Efasasi 1 - The Keyagana NT and 25 OT books

¹ Nagaemo Poloʼnaeʼmo Gotiʼa hauʼnigeno lekana paino nateʼnigeʼna Yesu Kalaisi apa vekaʼamo maiʼnove. Efasasi taonifiʼmo maiʼnaya vayaʼmogitapamo Kalaisi Yesupiʼmo maiʼnageʼna aliʼna amufa nelapamugenoʼaeʼmo Gotiʼa lapavaleno alino lapaote lapateʼniya vayaʼamogitaeʼmo mani avoʼmo nekaove.

² Afotimo Gotiʼe Ala kava netimo Yesu Kalaisiʼeʼmo fikumo lapa maeʼana lapamisaʼageno lapaipamoʼmo falu hino.

Gotiʼa Kalaisitetiʼmo muki alagepa yaʼamo lamiʼniya gemae

³ Lagaemo Gotiʼa alita auleta ategetao. Agaemo Ala kava netimo Yesu Kalaisi Gotiʼamoʼmo maige Afoʼamoʼmo maige huʼniye. Lagaemo Kalaisipiʼmo maiʼnonagenoʼaeʼmo agaemo muki aulena yaʼamo kokuʼnapatiʼmo launelameʼmo ha maesiya yatetiʼmo ago alino auleno lateʼniye.

⁴ Akeyaʼvilagamo ma mopamo alo osuʼniya afinaʼmo Goti aulagaleʼmo laote vayaʼamo maiʼnisunagenoʼaeʼmo hosu kavatimo alagi ohanesiyafeʼmo Kalaisipiʼmo maiʼnaya vayane, huno lekana paino lateʼniye.

⁵ Agaemo lagaefeʼmo hau ayamopafiʼmo hauʼnigeno hogoteno hunoʼaeʼmo, nahauʼniyanageʼa Yesu Kalaisitetiʼmo nagaiʼnilefeʼmo mafaʼneʼnimo maigae, huno lokiya gemo hu maleʼniye.

⁶ Fikumo laha maeno lamiʼniya ha le konali yaʼamo alino apave lisigeʼapaeʼmo ageteʼa agiʼaleʼmo aliʼa asaga huʼa atesayafeʼmae. Agaemo hau ayamopafiʼmo hauʼniya mafaʼneʼaletiʼmo ani kavaʼmo huno fikumo laha maeno lamiʼniye.

⁷ Kalaisipiʼmo maiʼnonagenoʼaeʼmo Gotiʼa lusi kava huno fikumo hapa maeno neʼapamiya kavaʼamo mago kagemi yaʼagana huno maleʼniya kavatefeʼmo Yesu kolaʼaletiʼmo miya faino hatu maeno lateʼniya hosu kavatieʼmo afaʼa ateyo, huno laha paiʼniye.

⁸ Lusi kava huno laha maeno lamitenoʼaeʼmo ageteta neʼafuna kavaʼe alagepa huta lagesamo neʼafuna kavatiʼeʼmo lamiʼnigeta aliʼnone.

⁹ Hauʼniya kavatefeʼmo ani kavaʼmo huguve, huno agesamo afiteno lokiya gemo hu maleʼniya kavaʼmo hogoteno alino fala ki maleʼniyaʼmonanafa hemenimo ago alino lave liʼniye.

¹⁰ Agesamo afino hu maletenoʼaeʼmo, hu maleʼnova afinaʼmo afole aisigeʼnaeʼmo muki kokuʼnapi vayaʼe ma mopafi vayaʼeʼmo aliʼna anupa huʼna apatesugeno Mafaʼneʼnimoʼmo yagaino apategaiye, huno huʼniye.

¹¹ Mafaʼneʼapimogimo muki afoʼapimogi yaʼmo neʼaliya kava huta Gotiʼa muki maleʼniya yaʼamo alisunafeʼmo agaemo muki kavaʼmo hisiyafeʼmo hauʼnigeno agaiʼamo ani kavaʼmo huguve, huno huʼniya geʼaleʼmo akame huno nehiya Gotiʼa hunoʼaeʼmo mafaʼneʼnimo maigae, huno hu maleʼniye.

¹² Gotiʼa lagaetetiʼmo ha le konali yaʼamo alino apave lisigeʼa ageteʼapaeʼmo agiʼaleʼmo aliʼa asaga huʼa atesayafeʼmo mafaʼneʼnimo maigae, huno hu maleʼniye. Lagaemo Yu vayaʼmogita hogoteta Kalaisifeʼmo alita amufa amiʼnone.

¹³ Ani kava hutapa lapakaeʼeʼmo alagi mani lama gemoʼmo lapau neʼvaiya kavatefeʼmo alagepa faigoko geʼamo afitetapaeʼmo alita amufa amiʼnae. Lapakaemo Kalaisifeʼmo lapakesamo afita fatago huʼnagenoʼaeʼmo Gotiʼa polomasi gemo hunoʼaeʼmo, Nauneʼnameʼmo apamiguve, huno hu maleʼniya Aunemeʼamo lapamitenoʼaeʼmo lapaipafiʼmo alagena yaʼamo ago hu maletenoʼaeʼmo, vayaʼnimo maiʼnae, huno lapa paiʼniye.

¹⁴ Gotiʼa maleʼniyanageno lamisiya yapatiʼmo Aunemeʼamo ago lamiʼniyaʼmofeʼmo ago afiʼnonana miya faino lateʼniya vayaʼamo alagi hatu maeno lateteno lavalelino uno haisigeta muki yaʼamo aligune. Agaemo ha le konali yaʼamo alino apave lisigeʼapaeʼmo agiʼaleʼmo aliʼa asaga huʼa atesayafeʼmo ani kavaʼmo huʼniye.

Poloʼa nunumuʼmo huʼniya gemae

¹⁵ Huʼniyaʼmofeʼmo lapakaemo Ala kava neʼmo Yesufeʼmo lapakesamo afita fatago hutetapa Goti apaote vayaʼaeʼmo lapau lapayamopafiʼmo nelapaiya kavafeʼmo lapava gemo afiteʼnaeʼmo

¹⁶ Gotifekeʼmo hao ke heʼna lapateteʼnaeʼmo muki afinaʼmo oʼataleʼna nunumuʼmo huʼna nelapatove.

¹⁷ Nagaemo Ala kava netimo Yesu Kalaisi Gotiʼamo ha le konali yaʼaʼe vekaeʼmo nunumuʼmo huʼnaeʼmo, Kaunekameʼmo apamigeʼapao alagepa apaipa apakesamo aliʼneʼa kageʼa alagepa huteʼa apakesamo afiʼa fatago hiyo.

¹⁸ Apakaefeʼmo keya aeka ge huʼnanageʼapaeʼmo eʼa apamisana yafeʼmo apavayagunagu huʼa agava neʼmaiye. Ha le yakamo apamiteka apaipafi apaulagamo alika ayakeka ategeʼapao mafaʼneʼapimogimo muki afoʼapimogi yaʼmo neʼaliya kava huka apaote vayaʼaina hetamaʼapimo apamisanageʼa ageʼa alagepa huteʼapaeʼmo, ha le konali yaʼamo alagepa yaʼmo haneʼniye, huʼa agava maiyo.

^19-20 Kagaemo lagaetegamo lusi kava huka aeno apakaseʼniya lokiyakaletiʼmo lokiya kavaʼmo huʼnananageka hemeniʼeʼmo nehane. Lokiyakaletiʼmo lokiya kavaʼmo huka Kalaisi agufafiʼmo kayamukiki huka aliʼyaʼmo aliteka faliʼniyatetiʼmo ago alika he tika ateteka lamaga kahaopaleʼmo avalelika uka haika ateʼnana kavaʼmo huka laipafiʼmo ani agufa lokiya kavaʼmo huka aliʼyaʼmo aliʼnanageta lagesamo afita fatago nehune. Mani lokiya kavaʼmo alika apave liyo, huʼna nunumuʼmo huʼna nelapatove.

²¹ Kalaisiʼa kokuʼnapiʼmo maiʼnenoʼaeʼmo hemenimo yagaiʼa neʼapataya vayanagi enisole vayanagi himamu vayanagi ala kava vayanagi ala apaki vayanagi huno ago aeno apakaseno hemenimo yagaino neʼapateyanageno henagaʼamo afole aisiya afinaʼeʼmo ani kavakeʼmo huno yagaino apategaiye.

²² Gotiʼa muki yaʼe vayaʼeʼmo Kalaisi aiyafiʼmo alino apateteno hogote vekamo yagaino neʼapateya vekamo siosi vayaʼaiteʼmo yagaino apatesiyafeʼmo avaleno apamiʼniye.

²³ Siosi vayaʼmo Kalaisi agufaʼamo maiʼnae. Siosi vayaʼamo oʼmaiʼnaesinana agenopaʼageʼmo haneʼniyesinaʼmonanafa Kalaisi siosi vayaʼamo maiʼnayaʼmofeʼmo muki agufafi yaʼamo haneʼnigeno alagepa huno neʼmaiye. Agaemo muki haopalegamo maiʼnenoʼaeʼmo muki yateʼe vayaʼaiteʼeʼmo yagaino neʼapateya vekamo maiʼniye.