Efasasi 4 - The Keyagana NT and 25 OT books

Gotiʼa apakaeʼeʼmo magoke vayaʼmo alino hamaleno lapateʼniya gemae

¹ Inagi nagaemo Ala kava netefeʼmo kalavusi huʼneʼnaeʼmo, Gotiʼa alagepa kavaʼmo hutapa maisayafeʼmo keya aeno ge huʼniya agufa kavaʼmo hutapa maiyo, huʼna aliʼna he tiʼna nelapatove.

² Muki afinaʼmo lapakufamo alita afepi atetetapa vase hutapa maiyo. Vayaʼmogimo hosu yaʼmo aliʼa nelapamisagetapaeʼmo lapaipamoʼmo falu hino. Konagatapimogimo kana yaʼmo aliʼa nelapamisagetapaeʼmo afaʼa ateʼnetapa konagatapieʼmo lapaino.

³ Goti Aunemeʼamoʼmo magokepi alino lokaeno lapateʼniyanagi magokepiʼmo lokaeta maisayafeʼmo lapayamukiki hiyo. Lapaipamoʼmo falu huʼninagetapa magokepi alagepa hutapa lokaeta maiyo.

⁴ Kalaisi agufaʼamo maiʼnonagenoʼaeʼmo magoke agufamo haneʼniye. Magoke Aunemeʼamo maiʼniye. Magoke kavafekeʼmo agava neʼmaune. Gotiʼa keya aeno ge huʼnigetaeʼmo ani magoke kavafekeʼmo agava maiʼneta lavayagunagu nehune.

⁵ Magoke Ala kava neʼmo maiʼniye. Magoke agufa kavaʼmo huta agaefeʼmo lagesamo afita fatago nehune. Magoke agufa kavaʼmo huta aniʼmo faleʼnone.

⁶ Magoke Gotiʼa muki vayaʼamogita afotimoʼmo maiʼniye. Agaemo muki vayaʼamogitaleʼmo yagaino latege muki vayaʼamogitafiʼmo aliʼyaʼmo alige muki vayaʼamogita laipafiʼmo maige nehiye.

⁷ Magoke vayaʼmo maiʼnonaʼmonanafa Kalaisiʼa hauʼnigeno Goti aliʼyaʼamo alisuna himamuʼamo alino fako huno lamete lamete huno fikumo laha maeno lamiʼniye.

⁸ Ani kavatefeʼmo Goti mukufi gemoʼmo hunoʼaeʼmo, Agaemo kamemo huno aeno apakaseteno apatafauno apavalelino anagamo uno haiteno alu ya alu yaʼmo fikumo alino vayaʼaina apamiʼniye, huno huʼniye.

⁹ Inagi uno haiʼniya gemo aepaʼamo na agufa gemae. Mani gemo aepaʼamo haneʼniyana Kalaisiʼa hogoteno ma mopamo afeʼalumelaga uno lamiʼniye.

¹⁰ Eno emineteno uno lamiʼniya vekamoʼmo agaiʼamo muki vayaʼmo lusi kava huno fikumo hapa maeno apamisiyafeʼmo kokuʼnapiʼmo aeno agaseno uno haiʼniye.

¹¹ Agaemo vayaʼaina fikumo hapa maeno apamiʼniya gemo aepaʼamo haneʼniyana mago vayaʼamo apa vayaʼmo maisayafeʼmo lekana paino apatege mago vayaʼamo Gotitegati gemo alini eʼa aeʼa hakalo huʼa hapa paisaya vayaʼmo lekana paino apatege mago vayaʼamo agaiʼaeʼmo alagepa faigoko geʼamo aeʼa hakalo huʼa hapa paisaya vayaʼmo lekana paino apatege mago vayaʼamo sipisipi vayaʼaiteʼmo yagaiʼa apateʼneʼa aliʼa apaya malesaya vayaʼmo lekana paino apatege huʼniye.

¹² Ani vayaʼmogimo Goti apaote vayaʼamo aliʼa alagepa huʼa alo huʼa apatesageʼa aliʼyaʼamo alisayafeʼmo lekana paino apateʼniye. Goti vayaʼamogimo Goti aliʼyaʼamo alisagenoʼaeʼmo Kalaisi agufamo kosino alopa hegaiye.

¹³ Ani kavaʼmo huta kosime kosime neʼutaeʼmo magokepi lokaeta maiʼneta magoke lagesamo afita fatago huge Goti Mafaʼneʼamo alagepa huta agege nehutaeʼmo alopa vayakana huta maiʼneta uta haita hapaigune. Kalaisiʼa alagi alopa vekagana huno maiʼniyanageta ani kavaʼmo huta kosime kosime uta Kalaisikana huta maigune.

¹⁴ Magoʼe huta mafaʼnegana huta oʼmaita kosigune. Mafaʼnegana huta maiʼnisunaʼmoʼmo aigofe vayaʼmogi aliʼa apaya neʼmalaya gemoʼmo yasimo alinino uneno nehigeno aino afelo afalo nehiya sipigana huta maigune. Apakaemo apakaiʼapimo apakesamo afiteʼa humiʼnami gemo huteʼa apayate neʼaliye.

¹⁵ Lagaemo vayaʼaifeʼmo lahauʼnisigeta lavayafatiʼmo lama gemo nehutaeʼmo kosime kosime uta Kalaisigana huta maigune. Muki vayaʼmo apakenopamokeʼmo muki apakufaleʼmo yagaino apateʼniya kava huno Kalaisiʼa lagenopagana huno maiʼneno yagaino nelategeno agufamo alino kosino neʼate.

¹⁶ Agufafi alu ya alu yaʼamo alagepa huno haneʼnigeno aeno hapaiʼniya yaʼmoʼa atafauno ateʼnigeno magokepi lokaeno haneʼniye. Agufafi alu ya alu yaʼamoʼa aliʼyaʼmo neʼaligenoʼaeʼmo agufamo ko nesiye. Ani kava huta magokepi lokaeta maiʼnetaeʼmo lahau layamopafiʼmo nelahaigetaeʼmo magokepi ko nesune.

Saufa kavaʼmo higetao, huno huʼniya gemae

^17-18 Ani kavaʼmo hutapa maiʼnayaʼmofeʼmo nagaemo Ala kava neʼmo agiʼaletiʼmo lokiya gemo huʼna lapa paiʼnaeʼmo, Malaga vayaʼmogi nehaya agufa kavaʼmo hogotetapa huʼnayaʼmonanafa hemenimo magoʼe hutapa osiyo. Fikumo apakesamo neʼafigenoʼaeʼmo apaipa apakesamoʼmo hani huʼnigeno apaipamo lokiya vaiʼniyaʼmofeʼmo noʼagayaʼmofeʼmo Gotiʼa afaʼa maisaya yaʼmo neʼapamiya yaʼmo oʼaliʼa malaga vayaʼmo maiʼnae.

¹⁹ Apaipamoʼmo faligekana huno haneʼnigeʼa apaipafiʼmo aliʼa oʼamalagiʼa apakufaleʼmo yagaiʼa oʼateʼneʼa alu kava alu kavaʼmo oʼaniʼya kavaʼmo nehuʼapaeʼmo magoʼe huno hapaʼye huʼnigeʼa maiʼnae.

²⁰ Lapakaemo ani agufa kavaʼmo hisayafeʼmo Gotiʼa Kalaisiʼmo alino lapave oliʼniye.

²¹ Kalaisiʼa alino lapaya maleʼnigetapa afiʼnisayana lama gemo afoʼamoʼmo geʼamo afiʼnae.

²² Agaemo hunoʼaeʼmo, hogotetapa huʼnaya kavatapilefeʼmo atafa vekatapimo alita ataleyo, huno alino lapaya maleʼniye. Atafa vekatapimoʼa lapaʼye nehiya kavatapiletiʼmo kasalime kasalime uno humi nelapate.

²³ Gotiʼa saufa lapaipa lapakesamo alino hamaleno lapatenagetapa maiyo.

²⁴ Atafa vekatapimo ataletetapa saufa vekatapimo Gotiʼa alo huʼniya vekatapimo agaiʼagana huno neʼmaiya vekatapimo alita vaiyo. Lama geʼaletiʼmo saufa vekatapifatiʼmo vayaʼaitegamo fatago kavaʼmo huge Gotitegamo lama ge aote kavaʼmo huge hugae.

²⁵ Inagi magoʼe hutapa aigofe gemo osutapa magoke agufafiʼmo alu ya alu yaʼamo maiʼnonaʼmofeʼmo mukiʼamogitapamo konagatapimogifeʼmo lama gemo hiyo.

²⁶ Hosu kavafeʼmo lapaipamo leno. Lapaipamo lesiya afinaʼmo hosu kavaʼmo osiyo. Fiku yanagetapa lapaipamo leme leme neʼvisageno yegemo uno lamino falegaiye.

²⁷ Fiku yanagetapa kitamo yaki maleʼnisageno Sataniʼmo eno uno haigiye.

²⁸ Kumaya neʼaliya kavaʼmo ataletapa lapayatetiʼmo aepa faitapa alagepa aliʼyaʼmo aliyo, kagemi yaʼapimo ohanesiya vayaʼaina apamisayafeʼmae.

²⁹ Alino hosu huno apatesiya agufa gemo osutapa hapa maesiya agufa gemo lokiya vaino apatesiya gemo alagepa huʼa oʼafiʼnisaya gemo hapa paigenoʼao alino alagepa huno apateno.

³⁰ Gotiʼa henagaʼamo lapavalesiya afinafeʼmo Aunemeʼaletiʼmo lapakaeteʼmo alagena kavaʼamo ago hu maletenoʼaeʼmo, mafaʼneʼnimo maiʼnae, huno huʼniyaʼmofeʼmo Aote Aunemeʼamoʼmo aipamoʼmo kana hisiya kavaʼmo osiyo.

³¹ Atu ofa lapaipamo okalige lapaipamo olege lapai oʼvaige falo gemo osuge ge ohapauge muki agufa lapaini nehaya kavaʼmo atalege hutapa maiyo.

³² Lapaipamo lapamete lapamete hutapa apamiteta afalu afalu kavaʼmo hutapa lapau hutapa apateyo. Gotiʼa Kalaisitefeʼmo hosu kavatapimo afaʼa alino ataleʼniya kava hutapa konagatapimogiʼeʼmo afalu afalu kavaʼmo hutapa hosu kavaʼapimo alita ataleyo.