Efasasi 6 - The Keyagana NT and 25 OT books

Mafaʼneʼapiʼe itaʼapi afoʼapimogiʼefeʼmo huʼniya gemae

¹ Mafaʼnemogitapae, huʼna, Ala kava neʼmo agiʼalefeʼmo itatapi afotapimogi geʼapimo afiyo, huʼna, geʼapimo neʼafiya kavaʼmo fatago kavaʼmo haneʼniyaʼmofeʼmae.

² Keʼaepa gemoʼa hunoʼaeʼmo, itatapi afotapimogi apakiʼapileʼmo alita asaga hutapa maiyo, huno huʼniye. Alu keʼaepa geʼamo haneʼniyaʼmonanafa mani keʼaepa gemo hogote keʼaepa gemo ani kavaʼmo hisayaʼmoʼmo lapa maegauve, huno hu maleʼniya polomasi geʼeʼmo magokepi lokaeno haneʼniye.

³ Mani polomasi gemoʼa hunoʼaeʼmo, ani gemo akame nehisayana alagepa hutapa yatala afinaʼmo ma mopafiʼmo maigae, huno hu maleʼniye.

⁴ Afoʼapimogitapae, huʼna, mafaʼnetapimo apaipamo lesiya kavaʼmo osutapa Ala kava neʼmoʼageʼmo alita apaya malege alita api aitapa apatege hutetapa alagepa huta yagaitapa apateyo.

Aliʼyaʼmo neʼaliya vayaʼe aliʼyaʼmo afoʼamogiʼefeʼmo huʼniya gemae

⁵ Aliʼyaʼmo neʼaliya vayaʼmogitapae, huʼna, lapakaemo Ala kava neʼmo geʼamo neʼafiya kava hutapa aliʼyaʼmo afoʼamogi geʼapimo afiyo. Fiku yanagetapa lole lapakesamo afigayanagi koli hutetapa atete nehutapaeʼmo lapaipafatiʼmo geʼapimo afiyo.

⁶ Aliʼyaʼmo afoʼamogi apaulagaleʼmo maiʼnetapaeʼmo amuse huʼa lapatesayafeʼmo geʼapimo oʼafitapa Kalaisi aliʼyaʼamo neʼaliya vayaʼmo maiʼnayaʼmofeʼmo Gotiʼa hauʼniya agufa kavaʼmo hutapa lapaipafatiʼmo geʼapimo afiyo.

⁷ Aliʼyaʼmo afoʼamogitefeʼmo aliʼyaʼmo neʼaluve, hutapa osuta, Ala kava netefeʼmo aliʼyaʼmo neʼaluve, huta kanale lapaipamo kaliʼnetapa aliʼyaʼmo aliyo.

⁸ Lapakaemo ago afiʼnayana kalavusi aliʼyaʼmo neʼaliya vayaʼmogimofi afa vayaʼmogimofi huʼa alagepa kavaʼmo hisagenoʼaeʼmo Ala kava neʼmoʼa alagepa miyaʼapimo apamigiyaʼmofeʼmae.

⁹ Aliʼyaʼmo afoʼamogitapae, huʼna, lapakaeʼeʼmo apakaetegamo ani agufa alagepa kavaʼmo hiyo. Koli hisaya agufa gemo hapa opaitapa ataleyo. Lapakaemo ago afiʼnayana yagaino nelapateya vekamo kokuʼnapi maiʼneno yagaiʼa neʼapataya vayaʼaiteʼe aliʼyaʼmo neʼaliya vayaʼaiteʼeʼmo alagepa huno magoke agufa kavakeʼmo huno alino fako huno neʼapate.

Kalisitini vayaʼmo ati vayakana huʼa maiʼnaya kavafeʼmo huʼniya gemae

¹⁰ Henaga geʼnimo lapa paiʼnaeʼmo, Ala kava nepiʼmo maiʼnetapaeʼmo lapayamufa valetapa himamuʼamo alitetapa lokiya vaita maiyo.

¹¹ Lapakaemo muki kamemo hisaya kukenamo Gotiʼa lapamiʼniya kukenamo vaitetapa maiyo, Sataniʼa lapamalageka nehisigetapaeʼmo kamemo hutetapa he titapa maigayanagi.

¹² Na kava hinagetaene. Lagaemo apakufaʼe kolaʼapiʼeʼmo haneʼniya vayaʼeʼmo kamemo nosunaʼmonanafa kokuʼnapiʼmo maiʼneʼa hosu kavaʼmo huʼa yagaiʼa neʼapataya apaune vayaʼeʼmo kamemo nehune. Ala apaki vayaʼenagi himamu vayaʼenagi ma mopafi vayaʼmo hani yapiʼmo neʼmaiya vayaʼaiteʼmo yagaiʼa neʼapataya vayaʼenagi huta kamemo nehunaʼmofeʼmo

¹³ Gotiʼa kame hisaya kukenamo lapamiʼniya kukenamo vaitetapa maiyo. Alita vaitetapa maiʼnisayana hosu afinaʼmo afole neʼaisigetapaeʼmo kamemo hume hume utapa huta hano hutetapaeʼmo he titapa maigae.

¹⁴ Lama ge kavaʼmo mapalugana huno haneʼniyanagi he titapa maiʼnetapaeʼmo lama ge kavaʼmo hutapa aeyo. Goti geʼamo akame nehaya kavaʼmo aeni siotigana huno haneʼniyanagi Goti geʼamo akame nehutapaeʼmo alitapa vaiyo.

¹⁵ Alagepa faigoko geʼamoʼmo alino nanu aeno lapateʼniya gemo sukana huno haneʼniyanagi alitapa vaigenoʼao alo huno lapateno.

¹⁶ Ani kukenamo vailiʼnetapaeʼmo lapakesamo afita fatago nehaya kavaʼmo halegukana huno haneʼniyanagi lapakesamo afita fatago nehutapaeʼmo aliyo. Sataniʼa ata kae malefa keveletiʼmo nelapaesigetapaeʼmo halegutetiʼmo afaʼa aetapa yu hegae.

¹⁷ Gotiʼa lapakufamo alino katino lapateʼniya kavaʼmo aeni kakolitagana huno haneʼniyanagi lagufamo alino katino lateʼniye, hutetapa alita maleyo. Goti geʼamo Aunemeʼamo naipegana huno haneʼniyanagi aliyo.

¹⁸ Aliʼnetapaeʼmo muki alu nunumu alu nunumuʼmo huge Gotifeʼmo ge huge nehutapa Goti Aunemeʼaletiʼmo nunumuʼmo hutapa maiyo. Muki afinaʼmo oʼataletapa muki Goti aote vayaʼaeʼmo nunumuʼmo hutapa apateyo.

¹⁹ Gotiʼa naha maesigeʼna alino fala ki maleʼniya alagepa faigoko geʼamo koli osuʼna alagepa huʼna aeʼna hakalo huʼna hapa paisuvafeʼmo nunumuʼmo hutapa nateyo.

²⁰ Ani gelefeʼmo Goti apa vekaʼamo kalavusi huʼnove. Gotiʼa alino namiʼniya gemo koli osuʼna lokiya gemo huʼna aeʼna hakalo huʼna hapa paisuvafeʼmo nunumuʼmo hutapa nateyo.

Ge apamamaeno huʼniya gemae

²¹ Tikikasiʼa lahauʼniya konagatimoʼmo Ala kava neʼmo aliʼyaʼamo oʼataleno muki afinaʼmo alagepa aliʼyaʼmo neʼaliya vekamo lapakaetegamo unoʼaeʼmo nagaefeʼmo ina kava huno neʼmaiye, huno nava gemo huno lapa paigiye.

²² Ani kavaʼmo huʼa maiʼnae, huno lapa paisigetapa afitetapaeʼmo lapaipamoʼmo falu hisiyafeʼmo aliʼna ateʼnogeno uʼniye.

²³ Afotimo Gotiʼe Ala kava netimo Yesu Kalaisiʼeʼmo alagepa huʼana lapa maesaʼagetapa konagatapimogiʼeʼmo magoke lapaipa lapakesamo aliʼnetapa lapakesamo afita fatago hutetapa lapau lapayamopafiʼmo lapaino.

²⁴ Gotiʼa Ala kava netimo Yesu Kalaisifeʼmo hapau apayamopafiʼmo hapaume hapaume neʼvigeʼapaeʼmo oʼataleʼa muki afinaʼmo nehapausiya vayaʼmo fikumo hapa maeno apamino. He, lama ge.