofaliniʼeʼmo hapa maeʼa apamigae, huno avoʼmo kae maleʼniye.

⁵ Avoʼmo kaeʼnigeʼapaeʼmo Yuta nofi vayaʼaiteʼmo yagaiʼa apateʼnaya vayanagi Menisameni nofi vayaʼaiteʼmo yagaiʼa apateʼnaya vayanagi mono huʼa neʼapataya vayanagi Livai nofi vayanagi Gotiʼa apaipa apakesamo alino he tino apateʼniya vayanagi huʼa Yulusalemu taonifiʼmo Ala kava neʼmo mono noʼamo halate kisayafeʼmo uʼa hetiʼnae.

⁶ Muki Isaleli vayaʼmogi hapaopaleʼmo maiya vayaʼmogimo siluva yafatetiʼmo alo huʼa maleʼnaya yanagi goli yafatetiʼmo alo huʼa maleʼnaya yanagi kagemi yanagi alopa monileʼyaʼmo aeno agaseʼniya yanagi Gotiʼa amisayafeʼmo hapauʼnisiya ofalini yanagi huʼa apamiteʼa apaipamo aliʼa lokiya vaiʼa apateʼnae.

^7-8 Hogoteno kini vekamo Nepukanesaʼmo Isaleli vayaʼeʼmo kamemo huteno Ala kava neʼmo mono noʼafatiʼmo kumaya alininuno aigofe gotigi mono nopiʼmo maleʼniye. Maleʼniya yafeʼmo kini vekamo Sailasiʼmo ge huʼnigeno Mitaletaʼmo kini vekamo moni noteʼmo yagaiʼniya vekamoʼmo ani Ala kava neʼmo yaʼamo gotiʼapimogi nopatiʼmo alinineno lekana paiteno mago hogote vekamo Yuta vayaʼaiteʼmo neʼyagaiya vekamo Sesimasaʼmo amiʼniye.

⁹ Muki yaʼamo inaʼa yaʼmo haneʼniye. Yatala goli yuvapamo tetiʼagi yatala siluva yuvapamo vani tauseniʼagi haginamo tuveti naeniʼagi

¹⁰ alopa goli yuvapamo tetiʼagi ani agufa alopa siluva yuvapamo fo hataleti teniʼagi magoʼe huno alopa agufa yaʼmo vani tauseniʼagi huno haneʼniye.

¹¹ Ani agufa goligi siluvagi huno muki yaʼamo faefu tauseni fo hataletiʼa agufa yane. Sesimasaʼmo ani yaʼmo aliteno Mamiloni kotega kalavusifiʼmo maiʼnaya vayaʼeʼmo Mamiloni kotegatiʼmo apavalelino Yulusalemu taonifiʼmo uʼniye.