Apa 3 - The Keyagana NT and 25 OT books

Mago vekamo aiyalaʼmo hosuʼniya vekamo alino api aino ateʼniya gemae

¹ Mago afinaʼmo Pitaʼe Yoniʼeʼmo Yulusalemu taonifiʼmo alopa mono notegamo yegemo uno lamino folaga huʼniya kanaleʼmo Yu vayaʼmogi nunumuʼmo nehaya kanaleʼmo uʼnaʼae.

² Mago vekamo itaʼamoʼmo alino ateʼniya afinatetiʼmo aiyalaʼmo hosuʼniya vekamo muki afinaʼae afinaʼaeʼmo avaleli uʼa alopa mono no kipateʼmo ateʼnageno maiʼnenoʼaeʼmo mono nopiʼmo uʼa haite haite huʼnaya vayaʼaifeʼmo monieʼmo aukaya huge huge huno maiʼniye. Ani kipafeʼmo hapaʼye nehiya kipaʼmo haneʼniyaʼmofeʼmo agiʼamo aeto agufa kanale kipane, huʼa ateʼnae.

³ Agaemo anakeyana Pitaʼe Yoniʼeʼmo mono nopiʼmo eʼana haisaʼafeʼmo eʼnaʼageno anaketenoʼaeʼmo, monimo mago namiʼao, huno aukaya huʼniye.

⁴ Pitaʼe Yoniʼeʼmo aulu haeʼana ageʼneʼanaeʼmo Pitaʼa hunoʼaeʼmo, Laʼago, huno ha paiʼnigenoʼaeʼmo,

⁵ mago yaʼmo namisaʼafeʼmo haʼae, huno agesa afiteno neʼanakegeʼanaeʼmo,

⁶ Pitaʼa hunoʼaeʼmo, monimo alagi oʼaliʼnovaʼmonanafa aliʼnova yaʼmo kamiguve. Yesu Kalaisiʼa Nasalasa taonifi vekamo agiʼaletiʼmo he tika umenitata huvo, huʼna kaha nepauve,

⁷ huno huteno lamaga huno ayateʼmo alino he tino ateʼniye. Alino he tino ateʼnigeno aiyaʼe aiya auʼaʼeʼmo lokiya vaiʼnigeno

⁸ aeno hailo huno he titeno aepa faino ka umenitata huʼniye. Anakaeʼeʼmo alopa mono nopiʼmo uno nehainoʼaeʼmo aeno hailo huge kaʼmo umenitata huge Goti agiʼaleʼmo alino asaga hume hume uge huʼniye.

⁹ Huʼnigeʼapaeʼmo muki vayaʼmogimo ageʼnayana umenitata nehuno Goti agiʼaleʼmo alino asaga hume hume uʼnigeʼa ageteʼapaeʼmo,

¹⁰ Vaehae, huʼa, aeto agufa kanale kipane, huʼa agi ateʼnaya kipateʼmo maiʼneno aukaya huge huge huno neʼmaiya vekamae. Hemenimo alagepa huno maiʼniye, huʼa huteʼa apakesa alaʼamo afiteʼa hapau aiʼnae.

Pitaʼa alopa mono nopiʼmo Yesufe ava gemo aeno hakalo huno hapa paiʼniya gemae

¹¹ Agaemo Pitaʼe Yoniʼeʼmo ananu kiʼnigeʼapaeʼmo hapau aiteʼa Salomoni hiyato none, huʼa agi neʼaya nopiʼmo maiʼnaya vayaʼaitegamo nagu nagu huʼa eʼnae.

¹² Pitaʼa apaketenoʼaeʼmo, Isaleli vayaʼmogitapae, huno, Na kava higeta lapau aitetapa lagaefeʼmo aulu nelahae. Lapakaemo lapakesa afitapaeʼmo lokiyatiʼaletiʼe alagepa kavatiʼaletiʼeʼmo mani vekamo alitaʼa alagepa hutaʼa ateʼnoʼageno umenitata nehiye, hutapa lapakesamo neʼafifiye.

¹³ Haʼao, Gotiʼa Emalehamuʼagi Aisikiʼagi Yekopuʼagi huʼa laginago vayaʼmogi Gotiʼapimo aliʼyaʼamo neʼaliya vekamo Yesu agiʼaleʼmo alino asaga huno ateʼniye. Lapakaemo gamani vayaʼai apayapiʼmo avalelitetapa ateʼnageno Pailatiʼa afaʼa ategauve, huno lapa paiʼniyaʼmonanafa Pailati aulagaleʼmo lapakameʼyamo amiʼnae.

¹⁴ Agaemo aote fatago vekamo maiʼniyaʼmonanafa lapakameʼyamo amitetapa vayaʼmo apamagiʼniya vekaeʼmo lahapauʼnigetapa Pailatifeʼmo hutapaeʼmo, Lagaetefeʼmo afaʼa ato,

¹⁵ hutapa ha paitetapa afaʼa maisaya yaʼmo neʼapamiya vekamo amagiʼnageno faliʼniyaʼmonanafa Gotiʼa ago alino he tino ateʼniye. Ago he tiʼnigeta ageʼnonaʼmofeʼmo hemenimo aeta hakalo huta hapa nepauna vayaʼmo maiʼnone.

¹⁶ Laʼagaemo agaemo himamuʼaletiʼmo agiʼalefeʼmo agesamo afino fatago huʼniya kavatetiʼmo mani ageʼnaya vekamo ayamufamo alitaʼa lokiya vaitaʼa ateʼnoʼae. He, huno, agaetetiʼmo afole aiʼniya kavafeʼmo agesamo afino fatago huʼniya kavatetiʼmo alagi alitaʼa lokiya vaitaʼa ateʼnoʼageno lapaulagaleʼmo maiʼniye.

¹⁷ Vayaʼnimogitapae, huʼna, Inagi nagaemo afiʼnovana lapakaeʼe ala vayatapimo neʼyagaiya vayatapiʼeʼmo Yesuʼmo agetapa aeto osutapa fikumo amagiʼnae.

¹⁸ Amagiʼnayaʼmonanafa Gotiʼa akeyaʼvilaga agaetegati gemo alini eʼa aeʼa hakalo huʼa hapa nepaiya vayaʼmo muki agaiʼa vayaʼai apavayafatiʼmo hunoʼaeʼmo, Kalaisi vekamo agafu kisigeno faligiye, huno huʼniya gemo hemenimo ago afole aiʼniye.

¹⁹ Ani kavaʼmo huʼniyaʼmofeʼmo lapaipamo alitapa afe legenoʼao Gotiʼa hosu kavatapimo alino ataleteno aipamoʼmo falu huno lapateno.

²⁰ Lapakaemo ani kavaʼmo higenoʼao Gotiʼa aeno hakalo huno lapa paiʼniya vekamo Yesu Kalaisiʼa alino atesigeno emineno.

²¹ Agaemo hogoteno kokuʼnapiʼmo maime maime neʼvisigenoʼaeʼmo muki yaʼamo saufa yaʼmo alino hamaleno atesiya afinakeʼmo afole aisigenoʼaeʼmo eminegaiye. Ani kavatefeʼmo Gotiʼa akeyaʼvilaga apaote vayaʼmogi agaetegati gemo alini eʼa aeʼa hakalo huʼa hapa nepaiya vayaʼai apavayafatiʼmo huʼniye.

²² Moseseʼa laginago vayaʼaifeʼmo lama gemo hapa painoʼaeʼmo, Ala kava neʼmo Gotitapimoʼa konagatapimogipatiʼmo mago vekamo alino afole aino ategaiye. Nagaemo Gotitegati gemo alinineʼna aeʼna hakalo huʼna lapa nepauva kava huno Gotitegati gemo alinineno aeno hakalo huno lapa paigiyanagi muki hisiya geʼamo alagepa huta afiyo.

²³ Gotiʼa ani vekamo geʼamo oʼafisaya vayaʼmo vayaʼafatiʼmo alino hapa faino apataleteno alino apagoʼya lagauno apatalegaiye, huno hapa paiʼniye.

²⁴ He, muki vayaʼmo Gotitegati gemo alini eʼa aeʼa hakalo huʼa hapa nepaiya vayaʼmo Samiyoʼe Samiyo akamelegatiʼmo eʼnaya vayaʼmogiʼeʼmo hemenimo afole aiʼniya kavafeʼmo hogoteʼa ava gemo huʼa hapa paiʼnae.

²⁵ Lapakaemo Gotitegati gemo alini eʼa aeʼa hakalo huʼa hapa nepaiya vayaʼai apakinago vayaʼmo maiʼnae. Gotiʼa kotalakemo lapakinago vayaʼaifekeʼmo osuʼnifa lapakaeʼefeʼmo huʼniye. Gotiʼa kotalakemo Emalehamufeʼmo hunoʼaeʼmo, Nagaemo kaginago vekaletiʼmo muki ma mopafi vayaʼmo aliʼna auleʼna apategauve, huno huʼniyaʼmofeʼmo

²⁶ Gotiʼa aliʼyaʼamo aliʼniya vekamo Yesuʼa alino afole aino ateteno alino ateʼnigeno hogoteno lapakaetegamo ago emineʼniye. Agaemo alino auleno lapatesiyafeʼmo alino aino afe leno lapatesigetapa hosu kavategatiʼmo ataletapa egae, huno hapa paiʼniye.