Efasasi 3 - The Keyagana NT and 25 OT books

Poloʼa alu nofi vayaʼaitegamo uno aliʼyaʼmo neʼaliya kavafeʼmo huʼniya gemae

¹ Gotiʼa ani kavaʼmo nehiyaʼmofeʼmo nagaemo Poloʼnamo Kalaisi Yesutefeʼmo Yu nofi vayaʼmo oʼmaiʼnageʼnaeʼmo lapa maeʼna kalavusi huʼneʼnaeʼmo nunumuʼmo huʼna nelapatove.

² Gotiʼa lapa maesuvafeʼmo fikumo naha maeno namiʼniya kavafeʼmo ava gemo lapakaemo ago afiʼnae.

³ Gotiʼa hogoteno alino fala ki maleʼniya gemo ago alino nave liʼniye. Ani kavafeʼmo aise gemo ago avoʼmo kaeʼna lapa paiʼnove.

⁴ Lapakaemo lekana paitapa afitetapaeʼmo, Poloʼa Kalaisifeʼmo ava gemo alino fala ki maleʼniya gemo ago afiʼniye, hutapa lapakesamo afigae.

⁵ Gotiʼa hogoteno akeyaʼvilagamo muki ma mopafi vayaʼmo alino apave oliʼniyaʼmonanafa hemenimo Aunemeʼaletiʼmo laote apa vayaʼamogita Gotitegati gemo alinita eta aeta hakalo huta hapa nepauna vayaʼmo ago alino lave liʼniye.

⁶ Alu nofi vayaʼmogimo Kalaisifeʼmo alagepa faigoko geʼamo afiteʼa apakaeʼeʼmo magoke vayaʼmo hamaleteʼa Gotiʼa Yu vayaʼaina apamisigeʼa alisaya kava huʼa Kalaisitetiʼmo aligae. Mafaʼneʼapimogimo muki afoʼapimogi yaʼmo neʼaliya kava huʼa aligae, huno alino lave liʼniye.

⁷ Inagi Poloʼnamo mani alagepa gelefeʼmo aliʼyaʼamo alisuvafeʼmo Gotiʼa fikumo naha maeno namiteno himamuʼaletiʼmo naipafiʼmo aliʼyaʼmo aliʼnigeʼna aliʼyaʼamo neʼaluve.

⁸ Muki apaote vayaʼamogimo aeʼa naga seʼnageʼna henaga vekamo maiʼnovaʼmonanafa kanale yaʼmo ageta lekana opaisuna agufa yaʼmo Kalaisiʼa neʼapamiya kagemi yaʼalefeʼmo ava gemo alu nofi vayaʼaifeʼmo aeʼna hakalo huʼna hapa paisuvafeʼmo fikumo naha maeno namiʼniye.

⁹ Gotiʼa Yesu Kalaisitetiʼmo muki yaʼmo afa yatetiʼmo alo huʼniya vekamoʼmo agesamo afitenoʼaeʼmo, ani kavaʼmo huguve, huno huʼniya kavaʼmo akeyaʼvilagamo alino fala ki maleʼnigeʼa muki kafugaʼae kafugaʼaeʼmo oʼageʼnae. Oʼageʼnayaʼmonanafa hemenimo Gotiʼa haiya kava huno agesamo afiʼniya kavaʼmo hisifi huʼa muki vayaʼmogimo ageʼa alagepa huʼa agesayafeʼmo aliʼyaʼamo alisuvafeʼmo navaleno nateʼniye.

¹⁰ Gotiʼa hunoʼaeʼmo, alagepa huʼna nagesamo afiteʼna siosi vayaʼalegamo alagepa huʼna alu kava alu kavaʼmo huʼna hapa maesugeʼa enisole vayaʼmo kokuʼnapi maiʼneʼa yagaiʼa neʼapataya vayaʼmogi ageteʼapaeʼmo, Gotiʼa muki yaʼamo alagepa huno ageʼniya vekamae, huʼa hugae, huno hu maleʼniye.

¹¹ Mani kavafeʼmo akeyaʼvilagamo ma mopamo alo osuʼniya afinaʼmo hunoʼaeʼmo, ani kavaʼmo huguve, huno hu maleʼniya kavaʼmo hemenimo Ala kava netimo Kalaisi Yesutetiʼmo ago alino afole aino ateʼniye.

¹² Agaepiʼmo maiʼneta agaefeʼmo lagesamo afita fatago nehuna kavatetiʼmo koli osuge lole lagesamo oʼafige huteta Gotitegamo neʼune.

¹³ Inagi nagaemo lapa maesuvafeʼmo kana yaʼmo aliʼnovaʼmofeʼmo lapaipamoʼmo kana nehinagetapaeʼmo, atalegaune, hutapa osiyo. Mani kavatetiʼmo ala lapakitapimo aligae.

Poloʼa nunumuʼmo huʼniya gemae

¹⁴ Gotiʼa fikumo lapa maeno lapamiʼniyaʼmofeʼmo Ala kava netimo Afoʼamo aulagaleʼmo naleʼyaʼmo faiʼneʼna nunumuʼmo nehuve.

¹⁵ Goti afamo anaga vayaʼamo muki kokuʼnapi neʼmaiya vayaʼe ma mopafi neʼmaiya vayaʼmogiʼeʼmo Gotiʼa afoʼapimotetiʼmo ala apakiʼapimo neʼaliye.

^16-17 Nunumuʼmo nehuʼnaeʼmo, lusi kava huka ha le konali vekamo maiʼnanaʼmofeʼmo ha le konali kagemi yakalefeʼmo himamukaletiʼe Kaunekametetiʼeʼmo apakupi mafaʼnemo lokiya vaika apato. Kalaisiʼa agaefeʼmo apakesamo afiʼa fatago nehaya kavatetiʼmo apaipafiʼmo alagi maiyo. Kalaisiʼa apaipafiʼmo maiʼnisigeʼapaeʼmo hapau apayamopafiʼmo hapauʼnisigeʼa hapafuʼyamo aegekana huʼa maiʼneʼa noʼmo faiʼa neʼataya yateʼmo alagi atafauʼa alagi huʼa maiyo.

¹⁸ Ani kavaʼmo huʼa maiʼneʼapaeʼmo muki apaote vayaʼaʼeʼmo Kalaisiʼa hau ayamopafiʼmo hauʼniya kavaʼamo ageʼa alagepa huʼa ageyo. Haiya agufa afafaleʼmo uno haiʼnifi haiya agufa afafale uno lamiʼnifi haiya agufa afafaleʼmo uʼnifi haiya agufa afafaleʼmo eʼnifi huʼa ageyo.

¹⁹ Muki alagepa yaʼageʼmo kaipafiʼmo havai teʼniya agufa kava huʼa kagaekana huʼa maisayafeʼmo alagi oʼagesaya agufa kavaʼmo Kalaisiʼa hau ayamopafiʼmo hauʼniya kavaʼmo ageyo, huʼna nunumuʼmo huʼna nelapatove.

²⁰ Lagaemo agaefeʼmo ge hutaeʼmo, ani kavaʼmo huvo, huta afi nekona kavaʼmo agaemo afaʼa hugiye, huta lagesamo neʼafuna kavaʼeʼmo afaʼa hugiye. Afaʼa magoʼe huno ge huta afi nokona kavaʼe lagesamo noʼafuna kavaʼeʼmo laipafiʼmo aliʼyaʼmo neʼaliya himamuʼaletiʼmo magoʼe huno afaʼa hugiye.

²¹ Siosi vayaʼamogitamo muki kafugaʼae kafugaʼaeʼmo agiʼaleʼmo alita asaga huge huge huta maigetao. He, lama ge.