Apa 25 - The Keyagana NT and 25 OT books

Poloʼa, Sisakeʼmo agoti huno nategaiye, huno huʼniya gemae

¹ Fesitasiʼa yagaino apatesiya kotegamo eno avaʼyi huteno loleʼe magoʼe afinaʼmo utegeno Sisaliya kotegamo ataleno Yulusalemu taonifiʼmo eno avaʼyi huʼniye.

² Eno avaʼyi huʼnigeʼapaeʼmo mono huʼa neʼapataya vayaʼaiteʼmo yagaiʼa neʼapataya vayaʼe Yu vayaʼaiteʼmo yagaiʼa neʼapataya vayaʼmogiʼeʼmo eʼa Fesitasifeʼmo, Poloʼa hosu kavaʼmo huʼniye, huʼa ha paiteʼa agoti huʼa ateʼnae.

³ Apakaemo huʼapaeʼmo, Poloʼa kateʼmo neʼesigetaeʼmo yagaiʼneta amagigune, huʼa vegemo huʼnayaʼmofeʼmo kahao ke honanagi Poloʼa Yulusalemu taonifiʼmo avalelika eno, huʼa ha paiʼnayaʼmonanafa

⁴ Fesitasiʼa hunoʼaeʼmo, Haʼao, huno, Poloʼa Sisaliya kotega kalavusifiʼmo maiʼnisigeʼna aise afinaʼmo uʼna lamiguve.

⁵ Nagaeʼe kava vayatapiʼeʼmo magokepi lokaeta ugune. Poloʼa hosu kavaʼmo huʼnisiyana agoti huʼa ategae, huno hapa paiʼniye.

⁶ Fesitasiʼa naya loleʼa afinaʼmo maiteno apakaeʼeʼmo Sisaliya kotega uno lamiʼniye. Egamo agoti huʼa neʼapataya nopiʼmo uno haino fai maiʼnenoʼaeʼmo, Poloʼa avalelika eno, huno ha paiʼniye.

⁷ Poloʼa eno maiʼnigeʼapaeʼmo Yu vayaʼmo Yulusalemu taonifatiʼmo eʼnaya vayaʼmogimo he tiʼa, Ani vekamoʼmo lusi hosu kavaʼmo nehiya vekamo maiʼniye, huʼa huteʼa agoti huʼa atege atege huʼa maiʼnayaʼmonanafa hosu kavaʼamo afaʼa aliʼa ave oliʼnae.

⁸ Poloʼa agaiʼamo huno ha maesiya gemo hunoʼaeʼmo, Nagaemo Yu vayaʼai keʼaepa gemo amagiʼna oʼatalege Yu vayaʼai alopa mono nofeʼmo huʼna faipa huʼna oʼatege Lomu vayaʼai kava vekaʼapilegamo mago hosu kavaʼmo osuge huʼnove, huno hapa paiʼniye.

⁹ Fesitasiʼa Yu vayaʼmogimo agaefeʼmo amuse huʼa atesayafeʼmo Polofeʼmo hunoʼaeʼmo, Yulusalemu taonifiʼmo uʼna haiʼna agoti huʼna katesuvafeʼmo afaʼa uka haigapiye, huno afi geʼnigenoʼaeʼmo,

¹⁰ Lomu vayaʼai ala kava vekaʼapimo agoti nopiʼmo maiʼnove. Manilekeʼmo afaʼa agoti huʼa nategae. Ago afiʼnanana Yu vayaʼaitegamo mago hosu kavaʼmo osuʼnove.

¹¹ Keʼaepa gemo amagiʼna ataleʼnofi namagisageʼna falisuva agufa kava huʼna maiʼnisufigeʼa afaʼa namagisageʼna faliguvaʼmonanafa agoti huʼa neʼnataya gemo aigofe gemo haneʼnisiyana magoke vekamoʼmo nagaemo navalelinuno apayapiʼmo oʼnategaiye. Sisaʼa gamani vayaʼaiteʼmo hogote kava vekaʼapimoʼa afaʼa alino fako huno agoti huno nategaiye, huno ha paiʼniye.

¹² Fesitasiʼa ani gemo afitenoʼaeʼmo uno kanisole vayaʼeʼmo ge huge afige hutenoʼaeʼmo, Gamani vayaʼai kava vekaʼapimo hogote vekamoʼmo alino fako huno agoti huno nategaiye, huka huʼnanaʼmofeʼmo Sisategamo ugane, huno ha paiʼniye.

Ala kini vekamo Agalipaʼa Fesitasitegamo eʼniya gemae

¹³ Mago afinaʼmo utegeʼana mago ala kini vekamo agiʼamo Agalipaʼe aʼamo Menisiʼeʼmo Sisaliya kotegamo Fesitasiʼa agesaʼafeʼmo eʼnaʼae.

¹⁴ Mago afinaʼmo maitaʼagenoʼaeʼmo Fesitasiʼa ala kini vekaeʼmo Polo ava gemo huno ha painoʼaeʼmo, Filikisiʼa mago vekamo kalavusi huno ateʼnigeno maiʼniye.

¹⁵ Yulusalemu taonifiʼmo uʼna maiʼnogeʼapaeʼmo Yu vayaʼmo mono huʼa neʼapataya vayaʼaiteʼmo yagaiʼa neʼapataya vayaʼe yagaiʼa neʼapataya vayatama vayaʼmogiʼeʼmo huʼapaeʼmo, Hosu kavaʼmo huʼniye, huʼa huteʼa agoti huʼa ateteʼapaeʼmo, amagigeno falino, huʼa naha paiʼnae.

¹⁶ Naha paiʼnayaʼmonanafa, Haʼao, Lagaemo Lomu vayaʼmogita ani agufa kavaʼmo nosune. Hogoteta agoti huʼa atesaya vekamo agotimo huta ategaune huʼa huʼnaya vayaʼai apaulagaleʼmo alita he tita ateʼnonageno agaiʼamo ha maesiya agufa gemo higeta neʼafune, huʼna hapa paiʼnove.

¹⁷ Ani vayaʼmo manile eʼa maiʼnageʼnaeʼmo afaʼa oʼmaiʼnofa egamo agoti nopiʼmo uʼna haiʼna maiʼneʼnaeʼmo, Kalavusifi maiʼniya vekamo avalelika eno, huʼna ha paiʼnove.

¹⁸ Avalelino eʼnigeʼapaeʼmo agoti huʼa atesayafeʼmo huʼnaya vayaʼmogimo he tiʼa mago gemo huʼapaeʼmo, Poloʼa ina hosu kavaʼmo huʼniye, huʼa huteʼa agoti huʼa atesafi huʼna nagesa afiʼnovana ani agufa gemo osuʼnae.

¹⁹ Apakaemo mono geeʼmo ge hauteʼa mago vekamo Yesuʼa faliʼniye, huʼa huʼnageno Poloʼa afaʼa maiʼniye, huno huʼniyaʼmofeʼmo ge hauʼnae.

²⁰ Ani gemo huʼnageʼna afiteʼnaeʼmo haiya kava huʼna ani gemo aepaʼamo afiguve, huʼna nagesa afiʼnove. Afiteʼna Polofeʼmo huʼnaeʼmo, Mani kavatefeʼmo agoti huʼa katesayafeʼmo Yulusalemu taonifiʼmo afaʼa uka haigapiye, huʼna ge huʼna afi geʼnogenoʼaeʼmo

²¹ haʼao, ala kini vekamo Sisa Agasasiʼa hogote vekamoʼmo agoti huno nategaiye, huno naha paiʼniyaʼmofeʼmo nagaemo ati vekaeʼmo huʼnaeʼmo, yagaika ateʼnegeʼnao Sisategamo aliʼna atesugeno ugiye, huʼna ha paiʼnove, huno ha paiʼniye.

²² Agalipaʼa Fesitasifeʼmo hunoʼaeʼmo, Ani vekamo geʼamo nagaiʼnimo afaʼa afiguve, huno ha paiʼnigenoʼaeʼmo, Egamo afaʼa afigane, huno ha paiʼniye.

²³ Egamo Agalipaʼe Menisiʼeʼmo muki konali yaʼanimo aliteʼana eʼnaʼageʼapaeʼmo muki vayaʼmogimo anakiʼanileʼmo aliʼa asagauʼa anateʼnae. Anakaegi ati vayaʼaiteʼmo yagaiʼa neʼapataya vayanagi ani taonifiʼmo apaki haneʼniya vayanagi huʼa eʼa aliʼa anupa huʼa neʼmaiya nopiʼmo uʼa haiʼa maiʼnae. Fesitasiʼa hunoʼaeʼmo, Poloʼmo uka avalelikeno, huno ha paiʼnigeno uno avalelino eʼniye.

²⁴ Fesitasiʼa hunoʼaeʼmo, Ala kini vekamo Agalipao, huno, Muki vayaʼmo lagaeʼeʼmo magokepi lokaetapa maiʼnaya vayaʼmogitapae, huno, Lapakaemo ani vekamo ageʼnae. Muki Yu vayaʼmogimo Yulusalemu taonifiʼmo nagaefeʼmo, amagigeno falino, huʼa huteʼa halate eʼa manileʼeʼmo, amagigeno falino, huʼa huʼnae.

²⁵ Huʼa huʼnayaʼmonanafa agoti gemo afiʼnovana amagisugeno falisiya agufa kava huno oʼmaiʼniyaʼmonanafa agaiʼamo hunoʼaeʼmo, Sisaʼa alino fako huno agoti huno nategaiye, huno huʼniyaʼmofeʼmo aliʼna atesugeno ugiye, huʼna nagesa afiʼnove.

²⁶ Aliʼna atesuvafeʼmo huʼnovana mago gemo avoʼmo kaesuva gemo alinino ala kava vekaʼnimotega visiya gemo ohaneʼniye. Geʼnimo ohaneʼniyaʼmofeʼmo kini vekamo Agalipao, huno, kagaetegaʼe muki vayaʼaitegaʼeʼmo avaleliʼna eʼnove. Hisiya gemo afitetapa naha paisageʼnaeʼmo avoʼmo kaegauve.

²⁷ Nagaemo kalavusifi maiʼniya vekamo agoti huʼa atesaya gemo avoʼmo okaeʼna fiku aliʼna atesugeno visiyana kanale osugiye, huno hapa paiʼniye.