Efasasi 2 - The Keyagana NT and 25 OT books

Gotiʼa faliʼnayatetiʼmo ago alino he tino lapateʼniya gemae

¹ Hogotetapa Goti geʼamo ago amagita ataletetapa hosu kavapiʼmo maiʼnetapaeʼmo falisaya kavategamo maiʼnae.

² Ma mopafi hosu kavaʼmo akame huge ala vekamo kokuʼnaʼe mopaʼeʼmo hanetegeno folagate neʼmaiya vekamoʼmo hosu enisole vayaʼaiteʼmo yagaino neʼapateya vekamo geʼamo akame huge huʼnae. Agaemo Goti geʼamo amagiʼa neʼatalaya vayaʼai apaipafiʼmo aliʼyaʼmo neʼaliya aune vekamo maiʼniye.

³ Mukiʼamogitamo apakaekana huta maiʼnogeno lagufamoʼe lagesamoʼeʼmo lahaʼye huʼnigetaeʼmo lagufamoʼmo hauʼniya kavaʼmo huge hosu kavafeʼmo lagesamo afita akame huge huʼnone. Itatimogi aliʼa lateʼnagetaeʼmo muki ma mopafi vayakana huta hosu laipamo alita maiʼnonaʼmofeʼmo Gotiʼa aipamo leno nelateyanageno kayoʼmo lamisiya agufa kavaʼmo huta maiʼnone.

⁴ Maiʼnonaʼmonanafa kagemi yaʼapiʼe vayaʼmogimo alopa kagemi yaʼapimo haneʼniya kava huno Gotiʼa hau huno neʼapateya kavaʼamo kagemi yaʼagana huno haneʼniya vekamoʼmo lagaefeʼmo hau ayamopafiʼmo hauʼniye.

⁵ Lagaemo Goti geʼamo ago amagita ataleteta hosu kavapiʼmo falisuna kavategamo maiʼnonagenoʼaeʼmo alino he tino latetenoʼaeʼmo afaʼa maisuna yaʼmo lamiʼnigeta Kalaisiʼeʼmo afaʼa maiʼnone. Fikumo lapa maeno lapamiʼniya kavatetiʼmo lapakufamo alino katino lapateʼniye.

⁶ Kalaisi Yesupiʼmo maiʼnonagenoʼaeʼmo Gotiʼa agaeʼeʼmo alino he tino lateteno kokuʼnapi lavalelino uno haino lateʼnigeta agaeʼeʼmo fai maiʼnone.

⁷ Gotiʼa lusi kava huno fikumo laha maeno lamiʼniya kavaʼamo kagemi yaʼagana huno haneʼnigeno Kalaisi Yesutetiʼmo agaiʼa aipamo alino ao yaʼmo hu maleʼniya kavaʼmo alino apave lisigeʼapaeʼmo afole aisiya afinaʼmo ageʼa maigae.

⁸ Gotiʼa fikumo lapa maeno lapamitenoʼaeʼmo lapakesamo afita fatago huʼnaya kavatetiʼmo lapakufamo alino katino lapateʼniye. Lapakaitapimo lapakesamo afita fatago osuʼnafa Gotiʼa fikumo lapa maeno lapamiʼnigetapa lapakesamo afita fatago huʼnae.

⁹ Gotiʼa vayaʼmogimo apakiʼapileʼmo aliʼa asaga osisayafeʼmo alagepa kavaʼapiletiʼmo apakufamo alino katino noʼapate.

¹⁰ Gotiʼa alagepa kavaʼmo hisunafeʼmo hogoteno, hugae, huno hu maleʼniya kavaʼmo hisunafeʼmo Kalaisi Yesupiʼmo saufa vayaʼmo alo huno lateʼniye.

Kalaisipiʼmo magoke vayaʼmo maiʼnone, huno huʼniya gemae

¹¹ Alo huno lapateʼniyaʼmofeʼmo lapakaemo, hogoteta maiʼnona afinaʼmo haiya agufa kavaʼmo huta maiʼnopi, hutapa lapakesamo afita ho hiyo. Itatapimogimo aliʼa lapateʼnagetapaeʼmo Yu nofi vayaʼmo oʼmaiʼnae. Yu vayaʼmogi apayatetiʼmo apakufamo lagauʼnaya vayaʼmogimo lapakaefeʼmo huʼapaeʼmo, Goti keʼaepa geʼamo oʼafiʼnaya vayaʼmogeʼapaeʼmo apakufamo olagauʼnaya vayaʼmo maiʼnae, huʼa nehae.

¹² Ani afinaʼmo Kalaisiʼeʼmo lokaeta oʼmaitapa lapaote maiʼnae. Isaleli vayaʼai kegiʼya yuʼilaga eta haiteta oʼmaitapa malaga maiʼnae. Gotiʼa lapa maegauve, huno hu maleʼniya kotalakelefeʼmo polomasi gemo hu maleʼniya gemo lapa opaiʼniye. Ma mopafiʼmo maiʼnetapaeʼmo Gotitegatiʼmo alagepa yaʼmo alisayafeʼmo agava maiʼnetapa lapavayagunagu osuʼnageno Gotitapimoʼmo oʼmaiʼniye.

¹³ Lapakaemo afagiʼaleʼmo maiʼnayaʼmonanafa hemenimo Kalaisi Yesupiʼmo maiʼnagenoʼaeʼmo Kalaisiʼa kolaʼaletiʼmo lapavalelineno Goti haopaleʼmo lapateʼniye.

¹⁴ Agaiʼageʼmo kame kavatimo alino hano huno ataleʼnigeta magokepi lokaeta neʼmaune. Hogoteno folagapi haneʼniya kegiʼyamoʼmo alino fako huno lateʼnigetaeʼmo lapaote maige laote maige huʼnonagenoʼaeʼmo ani kegiʼyamo ago alino halagape vaino ataleʼniye.

¹⁵ Agaemo malipu yosaleʼmo maiʼnenoʼaeʼmo agufaletiʼmo Yu keʼaepa gemoʼmo ani kavaʼmo hiyo, ina kavaʼmo osiyo, huno huʼniya gemo alino ataleteno Yu nofi vayaʼe alu nofi vayaʼeʼmo alino agaepiʼmo lokaeno lateteno saufa nofi vayaʼmo alo huno latetenoʼaeʼmo kame nehuna kavatimo alino hano huno ataleʼniye.

¹⁶ Kalaisiʼa malipu yosaleʼmo faliʼniya kavatetiʼmo apaini huʼa ateteʼapaeʼmo apaini huʼa neʼapataya kavaʼmo alino hano huno ataleteno lole nofi vayaʼmo alino magoke nofi vayaʼmo hamaleno latetenoʼaeʼmo lagaegi lapakaegi Gotiʼagi huno alino nanu aeno lateʼniye.

¹⁷ Ani kavaʼmo hutenoʼaeʼmo lapakaemo afagiʼaleʼmo maiʼnaya vayaʼe lagaemo Goti haopaleʼmo maiʼnona vayaʼmogitaʼeʼmo, kame nehaya kavaʼmo aliʼna hano huʼna ataleʼnovanagetapa Gotiʼeʼmo magokepi lokaeta maigae, huno aeno hakalo huno laha paiʼniye.

¹⁸ Agaemo lagaeʼe lapakaeʼeʼmo kaʼmo valino lateʼniyanageta hemenimo magoke Aunemeʼaletiʼmo muki yaʼmo Afoʼamotegamo afaʼa uta haigune.

¹⁹ Ani kavaʼmo hutapa maiʼnayaʼmofeʼmo hemenimo lapakaemo nata vayaʼmo oʼmaige alu kotegatiʼmo eʼa maiʼnaya vayakana huta oʼmaige huʼnayaʼmonanafa Goti apaote vayaʼaʼeʼmo magoke kote vayaʼmo maiʼnetapa Goti afamo anaga vayaʼaʼeʼmo magokepi lokaeta maiʼnae.

²⁰ Apa vayaʼmo Gotitegati gemo alini eʼa aeʼa hakalo huʼa hapa nepaiya vayaʼmogimo Gotiʼa noʼmo faino neʼateya yafakana huʼa maiʼnae. Gotiʼa ani yafateʼmo no kigekana huno alino lapateʼniye. Yesu Kalaisiʼa hogote yafaʼmo aluga aluga atupaleʼmo noʼmo faiʼa neʼataya yafakana huno maiʼniye.

²¹ Agaepiʼmo muki yaʼaleʼmo atafauʼneno Ala kava neʼmo aote mono noʼamo kime kime uno nehaiye.

²² Agaepiʼmo Gotiʼa Aunemeʼamo noʼafiʼmo maisiyafeʼmo lapakaeʼeʼmo alino anupa huno no kigekana huno nelapate.