Apa 5 - The Keyagana NT and 25 OT books

Ananaiyasiʼe Sapailaʼefeʼmo huʼniya gemae

^1-2 Ani kavaʼmo huʼniyaʼmonanafa mago vekamo agiʼamo Ananaiyasiʼe aʼamo agiʼamo Sapailaʼeʼmo anakae mopamo maketi hu maleʼnaʼageno mago vekamoʼmo miya faiʼniya monimo alino fako huno mago moniʼamo fala ki maleteno mago moniʼamo alininuno apa vayaʼmo apamiʼniye. Maleʼniya monimo aʼamoʼmo ageʼniye.

³ Pitaʼa hunoʼaeʼmo, Ananaiyasiyo, huno, Na kava higeka Sataniʼmo ateʼnanageno kaipafiʼmo faleno uno haiʼnigeka mago vekamoʼmo mago mopamo miya faiʼniya monimo alika fako huka maleteka eka Goti Aunemeʼaeʼmo aigofe gemo huʼnane.

⁴ Hogoteka maketi osuʼnana afinaʼmo kagaika mopamo haneʼniye. Maketi hu maleʼnanageno miya faiʼniya monimo kagaika yaʼmo haneʼniyaʼmonanafa na kava higeka ani agufa hosu kaipa kagesa afiʼnane. Kagaemo vayaʼaifeʼmo aigofe gemo osuʼnanaʼmonanafa Gotifeʼmo aigofe gemo huʼnane, huno ha paiʼniye.

⁵ Ananaiyasiʼa ani gemo afitenoʼaeʼmo mopafiʼmo asagauno aiteno faliʼniye. Ani kavafeʼmo ava gemo afiʼnaya vayaʼmogimo lusi kava huʼa koli huʼnae.

⁶ Faliʼnigeʼapaeʼmo mago neya vemogi eʼa aliʼa hayaeteʼa hiʼyopa maleʼa alini uʼa kiʼa ateʼnae.

⁷ Aise afinaʼmo loleʼe magoʼe aovamo utegeno aʼamoʼmo ani afole aiʼniya kavafeʼmo ava gemo oʼafino afaʼa eʼniye.

⁸ Pitaʼa hunoʼaeʼmo, Naha paiyo, huno, Lanakae mopamo maketi hu maleʼnaʼageno miya faiʼnigetana aliʼnaʼa monimo alagipi mago haneʼnegaiye, huno afi geʼnigenoʼaeʼmo, haʼao, huno, magoʼe monimo oʼaliʼnoʼae, huno ha paiʼniye.

⁹ Pitaʼa hunoʼaeʼmo, Na kava higetana aigofe gemo huguʼae, hutana hu maleʼnetana Goti Aunemeʼaeʼmo amalageka hutana neʼataʼae. Anaukamoʼmo faliʼnigeʼa alini uʼa kiʼa ateʼnaya vayaʼmo kipate neʼayanageʼa hiyopa alini uʼa kiʼa kategae, huno ha nepaigenoʼaeʼmo

¹⁰ malage huno mopafiʼmo asagauno aiteno faliʼniye. Neya vemogimo eʼa agayana ago faliʼnigeʼa hiʼyopa alini uʼa anauʼamoʼeʼmo lokaeʼa kiʼa anateʼnae.

¹¹ Muki siosi vayaʼmogiʼe ani kavafeʼmo ava gemo afiʼnaya vayaʼmogiʼeʼmo lusi kava huʼa koli huʼnae.

Apa vayaʼmogimo noʼagaya agufa lokiya aune kavaʼmo huʼnaya gemae

¹² Ani afinaʼmo apa vayaʼmogimo muki noʼagaya agufa lokiya aune kavaʼmo huʼnae. Muki siosi vayaʼmogi magoke agufa apaipa apakesamo aliteʼa Salomoni hiyato nopiʼmo uʼa aliʼa anupa huʼa maiʼnae.

¹³ Muki malaga vayaʼmogimo Goti mafaʼnemogi apakiʼapileʼmo aliʼa asaga huʼa apateʼnayaʼmonanafa eʼa magokepi aliʼa anupa huʼa maisayafekeʼmo koli huʼnae.

¹⁴ Magoʼe magoʼe huʼa lusi ve aʼnemogimo Ala kava nefeʼmo apakesamo afiʼa fatago huʼnageno Gotiʼa magokepi alino anupa huno apateʼnigeʼapaeʼmo aliʼa anupa huʼa maiʼnae.

¹⁵ Maiʼnayaʼmofeʼmo kaita hapauʼniya vayaʼmo apavaleliʼuʼa kateʼmo apateʼneʼa hipaleʼmo havaeʼa apatege yakaikonamo aiteʼa havaeʼa apatege huʼneʼapaeʼmo, Pitaʼa uneno nehisigenoʼaeʼmo yege auneʼamoʼmo apakufaleʼmo visigeno kaitaʼapimo alino hapagegaiye, huʼa apakesa afiʼnae.

¹⁶ Asole vayaʼmo Yulusalemu haopalega muki taoniʼafatiʼmo kaita hapauʼniya vayaʼe hosu apaune vayaʼmo apaipafiʼmo maiʼniya vayaʼeʼmo apavaleli ete ete huʼa apateʼnageno muki alu kaita alu kaitaʼapimo hapageʼnigeʼa he tiʼnae.

Apa vayaʼmogimo kana yaʼmo aliʼnaya gemae

¹⁷ Ani kavaʼmo nehageʼapaeʼmo hogote vekamo mono huʼa neʼapataya vayaʼaiteʼmo yagaino neʼapateya vekaʼe Satiyusi mono vayapati vayaʼmogiʼeʼmo apa vayaʼaifeʼmo apaipa kafamo hapaeʼnae.

¹⁸ He tiʼa apa vayaʼmo apavaleli uʼa gamani kalavusifiʼmo kalavusi huʼa apateʼnae.

¹⁹ Apateʼnayaʼmonanafa mago Ala kava neʼmo enisole vekamoʼmo haniʼilagamo emineno kalavusi nopi kitamo yakino apavalelino uno lamino kumateʼmo apateʼnenoʼaeʼmo,

²⁰ Utapa alopa mono nopiʼmo uta haitapa he tita maiʼnetapa ani saufa kavafeʼmo ava gemo aetapa hakalo hutapa hapa paiyo, huno hapa paiʼniye.

²¹ Apa vayaʼmogimo geʼamo afiteʼa akame huʼa kotilamiyapiʼmo uʼa alopa mono nopiʼmo uʼa haiʼa aliʼa apaya maleʼnae. Mono huʼa neʼapataya vayaʼaiteʼmo yagaino neʼapateya vekaʼe vayaʼamogiʼeʼmo muki Yu vayaʼaiteʼmo yagaiʼa neʼapataya vayatama vayaʼaifeʼmo ge huʼnageʼa eʼa kanisole vayaʼeʼmo aliʼa anupa huʼa maiʼnae. Maiʼneʼapaeʼmo ati vayaʼaifeʼmo huʼapaeʼmo, uta kalavusi nopatiʼmo apavalelitapa eyo, huteʼa aliʼa apateʼnageʼa uʼnae.

²² Uʼa kalavusi noteʼmo avaʼyi huteʼa apakayana apa vayaʼmo oʼmaiʼnageʼa ataleʼa aiʼa atagi neʼa eʼapaeʼmo,

²³ ago uta avaʼyi huteta agonana kalavusi nopiʼmo oʼmaiʼnageʼa yagaiʼa neʼapataya vayakeʼmo yagaiʼa maiʼnae. Kitamo yakituta haita agonana afaʼa haneʼnigeta ageʼnone, huʼa hapa paiʼnae.

²⁴ Hogote vekamo mono huʼa neʼapataya vayaʼaiteʼmo yagaino neʼapateya vekagi alopa mono noteʼmo neʼyagaiya ati vayaʼaiteʼmo yagaiʼa neʼapataya vayanagi mono huʼa neʼapataya vayaʼaiteʼmo yagaiʼa neʼapataya vayanagi huʼa ani gemo afiteʼapaeʼmo, Haiya agufa kava huteʼa haiya katetiʼmo uʼa maiʼnae, huʼa huʼnae.

²⁵ Mago vekamo enoʼaeʼmo, Afiyo, huno, Lapakaemo kalavusi hutapa apateʼnaya vayaʼmo alopa mono nopiʼmo uʼa haiʼa maiʼneʼapaeʼmo aliʼa apaya neʼmalae, huno hapa paiʼniye.

²⁶ Ati vayaʼaiteʼmo yagaino neʼapateya vekaʼe ati vayaʼaʼeʼmo uʼa apa vayaʼmo apavaleliʼa eʼnae. Apakaemo huʼapaeʼmo, fiku yanageʼa vayaʼmogimo yafa kayotetiʼmo lamagigae, huʼa apakesamo afiteʼa oʼapamagiʼa afaʼa vase huʼa apavaleliʼa eʼnae.

²⁷ Apakaemo apavaleliʼeʼa kanisole vayaʼai apaulagaleʼmo aliʼa he tiʼa apateʼnageno mono huʼa neʼapataya vayaʼaiteʼmo yagaino neʼapateya vekamoʼmo loka huno apafi geʼniye,

²⁸ Ani vekamo agiʼalefeʼmo alita apaya oʼmaleyo, huta lokiya gemo huta lapa opaiʼnopiye. Ago lapa paiʼnonaʼmonanafa ani getapimoʼmo aino atagu faeno uneno huno Yulusalemu taonifiʼmo havai teʼniye. Lapakaemo aigofe gemo hutapaeʼmo, apakaemo ani vekamo amagiʼnae, hutapa lagaepikeʼmo alita faita nelatae, huno hapa paiʼniye.

²⁹ Pitaʼe mago apa vayaʼmogiʼeʼmo geʼaleʼmo aeʼa atagaina huʼa hapa paiʼapaeʼmo, Hosu kavanageta vayaʼai geʼapimo akame hugunaʼmonanafa kanale kavanageta Goti geʼamo akame hugune.

³⁰ Lapakaemo Yesuʼa malipu yosaleʼmo nili aitetapa alita he titapa ateʼnagenoʼaeʼmo laginago vayaʼmogi Gotiʼapimoʼmo faliʼniyatetiʼmo ago alino he tino ateʼniye.

³¹ Gotiʼa agaemo ala agiʼamo amiteno avalelino uno haino lamaga haopaleʼmo atetenoʼaeʼmo, hogote vekamo yagaino apatesiya vekamo maiʼneno apakufamo alino katino neʼapateya vekae, huno lekana paino ateʼniye. Agaemo Isaleli vayaʼmogita laipamo alita afe lesuna kavaʼmo lamige hosu kavatimo alino atalege haisiyafeʼmae.

³² Lagaemo ani kavafeʼmo ava gemo huta aeta hakalo huta hapa nepauna vayaʼmo maiʼnone. Lagaeʼe Goti geʼamo akame nehaya vayaʼaina fiku hapa maeno apamiʼniya Aunemeʼamoʼeʼmo ava gemo nehune, huʼa hapa paiʼnae.

³³ Kanisole vayaʼmogimo ani gemo afiʼnagenoʼaeʼmo apaipafiʼmo faiʼnigenoʼaeʼmo apaipamo lusi kava huno leʼnigeʼapaeʼmo, ani vayaʼmo apamagigune, huʼa huteʼa ge huge afige huʼnae.

³⁴ Apakaepatiʼmo mago vekamo Falasi vayapati vekamo agiʼamo Gameliʼeliʼa keʼaepa gemo alino apaya neʼmaleya vekamo maiʼniye. Muki vayaʼmogi agiʼaleʼmo aliʼa neʼasagaya vekamoʼmo he tino kanisole vayaʼaifeʼmo hunoʼaeʼmo, Ani vayaʼmo kumatega apavalelitapa uta lamiyo, huno hapa paiteno

³⁵ kanisole vayaʼaifeʼmo hunoʼaeʼmo, Isaleli vayaʼmogitapae, huno, Ani vayaʼaitegamo na agufa kava hugune, hutapa osuʼnetapa hogotetapa alagepa hutapa lapakesamo afiyo.

³⁶ Akeyaʼvilaga mago vekamo agiʼamo Tiyunasiʼa afole aitenoʼaeʼmo, ala vekamo maiʼnove, huno hapa paiʼnigeʼa fo hataletiʼa agufa ve anagaʼmogi akame huʼnae. Mago vayaʼmogi eʼa amagiʼnageno faliʼnigeʼapaeʼmo akame huʼnaya vayaʼmo ataleʼa atagu faeʼuʼeʼa huʼnageno aliʼyaʼamo ago hano huʼniye.

³⁷ Henagaʼamo mago Galeliya kotega vekamo agiʼamo Yutasiʼa apaki alisaya afinaʼmo afole aiʼnigenoʼaeʼmo asole vayaʼmogi eʼa akame hisayafeʼmo apayateʼmo aliʼniye. Agaemo faliʼnigeʼa muki akame huʼnaya vayaʼmo ataleʼuʼeʼa huʼnae.

³⁸ Huʼnayaʼmofeʼmo nagaemo huʼnaeʼmo, ma mopafi vayaʼmogi aepa faiʼnisayaʼmoʼmo afaʼa hano hugiye.

³⁹ Inagi Gotiʼa alino aepa faiʼnisiyaʼmoʼmo lapakaemo alitapa hano hutapa oʼatalegae. Fiku yanagetapa lapakaemo Goti kameʼamo maigae. Mago kavaʼmo apakaetegamo osutapa afaʼa apataleyo, huʼna lapa nepauve, huno hapa paiʼniye.

⁴⁰ Kanisole vayaʼmogimo ani gemo afiteʼapaeʼmo akame huʼa apa vayaʼaifeʼmo keya aeʼnageʼa eʼnageʼapaeʼmo nofi kayotetiʼmo apamagiteʼapaeʼmo, Yesu agiʼalefeʼmo gemo osiyo, huʼa hapa paiteʼa aliʼa apataleʼnageʼa uʼnae.

⁴¹ Apa vayaʼmo kanisole vayaʼai nopatiʼmo ataleʼa kumatega uʼa nelamiʼapaeʼmo, Vae, huʼa, Gotiʼa lagaefeʼmo hunoʼaeʼmo, Yesu agiʼalefeʼmo apavagage hisaya yaʼmo afaʼa alisaya agufa kavaʼmo huʼa maiʼnae, huno agesa afiʼniye, huʼa huteʼa lusi kava huʼa apamogaga aiʼnae.

⁴² Apa vayaʼmogimo muki afinaʼae afinaʼaeʼmo alopa mono nopiʼe muki nopiʼeʼmo Yesuʼa Kalaisi vekamo maiʼniye, huʼa aliʼa apaya malege aeʼa hakalo huʼa hapa paige huʼa maiʼnae.