Efasasi 5 - The Keyagana NT and 25 OT books

¹ Lapakaemo Gotiʼa hau ayamopafiʼmo nehaiya mafaʼneʼamo maiʼnayaʼmofeʼmo agaekana huta maiʼnetapa nehiya agufa kavaʼmo hiyo.

² Kalaisiʼa lagaefeʼmo hau ayamopafiʼmo hauʼnigenoʼaeʼmo agufaʼamo sipisipimo amagiʼnaya agufa kavaʼmo huno alagepa atumo neʼaiya ofalinimo Gotiʼmo amiʼniya agufa kavaʼmo hutapa konagatapieʼmo lapau lapayamopafiʼmo lapauʼninagetapa maiyo.

³ Kumai kavaʼmo osuge muki oʼaniʼya kavaʼmo osuge lapaʼye osuge hutetapa Goti apaote vayaʼamogi hisaya agufa kavakeʼmo hiyo. Fiku kavanagetapa lapakae folagapiʼmo magoke afinaʼmo ani agufa hosu kavaʼmo agimo aegae. Goti apaote vayaʼmogi osisaya agufa kavaʼmo haneʼniye.

⁴ Alino oʼaniʼya faino neʼapateya agufa gemo osuge negi nagi gemo osuge hosu kigi yokalo gemo osuge hutapa maiyo. Goti mafaʼneʼamogi nosaya agufa gemo haneʼniyanagi ani agufa gemo osutapa Gotifekeʼmo hao ke heyo.

⁵ Lapakaemo ago afiʼnayana kumai kavaʼmo nehaya vayaʼmofi oʼaniʼya kavaʼmo nehaya vayaʼmofi hosu hapaʼye nehiya vayaʼmofi huʼa Kalaisiʼe Gotiʼeʼmo yagaiʼana neʼapataʼa kotetiʼmo hetamaʼapimo oʼaligae. Mago vayaʼmogi aigofe gotiʼapimogifeʼmo mono nehaya agufa kavaʼmo huʼa hapaʼye nehiya vayaʼmogi ma mopafi yatefekeʼmo mono nehae.

⁶ Mani agufa hosu kavaʼmo nehayaʼmofeʼmo Goti geʼamo oʼafiʼa amagiʼa neʼatalaya vayaʼaifeʼmo aipamo leno neʼapateyanageno alagi apamagigiyaʼmofeʼmo fiku yanageʼa mago vayaʼmogi afa gemo huteʼa humi lapategae.

⁷ Alagi apamagigiyaʼmofeʼmo afalu afalugana agufa kavaʼmo hutapa oʼmaiyo.

⁸ Hogotetapa hanipiʼmo maiʼnayaʼmonanafa hemenimo Ala kava nepiʼmo maiʼnetapaeʼmo ha le yakana hutapa maiʼnayaʼmofeʼmo ha le mafaʼneʼamogimo hisaya agufa kavaʼmo hiyo.

⁹ Goti Aunemeʼamoʼmo alagamo neʼaesigetapaeʼmo alagepa kavaʼmo huge fatago kavaʼmo huge lama ge kavaʼmo huge hutapa maigae.

¹⁰ Mafaʼneʼamo maiʼnetapaeʼmo Ala kava neʼmoʼa hauʼniya kavaʼmo amalageka hutapa agegeyo.

¹¹ Hanipiʼmo nehaya kavaʼmoʼa alagamo noʼaeyanagi hosu kavaʼmo nehaya vayaʼeʼmo afalu afalugana agufa kavaʼmo osutapa hosu kavaʼapimo ha le yategamo alita afole aitapa ateyo.

¹² Fala kiʼa nehaya kavafeʼmo ava gemo hisunana lavagage hugiye.

¹³ Fala kiʼa nehayaʼmonanafa hosu kavaʼapimo ha le yategamo alita afole aita apatesageʼapaeʼmo alagepa huʼa ageteʼa ha le vayaʼmo hamalegae.

¹⁴ Ani kavafeʼmo hunoʼaeʼmo, kaukaleʼnana vekamogamo kaupatiʼmo he tige faliʼnaya vayapatiʼmo he tige huka maigenoʼao Kalaisiʼa kaipafiʼmo ha le yaʼmo kamino, huno huʼniye.

¹⁵ Huʼniyaʼmofeʼmo muki afinaʼmo alu kava alu kavaʼmo nehutapaeʼmo alagepa hutapa yagaita maiyo. Negi vayaʼmogi kavaʼmo osutapa ageteʼa afiʼnaya vayaʼmogi kavakeʼmo hutapa maiyo.

¹⁶ Hemenimo hosu kavaʼmo nehaya afinaʼmo haneʼniyaʼmofeʼmo muki afinaʼae afinaʼaeʼmo alagepa kavakeʼmo huge huge hutapa maiyo. Fiku yanageno alagepa kavaʼmo hisaya afinatapimo hano hugiyanagi.

¹⁷ Inagi negi nagi vayaʼmo oʼmaitapa Ala kava neʼmo hauʼniya kavafeʼmo kahauya hutapa ageyo.

¹⁸ Lusi aniʼmo netetapa negi nagi gemo osigenoʼao lapakufamo alino hosu huno olapateno. Osutapa Goti Aunemeʼamoʼmo lapaipafiʼmo havai teno.

¹⁹ Maiʼnetapaeʼmo konagatapimogifeʼmo Samu gemo huge mono yokemo huge lapaunelapametetiʼmo yokemo huge huta hapa paiyo. Lapaipafiʼmo mono yokemo huge Ala kava nefeʼmo Samu yokemo huge hutapa maiyo.

²⁰ Muki afinaʼmo muki yaʼe kavateʼefeʼmo Afotimo Gotifeʼmo Ala kava netimo Yesu Kalaisi agiʼaletiʼmo hao ke hetapa maiyo.

²¹ Lapakaemo Gotifeʼmo koli huʼnetapaeʼmo konagatapimogiʼeʼmo afalu afalu kavaʼmo hutetapa apaiyafiʼmo maiyo.

Aʼneʼapiʼe anauʼapimogiʼefeʼmo huʼniya gemae

²² Aʼneʼapimogitapae, huʼna, Ala kava netapimo aiyafiʼmo maiʼnetapa geʼamo neʼafiya kava hutapa anautapimogi apaiyafiʼmo maiʼnetapa geʼapimo afiyo.

²³ Kalaisiʼa siosi vayaʼaiteʼmo yagaino neʼapateya vekamo maiʼniya kava huʼa anautapimogi yagaiʼa nelapataya vayaʼmo maiʼnae. Kalaisiʼa siosi vayaʼai apakufamo alino katino neʼapateya vekamoʼmo maiʼneno agufaʼamoʼmo agenopagana huno haneʼneno siosi vayaʼaiteʼmo yagaino neʼapate.

²⁴ Siosi vayaʼmogimo Kalaisi aiyafiʼmo neʼmaiya kava hutapa aʼnemogitapae, huʼna, lapakaitapi anautapimogi geʼapimo afitetapa muki kavatefeʼmo apaiyafiʼmo maiyo.

²⁵ Anauʼapimogitapae, huʼna, Kalaisiʼa siosi vayaʼaifeʼmo hau ayamopafiʼmo hauʼnigenoʼaeʼmo falino apateʼniya kava hutapa aʼnetapieʼmo lapau lapayamopafiʼmo lapaino.

²⁶ Agaemo siosi vayaʼamo alino apaote apateʼneno Goti geʼaletiʼmo aniʼmo falegekana huno faleno apatesiyafeʼmo siosi vayaʼalefeʼmo falino apateʼniye.

²⁷ Alagepa siosiʼamo ha le konali siosiʼamo oʼaniʼya faifa yaʼmo ohanege kalagukifa yakana huno ohanege magoke hosu yaʼmo ohanege huʼnisigeno aote siosiʼamo aʼmo aligekana huno alisiyafeʼmo falino apateʼniye.

²⁸ Anauʼapimogimo apakaiʼapi apakufaeʼmo nehapaiya kava huʼa aʼneʼapieʼmo hapau apayamopafiʼmo hapaino. Aʼneʼapieʼmo nehapaiya ve anagaʼmogimo apakaiʼapieʼmo nehapaiye.

²⁹ Muki vayaʼmogimo apakaiʼapi apakufaeʼmo apaini osuʼa hapauʼnigeʼa neʼyaʼmo nege apakufaleʼmo alagepa huʼa yagaiʼa atege nehae. Ala kava neʼmoʼa siosiʼaleʼmo ani kavaʼmo nehiye.

³⁰ Agufaʼamo maige agufafi alu ya alu yaʼamo maige ayamufafiʼmo alu ya alu yaʼamo maige huʼnonaʼmofeʼmae.

³¹ Goti mukufi gemoʼa hunoʼaeʼmo, Huʼniyaʼmofeʼmo mafaʼne anagaʼmogimo kositeʼapaeʼmo itaʼapi afoʼapimogimo apatale uʼa aʼmo aliteʼa aʼapiʼeʼmo lokaeʼa maisagenoʼaeʼmo lole kanolaʼmoganimo magoke anagufamo hamalegaiye, huno huʼniye.

³² Mani gemo alagi alino fala ki maleʼniya gemo haneʼniyaʼmonanafa siosi vayaʼmogitaʼe Kalaisiʼeʼmo lokaeʼa maisagenoʼaeʼmo magoke lagufamo nehaneya kavafeʼmo nehuve.

³³ Siosilefeʼmo nehuvaʼmonanafa lapakaitapieʼmo lapau lapayamopafiʼmo nelapaiya kava hutapa lapamete lapamete hutapa aʼnetapieʼmo lapaino. Inagi aʼnemogimo anauʼapimogi apakiʼapileʼmo aliʼa asaga huteʼa geʼapimo afiteʼa akame hiyo.